728x90 AdSpace

Hot
Menu
Zon-ol na Donate

Latest News

PASIAN THU KAWLGAM LE ZOGAM AH. Agelh - Dong Za Mung

PASIAN THU KAWLGAM LE ZOGAM AH
Agelh - Dong Za Mung
Photo Credit : Naing Naing Aung

            “Pasian in leitung mite hong it mahmah ahih manin ama tapa a um mite khempeuh si nawnlo in a hin tawntung theihna dingin a Tapa neihsun a hong piak dongin ahong itna a hong lak hi”. John 3:16

            “Mi khempeuh mawh ciat uh a, ahong honkhia Pasian tawh kigamla uh hi. Ahi zongin Pasian in a hong hehpihna hangin Khrih Jesuh tawh hong tatkhiat manin amah tawh i kipawl thei kik hi”. Rom. 3:23-24

I. LEITUNG LUNGDAM TOPA HONG PAI
           
            Pasian in B.C 4004 kum pawlin Ama lim-le-mel sunin Adam na bawl hi. Tua a bawl mipa in mawhna neilo in siangtho a, Pasian in lawmin nei-in Eden huan ah kikholhpih in a holimpih ahi hi. Ahi zongin Gulpi in na khem a tua panin mihingte in mawhna tawh hong kizom to uh hi. A siangtho mihingin Pasian thu hong manglo in mawhna hong neih uh ciangin amaute mawhna selna dingin Pasian in tuu vun, keel vun tawh a zum huianate uh na dal sak hi(Pian. 1:26-30; 2;15-25; 3:21).

            Mihingte khangin a tam semsem ciangin Pasian deihna sangin Mawhna deihna bangin siatna gamta den uh hi. Ahi zongin Pasian in ama lim-le-mel suna a bawl mihingte a mawhna uh a maisak zawhna dingin tuu si, keel si tawh biakpiakna na ngen hi. Tua biakpiakna ah a sepsak dingin Siampi a teel hi. Tua bangin hun saupi Pasian le mihingte hong kizom toto uh hi. (Siampite Laisiangtho bu sung).

            Tua bangin Pasian le mihingte kizopna ah ganhing si tawh Siampite’n sepsakin kum khat khatvei/nihvei cih bangin hong septoh uh hangin mihingte in mawhna mah tawh nuntak nuamsa in Pasian deihna bangin nungta tuanlo uh hi. Tua bangin Pasian lungtuak in nungta zo mahmah lo mihingte hong itna lian lua mahmah ahih manin tuma kum 2000 val lai in a tapa khat neihsun leitungah hong pai sak hi. A tapa neihsun Zeisu in mihingte mawhna teng siangsak ding, natna pan damna angahna dingun simmawh kosiatna, bawlsiatna, vuakna satnate hong thuakin Calvary sing khuam tungah ama sisan hong bua khia hi.

            Pasian mit ah a kilawmlo mihingte mawhna ama sisan tawh hong sawp saka, mihingte mawhna tang dingin hong thuum sak hi. A.D 1 in mawhnei mihingte adingin Bethelem bawng annekna kuang sungah hong kisial a A.D 33 in mihingte mawhna taang dingin Calvary sing khuam tungah a sisan manpha hong bua khia hi.


II. KAWLGAMAH PASIAN THU HONG TUNGA
A. Roman Catholic Mission
            A tunga i gensa mah bangin leitung mi khempeuh adingin lungdamna thu in Kawlgam zong hong ban hi. A masa pen in Roman Catholic upna Kawlgam hong tung masa pen hi.

            Kawlgam a inn lui mahmah khat ahi Kyansittha ii a lam khul sunga baang tunga kisuai limte lakah tui paak khat om a, tua paak sungah singlamteh lim khat kisuai-in tua paak kimkot ah singlamteh lim giat kisuai hi. Tua dan lim lian mahmah Rome khuapi lei nuai khul sungah zong kimu thei hi. Bangdan in hong tung thei hiam cih i ngaihsut ciangin 1287 kumin Kawlgam hong lut Tartar kici China galkapte lakah Tapidaw tampi om hi, ci-in kiciamteh hi.

            Tua sang a ziakai zaw 1496 kumin Pagu hong tung Gonao, Italy gammi Hieromino di santo Stephano sum bawlpa ciaptehna ah kimu thei hi. Ama lawmte khat Kawlgamah si-a biakinn lui khat ah kivui hi, ci-in na ciamteh hi. Tua hun lai-in India, Thailand le Kawlgam mun pawlkhat ah Armenian sumbawlte le Syrian sumbawlte in phualsat in teeng ngei uh hi. Tua biakinn zong tua sum bawlte lam hidingin kilamen hi.

            1498 kumin Portugue mi Vacaso de Gamma in a sum bawlna khan in Europe gam pan Nisuahna gam lam ah khualzin theihna ding hong mu khia hi. Tua ciangin Cape of Good Hope pan hong kipan in India gam hong tung hi. 1510 kumin India gam Goa khua hong sat a, tua panin Kawlgam sung Myeit, Martaban, Bagu, Thanlyin le Pathein dong hong ban to uh hi. Ama sum bawlna ah galkapte le Pasian thuhilhsia(Chaplain) khat tonpih pah ahih manin a tuntun na ah Roman Catholic upna hong sel pah hi. Kum zalom 10 ciangin Martaba ah Siampi(priest) 6 le Brothers 2 om hi ci-in 1768 kuma kihawmkhia “History of Dominics Order” cih min nei laibu sungah kiciamteh hi. Vasaco da Gama in tua banga Nisuahna hong muh khiat ciangin Portugue Mission na sepna huang ci-in Pope Martin V in na ciamteh pah hi. Tua ahih manin Roman Catholic Mission in Kawlgam hong tun zawh kum zanga val ta ahi hi.

B. Baptist Mission
            i. English Baptist Mission
                        Kawlgamah Baptist Mission hong tun masa pen in England Baptist Mission-te ahi hi. Kum 1807, December kha in English Baptist Mission panin Kawlgamah Mission na sep sem dingin Felix Carey’ Yangon hong tung hi. Amah pen English Mission-te in India a mission sem a akhah uh William Carey tapa ahi hi. Siavuan(doctor) khat zong ahi hi. Yangon hong tun zawh 1810 ciangin Portugue+Kawl=Kabia nungak N. Blackwall tawh kiteeng uh a, 1812 kumin W. Carey’ tapa khat nei uh hi. 1814 kum ciangin Eliza Franes Carey’ tanu khat nei leuleu uh hi.

            Felix Carey pen Siavuan khat ahih manin cina tampi in damna ngah in a nasepna lawhcing mahmah hi. Mite maipha zong ngah mahmah hi. Mate (Matthew) laibu zong Kawllai in letkhia khin a, ahizong hawmkhia manlo hi. Tua banga cinate a bawlna thute Yangon khuapi a uk Minyekyawswar in pakta in Yangon khuapi laizangah inn mun ecra 2 bang a lian khat a pia hi. Tua munah inn lamin Missionary-te inn ci-in kiciamteh hi. 1813 kumin Adoniram Judson-te Yangon hong tun un zong tua inn ah tung uh hi.

            Felix Carey in tua bangin cinate a bawlna ding zatuite apa omna India ah vai khak zelin, amah ngiat in zong va la zel hi. Eva kumpipa adingin laikhetna khawng pia in zatui khawng apiak ciangin kumpipa’n thupi sa mahmah ahih manin ama omna khuapi ah teengin mission sem kawmin cinate a bawl theih nading phalna a pia hi. Tua thu Felix in India a om apa a zaksak leh apa’n thukimpih ahih manin kumpipa omna Amarapura khua ah pai ding hong khensat uh hi.                                   

Kumpipa in amau adingin innmun khat piaksa om ahih manin Yangon a a inn le a vante Judson-te nupa ap in amah le a zi, a tapa le tanu tawh Irrawaddy gun tawnin khualzin hong kipan uh hi. A zin khiat dingun Judson-te nupa in zong teembaw khawlna ciang va kha uh a, khitui luang kawmin thu kingetsak in, kimuh kik ding lametna lianpi tawh hong kikhen uh hi.

            Amaute lamet le lunggulhna bangin hong piang hetlo in August 30, 1814, zingsang 11 pawlin thakhat thu-in huihpi hong nunga, tuihualte hong khang in a tuanna uh teembaw kibung hi. Felix in azi le atate honkhia nuamin a hanciam hangin honkhia zolo hi. Amah nangawn lametlohpi in a suakta liailiai ahi hi. Lametlohpi in dahna le supna lianpi a tuah ciangin lungkia mahmah hi. Ahi zongin a khualzin zom suak veve a kumpipa omna a tung hi.

            Yangon a om Judson-te nupa kiangah laikhak in, “Ka neih khempeuh bei mang ta! Ka it ka zi, ka tate ka khahsuah a ka lungtang a na mahmah hi. Ahi zongin Pasian deihna ah ken bang gen thei ding ka hiam?”, ci-in a gelh hi. Haksatna tampi sung panin Felix lungkia tuanlo in mission na sep le cina bawl zom suak veve a, November 10, 1822 in Nyipaytaw ah a nuntakna bei hi.

            Kawlgamah Roman Catholic upna hong tun zawh kum tampi khit ciangin Baptist upna English Mission-te tungtawn in hong tung ahi hi.

            ii. America Baptist Mission
            English Mission-te in 1807 kumin na sep hong kipat khit uh ciangin America Baptist Mission-te Kawlgam hong tung pan ahi hi. English Baptist Mission pen Felix Carey tungtawnin 1807 kumin hong  tunga, America Baptist Mission pen Mr. Charter le Fr. Richard Mardon-te tungtawnin 1811 kumin Kawlgam hong tung hi. 1812 kumin Charter ciahkik hi. Ahizongin kiptakin Kawlgamah Baptist upna hong phut zo taktak lo uh a, Adoniram Judson-te nupa 1813 kuma hong tun vua kipan in Kawlgamah kipzo pan hi. Tua ahih manin Adoniram Judson pen Kawlgam ah Baptist upan le Pasian thu hong puak masa pen in kiciamteh hi.

            iii. Pawlpi tuamtuam or upna tuamtuam
            Roman Catholic Mission le Baptist Mission-te Kawlgamah hong kip tak ciangin pawlpi tuamtuam le Mission tuamtuamte zong Kawlgamah hong lut ngeingai uh hi.
            **1877-- Englican
            **1879-- Upper Methodist
            **1887-- Lower Methodist
            **1887-- Presbyterian
            **1884-- Bretheren
            **1907-- Emanuel
            **1915-- Salvation Army
            **1919-- Seventh Day Adventist
            **1931-- Assembly of God
            **1931-- Church of Christ

                        **Hih a tungate pen 1966 ma lam hong tungte ahi hi.

III. ZOGAMAH PASIAN THU HONG TUNG

            Kawlgamah America Baptist Mission in kum 86 sung bang na sepna le mun kip hong neih khit ciangin Zogamah Pasian thu hong tung pan ahi hi. Pasian in Zomite hongit lua ahih manin 1899 kumin a nasem Carsonte Zogamah hong puak hi.

            America Baptist Mission in Kawlgam sunga na sepna uh khanin phualpi thak phuana na sem dingin October 14, 1886 in America gam panin Carson’ Kawlgam hong paisak uh hi. Tua kum December 12 ni-in Yangon hong tunga, ni nga sung a taam khit ciangin Pathein khua a Ko Thaphyu sanga na sem sang siama Laura Hardin tawh kiteeng uh hi. Pyi ah kum 2 a sep khit ciangin ama mun ding ahi Thayetmyo ah 1888 kumin kisuan hi. Tua lai a om Zanglei Zomite kiangah na sep kipan hi. 

            Tua munah a sep kawmin 1892 kumin lungdamna thu genin  khualzin kawikawi hi. Tua banga a khualzinna panin Zomite a tamzaw khamtungah teeng uh hi cih a theih ciangin Zomite teenna khamtungah mission phualpi khat kipat ding hong lunglut mahmah hi. Tua a lunggulhna thu Misson board-te a zasak hi. August 1898 ciangin Carson-te mundang a kisuan ding hoih maw, hoih lo, cih thu board-te naakpi tak a kikup khit uh ciangin kisuan ding thukim uh hi.

            Mission board-te phalna a ngah ciangin a mun le mual en cian dingin October le November 1898, sungin a khatveina Zomite teenna khanglam kuam Kanpalet ah va zin hi. Tua khit ciangin a nihveina saklam Zomite teenna Tedim, Falam le Hakha ah December kha in hong zin kik hi. Tua a zinna sungah Hakha ah phualsat dingin khensat hi. Tua ciangin February 2 in Thayetmyo pan Hakha zuanin hong ding khia uh hi. Amau tawh hong paite in Kayin sia San Win le Tapidaw numei nih (Asho-Chin hidingin kilamen) le India pasal an huanpa ahi uh hi. March 15, 1899 in Hakha hong tung uh hi.

            Tua in Zogamah Pasian thu hong tun masak hipah hi.

            i. Hakha
            Zogamah Mission na sepna thak kipan dingin phual hong sat uh ciangin Mangkal galkapte phualpi ahi Hakha mah ah hong om pah uh hi. Banghang hiam cih leh tua hun lai in gal tamin dinmun lau huai ahihman ahi hi. Carso-te nupa le alawmte uh zong galkapte phualpi ah om sak pah uh a, tua mun panin mission na sepna hong kipan uh hi. March 15, 1899 kumin Carsonte Hakha hong tung uh ahih manin tua-in Hakha ah Pasian thu tun cilna hipah hi.

            ii. Tedim
            Carson-te nupa in 1899 kum akipan in Zomite sungah na sep hong kipat uh ciangin pilna lam le cidamna lam kisam sa mahmah uh ahih manin laihilh ding le Pasian thu ahilh dingin amau tawh kimeltheih sa Kayin Pasian thu-um sia pawl khat na sam to uh hi. Amau tawh a tonkhawm sia San Win pen Hakha ah amau tawh om khawm in seppih uh a, 1900 Hakha ah sang hong hon uh ciangin sang sia sem sak uh hi. Tedim ah zong lai hilh kawmin Pasian thu ahilh dingin 1902 kumin Sia Pu Ko na koih hi.  Sia Po Ku in Kawllai hilh kawm in Pasian thu na hilh khawm pah ahih manin tua zong Tedimah Pasian thu hong tun cilna hipah hi.

            iii. Tonzang
            Tedimah Sia Po Ku in laihilh in mipite in phattuamna angah lawh thu uh Kam Hau gam ukpi Pu Hau Cin Khup in a theih ciangin ama omna Tonzang ah zong laihilh sia khat a kipuak ding a ngen hi. Ukpipa ngetna bangin 1905 kumin Tedim a sem Sia Po Ku’ Tonzang ah ki om sak hi. Aman laihilh kawmin Pasian thu hong hilh a, a sangnaupangte sung panin Pasian thu-um hong om hi. Tua in Tonzangah Pasian thu hong tuncilna hipah hi.

           
IV. SANGMANGPITE THU TOM

A. Rev. Adoniram Judson-Kawlgam sangmangpi
            Kawlgam a America Baptist Mission tawh Pasian thu gil hong kipsakpa ahi hi. Amah pen August 9, 1788 in Boston, Massachusette state, Ameriaca ah suak hi. A neu tung akipanin lai thei mahmah a, kum 3 aphakin LST sim thei ta hi. Brown University panin B.A zo a, Andover Theological Seminary panin B.D zo in, Brown University mah panin M.A zo hi. Dr. Claudius laihawm “The Star From The East” le English Baptist Mission-te’n India a missionary a apaisak uh William Carey thu genna tungtawnin Nisuahna gam lamah Pasian na sep ding lunglutna nei hi.

            February 5, 1812 in Ann Hasseltine tawh Bradford ah kiteeng uh hi. Amau pen Congregational pawlpi ah om uh a, tua pawlpite in amau mission na sepna khan dingin India gamah missionary dingin February 19, 1812 in hong khahkhia uh a, June 1812 in Kolkata tung uh hi. Teembaw tawh hong paina vuah LST hoih tak sim in hong lungngaih leh tui kitheh ding hilo in, kiphum ding hizaw cih hong mukhia hi. Tua ciangin Kolkata hong tun uh ciangin Rev. William Ward in Lal Bazaar tuiphum biakin ah tuiphum hi. Banghanghiam cih leh Congregationalte pen tui kithehte ahi uh hi.

            A upna le san dan hong kikhel ciangin amah apuak khiate zasak hi. Amah a sawlte tawh kizopna hong kitat ahih manin America Baptist Foreign Mission-te tungah a zasak hi. Tua ciangin ABM-te in India ah sem dingin a phal uh hi. Ahi zongin tua laitak in India pen England-te ukna nuai a om ahi hi.. Tua kum in America le England-te gal kido dingin thu ging zota ahih manin England-te ukna India ah a om dinguh amau ading lauhuai ding cih William Carey le a lawmte’n na genpih uh a, America ah ciah kik dingin a sawl uh hi. America gamah ciah kik lo in mun khat teitei ah missionary a pai ding a lunggulh hi. Tua laitak in Portuguete teembaw Georgia kici khat Kawlgam pai ding amuh ciangin a zui uh hi. June 22, 1813 in India pan hong ding khia uh a, July 13, 1813 in Kawlgam hong tung uh hi.
            Yangon hong tun uh ciangin English Baptist Mission a na sem Felix Carey-te inn ah a tung uh hi. Yangon hong tun uh ciangin Mangkangte ngeina tawh dinsa in thu a gen leh kuama’n lunglut zolo a, Kawlte ngeina danin bukno khat lamin April 4, 1819 in Phungyi-te danin tutsa in thu a gen leh thu ngai 15 bang pha hi. Tua danin thu a gen leh May kha ciangin Mg. Naw akici tangval khat in Lungdamna thu hong sang thei a, June 27, 1819 in mipi mai ah ki tuiphum hi. Kalwgamah April 4, 1819 in a masa pen biakpiakna kinei ahi hi. Anihveina tuiphumna pen July 13, 1819 in U Bia le Thar Hla-te ahi hi.

            Tua bangin a nasepna Topa’n thupha pia in, kalsuan pih a, Kawlgam ah Tuiphum upna le Pasian thu in munkip hong nei hi. 1823 kumin Lai Siangtho thu ciamthak na zo a, 1834 kumin Lai Siangtho buppi na zo hi. Tua bek thamlo in 1848 kumin English to Burmese Dictionary hong na bawlsak hi. Haksatna tampi thuakin, bawlsiatna tampi thuak mah tase leh Kawlgam a om mihingte hong lainatna tawh hong sepna in tuni in Kawlgam ah Topa hehpihna thupha i sang hi. Rev. Adoniram Judson in lainatna tawh hong sepsakna hangin Kawlgam tapidawte ii pa hi hi.

B. Rev. Arthur E. Carson- Zogam sangmangpi
            America gam Columbus khuapi Iowa khua ah August 6, 1860 kumin suak hi. Innkuan cithei mawhlo pan a khang khia khat ahi hi. Aneu tunga kipan lai pilin, khut siamna zong a kiva mahmah khat ahi hi. Kum 16 aphakin lametlohpi in apa in pumzaw natna ngah in na sem thei nawnlo hi. Unau nga lakah a upen ahih amnin inkuan nek-le-dawn ama liangko hong tung hi. Khuakhal sung teng lo kho in phalbi ciangin sang sia semin tua bang tawh innkuante a vak hi.

            1881 kum ama kum 21 in Gibbon khua a Nebraska Baptist Seminary ah LST sin kipan a, June 1883 kumin B.Th zo hi. Tua sangah a kah sungin Laura Hardin tawh kimu in kingai uh a, sang a man uh ciangin zu thawl a kipia uh hi. Carson in a sangkah zom a, 1886 kumin B.D a zo hi. August 27, 1885 in Tuiphum sia (ordination) kipia hi. ABM in Kawlgamah missionary dingin April 16,1886 in na teel uh hi.

            October 14, 1886 in America panin Kawlgam zuanin Teembaw tawh hong zin khia a, tua kum December 13 in Kawlgam hong tung hi. Yangon ah ni 5 sung a taam khit ciangin a lawmngaihnu Laura Hardin omna Pathein ah pai pah hi. December 18, 1886 in Sakaw Karen-te sangmang huang sungah Pastor Saw Thar Phyu in siangtho kiteena neih sak hi. Tua khit ciangin Pathein pan Henzada ah pai to uh a, kha thum sung khawng a om uh hi. Tua pan Pyi ah kisuan in kum 2 khawng a om uh hi. March 1888 in Thayet ah kisuan in na sep kipan hi.

            Thayetmyo le akiim a om Asho-Chinte lakah kum 11 sung na hong sep sungin Chin/Zomite a tamzaw khamtung gamah om uh hi, cih hong theih ciangin khamtungah Pasian na sep nopna lungsim hong nei hi. Tua ciangin 1898 kumin ABM zumpi a zasak hi. Tua bangin lunggulhna le veina thu a zaksak tak ciangin Carson-te kisuan ding hoih maw, hoih lo cih thu na siatak a kikup khit uh ciangin August kha in phalna a pia uh hi. Tua ciangin October le November kha sungin khanglam Zogam Kanpalet kuam teng a pha hi. Tua khit December kha ciangin saklam Zogam Tedim, Hakha, Falam zong hong pha to leuleu hi. Hong zinna ah Hakha ah phualpi phuh dingin hoih hong sa in hong kipsak hi. Banghang hiam cih leh Hakha pen Mangkang galkapte phualpi ahi hi.

            February 2, 1899 in Thayetmyo pan hong kipan khia uh a, Falam khua hong tung masa uh hi. Tuatak ah Mangpipa Capt. Dury tawh kimu masa in, tuapan Hakha ah hong pai uh a, March 15, 1899 in Hakha hong tung uh hi. Silh-le-teen dan nangawn theilo Zomite lakah haksatna tampi thuak kawmin lungdamna thu hong tangko uh hi.

            Zomite in lai kineilo in kihai mahmah bek thamlo in kicidamlo ahih manin pilna lam le cidamna lam hong vei mahmah a, 1890 in mission sang hong hong pah hi. A sangsia dingin amau hong tonpih Karen sia Sia San Win a sem sak uh hi. Thayetmyo a a om sungin a meltheih sa uh ahi Karen sia pawl khat sam to in lai le Pasian thu hilh sak hi. Cidamna lam kisam sa lua ahih manin ABM zumpi ah a zaksak leh March 11, 1902 kumin Dr. E.H. East hong puak uh hi. Dr. East in cina bawl kawmin lungdamna thu tangko a, zin kawikawi ahih manin Zomi sung tapidaw suak masate ama tuiphum tam mahmah hi,.

            Ahih theih zah in lam tuamtuam zangin Zomite sungah na hong sem a, Pasian in thupha pia in February 17, 1906 in Khuasak ah mi 11 tawh Zogam a Tuiphum pawlpi masa pen ki phut hi. Sia Shwe Zan in pawlpi kem sia sem in, Pu Thuam Hang le Pu Pau Suan-te in upa sem uh hi. Hih a pawlpi phuh ni uh pen kiginni (saturday) ni hi-a, a zing ciang nipini(sunday) in Zogam ading a masa pen nekkhawm nekna na nei uh hi. March 25, 1907 in Hakha ah Zogam bup tuiphum kipawlna kiphuan khia hi.

            A nasep ding tampi nusia in April 1, 1908, ama kum 47 in a na asepsak Topa kiangah hong zuatsan ta hi. Amah a sih hangin a lawmnu Laura Hardin in a pasal maban kum 12 sung zomin October 6, 1920 kumin America ah ciah a, July 19, 1942, ama kum 83 in Topa kiang zuan ta hi.

C. Dr. Joseph Herbert Cope- Tedim sangmangpi
            Zomite (Tedim kampaute) hong pilsak, hong teisak, hong lamto Cope topa ahi hi. November 21, 1882 in America gam Philedelphia khua Germantown ah suak hi. Apa Joseph B. Cope hi a, anu Elizabeth Danforth Cope ahi hi.

            1899 kumin piangthak in tui kiphum hi. Manual Training High School panin taan sawm a zawh khit ciangin Pennylavia Unversity panin B.Sc ngah hi. B.Sc a zawh khit caingin kum khat sung Uttah gam-a Mormon-te kiangah missionary in kuan hi. Kum khat sung a sep khit ciangin LST sangkaha, 1908 kumin Roschester Theological Seminary panin B.D zo hi. July 7, 1908 in Germantown tuiphum pawlpi ten Siampi(Ordination) a pia uh hi. Tua kum September 3 in a lawmngaihnu Elizabeth Caldwell Smith tawh kiteeng uh hi.

            Zogamah sangmang na sepna phual thak(second missionary centre) kipat ding lunggulh uh a, tua mun pen Tedim khua ah khoih ding khensat uh hi. Tua ciangin ABM board-te’n second missionary centre ah na sem dingin J.H Cope a teel uh hi. September 10, 1908 in America pan hong ding khia uh a, November 16, 1908 in Yangon hong tung uh hi. Dr. East tawh Yangonah kimu uh a, amah tawh Hakha dong tonkhawm uh a, December 21, 1908 in hong tung uh hi.

            Amau Tedim ah om pah dinguh himah leh a omna dinguh inn kilam khin nailo ahih manin Hakha ah kum nih sung om phot uh hi. Tedim ah inn lam a kizawh November 1, 1910 ciangin Tedim ah hong om to pah uh hi. Tedim hong tun ciangun Tedim pau sin pah uh a, siam pah uh hi. Zomite adiakin Tedim kampaute adingin na lianpi tampi tak hong sep khiat sak hi.
            **Cope topa pen**

            1. Hong pilsakpa (Educator)
Zogam hong tun cil phet in Hakha khua ah Carson tonu huh in sangsia sem a, “Laitheihna bek tawh pilna khang dinga, pilna in khua musakin Zomite tapidaw suak ding hi”, cih um ahih manin sang tampi a kiphut ding hanciam hi. Tua manin “sangmangpa” kici hi.

            2. Laiteipa (Translator)
A na sep thupi pen khat in laitei ahi hi. A hun awng khempeuh laiteina in zanga LST, labu, sang laibu, biakna laibu le Tedim kam Thukizakna laite tatsatlo in bawl hi. Laibu tamtak bawlin Zomite adingin a manpha mahmah mualsuang ahi hi.

            3. Thugenpa (Preacher)
Zogam hong tun ma in America gam Mormon-te kiangah missionary in pai ngei khin ahih manin gupna thugen pen kipelhsak hetlo hi. A tuntunna ah hun angah zui-in gupna thu tangko in, tapidaw suakte tuiphum a, biakinn thakte zong honna neihsak hi.

            4. Khasum sanglo sang ukpa(Honorary Inspector of Schools)
Mangkang kumpi vaihawmna tawh 1925 kumin sang khempeuh kumpi khut sung tunga, Zolai taanli ciang kisin hi. Hih vaithak akihawm ciangin lai sinbu teng kampau nih tawh bawl ding le sanguk mang a sem dingin kumpite’n Cope topa tung vaipuak ap uh hi. Khasum sanglo in sangmang a sep sungin kumpi piak TA, DA-te zanglo in tuate Tedim kam Thukizakna laihawmna in zang zaw hi. “Tedim kam thukizakna” pen anungteh “Lungvakna”kici hi.

            Zomite adingin na tampi hong sepsak banah na sep ding tampi tak om laite nusia in June 11, 1938, ama kum 56 in Topa kiang hong zuatsan hi. Cope topa asih ciangin azi Elizabeth Caldwell Smith zong America ah ciah kik hi. 1940 kumin Thaunggyi a om Sangmangte tate sangkahna sanginn ah siamahpi ahi dingin sawlna ngaha, March 10,1941 in Kawlgam hong tung kik hi. Galpi nihna tawh kituak to ahih manin Tedim lam hong phato manlo in India ah galtai a, India pan February 20, 1942 in America ah ciah kik hi. December 10, 1968, ama kum 86 in a teenna Germantown a a inn panin Topa kiang hong zuatsan ta hi.

IV. KHANLAWHNA LIANPI ZOGAM AH

            Kum 1899 kumin Zogam Hakha khua ah Pasian thu hong tun akipanin Tapidawte sungah adang updan, san dan kilamdang lamna, tawnna, cih bang om selo hi. Sangmangte le Sia masate up da, san dan le amau hong hilh dan pen tapidaw upna dik pen man pen dingin ki sangpah lian hi. Tua pen Baptist upna hipah hi.

            Kum bangzah hiam khit February 26, 1940 ciangin India lam Pentecostal Movement in hong nawkto a, Hualngo, Zahau le Tedim gam hong ban to hi. Tuate pawl in khuangkhat tumin ‘Halleluijah’ le ‘Hosanna’ ci-in awngin inn khat khit inn khat lut in om uh hi. Ahi zongin a sawtlo in bei ziau hi.

            1940 kuma piang dan mah bangin 1963 kumin Matupi gamkee sungah piang leuleu a, ahi zongin kip zo tuanlo hi. Tua dan mah in 1968 kumin Hakha ah piang leuleu in kizom toto a 1973 dong khawng kip hi. Ahi zongin bei leuleu hi.

            Ei Tedim gamah a masa pen Crusade ahi Rev. Hau Lian Kham in April 30-May 6, 1973 in Tedim Zolai sang Tualpi ah hong nei hi. Tua panin mite’n Pasian thu hong phawk thak uh a, khanlawhna lianpi hong piang hi. Hih Crusade pen Tedim gamah a om ngei nailo hi-in a masa penpen ahi hi. Tua Crusade pan kipanin Zogamah khanlawhna lianpi hong om to a, tuni ciang dongin kizom toto lai hi.

V. ZOGAM A BIAKNA LE PAWLPI TUAMTUAMTE

A. Dawi biakna
            Nidang hunin i pu i pate China gam, Mongolia gam, Kawlgam sung mun tuamtuam ah a teen sungin dawi upna nei ahih manun dawi na bia uh hi. Tua biakna in Zogam i tun toh in zong kizom toto hi. Tua dawite sungah zong a gilo le a migi ci-in nam nih in na nei uh hi. A migite pawl pen pasian ci-in na ciamteh uh a ‘paai’ na ci uh hi. A gilote pawlin hong bawlsia thei ahih manin na bia uh hi. Dawi nam tampi tak a om hangin nampi nih in na khen uh a, Gam dawi le Inn dawi ahi hi. Gam dawi ah Mualsang dawi, Gundawi, Suangdawi, Cikdawi, Lodawi-te hi-a, Inndawi ah Sumtawng dawi, Innsungpi dawi, Huangsung dawi ci-in na khen uh hi. Amau nam ciat in biakpiakna zong na pia uh hi.

            Tua danin a biakna vuah zong nampi nih in na khen leuleu uh a Khuazang biakna le innkuan or beh zui a biakna ahi hi. Khuazang biakna bawl dingin siampi na nei uh-a, innsung biakna bawl dingin a beh zui in Beh Tuulpi na nei ciat uh hi. Khuazang biakna a neih uh ciangin Siampipa’n makaih a, Innsung biakna a neih ding ciangun beh tuulpi in makaih hi.

B. Laipian biakna
            Hih biakna pen mundang pan hong kipan hilo in Zomite sung pan hong kipan tualsuak biakna khat ahi hi. Pu Pau Cin Hau tungtawn pana hong kipan khia biakna le upna khat ahi hi.

            Amah pen Pasian in na hopih zelzel in maang khawng na mu zelzel hi. Kum 17 aphiakin cina in kum 15 sung khawng zawngkhal in opcip hi. A zawngkhalna sung pan mah in maang mu zelzel a, khatvei Pasian in, “ Damna hong ngen lecin na dam ding hi”, na ci-a aman zong damna a nget leh dam takpi hi. A kumzawn khat thakhat thu in hong dam ciangin mite in lamdang sa in amau ading zong thu a ngetsakna ding a ngen uh hi. Ama’n zong thu a ngetsak leh cinate in damna ngah takpi uh hi. Tua bangin a maangmuhna te gen kawm in, cinate thungetsak in damna hong ngah toh uh ciangin ama nungzui le ama thuhilhna sang thei mi hong tam semsem ciangin 1896 kum in Pau Cin Hau Pawlpi or Pau Cin Hau Biakna hong piang khia hi.

            A mangmuhna tungtawnin laigelh dan khawng na kihilh zelzel a tuate aman hong zattohtoh leh laimal 1050 a pha lai khat hong mu khia hi. 1899 kumin lai hong ngah khia hi. Tua kum ma sangsiah lai in Zomite sungah lai om nailo ahih manin mi tampite in sin in thu ciaptehna in a zang uh hi.

            Tua ahih manin Laipian pa kici hi. Ama pawlpi zong Laipian pawlpi or Laipian Pau Cin Hau pawlpi kici hi.

C. Tapidaw biakna
            Leitung hun kikhelna le gam khantohna tawh kizui in Dawi biakna pan Laipian biakna, Laipian biakna pan Tapidaw biakna ah Zomite kikhangto hi. Anungta Pasian thu hilh dingin Rev. Judson’1813 kumin Kawlgam hong tunga, Rev. Carson’ 1899 Kumin Hakha hong tunga, Rev. Carson’ 1910 kumin Tedim hong tung hi. Tua sangmangte in Zomite anungta Pasian biak theihna ding thu hilh uh hi. Pasian Kha Siangtho panpihna tawh Zomite lungsim kikhelin a nungta Pasian kibia hi.

D. Pawlpi tuamtuamte
            Dawi biakna pan Laipian biakna, Laipian biakna pan Tapidaw biakna sungah a kihei toto Zomite sungah a hun zui in Tapidaw upna pan zong san dan, up dan hong kikhel in pawlpi tuamtuam hong om ta hi.

            i. Tuiphum pawlpi-1906
Missionary phualpi thak Zogam ah kipan dingin America Baptist Foreign Mission Board-te phalna om bangin Carson-te March 15, 1899 in Hakha hong tung uh hi. Mun thak ahih mah bangin tawlpi khat kisang thei pah lo a, 1906 kum ciangin mi tawmkha hong ngah uh a, tuate tawh Tuiphum pawlpi khuasak ah hong phut khia uh hi.

            ii. RCM-1939
Zomite pen kithutuakin nop ni dahni ah zuhai mah a tawite ihi hi. Tuiphum upna hong tun ciangin tua upna a sangte in nopna dahna ah zu hai tawi theilo ding ci bangin hong om a, Zongeina tawh kitkhen khia uh hi. Pawlkhatte in Tapidaw ahi veve zu kidawn theihna pawlpi a om leh ci-in na kan kawikawi uh a, ahizongin kuamah na mulo uh hi. Kam Hau innpipa, Pu Pum Za Mang in tuiphum pawlpi na sepna hawmthawh in pilna lam le cidamna lam ah na sem ding pawlpi dang hong zon ciangin 1939 kumin RCM makaite Tonzang hong paito in pawlpi hong phut uh hi. Cidamna lam le pilna lam ah na naakpi hong sem pah uh ahih manin mi tampi in na sang thei uh hi.

            iii. Seventh Day Adventist -1953
1953 kum ciangin Tedimah hong kipan hi.
Pastor D. Tun Khaw Nang in ‘SDA Pawlpi Tangthu’ cih thulu tawh “Zomi leh Biakna” laibu laimai 46-64 sunga a gelhna ah: 1951 kumin J.O Wilson makai in Voice of Prophecy Sang a kici Lai Siangtho galsinna khat March 21 ni in hong uh a, Mangpau, Kawlpau, Karen pau leh Sen pau tawh kisin hi. 1960 kumin Lusei Lesson zong kinei a, Tahan ah a kiang kikoih napi, tuin Kawllai bek kinei a, Sia Taung Khin in sem hi.

1953 kum ciangin Zogam lamah zong hih thuman hong lut to hi. 1952 kumin tu a Pastor Ngul Khaw Pau in Baptist sunga a om lai in Leilum ah pawlpi upa a sem hi. 1946 kumin Calcutta ah motor hawlin va om ngei a, tua lai in Lusei tangval no khat Van Lal Rawna tawh kithuahin SDA thu upna va mukhia hi. Man sa napi in zui nai lo hi. 1952 kum a Leilum Pawlpi a upa a sep laitakin, Aizawl ah SDA sangmang W.G. Lowry om hi, cih thu za a, lai khakin SDA sia hong puak in, ci-in ngen hi. W.G. Lowry zi’ min dingin Zo min phuah uh a, Pi Zohmangaihi ci uh hih tauk hi. Pi Zohmangaihi min tawh lai thuk a, “Na lai ka ngah uh a, Assam, Section panin Za Khuma leh Lal Khuma kong puak uh hi. Amaute gel tawh Darkhai khua ah na kimu thei ding uh hi. Tham loin, na lai pen Burma Union H.Qs. Rangoon ah ka khak sawn uh hi. No Chin Hills pen Burma Unionte in hong len ding uh hi. Tua lai ah na kithuza un,” ci hi. Tua mah bangin sangmang ngetna lai pen Burma Union Executive Committee meeting laitak lianin kingah a, Myaungmya a Sang Siapi a sem kimlai Zogam ah sangmang sem dingin A.E. Anderson a sehkhia pah uh hi.

Tua zawh a sawt loin Union President Pr. C B. Guild, Treasurer Pein Gyi, F. Ba Tin, Myat Pe leh Andersonte gam van dingin a hong pai to pah lian uh hi. Tonzang dong a va pha to uh hi. Ngul Khaw Pau pen Zato a na lup laitak hi a, Tuiphum Pawlpi sunga Sia Go Za Kham in makaih in Zato ah a va veh uh hi. Aizawl a sangmang ngetna lai a khak pen tawi in, “Hih lai nang gelh mah ahi na hiam?” ci-in laka, “Hi mah hi,” a cih ciangin, “Tuin nasem dinga nong sap kei kong tungta hi, nong huh diam?,” a ci leuleu hi. “Kong huh ding hi,” ci-in a kivaikhak uh hi.

A lawm dang teng Zangkong ah a ciah kik pah uh a, Anderson pen Rih Buzung ah W.G Lowry tawh kimu dingin a zin suak hi. Tahan pana Rual Chhina tawh kimu in a kizui suak hi. A ciah suk kik ciangin Rual Chhina in zui suaka, Runrothang leh Sangchia tawh Myaungmya High School ah a va kah uh hi. 1953 kum October kha ciangin Zangkong a zin Sia Go Za Kham leh a hong kisuan toding Andersonte hong ton to pah uh a, Lawibual a Bo Khual Khan Tualte’ inn sapin nasep a hong kipan uh hi. Zogam sunga sangmang a hong lut masa pen ahi hi.

1954 kumin Zomite lakah Anderson in kamphen zangin na hong sem a, Sia Ngul Khaw Pau leh Sia Go Za Kham in a huh uh hi. Lusei lakah Sia Zakhuma leh Sia Lalkhuma in a huh uh hi. 1953 kuma Myaungmya a sangkah Rualchhina, Runrothanga leh Sangchia te hong ciahin na a hong sem kikta uh hi. 1954 kum ciangin Ngul Khaw Pau leh Suan Kai zong sang a va kah leuleu uh hi. Zogam sunga nasep a hong kipat cilna tu a bang teng hi phot hi. Sia Ngul Khaw Pau baan zomin Sia Ngul Khaw Thang, Sia Sen Do Lian, Sia Tun Khaw Nang, Sia Tial Cung leh Sia Lian Khup te in a hong zom to uh hi. Tuate baanah, Sia Kip Za Nang, Sia Do Hen Pau, Sia Suan Za Nang, Sia Tel Khan Thang cihte a hong khang leuleu uh hi. Hih Sia pawlkhatte bang hoh Union sungah ulianpi suak in Section lutangpi a hong suak zong a om uh hi. 1989 kum laitakin Zomi sia a sem vekpi 70 valta a, Sia Do Hen Pau bang hoh, Burma Union buppi ah treasurer ahi hi. Kawlgam bup nasepna ah Zomite in hih zaha inntekna i ngah theih pen Topa Pasian tungah lungdamkoh ding bek ahi hi. Kawlgam Saklam buppi ah Section President zong ei mite khut mah ah om a, Sia Kip Za Nang baanah Sia Thang Siang in a laih hi.

1960 kumin Myaungmya ah Burma Union Bible Seminary kiphuan a, W.W. Christensen in Principal a sem hi. Tan 10 on khit ciangin , plus 1 leh plus 2 ci-in kum 2 sinna khat om phot hi, tua khit ciangin Seminary Course taktak kipan phing hi. Kum 2 mah kisin zom to a, a vekin tan 10 khit kum 4 kisam hi. Tua muna hong ongkhiate pen M.T.C (Ministerial Training Course) diploma a kipia hi. Tua sang pen kiliansak semsem a, pastor sinna bek sangin a lianzaw in a kingaihsun hi. Sia Ngul Khaw Pau bang zong tua sang mah a a va kah kik ahi hi. I gama nasem sia muanhuai a tam pente in tua sang pana a zo sate vive ahi uh hi. Tu laitakin tua sangpi a makai Sia Yan Eye ahi hi.

1977 kum panin Upper Burma Section sunga SDA nasepna khempeuh ah Zomite vive in nasep a len uh hi. Ei Zomite sungah Section President a sem masa pen Sia Tun Khaw Nang hi a, tuin ei mite vive mah in a baan kiluah paisuak ta hi. Zomite laka nasem dingin Zomite mah a hanciam pen ihih kul hi. Hih tangkona a hong tun theihna dingin sangmang a hong ngetsak, mite muhdah thuaka cilphihna, mukpiksanna, mitsiitsanna leh ui-ek-pu a cih uh banga nawh kawikawina thuaka i mai a hong honkhiatsak Pastor Ngul Khaw Pau tung leh Pasian tungah lungdamnako in Pasian in thupha a hong piaksakna dingin thu i ngetsak ding kilawm mahmah hi. Zomite laka Pawlpi Elder sem masa pen Sia Phung Kai ahi hi., Haksatna tampi mah a thuak hi. Pensen a la khinsa siate leh a sem laite min a kimin kong suaksak nop hangin tamlua ta ahih manin kong gelh kim zo kei hi. Pilna lianpipi a nei siate zong ki-omta hi. A kim in hong gen leng sau lua ding hi. A cing lo lua lah pawlpi khat dinmun leh nuntakzia genna ah cing zolo lua zel ding ahih manin, ka tomkaih thei zah tu a bang ciang ahi hi.

            iv. Thang Za Kam Tuiphum Pawlpi-1965
Hih pawlpi pen Pu Thang Za Kam hong pat khiat ahi hi. Amah pen Pasian thulawp mahmah khat ahi hi. Ama upna tawh Tedim kiim tengah Pasian thu gen in vak kawikawi a, ABM te aa 10/100; RCM te aa 70/100; SDA-te aa 20/100 cih bangin lakhawmin thu hong gen kawikawi hi. Ama upna a sang theite hong kibehlap in hong tam uh ciangin 1965 kumin Thang Za Kam Tuiphum pawlpi hong ding khia hi.

            v. Evangelical Baptist Church-1975
1973 kum a Rev. Hau Lian Kham Crusade panin Zogamah khanlawhna lianpi hong tung bek thamlo in up dan, san dan hong kibang nawnlo hi. Piangthakte le piangluite hong omta hi. Ahi zongin tua buaina bel Tuiphum pawlpi sung ahi hi. Tua bangin pawlpi khat sungah hong kitukalh ciangin piangthakte hong kituam khawp uh a, March 9, 1975 ciangin Evangelical Baptist Church ci-in kimin vawh uh hi. Tua akipanin hong kipto a, anung ciangin Evangelical Baptist Convention kici uh hi.

            vi. Assemblies of God-1977
Tedim gamah khanlawhna apian thu Kawlgam A.G pawlpi makaipi Saya Myo Chit in a theih ciangin hong lunglut mahmah ahih manin February 1977 in Tedim ah hong zinto hi. Tua pan in A.G upna sang thei pawlkhat hong om leuleu a, EBC pawlpi kem siapa Hau Lian Kham zong A.G ah na lut leuleu hi. Tua kum a kipanin Tedim gamah A.G pawlpi in mun hong neito hi.

            vii.United Pentecostal Church
Rev. Hau Lian Kham nungzui in ABM pan EBC ah a suak pawlkhat in a makaipipa uh A.G ah a pai leuleu ciangin zui nuam nawnlo in UPC-te tawh na kizom uh a, UPC pawlpi Tedimah hong lut leuleu hi.

Rev. Khen Za Sian in ‘UPC Pawlpi Tangthu’ cih thulu tawh “Zomi leh Biakna” laibu laimai 29-26-na sunga a gelhna ah: 1953 kumin kipanin Pu Vai Za Dal pen UPC na suak khin hi. A hih hangin ama omna munin zil lo ahih manin, Tuiphum Pawlpi ah a na om hi. Sia Dam Khan Hang zong galkap sunga aom laitakin August 24, 1985 kumin Zangkong ah Jesu minin tui a kiphum hi. S. Ngo Khaw Nang leh Vung Khaw Gin zong Jesu minin Zangkong ah tui a kiphum uh hi. Rev. S. Ngo Khaw Nang, B.A (Phil.) in hunbit nasem dingin a hong kipan hi. Amah pen Tedim mite sungah hunbit nasem masa pen hi. 1978 kumin Sia Vung Khaw Gin in ama pianna khua Suanghoih ah hong ciah toin pawlpi hong phutkhia hi. Tua pawlpi pen Tedim mite lakah a masa pen hi. Tua kum mahin Rev. S. Ngo Khaw Nang in ama pianna khua ahi Mualnuam ah pawlpi a phutkhia hi.

1978 kum pen Tedim gam adingin a ciapteh huai mahmah a hihna tampi a om hi. Bang hang hiam cih leh, kha khanlawhna a pian kum ahi hi. Tua bangin kha khanlawhna a pian ciangin ‘sawlna’, ‘kamsanna’, ‘thuphuan’ cih peuh hong tam zelzul ciangin, kha lamah lawpna a neite pen pawlpi a tuamtuam panin kihawlkhia a pawlmin nei nawn lo uh hi; amaute ‘khami’ a kici uh hi. Tua khamite’ sung panin Myo-uk Dai Khan Pau leh G. Khen Za Sian te in pawlpi khat peuh tawh kizop lohin hoih lo ding hi, ci-in Zangkong ah kizoppih ding pawlpi a zong dingin a pai suk uh leh, UPC tawh kituak pen hang, ci-in UPC ah  a lut pah uh hi. A hong ciah uh ciangin G. Khen Za Sian in ama tenna khua ahi Sawbwayeshin ah April 4, 1979 in pawlpi phut a, zang gam a om Tedim mite’ sungah UPC a din masakna pen ahi hi. Myo-uk Dai Khan Pau zong Tedim a tun toh ciangin, April 1979 kum mahin Tedim ah UPC a phut hi. 1979 June kha a kipanin G. Khen Za Sian pen India ah Lai Siangtho Sang va kah a, 1981 kumin ‘Diploma Certificate’ tawh hong ciah hi. UPC sung a om Tedimte sung panin Lai Siangtho a zo masa pen ahi hi. Hih bangin Tedim mite sungah UPC upna hong khang semsem a, tuin biakna picing mahmah khat hong hita hi.

viii. Presbyterian Pawlpi
Zomite laka Tedim gama Presbyterian a hong pona pen pawl dangte bangin missionary te hong puak hi loin, a gama tengsa mite phuh ahi hi. Tedim gam Presbyterian pawlpi hong po khiatna masa pen Fartlang khua hi a, a phuankhiate hih a nuai ate a hi uh hi.
1.    Pa Zel Ngin
2.    Pa Thuam Cin Thang
3.    Pa Zam Khaw Pau
4.    Rev. Thang Sian Kap-te ahi uh hi.

-       Mimal 45 tawh Pa Zel Ngin makaihna in a na phuankhia uh hi. Pawl kipsak ni May 1, 1963 ahi hi.

Fartlang khua pana Presbyterian pawlpi a hong kiphuatkhiatna tangthu pen hih bang ahi hi. Hih khua pen Lusei gamgi kiangah hi a, Pasian thu a theihnasate uh Presbyterian huzap vive ahi hi. Kawlgam sungah Presbyterian pawlpi a om leh om loh zong a thei nai lopi ahi uh hi. Pawlpi a phuh tungun kuamah tawh kizopna om lo napi, 1965 kum ciang Pastor Ngaih Khaw Gin leh, Pa Ngul Khaw Thangte in Tedim khua ah Presbyterian pawlpi hong phut ve uh ciangin, amau tawh hong kizom uh a, Tedim, Fartlang leh Kawlgam ate tawh kizopna hong nei toto uh hi. (Rev. Thang Sian Kap- Presbyterian Pawlpi Tangthu-Zomi leh Biakna-laimai 64-76).

ix. Churches of God
Kawlgam sungah Suahtakna i ngah ma pekin Needed Truth hong tunga, a thu zui nuam mi tawmno khat in England gamah a thu a zasak uh hi. England gam panin nasem mi nih 1947 kum October kha in Kawlgam ah a hong paisak uh hi. Tua kum November kha ciangin Insein khua ah Church of God khat a hong phut uh hi. Tua pawlpi in tuni in 274 Civil Station Road ah a om hi.  Khat kia lutang om ngeilo hi. Tua pawlpi pana nasepna in Tedim gam a hong lawh masa pen hi.

1960 kumin Churches of God-te lai Suangphei khua a om Sia Tual Khaw Zam in pawlkhat ngah a, hoih kisa mahmah hi. Khanlawhna pawlkhat zong tung tuam pah hi. 1965 kum September kha in hih thului a gelhpa in a dang nget beh a, Insein panin tampi hong kikhak hi. Tua lakah U Thein Maung gelh, WHY I WORSHIP IN A CHURCH OF GOD, a cih hong kihel a, hoih kisa mahmah ahih manin Tedim khua ah lawmte kim khatin zong a hong deihpih uh hi. Hih thu a pom thei mi in 1966 January kha bei kuanin Tedim khua pan lawmte nih leh kei kizopna thu kan dingin Insein ah a hong paisak uh a, February ni khat ni in 274 Civil Station Road ka tung uh hi. Tua lai ah Evangelist G. Jaruie na om lai hi. Amah leh a pawlpi tawh Nipi khat sung thu ka kikum uh hi. Tua hun sung ka hun awn ni khatin Insein a Lai Siangtho Sangpi ah ka va hawh leh, Sia Pau Khan En, Sia Khai Za Dal, leh Sia Gho Khan Dal-te tawh ka kimu uh hi. Sia Khai Za Dal leh, Sia Gho Khan Dal-te ka zin uah a hong hawh uh hi.

Insein pan ka ciah uh ciangin, ka lawmte gelin a hoihzaw hong muhsan uh a, tuni dong ka kithuahkik zo nai kei uh hi. Suangphei khua ka tun kik ciangin ka lawm dingte nga khawng, guk khawng kigingsa in na om uh a, pawl kizopna na nei nawn lo uh hi. Tua teng pawlpi phuhsak dingin tua kum May kha in Insein pawlpi panin Kawlmi upa nih hong pai uh a, 1966 May kha 15 ni sun nai 11:00 hunin Suangphei khua Church of God a hong phut uh hi. Amau hong tun ciangin tuiphumsa mi 18 leh phum ding mi 5 kipha a, mi 23 tawh pawlpi a ding ahi hi. Tu in tuiphumsa mi 80 kipha ta hi.

A beisa nasepna a tomin hih bang ahi hi. Kum 1971 in Langzang khua ah pawlpi khat kiphut hi. 1975 kumin Aungwa ah pawlpi khat, Leisan Zo ah pawlpi khat kiphut leuleu hi. 1977 kumin Munlai ah pawlpi khat kiphut hi. A nunung penin 1982 kumin Vaivet khua leh Khumnuai khua ah pawlpi kiphut a, a vekpi gawm disciples 200 kipha nai lo hi.

A patna lama i gensa bangin Headquarters a kibawl loh mah bangin, makai zong om tuanlo hi. Zomite lakah pawlpi nasem 3 hong koih khin uh a, tuate in Go Khaw Hau, Tual Khaw Zen leh, Munlai khua a Lian Za Nang-te ahi uh hi. A masa 2 te Suangphei khua ahi uh hi. Hihte pen thuhilh sia ding hi a, ka pawlpi mite un, The Lord’s Servants ong ci uh hi. Pawl khat dan pen damdam mainawt hi a, manlang hehu thei lo hi. Banghang hiam cih leh, biakna na bekbek kisem a, sang leh zato khawng kiphuan loin nasep ngak nading kibawl lo hi.

Tua banah kitangdin ahih mah bangin pawl sunga hong lut dingte interview kibawl zaw lai hi. A kilutsak thei lo nangawn zong om lai hi. Gentehna in Khristian ahih khit ciangin nupa kikhenna midang tawh a kiteng kikte kisang lo hi. Local Church of God pen gupna ngahna dinga kilut hi loin, Topa’ teci pang dinga kilut hizaw ahih man ahi hi.

Local Church of God pen ‘disciples’ kici thu zuite tawh kiphuan hi. Thuzuite in Pasian zahtakna tawh a nuntakna uh siangthosak mahmah dinga, leitung nainganzi partyte ah zong lut lo ding uh hi. Ahih hangin kumpi a ding laitak peuhpeuh Pasian zat hi, ci-in sangin, zahtakin, a thu mangin, thu a ngetsak den ding uh hi.

Pawlpi khempeuh ah ‘elder’ kici pawlpi keem siate om kim hi. Khat kia lutangin om ngeilo hi. Khasum sang pastor zong om lo hi. Elderte in pawlpi khat leh khat kizopna hi a, fellowship bup a kizopna ahi uh hi. Kum simin ‘Elders’ Conference’ Sawl. 15 bangin kibawl den hi. Tua teng khempeuh a lamlak dingin upna lama a khanghamsa mite kikoih a, ‘Leading Brethren,’ kici hi. Pawlpi bup in thuhilh ding siate sawl uh a, evangelist zong kici hi. Amaute in khasum sang lo uh hi. Citna leh thusiamna tawh a piakte bek uh a ngah uh hi.

Thu-um nailote tunga thuhilh ding pen thuhilh siate tavuan kisuan tuan loin, mimal leh pawlpi semna nasia takin kibawl hi. Mi inn, zato inn, thong inn sung khawngah hawh a thuhilhna, mi khawma thuhilh pawi bawlna, motor tawh vaka lai hawmna, radio a tangkona, cih bang pen pawlpi bup in a nasepna ahi hi.

Ei Zogam ah mi inn ahawh a thugenpihna, thuhilh kikhopna bawlna leh laihawmnate tawh na kisem hi. Dawibia taktakte zong kingah ahih manin Pasian hong panpihna om hi, ci-in teci ka pang uh hi. (Go Khaw Hau- Churches of God Tangthu- Zomi leh Biakna-laimai 81-89)

x. Yaweh pawlpi
1965 kum khawng pan kipanin, Zogam ah khanlawhna khat ong kipan hi. Tua hun in Jesu sisan in a i mawhna khempeuh sawp siang zo hi, cih um ziau peuh lecin gupna  angah na hi pah hi, ci-in mi pawlkhatin ong taangko uh a, mi tampi ong khanglo takpi uh hi. Tua khanlawhna ong nasia semsem in, 1975 kum pawlah Kha lam khanlawhna lianpi ong tungin, Pentecost pawipi laimah bangin, lungdamna, lamna, limna, kamsanna, mangmuhna, leh mangmatnate ong piang ziahziah takpi hi. Tedim township Phaiza khua panin ong kipan masa pen hi, ci lehang kikhial khollo ding hi. Zanggam lam panin Sawbwayeshin pan in ong kipanin, tua pan Thalmual khua, Tuithang khua, Tedim khuapi leh Kaptel leh khua tuamtuam leh mun tuamtuam ah hong kizel in, Falam gam Khalkha gam leh Thantlang gam ahi zongin Paletwa leh Matupi Zogam bup ong kizel hi.

Tedim khua Jerusalem Council thukhensatna a om mah bangin, Pasian min kikan kawikawi a, Vakkawn sia (Evangelist) Sia Thuam Go Lian tung panin Jahvah Lai Saingtho (Sacret Name Bible) khat ong mu khia hi. Tua Lai Siangtho sungah Pa’ min Jahvah hi a, Tapa’ min Jahshua hi in pawlpi min zong Assemblies of Yahvah (Jahvah pawlpi) 1 Kor. 1:2; Sawl. 20:28). Ahihna akimuh ciangin kilungdam mahmah hi. Jahvah pawlpi kiphuan pah hi. Pawlpi omna khua tengah hilhcianna kipia kawikawi a, kizo man nai loin Pasian min man pen Yahweh (ia-we) hi zaw hi, cih thu hong tung leuleu hi. A thu kikan beh to a, 1983 kum ciangin Tedim ECC makaipa Sia Pau Cin Thang tung panin, Holy Name Bible (Scripture Research Ass.U.A) khat kingah khia a, Pa’ min Yahweh leh tapa’ min a man Yahshua (Yahweh’s Salvation) ahih zawkna  akimuh ciangin, lungdamna lian semsem hi. Pawlpi min zong Assembles of Yahweh hi ci-in kimu leuleu hi. Pa’ min leh Tapa’ min bek hi loin, Khristian gam sung a, kizang Sunday, Easter Sunday, Christmas, New Year cihte pen a taktak hi loin, akhem (alem) hi ci-in Kha Siangtho in ong hilhcian sawnsawn hi.

A sawt lo 1989 kum ciangin Sakollam pawlpi kamsangte in, Evangelist T.N.Joel in pilna tawh ong makaih hi, ci-in deihlo a thuman thutak a it manin, amah zong Assemblies of Yahweh ah hong kigawm hi. Upate gel leh T.N.Joel in Upna guipi (doctrine) te leh pawlpi sung ki-uk zia (government) leh Kha nuntak ziate geel uh a, pawlpi ong makaih uh hi. Amaute Kha Siangtho in panpih ahih manin, 1989 ciangin, Tuisanzang khua ah amau sapna tawh ni 15 sung Crusade va bawl uh a, khanlawhna lianpi ong tungin, mi 82 tui kiphumin pawlpi ong pjhut uh hi.

Zogamah Assemblies of Yahweh ong din khiat cilin, Satan in haza mahmah a, Pawlpi sung kisiatna tampi a piang sak hi. Pawlpi sungah thuman thutak Lai Siangtho galin a do kamsang pawlkhat ong piangkhia hi. Tua mite in Kha mapina bek tawh kikalsuan ding a, Lai Saingtho pen teci in kizang bek ding hi, a cih ciangun mitampi’n um in zui uh hi. Thuman thutak Lai Siangtho mapina, Kha Siangtho tawh zuih ding hi, a ci mipawlte tawh ong kilem lo uh a, tua pawl nihte a kigawm kikna ding nihvei thumvei a kihanciam hangin piang zolo a, Kha mapina deih teng Tedim khua Sakollam Kam Za Dal inn sapin kituam khop uh hi. Dai Khan Pau inn sapna ah Sia Ngul Khaw Pau leh Sia Pau Khaite nih bek cian lai uh hi. Kum thum tang ding amaute geel bek hi uh a, tua banga amaute geel a din kawm un Yahweh gam lungdamna thu gen kawikawi in a vakna uh ah, 1986 kumin Gamlai khua ah Pawlpi ong ding hi. 1987 kum ciangin Chyantagyi leh Pyidawtha khuate ah pawlpi ong phut uh hi. Sakollam pawlpite tawh a  thum veina kigawm kik uh a, ahih hangin 1987 September kha Sabbath ni-in amaute paikhia veve uh hi. Sakollam Sia Lang Za Mang inn ah kikhawm uh hi. (H. Ngul Khaw Pau- Assemblies of Yaweh hong piankhiatna- Zomi leh Biakna – laimai 237-242)

xi. Biblical Baptist Church (BBC) pawlpi
1970 kum pawlin Zogam sungah, Gupna thu leh Pianthakna thute ahi zongin, kha lam khanlawhna nak takpi in ong tung hi. Munkhat khat ah pawlpi kisia in kitam in, zum kong mang kong nangawn a tunna mun om liang hi. Tua bek hilo in biakinn a kikhak cipna khua nangawn zong om hi.

Tuimui khua ah zong khanlawhna ong lim tun mahmah in kitotna kimuhdahna a om loh hangin, Tuimui Khris mi kilawmtakna, ‘Tuimui Khristian Fellowship’ tua kipawlna bawl in, gupna thu gen khawm kan khawm in, Pasian na kisem khawm hi.

Hi kilawmtakna in ngimna khungkhia pah a, a piancil ni May 25-27, 1975 kum ahi hi. A mukhia cil a geelkhia cil pen Thawng Za Mung hi a, tua hun pan kipanin tudong tua kimakaihna ah President sem den hi. Zong makaih den hi. (Rev. Thawng Za Mung- Biblical Baptist Church hong piankhiatna-Zomi leh Biakna Laibu Laimai-229-230)

            xii. Pawlpi tuamtuamte
Kum 1973 khit Tedim khanlawhna bek hilo in Kawlgam bup khanlawhna hangin pawlpi tuamtuam hong piang ngeingai a, tua a piang pawlpi tuamtuamte in Tedim gam zong hong ban to zel ahih manin pawlpi tampi tak hong om hi. Adiakin 1990 kum khit lam ciangin Zogamah pawlpi pen pateh po in hong po ziahziah a, a kipkip tawh a mang kik tawh kiciau ngeingai hi. Khua pawlkhat khat bangah inn khat pawlpi khat zah phial in om a, inn nga pawlpi nga cih dongin hong khang to hi.

Laigelhpa - Dong Za Mung

Reference :
1. U Ba Khin (Hanthawathi)- Foreign Mission Group (Yangon: Hanthawathi Publishing House, 1906)
2. Go Lam Pau- A Chay Pia Myanmar Khrityan Thamaing (Yangon: Phileo Mission, 2014)
3.  Rev. L. Tuan Khaw Kham Ngaihte--Christianity In Myanmar and Its Progress (Yangon: Mr. Kap Khan Pau,1998).
4. Luan Za Cing--Tedimgam Christian Tangthu le Rev. Sukte T. Hau Go Tangthu (Yangon: Luan Za Cing, 2010).
5. Khen Za Sian—Zomi leh Biakna (Kalaymyo: Khen Za Sian, 1993)

Magazine
1. Chin Evangel Centenary Magazine (Yangon: Magazine Committee, 2000)
2. Rev. Neng Suan Thang- Ministry Golden Jubilee Magazine (Cikha: CLBC, 2010)
3. Sukte Beh le Tedimgam Tangthu (Tedim: Magazine Committe, 1996)
4. Faith Baptist Bible College & Seminary- Tenth Anniversary Magazine (Tedim: FBBC&S, 1996)
5. Evangelical Baptist Convention- Silver Jubilee Magazine (Tedim: EBC, 2000)
6. Evangelical Baptist Convention- Pearl Jubilee Magazine (Tedim: EBC, 2005)
7. Upna Laigil Vol.7, No.9, September 2015

Laigelhpa Sia Dong Za Mung in Zomi eLibrary / Laibusaal ading ding Phalna hong piak ahi hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: PASIAN THU KAWLGAM LE ZOGAM AH. Agelh - Dong Za Mung Description: Rating: 5 Reviewed By: Cinpu Zomi
Scroll to Top