728x90 AdSpace

Hot
Menu
Zon-ol na Donate

Latest News

TATE IT DAN ZONG SIAM KULHI VEH AW. Agelh – Rev. Thang Do Khen

TATE IT DAN ZONG SIAM KULHI VEH AW
Agelh – Rev. Thang Do Khen
Pastor of zcf- canaan ,Malaysia

Kong it Zomi ulehnau,

            Leitung galpi khatna khit Germany gam thonginnpi khat sungah a ki it mahmah thongkia mi nih na om hi.A nih tuak un mithat hi a, a ki thahlup ding ni uh ngak a om ahi uhhi.A kithah dan ding pen khau tawh khai lum ding ahih kei leh setpi tawh a gawng kitan zaw ding ahihi. Tua pen amau ki telsak ding ci se citciat hi. (A nuam zaw bel om tuan kenteh maw) Tua lai ah amau mah bang mithat thahlup dingni ngak mi 100 val bang om ci zen hi.Amaute min pen John leh Mark hi a, neu lawm khangual ki-it mahmahte ahi uhhi.

            John leh Markte nulehpate pen mi hau, mi nuamsa sanggam numei pasal tawh kicing innkuan nuamte ahi uhhi. Tua bek hilo in Pasian a it, Pasian a zahtak Pawlsung Pawlpua ah zong  khualehtuite suanlehmuante zong na hi lailai uhhi.Amau zong nuamsa lua uh ahihmanin a tawp na ah hilh zawh nawnlo dongin gamtat sia  uh a,nikhat ni-in mi hong that khamawk ta uh hi. John pen a nulehpan it lua mahmah ahih manin Thukhen mangte leh Palikte mai et in misi lamte tawh kilemna bawl simin thongkiat nading pan honkhia uh hi. Mark ahih leh a nulehpa ten  a lawmpa John bangin na bawllo uh ahih manin Palikten man in thonginnpi va kidenna pah vingveng hi.


            Thong sung a tun ciangin a pualam tawh na kikhai lua mahmah ahihmanin nuamsa hetlo in kap in khitui luang luang mai hi. Mithat ahih manin puan sanpi khat kisilhsak pah hi.Tua puan sanpi pen thahdan thuak dingte kithah ni a tun mateng a kisilhsak ahihi. Hithu a theih ciangin dahin, lau in, lungleeng in hehpih huai mahmah hi.A lawmpa John phawk in hamphasa mahmah hi. A nulehpate tungah heh mahmah in, khasia mahmah a, mudah zo liang hi.

            Hunte hong beibei a, maikha ni 15 ni zingsang nai 12 lian kithat ding mi 12 sazian suanglaipi tungah kisuang ta hi.Tuate sungah John zong na kihel hi. Palik ten smpah a,na nulehpa tawh na kimuh nop leh tua ni zingsang nai 10 pan nai lang sung kimu theiding cih vaikhakpah hi.Tua thu a zak ciangin Mark zong lau mahmah in,zan thapai ihmu theilo in a bei dongna pan Zeisu tawh na kimu kha hi.

            A sawtlo in a lawmpa John tawh  lametlohpi in kisilna tuikuangah na kituak kha uhhi. John pen a lawmte tawh a kitot na pan in nupi naupai laikhat na that kha leuleu a,thukhen mangte kimai et thei nawnlo ahihmanin thong sung a va tung ahihi.Amah zong thong pan in puansan tualpi khatmah tawh na ki dawn  tuahpah hi. Banghangin puan san  kisilhsak cih thu zong Mark in a gen ciangin John zong laulua kisa in ling kelkel liang hi.An nee zolo, tui dawn zolo ihmu theilo lai uh ahihman in a nini in gawng semsem in mi thatzo ding mellehsa zong nei nawnlo ta uhhi.Kisik in kapkap uh a,ahi hangin bangmah phattuam na om nawnlo hi.

            Tua bang kawmkal pan in thongkiate ading lungdam huai  mahmah thukhat hong ging hi.Tua thu in bang thu hiam cih leh Kumpipa  kum (50) cin lungdam na pawipi kikham dinga, "thongkiate khempeuh zong kikhah khia ding ( Amnesty)" cih thu ahihi. Mithatte nangawn khah ding cih thu kiza hi. Hih thu hangin John leh Mark te lawmta zong ihmu theilo liang in lungdam leuleu uhhi.

            A zingsang ciangin thongkiate a banban in sam in ciahsak uhhi.Mark nulehpate zong thong kongah tapa dawn dingin na ding thiutheu ta uhhi. Mark zong a min kisam tautau a zak phet in thakhat in hong diangkhia pah a,a nulehpa tawh kimu in nuamsa mah mah uhhi.A innkuan un lungdamlua uh ahih manin maizum khuallo in Pasian hehpihna hong phat ziahziah uh leh ansaipi khat sung buppi  thawnpah ziah ziah a, mikhempeuh daipah khipkhep uhhi. Banghang hiam cih leh Mark in  Zeisu tawh a kimuh khak na thute teci napangpah  ziahziah ahih ciang a mi khempeuh in lamdangsa uhhi. 

            A lawmpa John'  nulehpa te zong a tapa dawn dingin hongpai kheu kheu uhhi.Mi bei keeita John lah hong paikhia thei peuhmahlo hi. Palik te a dot uh leh John pen theimah ung. Amah pen mi tampi na that kha mawk ahih man in kisuaktasaklo hi, amah pen  mai kha ni 10 ni zingsang 12 lian in kithat ding ahihman in  na kimuh nop uh leh nai 10 lap in hongpai un,nai lang sung kimuh khuan om ding hi,ko kong huh theihna uh tua ciang bek hi ci-in a nulehpate theihsak na laikhat zong piapah hi.

            John kithah ding ni zingsang nai 10 lap in a nulehpate a tapa tawh kimu dingin hong tungta uhhi. Ahihangin John ahih leh nulehpa mu dingin hong pai khialo hi.Palikten a va sap uh leh utlo, ken munuam keng,ka nulehpa mu ngam keng, hih lai na piaksak in cin Palikpa lai ip khat pia hi. Tua lai sung ah" Kong it ka nulehkapa..Ka lawmpa Mark pen a hunlap in thongsungah thuhilhna ngah kha ahih manin a hunlap in suakta a,kei ka hih leh ka nulehpate it luatna hangin  a si ding ka hi ta hi,ka lungleenglua  ahihmanin hong mu ngamlo hi zaw ing. Tui buasa kiluak kik thei nawnlo hi.Ka sih hunding nai ta a,nai lang bek in samlai ahihmain kei hong manggilh ta unla, lungnuamtakin na ciahkik un,...laikhak nong it mahmah uh, na tapa hai keimah John" ci-in lai khat na nusiat hi. (Hih thu i et ciangin John zong Mark mah bangin a hunlap in thu kihilhna thongsung va tungkha hi zaw leh anih mah un suakta khawm thei taktak ding uhhi. John nuleh pate in a tapa John a itluat manin sihsuah zawsop hi ci leeng kinial zolo ding hi.) 

            Zomi ulehnaute aw hi thu limtakin ngaihsut huai mahmah hi. Tate itlo, tate ngailo kuamah ki omlo ding hi.A hizongin "tate it dan zong siam kul hi veh aw" ci ni maw guai. Laisim khempeuh Topa kha siang tho in hong lawngin hong telsiamsak ta hen. Amen.

*(Naupang khat a neulai-in lampi man tawnsak lecin, a teek dongin lampial nawnlo ding hi...Paunak 22:6 )

Source :
from:Thang Do Khentdkhenmb@gmail.com
reply-to:zomidaily@googlegroups.com
to:ZD Group <zomidaily@googlegroups.com>,
ZomiAG <ZomiAG@yahoogroups.com>,
ZomiMC <ZomiMC@yahoogroups.com>,
Zomi Daily <zomidaily@gmail.com>,
zominam <zominam@yahoogroups.com>,
MualBeemInnKuan <MualBeemInnKuan@yahoogroups.com>
date:Sun, Aug 28, 2016 at 7:27 PM
subject:[Zomi Daily] TATE IT DAN ZONG SIAM KUL HI VEH AW

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: TATE IT DAN ZONG SIAM KULHI VEH AW. Agelh – Rev. Thang Do Khen Description: Rating: 5 Reviewed By: Cinpu Zomi
Scroll to Top