728x90 AdSpace

Hot
Menu
Zon-ol na Donate

Latest News

Sumtawh Kileitheilo. Agelh – Pau Sian Lian

Sumtawh Kileitheilo.
Agelh – Pau Sian Lian


Zomite'n i kamzat mun mahmah khat pen “I zawn in hong haisak” cih ahi hi. Hih kammal Zomite sungah a khiatna gencian kullo, phen kikkik kisam lo hi. Sum neih loh man-in na hoih khatpeuh i theih hang, i kitheihmawh bawl hi. I deihte i kideihmawh bawl a, i duhte i kiduhmawh bawl hi. Sum nei kei lehang, sang pilna i sinnop hang kikah zolo-in, i ci a nat hang zatui zaha lei zolo-in, i kibawl zo kei hi. Zawnna tawh kisai haksatna Zomite kiang hilhcian kul peuhmah loin kithei ciat hi. Mi pawlkhatte bangin sum pen pasian nihna (second god of this world) ci uh a, laigelh siam Mark Twain in, “Sum neihlohna-in siatna khempeuh zungpi hi” ci liang hi.

Ahi zongin sum tawh kisai ngaihsut huai mahmah thu phawl khat om hi. Harvard University a professor sem, thumanna, diktatna (justice, morality) cih thute a hilhcian Michael Sandel in sum tawh kisai khenkakna khat nei hi. Tuate nih-in market economy le market society cih ahi hi. Summet bawlna le mihon kithuahna-ah metbawlna cih dan ahi hi. Market economy cih summet bawlna ahih leh gam khat peuhpeuh khantohna, hauhna, cihtheih nopsakna a ngah nadingin zat loh phamawh vanzat (tool) khat ahi hi. Vanlei vanzuakna leh gam khat-in sum-le-pai a hauh nop leh adang gam tuamtuamte tawh kizom kikawm-in summet a bawl kul hi.


Tua lo market society i cih teh mihingte kizop kithuahna-ah hong om thak ngaihsutna zia khat hi-in nisim nuntakna ah sumlei sumzuakna mit tawh na khempeuh etna ahi hi. Vanzat (tool) hi nawnlo-in mipite’ tenna (place) ahi zongin na khempeuh a meet ngah nang etna tawh nuntakna hong suakta hi. Mihingte nuntakzia kilaihna tawh kisai a kician et-the, hih market economy a kizat kawmkawm mah-in tuma kum 30 khit lam a kipan market society cihna lam-ah mihingte nuntakna hong kilaih mangta, ci uh hi. Sum-in zawhlah, neihlah, leilah nei khollo ahih man-in na khempeuh a man kiciangtan kha pahpah ta hi.

Ei mite mahmah zong i haksat luat man-in lampi tuamtuam tawh nuntakna a lemzaw deuhna, gam thumna lam kizin, kiteeng in, na va kisem ngeingai hi. Kuamah mawhsak theih hilo hi. Ahi zongin a patauh huai khat-ah sum-le-pai i zon kawmkawm-in u-le- nau kikal ah, innkuan vai-ah, tanau meeltheih kithuahna-ah sum mit bek tawh en-in, supna meetna ngaihsutna lam bekbek tawh thu i khensat khak leh hong diklo ding hi. Vai khat peuhpeuh met nading bek en-in lawm-le-gual teelna, zi/pasal ding teelna, sung/mak ding teelna, pawlpi kihel nading teelna, nasep teelna, pilna sang teelna, makai ding teelna, pawlpi sia/upa ding teelna, cihte a kipan mihing te kithuahna sungah sum metna ding bek 100% mitsuan kawm sa-in thu i khensat khak loh ding thupi hi.

Bang hang hiam cihleh sum tawh a kilei theilo, sum tawh man a kiciangtan theilo pawlkhat na om hi. Summet bawlna (market economy) lam ah bel demand and supply, incentive cih theory tuamtuam te thupi mah hi. Ahi zongin mipi kithuahna ah tuate lem den lo hi. Kikhial thei hi. Hih vai tawh kisai thu piang taktak pawlkhat en ni. Switzerland gamah meitha lakna nuclear power a neihna hangun buaina khat tuak uh a, nuclear setzung pan a paikhia ninte a paih nading uh mun mulo-in buai mahmah uh hi. Mihingte’ cidamna susia thei ahih manin kua mah-in amau huangah paih ding phallo hi. A tawpna ah kumpite’n tua ninte paih nading a tamzawte ading patauh tawm pen leh mun lem pen ding a zon uh teh mualtung khat a om khua neu khat mu khia-uh hi.

Tua ahih manin khua mite` phalna a nget uh leh tua khua mite’n altruism (midangte ading khualna) lungsim tawh amau ading patauh huai mah taleh khua mibup lak pan 51% in phal uh hi. Tua laitak-in thuneite’n khuamite’ thukimna a ngah beh nading cih ngimna tawh ninbuak man liauna sum mihing khat-in kumkhat in EU dollar 6000 ta kipia ding ci-in, sum tawh na zol (money incentive) uh hi.

A tungin khuami 51% in a phalsa pen 25% ah kiamsuk zaw mawk a, summet bawlna pilna tawh a ki-et teh lamdang kisa mahmah hi. Ahang a kidot leh khuamite`n, ko pen gam-le-minam ka it man uh hi-in, sum deihna hi masa lo hi. Tua sum tawh nong zolna uh in ka gam itna lungsim-uh golh guknekna (bribe) bang hi, ci-in na dawngkik uh hi. Israel gam-ah mi gentheite huhna (charity) kipawlna khat omin, khangno sang naupang tampi kihel uh hi. Khatvei sumbawlna lam siam mipilte‘n mihingte` zia theih nop man-in tua sang naupangnote khen thum suah uh hi. Khen masate kiang mi gentheite huhna a thupitna ciantak-in a gen khitteh khuasung inn lusi-ah huhna va dong un ci-in sawlkhia uh hi. Khen nihna te zong tua bang mah lian-in thu a hilh khitteh sawlkhia uh a, ahih hangin sum na ngah zahzah lak uh pan 1% no hong kipia kik ding hi, ci-uh hi.

Khen thumnate zong tua bang lian mah hanthohtna a piakkhit uh teh na ngah zahzah lak pan 10% pen thaman in hong kipia kik ding hi, ci-in sawl uh hi. Tua tengin inn sim-ah huhna va dong kawikawi uh a, a man uh teh a ngah zah uh kisimkik pah hi. Tua khen thum lakpan sum tawh a kizol kilkel lo groupte-in sum tam zong zo pen mawk uh hi. 10% commission ngahte`n bel 1% ngah dingte sangin tam zong zo zaw sam uh a, ahi zongin met nading khat zong om kilkel lo a kipumpiak group masate ngah zah sang tawm ngah zaw veve uh hi.

Philippines gam a uk ngei kumpi gilo khat ahi Marcos uk hun lai-in, amah kumpi hihna pan a sawnkhia nuam, gam ading avei honkhat training a pia ngei Philippines te sia khat tawh ka kiho kha ngei hi. Ama hong genna ah Marcos kumpi hihna pan lakkhiat zawh nading in minam it a kipia khia nuam mi 100 val, gammang tulak a om mual khat ah kha khat val training ka pia uh a, lungsim lam kipattahna hita leh siamna tuamtuam ka hilh uh hi. A tungin mi 100 bang hong kihel napi sum nei zawdeuh, nasep hoihnei cihte pawl patauh lungkiatna tawh khat khit khat ciah uh a, a tawpna-ah mizawng daipam pawlkhat bek cian lai-in tuate tawh ma ka zom uha, gam ading ka kiphiakhia uh cih hong gen hi. Gam hoih khat lam nading hih mi zawngte kipiakhiatna zong neu lo hi, si-ngam ngiat uh hi.

Mihing kithuah kikholkhopna-ah sum mit tawh i et den keei khak leh kikhial mahmah thei hi. Itna, deihsakna, veina, lainatna, kipiakkhiatna, kipumpiakna, cihte cikmah hun-in sumbawlna pilna tawh kituat theilo, leitung sum man zah tawh kiciangtan theilo ahih lam mangngilh kha kei ni.

Source :
"Bucing khantohna leh Picing ki-ukna" Laibu.

Laigelh Pau Sian Lian in Zomi eLibrary/Laibusaal ading in Phalna hong piak ahi hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Sumtawh Kileitheilo. Agelh – Pau Sian Lian Description: Rating: 5 Reviewed By: Cinpu Zomi
Scroll to Top