728x90 AdSpace

Hot
Menu
Zon-ol na Donate

Latest News

Makai Leh Khensatna. Agelh – Lian Muan Kim

Makai Leh
Khensatna
Agelh – Lian Muan Kim



President Reagan a neulai in, khatvei, khedap khat lei  dingin sumbuk ah pai hi. Khedap tampi lak ah nih  hoihsa in enen a, ahi zongin koi zaw lei ding cih khensat thei lo ahih manin guakciahkik hi. Tawlkhat khit  ciangin hong kithawi kik leuleu a, tua khedap tegel mah en thapai in a leizawk ding a thei tuan kei hi. Tua leh khedap zuakpa in: Naupang pa aw nang na khensat theih kei a leh mi dang khatpeuh in nang a dingin hong khentat sak ding hi, ci in khedap khat mawkpiak in ciah sak hi. Reagan in: Ken ka khensat kei a leh mi dang khatpeuh in hong khentat sak ding hi mah veh e, ci-in hih thu mangngilh nawn lo hi.

Makai khat in tupna ngimna a neihkhit ciangin tua- tawh kizui in kalsuan pah ding cih a khensat ding ahi hi.  Gamtatna khat peuhpeuh pen khensatna khat peuhpeuh pana hong piang hi-a, khensatna omlo pi-a a piang na khat beek om lo hi. Tua hi-a, makai khat in a hunzui in na khat peuhpeuh zong manlang tak leh kician tak in a khensat theih ding kisam hi. Midangte leh makai pa muh zia zong kibang thei, zong kibang lo kha thei ding hi. Tuabang hun ciangin khensatna khat peuhpeuh a nei ding pen makai pa ahi hi. A zi, a ta leh a lawm a gualte peuh zong hilo a, a mah ngiat ahi hi. Tua banga khensatna neih theihna bek in makai ahih lam kilang sak hi.

Khantoh ding leh
Kiamsuk ding,
Makai pa
Khensatna ah
Kinga hi.


Vai khat peuhpeuh ahi zongin sepding bawl ding khat peuhpeuh a om ciang ahi zongin mipite in lunghiang nei thei uh ahih manin makai pa mah in a khensat kul hi. Sepding seploh ding khensat ding a om ciangin makai siam, siamlo zong kilang hi.

Pasian' innkuanpih suah theihna dingin mimal mah mah in Zeisu Honpa le Topa-a sankul hi. Amah i up ding leh i uploh ding mimal khensat ahi hi. Ahih hangin hih makaihna vai ah makai pa khensat khat pen mipite khensat mah tawh kibang ahih manin makaipa khensatna a hoih leh vaikuang a, a hoih kei leh kuanglo hi.

Tua ahih manin thu khensat ding khat peuhpeuh a om ciangin makai pa mah in khensat bek thamlo in a pilvang mahmah ding kisam hi. A khensatna hangin thuak a kul le zong thuak, sih a kul le zong si ngam ding hi.

Joshua le Caleb in nungkik lo ding, manawt ding cih a khensat uh ciangin mipite'n suang tawh denlup sawm uh hi. Mipite' deihna zuituan lo uh hi. Thuak a kul le thuak, sih a kul le si dinga kiging uh ahi hi. Tua banga Pasian muanna tawh a khentat man un gualzawhna Topa‘n pia hi. Hih tegel a kipat dan uh leh a khensat dan uh hoih ahih manin a tawpdan uh zong lungkim huai mahmah hi. Joshua in hoi lo in Pasian makaihna zui tinten a, amah bek zong hilo in a innkuanpihte tawh Topa na sem uh hi (Joshua 24:15). Caleb in kum 85 a phak ciang nangawn in: Hih mual hong pia in, ci lai hi (Joshua 14:12). Migolte ahi a galte kihta nai tuan lo hi. Hih tegel in Pasian piak ahi a tupna, a ngimna uh bangin kalsuan uh a, nungkik ngeilo ding in khensatna nei uh ahih manin gualzo takin Pasian kiangah ciah uh hi.

Sawlu kumpipa Davuih khut sung a tun laitak in Davuih nasem pa in thatnuam mahmah hi. Tawm dawtsuk ziau leng nihvei dawtkik kul lo ding hi, cikeeimawk hi. Davuih in amah thah dinga a zongzong pa Sawlu pen that ding maw thatlo ding cih tu'n a khensat ding ahi hi. A nungzui pa khensatna peuh na mang kha hileh Pasian sathau nilhpa tungah a khialkha ding ahi hi. Ahih hangin Davuih in Pasian aitna leh a zahtakna tawh khensatna hoih hong nei thei-a a khutkhial kei hi (Samuel masa 24:1-7; 26:7-12). A that nop loh bang teh a nungzui pa'n Davuih mawhsak khaphial ding hi. Hih lai mun ah khensatna hoih a nei Davuih pen makai hoih ahih lam hong kilang mahmah hi.

Pasian kammal
Muanglah ke’n la,
Nang theihna
Suang ke’n;
Khensatna maan
Na nei ding hi.

Topa Zeisu nungzuite lakah makaipi pen Pitazuh ahi hi. Khen-satna khat peuhpeuh zong nei thei mengmeng ahih manin pahtakna zong ngahthei zel hi. Tua kawmkal ah khatvei khensatna hoih hetlo khat hong nei kha hi. Kum nih val sung bang a nung a zuihpa Topa Zeisu a sihkhit teh thokik ding hi cih hong um zo nawnlo hi. Tua leh ngabeng dingin pai ning cih ngaih-sutna le khensatna hong nei-a nungzui 7 te in zong Pitazuh zui pah luailuai uh hi (Zawhang 21). A zenzen in Topa Zeisu na kilaakkik lo hileh a khan tawn ua ngabeng kik ding hi dihzen uh hi.  

Galkapmang Dwight D. Eisenhower leh a mi muan pawlkhatte in galpi nihna lai in a galkapte uh tawh a galkuanna uah khuadam lua mahmah, khuahun sia lua mahmah ahih manin manawt ding maw nawtlo ding, khuahun hoih ngak ding maw ngaklo ding cih khensat hak sa mahmah uh hi. Tua lai tak in Eisenhower in si ding maw hing ding cih a theihloh hangin manawt veve ding khensat ahih manin a sawtlo in gualzawhna dial hong khai uh hi.  

John Adams in U.S President a sep lai in a tembaw uh 300 Piancikte'n matsak hi. A gam ua tangmi pa ahi Charles Pinckney zong hawlkhia uh hi. Gammite hehluat mahmah amuh hangin John Adams in bang cih ding, bang sem ding, Piancikte do ding maw do lo ding cih a khensat thei kei hi.  1800 kum in kilemna bawl lai ahih manin a pa nasep pih teng khennih suak khin uh hi. Khensat dinga kilawm banga a khensat lohna in guallelhna piang sak hi. September 11, 2001 kum in World Trade Centre a kattum khit ciang President George W. Bush in hiamgamhte kap dingin na khensat khalo hi leh mipite'n a bangci ngaihsut uh tam! A kisam lopi khensatna dang khat hong neikha leuleu hi. Iraq-te kumpipa Saddam Hussein pen hepkhiat ding kithukim tek hi. Ahih hangin thauvui thautang tawh Iraq kap pah ding pen kithukim mel lo hi. Tua kawmkal ah Bush in ama khensatna tawh Iraq hong kapgawp a, sihna natna, a veng pak zo lo buaina le haksatna tuamtuamte hong piang hi.  

Sum
Deihluatna in
Mawhna
Khempeuh ih
Zungpi hi.
- Apostle Paul

Tua ahih manin makaipa khensatna tungah mite nuntak na ding leh sihna ding, Pasian na sepding le sep loh ding, a sia a pha sepding le sep loh ding kinga hi.  Khantoh ding le kiamsuk ding zong makaipa' khensatna ah kinga hi. Khensatna hoih in Pasian minthang nading, nang leh na nungzuite hamphat nading hi a, khensatna hoihlo in Pasian mindai nading, nang leh na nungzuite hamsiat nading ahi hi.

Khensatna Bangci Neih Ding
1.    Duhhop luatna leh hauhnop luatna tawh thu khensat ding hilo hi. Banghang hiam cih leh mikhat in To nih na sem khawm theilo hi (Matt 6:24). Sum leh Pasian na kisem khawm theilo ahih manin sum deihlua-a a duhhop mahmah khat pen piangthak makai hoih suakthei lo ding hi. Banghang hiam cih leh sum deihluatna in mawhna khempeuh ih zungpi hi (Tim masa 6:10). Duhhopna tawh khensatna a pia makai pa in dongtuak ding hi. Tua ahih manin sum leh pai sangin Pasian mah thupisak zaw a, tua lungsim mah tawh khensatna i neih theih ding thupi hi.
2.    Ei angsung bek khualna leh inn kuanpihte i huai nading ciang bek ngaihsutna tawh khensatna neih ding hilo a, vai khat peuhpeuh ah Pasian mah i ultun sak pen ding thupi hi.
3.    Mite pahtaak ding leh lungdam nading ngaih- sutna bek tawh khensatna neih ding hilo hi. Zeisu in a kumpi gam phut dinga hong pai hi napi makaite leh mipite pahtaak ding na asep sangin Pasian lungdam nading nasem in khentatna khat peuhpeuh pia zaw hi. Ei minthan nading sangin Pasian minthan semsem nading tupbel in nei-a, tua lungsim mah tawh khensatna i neih ding ahi hi.
4.    Khensatna i neih ciangin a thupi pen in thungetna ahi hi. Makai hoih pen ahi Zeisu in khensatna khat peuh peuh a neih ma in thungen masa den hi. Nungzuite' a teel dingin zan tawntung thungen hi. A galte' khutsung ah a kipiak ma in thungen masa hi. Khensatna khat peuhpeuh a neih ma in thungen masa ahih manin khial ngeilo hi. Mipi mai ah a sep ding khat peuhpeuh pen mipi om loh na mun ah thungetna tawh zo masa hi. Mawhna a baanglo, makai hoihpen ahi Zeisu in khensatna a neih ma in thungen masa den ahih leh piangthak makai khat in bang zahta in nget huai zaw lai hiam! Thungetna gina neilo pi in khensatna hoih lam-en kei ni. Makai pilvang a suak dingin kilam-en kei ni.

Khensatna banga Bangci Kalsuan Ding
Thukhensat ding haksa lo a, khensatna banga kalsuan pah ding haksa hi. Ahi zongin khensatna bangin kalsuan kei le hang khensat thaman om lo hi. Tua ahih manin khensatna bangin bangci kalsuan thei ding ihi hiam.
·         Gelhkhia masa ding 
·         A bei ding zah geel ding 
·         Khiatna neisak ding 
·         Na dang tuamtuamte sangin thupi sak masa ding 
·         Kician sak sitset ding 
·         A piangthei dingte khensat ding 
·         Pawl zawn ding 
·         A kisam banga hong huhding mi zong ding 
·         Kalsuan khia ding 
·         Gualzawhnate hangin pahtakna pia ding 
·         Tupna mitsuan gige ding 
·          A nuam theithei dinga lawpna tawh sem khia ding

Endnotes
1)    Dwight D. Eisenhower pen Oct. 14, 1890 in Denison, Texas ah suak hi. Presbyterian pawlpi mi hi-in 1945-48 dong USA General leh Statesman sem hi. January 20, 1953 in 34th president suakin term 2 sem a, January 20, 1961 in John F. Kenedy in laih hi. 1956 kum in America state khat le khat kikawm na ding lamzikpi bawl kipan uh a, ama President sepsung mah in America thuletpi dingin In God We Trust kipsak uh hi. Tua In God We Trust pen  1957 kum in a sum tung uah khen uh hi. Mamie Geneva Doud tawh ta 2 nei uh a, March 28, 1969 ni-in leitung nusia hi. US President hoih pen 10 lak ah khat in kihel a, pahtawina leh minphatna tampi ngah hi.
2)    George W. Bush pen July 6, 1946 in New Haven, Connecticut ah suaka, sanggam 5 nei hi. Episcopal pawlpi pan khangkhia hi na pi, a zi Laura Bush ih pawlpi ahi United Methodist pawlpi mi suak hi. A pu Prescott Bush in Connecticut ah Senator sem a, a pa George W. H. Bush in 1989-1993 sung US President sem hi. Yale University pan in BA ngah a, Harvard University pan in MBA ngah hi. Kimawl siam na pi laibel kiva khollo hi. 1968 in Vietnam gal kuan dingin galkap tum in vanleng galkap suak hi. Vanleng galkap a suah na dinga laivuan na ah a 25 na bek ngah in ong liamliam sam hi. Texas Governor a 46th na kum 5 sung sem a, tua ciangin January 20, 2001 in US President a 43th na suak hi. Nihvei a kizom in President sem hi.  

Source :
Makaih Pilna Laibu

Lai gelh Dr. Lian Muan Kim in Zomi eLibrary / Laibusaal ading in Phalna ahong piak ahi hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Makai Leh Khensatna. Agelh – Lian Muan Kim Description: Rating: 5 Reviewed By: Cinpu Zomi
Scroll to Top