728x90 AdSpace

Hot
Menu
Zon-ol na Donate

Latest News

ACHSAH (Aksah ci-in sim in) A ngah ding hamphatna la thei, Adeih thuah Numei.

ACHSAH
(Aksah ci-in sim in)
A ngah ding hamphatna la thei
Adeih thuah Numei
­Josh 15:16; Judges 1:12, 13; 1 Chronicles 2:4, 9


Agelh -  Rev. Dr. John Thang Hum (Ph.D) leh 
Dim Lun Zam

                                    Achsah (Aksah) pen Kaleb in khatbek aneih tanu ahihi. Kaleb i cih pen Isrel te Kanan gam a zuatlai a Joshua tawh kibang a, thuman tak a, makai Moses nungzui khat  ahihi. Achsah min khiatna ‘Kizem’ cih nopna hi. Sanggam pasal zong 3 nei hi (1 Khang 4:15).

                        Othniel tawh kiten na
                                    Joshua in Pasian thupiak bangin Kaleb gamh (tanh) pia hi. Kaleb in ama ngah gamsung pan Anak mite hawlkhia hi. Alak ding maban omlai ahih manin lungkim theiloin la suak ding ngaihsun hi. A mahmah pai kul lo a, apian theih nading in tua dan a-ut, a lazo ding mi a om leh a tanu pia ding cih kamciam pia hi. Kaleb sanggampa tapa, Othniel in tua thu azak ciangin lawp mahmah a, va kuan pah in galte a omlai teng hawlkhia siang hi. Tua ciangin Caleb in a kamciamsa om bangin a tanu Othniel pia hi (Thukhente 3:8-11). Hih luah ding gamah amau gamh (leitang) thupi mahmah hi. Banghanghiam cih leh Izipt gam ah, na nakpi tak  asep uh hang aluah khak ding bangmah om lo hi. Atu atate tungah a nusiat ding vangil leh leitang khat zong om lo hi.

           
                        Leitang nget behna
                                    Hih a ngah nasa uh Negeb gam pen leitang hoihlohna sehtak gam ahihi. Tuikhuk gina omlo in ankung leh singno ki ciing theilo ding na mun ahihi. (Hih Negeb zangkuam pen Isrel kumpi te siamna hangin tu hun in singno leh lo hing tawh dim hi). Aksah in a pasal tawh  kikum in a pa kiangah tuikhuk omna gam teng zong na nget beh hi. Caleb in zong nungngat san het lo in na pia pah hi.

                        Thukhupna
                                    Aksah leh a pasal gamtatna huaiham vai asa zong om ding hi. Ahi zong hih Aksah te nupa gamtatna pen kha thu tawh kipawl khat ahihi. Kha lam ah zong Pasian in duhhop ding hong deih hi. Mi khenkhat te in, Pasian in i kisapna hong thei a, bangmah ngetnget kul lo hi, a ci pawl zong om hi. Ahi zong in LST in I kisap thute Pasian tungah nget tangtang ding ahihna hong gen hi. Ngen lo a hong ki pia na tampi I ngah hi. Ahizong in Pasian in I nget ding hong deih hi. Ih nget ciangin; khatna ah- Pasian in na khempeuh I bulpi ahihna pulak I hihi. Nihna ah- Pasian in kizopna deih Pasian hi-a, deih leh sap ngetna in kizopna nei ih hihna hong lak hi. Athumna ah- Pasian pen a cingh Pasian ahihna hong thei sak hi. Luke 18 na-ah, lungkia lo a, ih deih, i kisapte i ngah masiah nget ding ahihna meigong nupinu tangthu tawh na genteh  hi. 1 Khang 4:10, ah zong Jabez in Pasian tungah duhhoptak in thu na ngen a, Pasian in a thungetna diksa in pia hi.

                                    Pasian in leitung nate sang Kha Siangtho nget ding hong deihsak zaw hi. Leitung nate I kisap lam thei hi. Ahi zong tuate sang a kisamzaw abulpi Kha Siangtho ahihlam hong gen hi. Aksah in tua sehtak gam ahoihsak theih nading a kisam tuikhuk ahih na thei hi. Aksah apil ahi hi. Pasian in thupha apiak mite en leeng, a minthan na ding azangh kik thei ding mite zong na hihi. Late 2:8 na ah, leimong donga I  nget ngam ding Pasian in hong gen hi,’.

                                    Aksah leh a pasal in tua  nungsang ah suan leh khak bangzah nei a, bangteng sem hiam cih i theihnon loh hangin Pasian in maipha pia ahihna I mu hi. Othniel in a sungh pa lunggulhna tangtun in, Israel mite gal pan a hutna ah Pasian lungkim hi cih I thei hi.

                        Dotna
1.    Aksah pa Caleb thu LST ah bangci dan in gen hiam? (Gamlak vakna 14:20-35 sim in)
2.    Othniel bang cidan mi hi ding ki ngaihsun thei hiam?
3.    Aksah in banghang apa tungah tui khuk te nget beh hiam? Hebia 13:5 na tawh etkak inla a kilam danna gen in.
4.    Aksah in tuhun ading khalam thu bang hong gen hiam? (Matt 7:7-12;1 Kor 14:1), te tawh et kak in.


 Source :
LAI SIANGTHO IN A CIAPTEH NUMEI PIL LEH THAHATTE (Laibu)

Laigelh Rev. Dr. John Thang Hum (Ph.D)  in Zomi eLibrary / Laibusaal ading in phalna ahong piak ahi hi.


Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: ACHSAH (Aksah ci-in sim in) A ngah ding hamphatna la thei, Adeih thuah Numei. Description: Rating: 5 Reviewed By: Cinpu Zomi
Scroll to Top