728x90 AdSpace

Hot
Menu
Zon-ol na Donate

Latest News

Leitung ah Khialhna Nam 7 (7 Blunders of the World). Agelh - Pau Sian Lian

Leitung ah Khialhna Nam 7
(7 Blunders of the World)
Agelh - Pau Sian Lian

India minam makai pipa Gandhi – in amah a kisuamlup madeuh 1948 kumin hih thu a gelhkhiat hi-in, a tupa Arun Gandhi na pia man hi. Hih khialhna nam 7 pen leitung ah thumanna, diktatna, a om theih nadingin tudong mah a ki tkak den, kizang, a kigen, a kizang mun kammalte hong suak hi.

1. Nasepna omlo Hauhna (Wealth without Work)
Lai Siangtho sung mahmah ah zong “Na a sem nuam lo mi peuhmah an ne kei-un” ci-in kigelhi (2 Thesaloni 3:10). Nasem lo-in hauhnop na-in lamdawt tot nopna hipah-in leitung thu le Pasian thu-ah san theih thu hilo hi. Leitung ah buaina, siatna tamzawte en lehang, gim-le-tawl thuak nuamlo pawlkhate’ sun khatthu zan khatthu-in a hauhnop man uh na hilel hi. Na vawh bangin na-at ding hi, cih kammal a om mah bangin na khat peuhpeuh i deih leh tua tawh kituak manpiakna, piakkhiatna, tha lawhna a om hamtang kul hi.


2. Kisuantheihna omlo Nopsakna (Pleasure without Conscience)
Mihing khat-in a lungsim sungah kisuan theihna a neih nawn loh ciang siatna bawlna-ah nopsa in ngeina bangkhat-in nuntak pih hi. Tua kisuan theihna cih-in Pasian in Ama tate siatna pan kihep theih nading ong piak thupha khat ahi hi. Nuntak-ah nopsak ding pen Pasian deih mahmah thu hi, ahi zongin a uang, khengval ding pen a diklo bekhi. (Thuhilhna 11:9)

3. Gamtat Hoihna omlo Pilna (Knowledge without Character)
Pilna neihlohna-in lauhuai mahmah hi. Pilna neite hong gamtat siat uhteh hong lauhuai zawkan thei hi. Pilna cih in a pillote sang hoihna lam le siatna lam a koikoi ah kiva zaw cihna hi photphot hi. Hitler, Binladen, Bill Gate le Nelson Mandellate mipil vive hi-uh a, gamtat hoih le hoihlo bek kilamdang hi. Pilna neina pi-in a nuntak pihlo te lah sum-le-pai nei napi a zangtheilote bang uh hi.

4. Diktatna omlo Sumbawlna (Commerce without Morality)
Hauhna ding, meetna ding bek ngim a, na a kisepteh midangte khem ding, suh ding, suksiat ding, zawhthawh ding ol mahmah hi. Thunei le mihaute`n meet nading bek et luatna tawh gam khat-le-khat a kizop uhteh gammite`n thuak lah mahmah uh hi. Singkungteng kiphuk, mualteng kisukham, tuipi teng kitepkang mang suak hi. Tu hunteh sum bawlna-ah zong meet nading bek en nawnlo-in mihingte le leitang mahmah kep-le-khoi ding (profit, people, planet) cih kingaihsun ta hi. Zekai lua ta hang a cici zong om hi.

5. Mihing vailo Khuakpilna (Science without Humility)
Leitung khuakpilna tawh mihingte cidam nading zatui zaha kibawl thei-in tua pilna mahtawh mi tampi siattheih nading thauvui thautang lauhuai tampi kibawl thei hi. Hih science pilna lam-ah theih gige ding khat-in hihthei, bawlthei peuh ing ci-in hih ding, bawl ding hilo hi. Mihing nangawn (cloning) cih tawh bawl tawm sawm uh hi. Pasian piansak ahi lo, leitung pilna tawh a kiphuak tawmte-in piansak nate ban zo ngeilo-in a hoihlo nungthuap (side effect) neithei gige hi.

6. Kipiak Khiatna omlo Biakpiakna (Worship without Sacrifice)
Gamtatna omlo upna in a si hi a, kipiakkhiatna-omlo biakpiak natawh kibang hi. Bang hang hiam cihleh ka gilkial laitak-in an nong pia-uh a, ka dangtak laitak-in tui nong pia-uh a, khualmi ka hih laitak-in zin nong do uh a, puan neilo-in ka om laitak-in puan nong guan uh a, ka cinat laitak-in nong veh uh a, ka thongkiat laitak-in nong hawh uh hi. (Matthai 25:35-36).

7. Dinpih Thugil omlo Politic (Politics withour Principle)
Politics cih limlim ah ah thu neihna (power) cih pen kihel hamtang kul hi. Ahi zongin tua thu neihna bang ding cih ngaihsut huai hi. Mizawng, thanem, mi namneu, numei naupang, meigong tagahte ading thumanna le diktak-in thukhenna a om nang hanciamna-in politic taktak hizaw hi. Tua thugil taktak dinpih lo-in angsung vaibek a thei mikhat-in thuneihna hong ngah teh a utut-in hong gamta-in zuaukhem, gitloh, ngongtat, suksiat ding peuhmah cikzia lo hi.

Source :
 “Bucing Khantohna le Picing Ki-ukna” Laibu
Agelh - Pau Sian Lian

Leigelh Pau Sian Lian in Zomi eLibrary / Laibusaal ading in Phalna hong piak ahi hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Leitung ah Khialhna Nam 7 (7 Blunders of the World). Agelh - Pau Sian Lian Description: Rating: 5 Reviewed By: Cinpu Zomi
Scroll to Top