728x90 AdSpace

Hot
Menu
Zon-ol na Donate

Latest News

NANG ADING BANG KIPAU? Laibu. Agelh - Dr. Derby Nuel & Dong Mung

NANG
ADING BANG
KIPAU?

Agelh  - Dr. Derby Nuel
&
Dong Mung


PIAKKHIATNA
Kei adingin kamsan’na hong nei-in tua kamsan’na ka tangtun’sak theih nadingin hong huhte tungah hih laibu ka piakhia hi. Tua banah ka pate Beneth Alan & Catherine Achi le ka pasal Prophet Bishop Nuel, Ka siapa Bishop T.D Jakes le Kha lama ka pate Bishop David & Faith Oyedepo.

LUNGDAMKOHNA
            Pasian gam adingin thuukpi ah hong kalsuanpih ka pasal Bishop Nuel le typing na ah hong huh Abigail Oghenetekpev tungah lungdamna ka ko hi.

Asunga om thute
Thupatna
  1. Nang ading bang kipau?
  2. Nang bang kampau?
  3. Pasian in hong gen khina hong gen lai ding
  4. Na nuntakna sungah kuan bang gen?
  5. Kha Siangtho kammalte pau in (Kamtuam pau in)
THUPATNA
            Pasian gam eite tawh kizom icih pen Pasian gamthu genna ahi hi. LST sunga a kigensa mah bangin a kibang Kha a neite ihi hi. Tua thu um ihih manin tua thute mah I gen thei hi. “Lai Siangtho in, ‘Um ka hih manin ka gen hi,’ a cih mah bangin kote in zong um ka hih uh manin a gen ka hi uh hi” (2 Kor. 4:13).

            Pasian gam nasepna ah I sunglam pauna (Kha Siangtho kampauna) le I pualam pauna (taksa kampauna) tawh I gen masiah bangmah kisem theilo hi.

            Hibang ziate pen Pasianin eite tungah hong lah ettehna ahi hi. “Pasian in ‘Khuavak om ta hen,’ ci hi; tua ciangin khuavak om pah hi” (Pian. 1:3). Tu’n Pasianin amah bangin vangliatna tawh I pau theih nadingin ama lim le mel suunin hong bawl ihi hi.

            Tapidawte upna pen a kipatcil peka kipanin a nasia taka pulakna ahi hi. Liinglawng het loin vangliatna I neihsate upna tawh lenkip ni (ama hong thuciamna kip tawntung hi)(Heb. 10:23). Zeisu Khazih in eite adingin I etteh ding makai hoihpen ahi hi. “Tua ahih manin Pasian’ sapna a ngah mi siangtho sanggamte aw, eite’ upna thu tawh kisai-ah Siampi Lian pen a sem dingin Pasian’ sawltak Jesuh thu ngaihsun dih un” (Heb. 3:1).

            Piansakna zong kampauna pan ahi hi. “Pasian’ kam pauna tawh leitung leh vantung piang a, tu-a I muh theih nate a om nai lopi panin hong piang hi, ci-in I upna bek mah tawh a thei ihi hi” (Heb. 11:3).

            Sunglam kampauna le pualam kampauna lo tawh bangmah a kipiangsak om lo hi.
            Hih pilna hong hawm ding laibuno in kampau vangliatna le na kampau in bang ciang nasem thei hiam cih hong musak ding hi.

            Adangteng sangin vantung le leitungah nang adingin bang kam kipau hiam? Nang ading kammal khat beek kipau hamtang ding hi. Abraham in Isaac biakna tau ah a luina hangin tuni ciang ama thu kigengen lai hi.

            “Tua ciangin Abraham in a tapa that dingin tem a la hi…Amah in, ‘Tangvalpa su kei in, ama tungah bangmah hih kei in; Pasian na zahtakna tu-in ka thei a, na tapa khat neihsun keima adingin na humcip lohna ka mu hi,’ a ci hi…. ‘Kei mahmah ka kiciam hi, Topa in ci hi. Bang hang hiam cih leh nang in hih thu na bawl khin a, na tapa neihsun na humcip kei hi. Nang thupha kong pia taktak ding a, na suan-le-khakte van-a aksite leh tuipi gei-a sehnel bangin tampi ka pha sak ding hi. Na suan-le-khakte in amau’ galte khuapite luah ding uh a,” (Pian. 22:10-17).

            Solomon kumpipa’n tuu 1000 tawh a biakpiakna in tudong ama thu gengen lai hi.  Thuciam lui sunga mi masate thu in tuni dong thu gengen lai hi.

1 Upna nei I cih ciangin I muh theih nai lohte I lametnate ngah takpi ding, ci-in muan’na lungsim neihna ahi hi.

2 Tanglai mite in upna a na neih manun Pasian in a na pakta hi.

3 Pasian’ kam pauna tawh leitung leh vantung piang a, tu-a I muh theih nate a om nai lopi panin hong piang hi, ci-in I upna bek mah tawh a thei ihi hi.

4 A upna hang bek mah tawh Abel in Kain’ piakna sangin a san’ theih huaizaw biak piakna Pasian tungah a na pia hi. Pasian in ama biakna na sang ahih manin a upna hangin mi hoih hi, ci-in Pasian’ pahtakna a ngah hi. Abel a sih zawh a sawtpi hi khin napi-in tu dong mahin upna thu a hong gengen lai a suak hi.

5 A upna hang mahin Enok zong sihna tawh kipelh hi. Pasian in ama kiangah la to ahih manin kuamah in Enok mu nawn lo hi. Amah a kilak toh ma-in Enok in Pasian’ lungkimna ngah hi, ci-in Lai Siangtho in a na gen hi. 

6 Upna lo tawh kuamah in Pasian lungkimsak zolo hi. Pasian kiang a zuan mi peuhmah in Pasian a om takpi ahihna thu leh amah a zongte Pasian in thaman pia hi, ci-in a up ding kisam hi.

7 Noah in zong a upna hang mah tawh mai lam-a thupiang ding a muh theih lohpi mahin Pasian’ thugenna na mang a, teembaw khat bawlin a innnkuanpihte tawh na suakta hi. Hih bangin a gamtatna tawh leitung mi dangte amawh ahihna kilangsak a, a upna hangin mi hoih hihna thu Pasian’ kiang panin a ngah hi.

8 Pasian in ama tunga piak dingin a ciam leitangah Abraham a pai dingin a sap lai-in Abraham in Pasian’ sapna a man’na pen a upna hang mah ahi hi. A paina ding mun nangawn thei lopi-in a gam a lei nusia-in a ding khia hi.

9 Pasian in piak dingin a ciamna gamah a upna hang mah tawh gamdangpi hi napi-in peemta-in va om phot a, ama ngah bangin thuciamna a ngah a ta Isaak leh a tu Jakob tawh puanbuk peuhah a om phot uh hi.

10 Pasian in gelin a lam, bul kip a nei khuapi, Abraham in a ngakna-in tua bangin a om ahi hi.
11 Sarah a ta neih theih hun ding bei khin napi-in ama tungah thuciampa zuau lo ding, ci-in Abraham in upna a neihna hang mahin Sarah gai-in ta a nei ahi hi.
12 A cimang khinin a kingaihsun hih mi khat suan-le-khakte pen van-a aksi zah leh tuipi gei-a sehnel zahin a tam hi.

13 Hih mite khempeuh in amaute tungah piak dingin Pasian’ ciam thute ngah nai lo uh a, a gamlapi-ah a om lai gal muhin hopih thei bek uh-a, hih leitungah mi khual peemta hi lel hi hang, ci-in kitheihna tawh omin a upna mah uh tawh a si uh hi.

14 Tua bang mite in amau adingin a gam a lei ding uh a zong ahihna uh hong kilangsak hi.

15 Amaute in a nusiat uh leitung ngaihsutpi penin nei uh hi leh hong ciahkik theihna ding uh hun ngah ding uh hi.

16 Ahi zongin amaute’ lunggulh in leitung sangin a hoihzaw vantung gam ahi hi. Pasian in amaute’ adingin khuapi khat na vaihawmsak ahih manin, tua bang mite in amah pen ka Pasian uh hi, ci-in a gen ding pen Pasian in maizumna-in na ngaihsun lo hi.

17 Pasian in Abraham a ze-et lai takin Abraham in a upna hang mah tawh Pasian biakna dingin a tapa Isaak na pia ngam hi. Pasian mah in Abraham tungah tapa ka hong pia ding ci-in a ciam hi napi-in, Pasian’ ciamna bangin a neih tua a tapa neihsun mah, Pasian biakna dingin Abraham in pia dingin na kithawi hi.

18 Tua a piak ding a tapa pen, Pasian in, “Na tapa Isaak tung tawnin suan-le-khak na nei ding hi,” a cihpa ahi hi.

19 Pasian in a sisa nangawn hingkik sak thei ding hi, ci-in Abraham in a up mah bangin Abraham in a lim-in, a sisa a tapa Isaak a ngah kik ahi hi.

20 A tapa Jakob leh Esau in mai lamah thupha ngah ding hi, ci-in Isaak in a na gen ngamna pen a upna hang mah ahi hi.

21 Jakob a sih kuan ciangin a ciangkhut dawn-ah kingamin Pasian bia a, Josef’ tapate gel thupha a piakna in Pasian in na pia takpi ding hi, ci-in a upna hang mah ahi hi.

22 Josef a sih ding ciangin Izipt gam panin Israel mite a pai khiatna ding thu leh ama luanghawm a bawlna ding zia a vaikhaknate zong a upna hang mah ahi hi.

23 Moses a suah ciangin a nu leh pate in hoih sa mahmahin, kumpipa’ thupiakna kihta tuan loin kha thum sung bang a selcip ngamna uh zong a upna hang mah uh ahi hi.

24 Moses’ a gol ciangin Faro tanu’ tapa kicih ding a ut nawn loh ngamna zong a upna hang mah ahi hi.

25 Tomno sung mawhna sungah nuam takin omna sangin Pasian’ mite tawh gimna thuak khawm ding a ut zaw hi.

26 Mai lam ah a thaman ding mu khol thei ahih manin Izipt gamah hauhna leh nopsaknate khempeuh sangin Khrih hangin simmawhna thuak taak zaw tham hi, ci-in a ngaihsun hi.

27 Moses pen kumpipa’ heh ding lau het loin Izipt gam panin pai khia a, a kimu theilo Pasian a mu bang keekin a nungkik hetlohna zong a upna hang mah ahi hi.

28 Mi That Vantungmi in Israel mite tapa upa pen khempeuh a thah khak lohna dingin Paisan pawi kipiangsakin, inntual kongtungzawl khempeuh sisan a kizutna zong upna hang mah ahi hi. (Heb.11:1-40).

Hi laibu ah kong dot nop thu in “Nang ading bang kigen?, cih ahi hi.

            Vantungin nang bang hong musak hiam? Tua in nang thuciamna mi siangtho na hihna hong lak hi.

            Gualzawhna kammalte pau in. Banghangiam cihleh nangpen mi siangtho thugen na hi hi.

            A paulo kam pen a thupha a khak kam ahih manin pau khia in!

            “Izipt gam pan note a hong la khia, Topa na Pasian uh ka hi hi. Na kam uh a gol-in ka un, keimah in kong dim sak ding hi” (Late 81:10).

NANG ADING BANG KI PAU?
            Pasian lungtuakin na lianpi a semkhia mite’n a kammal uh leh a sepna uh tawh kilangsak uh hi. Amaute sepna leh kammalte in vantung pan thupha ngah theih nading vive ahi hi.

            Vantung leh leitungah a minte uh kham tawh kigelh in na lianpi sema ciaptehna ngah mite in amau kampauna mah ii gah ahi hi.

Enok pen Pasian tawh kikhawl hi; Enok kimu nawn lo hi; bang hang hiam cih leh Pasian in amah la hi (Pian. 5:24).

            Enok Pasian tawh a kalsuan khopzia pen a kizom paisuak ahi hi. Jude laikhak bu sungah Enok pen kamsang thupi khat hi-in Khazih hong pai kik ding thu hangsan takin a gen khia ngampa ahi hi.

            Abraham in Pasian sawlna bangin a sanggam, a pu le pate gam, a tapa Ismael, a tawpna ah a tapa neihsun Isaak a piak dongin Pasian a itna lak hi. Ama gamtatnate in tuni dong thu hong gengen lai hi. Amah pen upna ah PA kici liang hi. LST sungah Zeisu khit ciangin etteh taak dingin Abraham ahihna I thei hi.

            Na pa uh Abraham leh note’ pianna Sarah ngaihsun dih un; bang hang hiam cih leh khat bek ahih lai takin amah ka sam khia a, amah thupha pia-in tampi ka phasak hi (Isa.51:2).

            Izipt gam nopsakna Moses in nusia in Faro mai ah a ciangkhut bek tawh va ding hi; Sinai mualtungah ni 40 sung va om a, Thu Kham Sawmte va la khia hi. Israel mite San tuipi kantanpih hi. A tawpna ah kum 120 a phak ciangin vantung mi Michael in vantungah la to hi (Jude 1:9).

Tuni dong thu-ummi hitaleh thu-umlo mi hitaleh Moses min pen mikhempeuh muukah kilolo lai hi.

24 Moses’ a gol ciangin Faro tanu’ tapa kicih ding a ut nawn loh ngamna zong a upna hang mah ahi hi.

25 Tomno sung mawhna sungah nuam takin omna sangin Pasian’ mite tawh gimna thuak khawm ding a ut zaw hi.

26 Mai lam ah a thaman ding mu khol thei ahih manin Izipt gamah hauhna leh nopsaknate khempeuh sangin Khrih hangin simmawhna thuak taak zaw tham hi, ci-in a ngaihsun hi.

27 Moses pen kumpipa’ heh ding lau het loin Izipt gam panin pai khia a, a kimu theilo Pasian a mu bang keekin a nungkik hetlohna zong a upna hang mah ahi hi.

28 Mi That Vantungmi in Israel mite tapa upa pen khempeuh a thah khak lohna dingin Paisan pawi kipiangsakin, inntual kongtungzawl khempeuh sisan a kizutna zong upna hang mah ahi hi.

29 Israel mite in leikeu tunga pai bang keekin San Tuipi a kantan theihna uh zong a upna hang mah uh ahi hi. Izipt mite’ in amau pai bangin pai ding a sawm uh ciangin tui in a tumcip hi. (Heb. 11:24-29).

Kumpi David in Pasian phat in la sa a, lamin vompi, humpite that bek tham loin Goliath mahmah zong a thahna thute’n tuni dongin eite tungah thu hong gengen lai hi.

34 Ahih hangin David in Sawl kiangah, “Na nasempa in a pa’ tuute a keem zel hi. Humpineelkai ahi a, vom ahi zongin hong pai-in tuute lak panin tuuno a mat ciangin,

35 a nungah delhin vat gawpin a kam sung panin tuuno ka honkhia hi. Keimah hih dingin amah hong ding leh keimah in a khamul-in manin vat gawpin ka that hi.

36 Na nasempa in Humpineelkai leh vomte that khin ngei ta hi. Amah in a nungta Pasian galkapte ninsak ahih manin dawi bia hih Filistiapa in tuate khat tawh kibang lel ding hi,’ a ci hi.

37 Tua ciangin David in, ‘Humpineelkai khecin leh vom khecin panin kei hong honkhia Topa in hih Filistiapa khut sung panin kei hong honkhia ding hi,’ a cih thuah lai hi. Tua ciangin Sawl in David kiangah, ‘Pai in, Topa in nang hong ompih ta hen,’ a ci hi.

38 Tua ciangin Sawl in a galvante David pia a, amah in a lu tungah sumngo lukhu khu sakin, sik puan silh sak hi.

39 Tua ciangin David in a gal dalnate tungah a namsau khih a, amah kingeina seh lo ahih manin lam pai dingin a kithawi leh pai thei lo hi. Tua ciangin David in Sawl kiangah, ‘Hihte tawh lam ka pai thei kei hi; bang hang hiam cih leh ka kingeina-seh kei hi,’ a ci hi. David in tuate suahkhia hi.

40 Tua ciangin amah in a khut ah a ciangkhut la-in, lui panin suangmai tang nga tengin a tuucin’ thung-ip sungah tuate koih hi. A khut sungah a suanglotna tawi a, Filistiapa nai-ah a pai hi.

41 Tua ciangin a mai-ah a lum puapa tawh Filistiapa hong pai-in David hong naih hi.

42 Filistiapa khua dakin David a muh ciangin amah in simmawh hi; bang hang hiam cih leh amah a tangval pan, a cidam tuak, a mel hoih khat hi lel hi.

43 Tua ciangin Filistiapa in David kiangah, ‘Ciangkang tawh kei kiangah nong paina dingin kei in ui ka hi hiam?, a ci hi. Filistiapa in ama pasiante tawh David samsia hi.

44 Filistiapa in David kiangah, ‘Ka kiangah hong pai in. Huih lak vasate leh gamlak gamsate tungah na sa ka pia ding hi,’ a ci hi.

45 Tua ciangin David in Filistiapa kiangah, ‘Namsau leh teipi leh teikhawh tawh kei kiangah nang nong kuan hi. Ahih hangin kei pen Israel galkapte’ Pasian, a Vanglian Topa, nang mah in na to mipa’ min tawh nang kiangah kong kuan hi.

46 Tu ni-in Topa in ka khut sungah nang hong pia ding a, keimah in nang hong sat tukin na lu ka tan khia ding hi. Tua ciangin tu ni-in huih lak vasate leh leitung ganhingte tungah Filistia mi a site’ luanghawmte ka pia ding hi. Israelte sungah Pasian khat a om lam leitung mi khempeuh in a thiehna ding,

47 leh Topa in namsau leh teipi tawh a hotkhiat lohna thu hih lai-a a om khempeuh in a teihna ding ahi hi. Bang hang hiam cih leh galdona in Topa’ aa hi a, amah in kote khut sungah note hong pia ding hi,’ a ci hi.

48 David tawh kituah dingin Filistiapa dingin hong pai a, hong naih ciangin David zong Falistiapa tawh kituah dingin manlangin gal mai-ah a delh hi.

49 Tua ciangin David in a khut-in a thung-ip sawkin suangtang khat la a, lawnin Filistiapa taltang a kha hi. A taltangah a suang tum a, lei lakah amah mai puk hi.

50 Tua ahih ciangin David in suanglotna khat leh suangtang khat tawh Filistiapa zo a, Filistiapa kha-in a si hi. David khut sungah namsau omlo hi.

51 Tua ciangin David tai in Filistiapa tungah ding a, a namsau la-in a paai panin dok a, amah thatin tua tawh a lu a tan khia hi. Filistiate in a makaipa uh a sihna a theih uh ciangin a tai keek uh hi.

52 Tua ciangin Israel mite leh Judah mite awngin ding uh a, Gath leh Ekron kulh kongpi ciang dong Filistiate delh uh ahih manin Sha-araim panin Gath leh Ekron ciang dong Filistia mi a liamte lampi-ah puk uh hi

53 Tua ciangin Filistiate a delhna panun Israelte hong ciah kik uh a, amaute in amau’ giahphual luh sak uh hi.

54 David in Filistiapa’ lutang la-in Jerusalem-ah paipih a, ahih hangin a gal kidalna pen ama puanbuk-ah a koih hi. (Samuel Masa 17:34-54)

Aw! Pasian tate bang hiam nang ading ki gen?
            A tunga I pulaknate en in na lianpi sem gawp ding cih bangin na ngaihsun kha pah kei in! Zeisu in a genna ah ‘Hih ka sanggamte a neu pen khat nangawn na limbawl uh ciangin kei tungah a hong bawl na hi uh hi,’ a ci hi’ (Matt. 25:35-39).

           Kumpi Solomon biakpiakna in Pasian lungkim sak mahmah ahih manin ama deihnate a ngah theih nadingin Pasian in na dong hi(1 Kum. 3:1-6). Bangzah taka hun manpha hiam?

            Nang ading na khat teitei ki pau, kigen ngel ding hi.
            Nang ading kam kipaute in siatna hong tun ding thu hilo cih phawk in!

            Shadrak, Meshak, Abednego le Daniel-te’n milim mai ah kun ding a nialna hangin tuni dong mah eite kiangah thu hong gengen lai ahihna phawk huai hi. Amaute sep ahihleh milim mai ah kun ding nialna ahi hi.

16 Shadrak, Meshak, leh Abednegote in Kumpi Nebukhadnezzar kiangah, ‘Kumpipa aw, hih thu kong dawng kei ding uh hi.

17 Mei phualpi sung panin a hong honkhia thei pasian a om leh ka biak ka Pasian uh hi ding a, na khut sung panin a hong honkhia ding hi.

18 Kumpipa aw, a hong hotkhiat kei zenzen mah leh zong, na pasian lah ka bia tuan kei ding uh a, na kham milim mai ah zong ka kun kei ding uh hi, ci-in thei ta in,’ a ci uh hi (Dan.3:16-18).

            Pasian dang kiangah thungen theilo ding ci-in thukham khauhtak a om pipi mahin Daniel in tatsat loin thungen veve hi. Ama Pasian pen na khempeuh a piangsakpa ahih banah hih haksatna sungah honkhia zo lua ding cih thei ahih manin a thunget tawpsan lo hi (Dan. 6:20-22).

            Hebrew tangvalno thumte’n ka lungsim hong sukha mahmah uh hi. Tua in banghiam cih leh Nebukhadnezzar kianga a thugen uh, ‘a hong hotkhiat kei zenzen mah leh zong, na pasian lah ka bia tuan kei ding uh a, na kham milim mai ah zong ka kun kei ding uh hi, ci-in thei ta in,’ ci-a a dawnna uh ahi hi (Dan. 3:16-18).

            A upna hang bek mah tawh Abel in Kain’ piakna sangin a san’ theih huaizaw biak piakna Pasian tungah a na pia hi. Pasian in ama biakna na sang ahih manin a upna hangin mi hoih hi, ci-in Pasian’ pahtakna a ngah hi. Abel a sih zawh a sawtpi hi khin napi-in tu dong mahin upna thu a hong gengen lai a suak hi (Heb.11:4).

            Khatvei kong dong kik lai ding hi. Vantung le leitungah nang adingin bang kigen hiam?

Topa kammal omna munah vangliatna om hi.

            Kumpipa aana neihna tawh gamta hi; ama gen bangin gamta in; kuamah in amah nial zo lo hi (Thuhilhna 8:4).

NANG BANG KAM PAU?
            Tulaitak na dinmun le na omna pen na kampauna ii agah ahi hi. Tua hi-a tulaitak a na dinmun ah na lungkim zawh kei leh na kampauzia tumahmah in khel in!

            Na theih masak dinga I deih thu in kam nih na neihna thu ahi hi. Khatna ah sunglam kam le pualam kam(kha kam le taksa kam) ahi hi.

            Tua tegel pen na kampau ciangin a tonkhawm ding ahi hi.

Na kampauna in a mannei asuah theih nadingin na lungsim thupi mahmah hi.

            Na lungsim in na kampau nadingin nasempi khat hi; tua ahih manin a muibun leh Pasian deihna tawh kituak in kam na pau theih nadingin nisimin Pasian sungah ki nosuah tawm sak den in! “Na lungsim uh leh na ngaihsutnate uh ki thak suak sak zel un” (Efesa 4:23).  “Leitung mihingte’ gamtat bangin gamta kei un la, na lungsim uh kikhelin Pasian kipuahpha sak un. Tua hi leh a hoih nate bang hi a, bangte in amah lungkim sakin, bangte a kicing hiam, ci-in thei-in Pasian’ deihna na phawk thei ding uh hi” (Rom 12:2). “Ahizong nangma na sep hoihna pen keima hong kalh hi loin nangma ut tawmna tawh na sep a suah theihna dingin nangma lungkimna om masa lopi-in bangmah ka hih nuam kei hi” (Filemon 1:14). I lungsim le ngaihsutnate pen I theihna ii munpi khat hi-a, Pasian kammal tawh I thaksuaksak det ding ahi hi. Tapidaw maimai khat leh Kha Siangtho tawh kidim thu-ummi khat kilamdanzia kilatna in Pasian kammal tungah a nuntakna tawh kithei thei hi.

            Na kampauna a mannei a suahna dingin a kisam pawlkhatte in:
            1          Pasian kammal tawh kizom in. Pasian kammal tawh na kizop det ding ahi hi. Banghanghiam cih leh ama kammal sungah vangliatna om hi. “Pasian’ thu nungta in a gamtang hi-a, lang nih a hiam namsau sangin hiamzaw lai hi. Lungsim leh pumpi, guh-le-tang kituahna, guh leh guhngek dongin khenkhia thei hi. Mihingte’ lungsim ngimna leh a ngaihsutnate zong theithei hi” (Heb.4:12).

            Ama kammal tawh na kizop theih na dingin
A} A kammalte sim ding: “Kei ka hong pai mateng in mipi mai-ah Lai Siangtho simna, a khiatna genna, leh hanthotnate ah tavuan na la in” (I Tim. 4:13)

B}. A kammalte lungngai ding: “Pasian’ thuman a man takin hilhin, na nasepna-ah maizumna na thuaklohna dingin Pasian’ pahtakna na ngah theihna dingin na siam tawpin hanciam in” (2 Tim. 2:15). Simna le lungngaihna ii kilam danna pen gentehna in I khualzinna ding mun khat I gamlim omna mun en ziau in a den ciang I mangngilh thei a, enpha in limtak lungngai in I ciapteh ciangin I pai nopna mun kitung thei hi.

C} Nuntakna tui ahi Pasian kammalte dawn ding: “Pawlpi pen paubanna a om het lo, a siangtho mahmah-in amah Khrih kiangah a kipiak theihna dingin Pasian thu tawh tui-ah a sil siang khit ciangin Pasian kiangah a ap theihna dingin pawlpi adingin Khrih a kipia ahi hi” (Efesa 5:26-27).

D}. Pasian kammal za ding: “Tua ahih ciangin zakna panin upna hong piang thei a, Khrih thu upna ding pen hilhna panin hong piang thei pan hi” (Rom 10:17).

E} Atawpna ah nuntak pih ding: “Na thu in kei hong kem a, an bangin ka ne hi. Na thute kei adingin kipahna leh lungdamna ahi hi. Bang hang hiam cih leh nangma min in kei hong kilo hi, aw, Topa, Vanglian Pasian aw” (Jer.15:16).

         Pasian kammal in vang nei mahmah ahih manin amah tawh I kizop nakleh I kampaute in vang nei in manpha mahmah ding hi.

         A kipat cil panin Pasian in ama gam pen kampauna gam ahihna hong lak hi. Pasian in gen, Pasian in gen, Pasian in gen (Gen. 1:3,9,11).

            Kam sia pauna in I ngimna hong suksiat sak thei hi.

            Pasian kammal tawh kizomin kammal hoihte tawh I deihnate I gen leh I lunggulhnate a tangtun’ theih nadingin na hong sepsak dingin vantung mite a sawl ihi hi.

          A tangpi in thu I nget laitakin I lungsim tawh Pasian kiangah I deihnate gen hinapi hangin I man ciangin I lawmte tawh I kihona tung tawnin kamsia pauna tawh I susia kik mang thei hi.

         Ngah dinga kilawmte kim takin ngah in! Na lunggulhna bang na ngah masiah lametna tawh kampau den in.

            1 Sianthona dinmun : Na sianthona zah tawh kituakin na kammalte in vangnei ding uh hi; banghanghiam cih leh ‘Nuntak siangtho lo tawh kuamah in Topa mu zo lo ding uh hi,’ ci-in LST in gen hi (Heb.12:14). Topa Zeisu leitungah hong vak lai-in kuamah in a kammal hangin mawhpaih theilo uh hi. Ahangin amah pen Pasian tawh kizom den ahih manin a kampaunate vang nei-in mite phattuamna ding vive hi-a, gahhoih zong a gah hi. Nuntak siangtho nungtate sungah Kha in kizopna nei hi.

            2 Thuneihna dinmun: Thuneihna pen tunglam pan hong kipia hi. Thuneihna hong pia thei dingpa tawh na kizop kei leh bel thuneihna na nei kei ding hi. Galkapte sungah zong thuneite in thupia in a sawl ziauziau theih bangin I Kha nuntakna zong tua dan mah ahi hi. Vantung mite le Dawite in nang ii thuneihna zahzah tawh na thu hong mang ding uh hi. Tua hang mahin Zeisu Khazih in Pasian tawh holimna nei-in vantung mite sam nuam leh a sap theihna thu I thei hi (Matt.26:53). (Thanemna leh guallelhna a om kha phial zongin phamawh lualo hi.

            3 Upna dinmun: Mi siangtho khempeuh in upna I nei ciat uh a, pawlkhatte bang ahihleh Kha Siangtho piak siamna ahi hi.  “A dang khat tungah upna hong guan a, adang khat tungah cina damsak theihna hong guan hi” (1 Korin 12:9).

            Na upna ciang tawh kituakin na kam pan na gen khia hi. A ngah ding a kilawm hamphatnate a ngah masiah Pasian in Abraham kisin saksak hi.

17 Lai Siangtho sungah zong, ‘minam tampite’ pupi dingin ka hong bawl khin hi,’ ci-in a kigelh hi. Tua hi a, bangmah a om nai lopi a thu piakna tawh a om sak thei, a site a hingsak thei, Abraham in a up Pasian’ muhna-ah hih thuciamna kipin a kizang ahi hi.

18 Lai Siangtho sungah, ‘Na suan na khakte aksi zahin tam ding hi,’ ci-in a kigelh mah bangin, tua bang a pian’ theihna ding lametna om nai lopi mahin Abraham in umin lamen ahih manin minam tampite’ pupi a suak hi.

19 Abraham kum za khat bang pha dek ta a, a si dektak ta ahihna leh a zi Sarah a ciin’na thute a theih hangin a upna kiam tuan lo hi.

20 Amah in Pasian’ thuciamna muan’lah dingin ngaihsun lo a, a upna khahsuah het lo hi. A upna hangin thakhauh semsem a, Pasian a phat hi.

21 Pasian in a thuciamsa tungsak zo taktak ding hi, ci-in a muang hi (Rom 4:17-21)

            4 Thumanna dinmun: Thumanna icih in I kampau bang semkhia cihna zong ahi lel hi. A thuman mi khat na hih leh na kampau in vang nei-in na lianpi sem khia zo ding hi.

            Hih a tunga teng tawh kituam inla, na lungsim ki nosuak sak kikin a mannei kammalte pau khia ta in!

            A tawpna ah leitungah Kha thupha na tunsak theih nadingin Kha Siangtho tawh na kidim ding ahi hi. Pasian pen Kha ahih manin amah tawh I kizop tawntung theih nading lampi khat in I kha ahi hi. Kha, lungsim, pumpi I nei hi. A manpha Pasian ta I suah theih nadingin I lungsim le I pumpi Pasian deihna bangin nungta in, Kha Siangtho makaihna tawh I nuntak ding ahi hi. Pasian kha tawh na kizop nadingin a kammal (LST) simna, lungngaihna, lungdamkohna, phatna, biakpiakna, antang thungetna, lungsim takpi tawh thungetnate tawh na nuntak ding ahi hi. Van a Pa tawh na kizop ciangin ama kammalte na sungah hong kizel dinga, hong nungta ding hi. “Ahih hangin tu-in lasakna a tum siam khat hong paipih un,’ a ci hi. Lasakna a tum siampa in a tum ciangin Topa’ vangliatna ama tungah hong tung hi” (2 Kum 3:15). Pasian sathau nilh tumging in zong mite leh Pasian kizopna nosuah sakin thuphate piangsak a, Pasian geelnate tangtung sak hi.

Khazih galkapte aw kam pau un!!!!!!
            5 Na ngaihsutna in na kampau ah kilangkhia hi. Na lungsim a na ngaihsut thu na kam ah hong gingkhia ahi hi. Tua hangin a thuman le a limci kammalte pau khia dingin hong kihanthawn ihi hi. “Sanggamte aw, a tawpna ah ka hong gen nop thu in, a hoih leh a phat taak thute tawh na lungsim uh na kidim sak un. Tuate in: A man, a dik, a tang, a siangtho, a deihhuai, leh a pahtakhuai thute ahi hi” (Fil. 4:8). “A lungsim a a ngaihsut bangin ama tungah a piang hi” (Pau.23:7). Na lungsim a na ngaihsut bangin kampau khia na hihmanin vang nei mah mah hi. Na lungsim a na ngaihsutna le na lamet zahzah in a vanglian Pasian in thupha hong pia ding ahi hi.

            6 Na zak thute in na kampau ah hong kilangkhia hi. Thuzakte zong thupi ahihzia Kha Siangtho in Mark na hilhsawn a, ‘Tua ciangin amaute kiangah, ‘Na zak uh thute lim takin ngaihsun un….’(Mk.4:24a), na ci hi.

            Na bil in na Kha ading kongpi khat hi-a, na zak thute in na Kha nuntakna ah hong lut in na kampau ah hong kilang khia hi (Rom 10:17). A sia le a pha I bil panun I sin uh hi.

            Tua ahih manin niin bung le niin paihna mun bangin a hoihlo lam thute zakna dingin zang kha kei in! “Kikholhpih hoih lote in mi siasak thei hi” (1 Korin. 15:33b)
Na bil kem in!

Kha galdona ah kammal tawh kizo hi
            “Kote’ zat gal dona hiam pen leitung galhiam hilo a, galte’ panmun phualpi a susia zo ding Pasian’ galhiam khauhte ahi hi. Mite’ ngaihsutna a man lote ka thalnial gawp zo uh a, Pasian thu theihna ding a khaktan thei nate ka susia gawp uh a, mi khempeuh’ ngaihsutna zo gawpin Khrih thu a mang dingin ka bawl uh hi” (2 Korin. 10:4-5).

NA NUNTAKNA SUNGAH KUA IN HONG HOPIH HIAM?
            Na nuntakna adingin kamsang masa pen nang na hi hi.
            Nang le nang na kigenna bangin a kalsuan na hi hi.
            Na muuk ii gah tawh na nungta ding hi (Pau.18:20).
            Na gen bangin hong piang ding hi a ci hi ( Mk.11:23).

            Na nu le pate pen na leitung pasian ahi uh hi. Vantung panin leitungah nang hong piangsakte ahi uh hi. Nang ading thupha hong piate ahi uh hi. Na pa’n mailam ah na gualzawhna ding sathau hong nilh a, na nu’n tulaitak na lawhcinna ding sathau hong nilh den hi. Anih un nang ading thugen den uh hi. Jakob le Esaute innkuan tangthu in I etteh ding a kicing mahmah khat ahi hi. Jakob thupha ngah ding ci-a kamciamna ngak a, ahizongin Rebecca in Pasian kamciamna tumah in a tangtun’ theih nadingin sem hi. Nu le pa na neih nawn kei phial leh zong na pano, na nunote le na lawmte nu le pate kiangah pai inla, nang adingin thu kigen sak in! Thupha kipia sak in! Kam pausak in!

            Pasian mizatte khat peuh in nang ading thu hong gen ding uh kisam hi. Tua hang mah in Pastor le kamsangte a om ahi hi.

            Innkuan pawlkhat a nu le patte’n a tate uh bangci thupha piak ding cih zong thei lo uh hi.

            Gentehna, Jakob in Reuben hamsiat a ahi zongin Moses in tua hamsiatna a phel hi (Thuhna.33:6; 1 Sam.16:6-27).

            Pasian mite khat peuhpeuh in nang ading kam a pau khiat theih nadingin zongin thu gen sak in! Amaute kiang na pai ciangin khutguak tawh pai loin khut ken khat nei hamtang in banghanghiam cih leh Jakob in Isaak kiangah a ken bangin thakhauh sak tuam ding hi.

            Nang hong siat gen leh thusia hong genpih na lawmte le na innkuanpihte pel in!
            Na hong tawsawn thei mite tawh kikhol in!

            Sehkholhna om pen I pianpih hi-a ahi zongin kamsangte panpihna tawh kitangtun’ thei hi. Mi khat teitei nang ading kamsang khat a om ding kisam hi.

            Nu le pa na neih nawn kei leh na Pastorte’n nang ading thu hong gen thei ding uh hi. Kamsangte zangin na nuntakna ahoih zaw in Pasian in hong khel kha thei ding hi. Jakob in a tapa Reuben hamsiat mah leh Moses in tua hamsiatna phel khia in, “Reuben nung ta in, si kei hen la, ama mite zong mi tawm hi kei ta hen,’ a ci hi (Thkn. 33:6).

PASIAN IN NANG ADING THU GEN KHIN A, GENGEN LAI HI
            I Pasian pen pasian dangte bangin a dai om mawk hi lo a, kam a pau Pasian ahi hi (Late 115:5).

            A kipat cil phet in I gahphat theih nading, I ciphat theih nading, I pun’ theih nading, leitung I uk theih nadingin Pasian in thu na gen khin zo hi.

            Eite pen leitungah I deihnate ngah in, ukna a nei thei dingin Pasianin na gen khin zo hi.

            Pasian gensa kammalte pen I thakhauh nading le I gualzawh nading vive hi a, hong lauthawngsak thei kammalte pen Pasian kiang pan hi lo hi.

            Pasian in eite adingin a sia geelna nei ngeilo a, I lametnate tangtun’ sak ding ama gelna ahi hi (Jer.29:11).

            Pasian in na sepna khempeuh matut ding leh na pumpi mahmah a cidam dingin hong deih hi (3 John v 2).

            Pasian in ama sepnate a tangko dingin khansauna hong pia ding hi (Late 118:17).

            Thuman mite tungah thumanlo mite tunga tung bangin siatna hong tung lo ding hi (Late 125:30).

            Pasian in a gensa mah bangin tuni dongin I nuntakna sungah thu hong gengen lai hi. Pasian ta na hihmanin ama kammalte na zak theih ding pen a kisam pen leh a thupi penpen ahi hi.

Tuciangin zong Pasian in eite hibangin hong hopih hi.
  1. Ama kammal tawh(a kigelh kammal ahihkeh hong phawksak kammal).
  2. Kha Siangtho tawh kikopin awging tawh! (Ezekiel 3:12; mang.1:10).
  3. Awnem tak tawh! (1 Kum. 19:12).
  4. Kim le pam khuahunte tungtawn in! (Pian. 12:10-20).
  5. Mangmuhna le mangmatna tawh! (Pian. 37:5-6; Job 33:13-18).
            I Pasian in thu a gen Pasian hi a, I nisim nuntakna ah hong kem, hong makaih den hi cih muan’na tawh I up ding ahi hi. Hih in pasian dangte nasemte leh a nungta Pasian’ tate kilamdanna khat ahi hi. 
Na khempeuh ah awging om hi.

            “Leitungah pau nam tampi om a, ahi zongin khiatna a neilo khat beek om lo hi” (1 Korin. 14:10).

KHA SIANGTHO KAMMAL TAWH PAUNA
(Kamtuam pauna-1 Korin.14)
            A piangthak taktak tapidaw khat in a ngah hamphatna lianpi khat in Kha Siangtho kammal zang a pau theihna ahi hi.

            Na pianthak ni lian in Kha Siangtho in na sungah na sem pah a, na kam kaa in thu na nget ciangin Pasian gam kammalte na pau thei hi. Banghanghiam cih leh tua kammalte kizatna mun tawh kizom ta na hihman ahi hi. Hih kammalte in vang nei in zat nuam mahmah hi.

Kam tuam cih zong a nam tuamtuam na om hi.
1 Mihingte pau om hi.
            Midangte pau sin tase kei leteh zong na pau theih ziau pawlkhat om hi. Hi pen Sawltak a lian nihna sunga kigen pen ahi hi

2 Vantung mite pau zong om hi.
            “Kei pen mihingte’ pau a tuamtuamte leh vantung mite’ pau nangawn ka pau theih hangin itna ka neih kei leh a bilaphuai zam leh daltuah kitum tawh a kibang lel ka hi hi” (1 Korin. 13:1).

3 Galte tungah gualzawh theih nading le Pasian tawh kinai taka kiho theih nading Kha pau zong om hi.
            “Bang hang hiam cih leh pau lamdang a paute pen mite tungah thugen hi loin Pasian’ tungah thugen ahi hi. Amaute’ pau kuamah in thei thei lo a, Kha Siangtho vangliatna tawh Pasian’ thusimte a gengen ahi uh hi” (1 Korin.14:2).
4 Kamsanna’ kammalte a khiatna gen ding kisam hi. (Kamtuam kipaute a khiatna pello kigen ding ahi hi).

            “Sanggamte aw, note kiangah hong pai-in pau lamdang tawh thu hong gen leng, bang-a kimang ding ahi hiam? Note’ aa-in Pasian’ thu theihna, pilna leh siamna a hong pian’sak kei leh a kiman’na  them khat zong om het lo hi” (1 Korin 14:6).
Kamtuam pauna hanga phattuamna tampite lak pan nam sagihte:

1.    Na kha Pasian tawh kihoho na hihna na thei ding hi.
            Lai Siangtho in hong genna ah, “… pau lamdang a paute pen mite tungah thugen hi loin Pasian’ tungah thugen ahi hi…. pau lamdang tawh thu ka nget ciangin lungsim takpi tawh….” (1 Korin.14:2;14).

2.    Pasian deihna tawh kituakin thungen na hihlam na kithei ding hi.
            Kha Siangtho in Pasian deihna tawh kizui-in hong thum sak hi (Rom 8:27).  Nangma taksa lunggulhna le deihnate nget nop hun na nei kha ding hi; ahi zongin kamtuam tawh thu na nget ciangin Pasian deihna bangin na ngen zaw hi. Tua ahih manin kamtuam pauna pen a thupi mahmah khat ahi hi. Solomon kumpipa’n a na genna ah, “Kampauna in sihna ahi a, hin’na ahi zongin piangsak thei…” (Pau.18:21), na ci hi.

3.    Pasian kiangah na lei a ap na hi hi.
            James in a genna ah, “Ahi zongin siat theihna ding gukhal tawh a kidim, a omkhawng theilo lei pen zualsakin a uk zo kuamah om lo hi” (Jeim 3:8), na ci hi. Ahi zongin Kha pau tawh na pau ciangin na lei Pasian kiangah a ap na hi hi. Tua ahih manin Kha tuiphumna  I ngah phetin Kha Siangtho in I lei hong kepsak hi.

4.    Nang le nang kipuah phapha na hi hi.
            “Pau lamdang a paute pen amau mahmah a phattuamna dingin a pau hi a, …pau lamdang pau thei zaw ka hih manin Pasian tungah ka lungdam hi” (1 Korin 14:4,18). Hi leitung pen I lamet bangin piang khol loin haksatna le buaina tawh kidimna gam ahih manin ei le ei kipuahphat zel ding kisam hi. Sawltak Pawl nangawn in zong kamtuam tawh pau ding kisam a sakna I thei hi.

5.    Na upna hong thakhauh sak hi.

            Juda in hong genna ah, “Ahi zongin ka it note ahih leh a siangtho na upna uhah na kip semsem un la, Kha Siangtho vangliatna tawh thu na ngen un” (Juda 20). Nang mahmah thanem kisa in na upna ah na lung himawh hun ciangin tuate nawlkhin inla kamtuam tawh thungen lecin na upna hong thakhauh kik ding hi.

6.    Pasian kiangah lungdamkohna a paipih na hi hi.
            Korin Masa 14:15-17 sungah kamtuam pau-in thu na nget laitak kuamah in hong theihpih keimah leh Pasian kiangah lungdamkohna a paipih na hihna hong langsak hi.


7.    Kha Siangtho in hong nosuak sak ding hi.
            Na lungkham hun leh na lauh hunin kam tuam tawh pau in! (Isa. 28:11-12) (John Hurton, Ph.D.2012 Charisma Magazine, December Edition.)

            Tulaitakin Kha Siangtho lawnna ngah nai loin kam tuam na pau theih nai kei leh na lungsim khempeuh tawh thungen in ki-ap in! Kam tuam pauna in thu-ummite ading galvan hoih pen khat ahi hi.

Khazih galkapte’ kam pau in; ama minthan nading le na gualzawhna dingin pau in!

References:
(John Hurston, Ph.D. 2012) Charisma Magazine, December Edition
Glenn Arekion (2010). The power of praying in tongues.
Marcus, J, Borg (2011) Speaking Christian Why Christian Words Have Lost Their Meaning and Power and How They Can Be Restored

About the author
Dr. Derby Nuel called to preach the uncompromising word of God. I believe in the total counsel of God. Am multi-gifted. An evangelist with a prophetic edge, a teacher with the compassion of a pastor. I have a ministry to the younger generation {SMAD}, Women {DDM}, Pastors wives and to the body of Christ at large. Above all I love God with a contagious passion. I am the international coordinator for DerbyNuel Charity International. Published some books. Word Encounter; Are you living ready for the Rapture, Reality of Salvation, Wisdom for teenagers and Two Shall become One. Married to Bishop Nuel with five children.

*********************************

Laigelhpa Sia Dong Za Mung in Zomi eLibrary / Laibusaal ading in Phalna ahong piak ahi hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: NANG ADING BANG KIPAU? Laibu. Agelh - Dr. Derby Nuel & Dong Mung Description: Rating: 5 Reviewed By: Cinpu Zomi
Scroll to Top