728x90 AdSpace

Hot
Menu
Zon-ol na Donate

Latest News

ZO NGEINA KHUADO PAWI. Agelh - Thang Cin Lian

ZO NGEINA KHUADO PAWI
Agelh - Thang Cin Lian


Thupatna
Leitung minam khempeuhin a kibanglo Pau, Lai, Puansilh, Pawi leh Ngeina tuamtuamte kineikimciat a, ei adingin eiminam aa tekmah athupipen leh i gamluah ahi hi. Tua ahih manin khangthakte’n kemin zuunin i puah ding kisam hi. Zomi (Chin) te zong Leitung minamte sungah khat i hi hi. Kawl kumpi-in minamkhat in hong ciamtehna sungah, Zomite ngeinapawi dingin KHUADO PAWI hong ciaptehsak hi. Khuado Pawi pen Zomite pawilakah a thupipen leh Kumcin kumthak Pawi, Anlakkhit lungdamkoh Pawipi ahi hi. Thudang khat in genleng khagilo khempeuh hawlkhia in kisiansuahna pawi leh mailam adingin thupha ngetna, dawhna pawipi zong ahi hi.

Zomite’n ngeina pawi tampitak kinei hi. Khuado Pawi banah Sialsawm Pawi, Ton Pawi, Zunun Pawi, Sa-aih Pawi, Gal-aih Pawi, Khuai-aih Pawi, Tangza-aih Pawi cihbangin Pawi tampi kinei hi. Khuado Pawi pen Tedim kammal hi-in, Khua cih kammal leh Do cih kammal nih kigawm hi a, Khua cih kammal pen mun, hun genna in kizang hi. Do cih kammal pen hawl, not, bengkhia ahih keileh muak, dawn cihna ahi hi. Tua ahih manin Khua Do cih kammal khiatna in khatna-ah khagilo khempeuh hawlkhia, notkhia, bengkhia cihna leh, nihna-ah thupha Muak, Dawn cihna ahi hi.

Khuado Pawi pen Kawlte “mithun Pwe” (meivak pawi) tawhzong kibang a, Zomi sungah zong Haka te’n “Tho Puai” Thantlalang te’n “Thaithar puai,” Falam Laizo te’n “Fang er puai, Zangiat te’n “Dongpi puai,” Khualsim te’n “Tho puai,” Rulbu te’n “Kuk puai” Sim leh Zahau te’n “Thaithar puai”; Matupi te’n “Cak Zoem Pwe”; Kanpatlet te’n “Nampui Pwe” cihbangin lawhna mintuamtuam na neiciat uh hi. Tedim mite sungah zong khuakhat leh khuakhat i bawldan a kibanglo omkha thei ding hi. Bangbang ahizongin Ciingpikot khuamite Khuado Pawi bawldan kei theihna bangin hong gelhkhia ka hi hi.


Khuado Pawi Bawlhun
Khuado Pawi pen anlak (tuktun) khitteh a kibawl pawi hi a, nidang hunlai leh tuhun zong kibang nawnlo hi. Nidangin “Taang” kilimciin pen ahih manin tuuk tungbaih a, Khuadokha sungin kibawl hi, Mikangkha in August tawh kituak hi. Tuhun ciangin Vaimim leh Buh kilimciin ahih manin tuuk tunghak zawdeuh a, Taangkha beikuan Phalkha kipatlamin kibawl hi. Mikangkha in September bei ahih keileh October kipattawh kituak hi. Tua ahih manin Khuado Pawi pen ani akhate tungah kinga hizawloin, anlakkhit (tuuktun) hun tawh kizui-in kibawl Pawi ahi hi. Kumpi khuado pen October kha sungin kibawl a, Zogam ah kumpi zumte nithum sung kikhak hi. Philippines gam ah zong 2005 kum October 23 ni, 2006 kum October 29 ni, 2007 kum October 28 ni –in Khuado Pawi nopcitakin kibawl a, tua mah bangin Gam tuamtuam aom Zomite’n zong amaumun ciatah Khuado uh cihthu kiza hi. Zomite kha simdan: (1) Theinosihkha (2) Tuunkha (3) Dotakha (4) Dopikha (5) Zingkha (6) Gamkha (7) Taangsihkha (8) Khuadokha (9) Taangkha (10) Phalkha (11) Nokha (12) Kaukha te ahi hi.

Pawi Kiginkholhna Leh “Sawm” Thu
Nidanglai-in Zomi tangvalte a zineih masiah uh innkhat ah giakkhawm uh a, tua mun pen “Sawm” kici hi. Nitak khua hong ziin ciangin nungakte kiangah zawlhelin pai uh a, khuazatlam ciangin a “Sawm”ciat uh hong zuan uh hi. Khuakhat ah behzui-in ahizongin, khualiatna tawh kizui-in ahizongin “sawm” thum leh li om hi. “Sawm” ah mitampi lupkhop theihna dingin taupikhat kidawh deda a, tua pen “Thaam” kici hi. Tua lai ah makai khat om in tuapa pen “Thaammang” kici hi. Zan alup uh ciangin zanpuan a lumkhop ding neilo uh ahih manin khuadamlua mahmahin lupnatau (Thaam) nuaiah meiphualcih uh hi. Zanlup ciangin meiphualcih dingin singkeu tom uh a, “Sawm” ah puak uh hi. Tua singlomte pen “Thaamsing” kici hi. Thaammang makaihna bangbangin nasemin gamta uh hi. I pu i pa te’n pilna sangpipi neilo napi khatlekhat thu kimangin, vaihawmin kimakaih uh a, thu leh la khat peuhpeuh ah makaite thu mangin semkhawm diamdiam uh hi. Thaammang cihbangbangin gamta in kalsuan uh hi.

Khuado Pawi hun hong nai ciangin “Sawm” ah nungak tangval te’n nitak simin khuangtum, phiit lemin lasa uh a, Khuado Pawi adingin nakpitakin kigingkhol uh hi. Khuado Pawi bawl ding hun hong tuntak ciangin, Hausapa te’n upa makaiteng kimutuahin Khuado Pawi bawl ding hun hong kikum uh hi. Sim leh zo anlakkhit ding hun, khualzin gamvakte kimtheih ding hun, hunlempen ding ngaihsunin Khuado Pawi bawlni ding hong khensat uh hi. Tua khit ciangin “taangaupa” khua sungah khuami khempeuh zak dingin tang ki-au sak hi. A zenzenin Khuado Pawi ma in anlak a zonailo aom aleh zong khatlekhat kihuhin kilakpih kipuakpih uh hi. I pu i pate Christian hilo napi Christian nuntakzia tampi na neikhin uh hi. Thu leh la khat peuhpeuhah dahna nopna ah kipaisanlo, kinelhsiahlo, kitheih-mawh bawlseseloin khatlekhat kipanpihin kihuh diamdiam uh hi.

Meilahsat Ni
Khuado Pawi ciang meivak dingin Takkung panin Takciimte “Meilah” dingin sat uh hi. Tuhun bangin meivak tuamtuamte kineinailo ahih manin Zomite limzat pen meivakin “Meilah” ahi hi. Tua ahih manin pawi tunma in meivakdet dingin meilahsat masa uh hi. Pawlkhatte bangin Khuado ciang zatding ci-in kum kipatcil pan meilah a kigingkhol bang omliang hi. Khuado Pawi tawh kisai-in kithawi masak pen ni ahi hi.

Kaubet Ni
Kaubet Ni cihpen innsung khuasung aom dawi leh kau, khagilo khempeuh khawlkhiat, notkhiat, bengkhiat ni hi a, kisiansuahni ahi hi. Tuhun pauleh “Khuasiansuah Ni” ahi hi. I pu I pate hunlaipek in Zomite’n kumkhatin khatveita “Khuasiansuah” a kinei den nahi gige mawk hi. Tuhun ciangbekin a neitawm hilo in taanglaipek panin i zat pen a zomtoto i hi hi. Kaubet ni-in Pawl omkhawmta uh hi. Pawlkhatte’n inn ah akhawi uh khuaite hal uh, Pawlkhatte’n gamsunga om khuaite hal/sim uh hi. Khuaino pen Zomite meh lakah mehlim mahmah khat ahi hi. Pawlkhatte’n saphelh (zusa phelh.. etc.) awm/huanin pawl omkhawm uh hi.

Nitak sanggam melmak hunciangin khangnote a “sawm” tek uh ah kikaikhawm uh a, tua panin tualteekte innah pai uh hi. Khuaziinkhit ciangin Kaubeng dingin hong kipan uh a, “Tualteekpa” in meilahsippikhat de-in a veilamkhut ah tawi a, a taklamkhut ah tugakhat tawi hi. A nungah panmun nei honkhatin zui dendan in, tuate in thautawi khat , daktaltawi khat, zamtawi khat, tua khit ciangin mipi-in kinungzuih hi. Kaubeng dingin Tualteekpa hong kipan a, tuga tawh mimbeem taangbem teng satin “Kau aw ciahta in nazun na-ek namsia, nani nakha cingta hi manlangin ciah in” ci-in kiko vava kawmsa in innsungpipan kongbiang ah, innliim ah, innka-ah, tuangdungah, innkadawn atuntak ciangin nakpi-in kiko veva a, ciahta vow! ci-in a tuga tawh sialkong dengphei hi. Tua khit ciangin a nungah thautawipa in a thaulawn hi. Tualteekpa in a meilahsip khennih suahin, huangkongpi sak leh khang gawl tungah alomin suangin naangkhau tawh lomkhih uh hi.

Tua khit ciangin mipi-in Tualteekpa meilahsip pan meideciat in, kigualdiudeu in khuanawl muallam manawhin kipai detdat hi. Khuanawl mual tun ciangin paulap a tuamtuam zong uh a, gimlua tahang ei, i meilahsip zong tumta ei, ko hong zuizo nawn keinung ei, ci-in paulap tuamtuam zongin meilahsip lomkhat cihsimloh teng kisumit hi. Meilahsip lomkhat pen detsa in singdawn ah suangin naangkhau tawh lomkhih hi. Tua khit ciangin mipite daikhipkhep in ki-om a, khuazing sungah lampi zawtkhiankhian in innlam zuanin kiciah hi. Pailam in meilahsip mikim in kide/kivak a, khuangtawh zamtawh khagilote khuanawl dong kikha a, kinot khia khuanawl pan in daikhipkhep in innlam kizuan kik ciat hi. Hihpen a hawlkhiat kaute in aleh zuihkik lohna ding deihna ahi hi. Khuasung innsung aom khagilo, dawi leh kau khempeuh kido kihawlkhia, kinotkhiain innsung, khuasung kisiansuah ni ahi hi. Christian i hih mapek in mitin i muh theihloh khagilo, dawigilote tua bangin i pu i pa te’n nahawlkhia uh hi. Hibangin innsung khuasung na siansuah uh hi. Kum khat sung annek tuidawnte khempeuh nekkhialh dawnkhialh a omlohna dingin a siangtho a limci cidamna ansiangtho asuahna dingin asiansuah uh ahi hi. Zingciang khuavakkal ding kingaklah mahmah tek hi.

Ompi Ni
Phalvak tungin naupangte ihmuthei nawnloin thobaih uh a, sa emna dingin, khuapua lam ah singkangtom uh hi. Thangmualdawn ah ni hong suaktak ciangin khuasungah vok-haam kizaziahziah pah hi. Khuazangbup in vok-haam awging kiza a, Vokliante ahaam uunzawdeuh ahih manin ahaam i zakphetin, amau voklian go aive maw cih kitheipahliang hi. A tamzawin vokgo uh a, pawlkhatin “Meipum” a go zong om uh hi. Meipum cihpen Sial, Bawng cihte pawl hi. “Pawlsa” pen kumsimin innkhat khit innkhat ban pai-in a kikhawi ahi hi. Sagawhkhit ciangin naangkhau tawh voktuuk kiteh hamtang a, Papite a kiho uh ciangin “No tutung napawlsa uh alimci hiam tuuk bangzah” cih kammal pen dotmasakin kinei uh hi. Gentehna in: saleep hi, tuuklilebelitung hi, tuukngalebeliphei hi, Tuukngalezungkhat hi, nupituukguk hi e, cihbangin kidawng kik uh hi. Zomite’n ganhing liatna i gen ciangin a tuuk leh akii tawh kipulak a, amankiseh hi. Tuuk bangzah hiam/A kii bangtansau hiam ci-in kidongse hi.

Sun in khangno pawlkhatin nitakteh khuai lakna-ah puak dingin zozu innkhat lawhta, lawhneu khatta khon uh hi. Tua pen “Khuaisahzu” kici hi. Nupi Papite ahih uhleh innah sahuankawm in zutaak kisuah uh a, Zozukhum mahmah a dawnkawmsa un mailam nuntak khuasakzia ding kikum-tanghtangh uh hi. Sunni hong kaai ciangin nitaak annek ding kivaihawmpah hi. Nitaak annek baih ding kihamciam hi. Banghanghiam cihleh Ompini pen si-ansiah ding leh nitak ciangin Khuailak ding vailianthupi kineilai hi. Annek ciangin Khanghamte sanam umkeu khat tawh a tuamin kipia a, Uham khanghamte zahtakna upatna ahi hi. Tua bek thamlo in Uhamte ankuang sawkmasiah khangnote’n ankuang kisawklo ankinelo hi. Christian i hihmain Zomite ngeina sungah Uham khangham Pi leh Pu, Nu leh Pa te zahtakzia upatzia kineikhin hi. Tua bangin kumkhat sungah a kingaklah mahmah nitaak ankuang umkhopna kinei a, khatlekhat itna tawh sakibaakin zukitulh uh hi. Nitakan nekkhit ciangin naupangte sangoi leh sabaak pawlkhat tawi-in a lawm itte tawh lamdung lamkal ah “Zawl-an” kipuak dingin taaingeingai uh hi. Tua pen naupangte adingin kumkhat sungah nopsakpen pen hun uh ahi hi. Zomite i naupanlai i neutung hun mahin zong “Zawl leh Lawm” cih athupi sak, a kinekngaih vauvau a ki-it phadiakte i hihna kilang hi. Nungakte’n zong alawmngaihte uh ahawh ding lamenin , kongvang pan khuadakdak uh a, meh leh an khentuam in siah uh a, annek ding ngak uh hi. Hibang ngeinahoih tampi Zomite sungah i neikhinkhian hi.

Annekkhit ciangin papi te’n kumkhat sung hong nusia (misi) sazian om zahzah “sanam” (satak, asin, alung, akal, atuap, azel, cihte pawl...) naangkhau tawh khil-in, tua leh zutaak thawlkhat (tuhun teh niangtui) tawh sinungah puak uh hi. Tua pen “Si-ansiah” kici hi. Nidang lai-in sanam, zutaak, zu-ha, leh sathaute pua in hanmual ah asisate luhawmte (misi luhawm) anvakin sathau kinilh sak hi. A sisate zahtakpiakna lim hi a, a maute kha in hong theihi cih upna nei uh hi. Kisiansuahna lim zong ahi hi. Sihkhit nungah nuntaakna, kha nuntaak tawntungna omhi cihpen i pu i pate hun lai, Christian i suak mapek in tuabang upna na om khinzo hi.

Nitak khuamui ciangin khangno khempeuh “Minam-puan” tawh kizemin Khuaila dingin “Sawm” ciatah kikaikhawm uh hi. Kumkhat sung nungak tangval te ahoih pen ni, A vampen ni ahi hi. Khuaila dingin akipaitak ciangin daktal , Zam, khuang, phiit, naanglukhu nih, Khuaikhau, zubeltungneukhat pua in, mikimin meilahsip lompi khattek leh cimbeng sukvuisa honkhattek kipua hi. Pailamin lampi ah daikhipkhep in kipai hi. Kaubetni tawh kilehngatlian hi. Kaubetni pen pailamin meivak-tawh khuangtawh zamtawh, ciahlamteh daikhipkhep. Khuailak ciangin pailamin ki daikhipkhep leuleu hi. Khuailakna ding mun akituntak ciangin mihonpi munkhatah khawlin, “Siampupa” zubelneu leh naangkhukhu nih tawh khuaila dingin pai hi. Khuai pen meitawh hallo, phuisamin a khuttawh la-a, khuaibu sungpan khuaipheekhoihpen la-in, Khua gamlim tawh kituakin sak leh khang, nisuahna leh nitumna ciamteh in, naanglukhu nih sungah khupin akoihkhitteh Siampipa in phuisamin, tua khitteh mipite kiangah hong paipih hi. Mipite kiang hong tuntak ciangin mipite in meilahsippi khattekde-in, akhut uhah tawi uh a, khut khatlamtawh khuaikhau lenkawmsa in kigualdiudeu in khua-muallam zuanin hong ciah uh hi. Siampipa masa, daktal, zam, sialki leh phiitmutte in zomin gualzawhna tawh meivakde-in hong pai detdat uh hi.

Phiitmut kawmin “khuamual” hong suak uh a, mipite-in meilahkuangah cimbengvuite thehin tezaizai hi. Phiitging pen ngaih, zaknop mahmah in, soprano, tenor, alto, bass cihbangin aw tuamtuam tawh tum uh hi. “Khuamual” ah innngakte in zutaaklim pen tawh nadawn uh a, zozutaak khumkiuhkeuh votkilkel abanban in kigualtulh uh hi. “Khuatual” tuntak ciangin tawlkhatsung phiitmutin laam uha, tuakhit ciangin Siampupa in Khuaibu hongtani-ei ci-in nakpitakin kiko a, mipite daikhipkhep uh hi. Siampupa in naanglukhu hongkhia in, khuaipheek tung-tawnin kumkhatsung nuntakzia ding tangkokhia hi. Mailam thupiang ding genkholna hong nei hi. Gentehna in: Khuaino a pusuak aom leh khuadangah atai, alal omding ci hi. Khuainosi aom aleh tua vengah tukum misi omding ci hi. Khuainobusa aom aleh nuamsa in ahau omding ci-in, mailam thupiang ding genkhiatna nei hi. Zomite zong mailam thupiang ding a theinuam mahmah minam i hihna kilang hi. Christian i suakma i pu I pate hunlaipekin mailam thupiang theihnopna lungsimna nei uh a, khutlametna, aisanna tuamtuamte tungtawnin mailam thupiang ding namagenkholzel uh hi. Tuhun Christian i suakkhit ciangin zong khutlamet, aisan cihlian ahihloh hangin tuabang danpian namte ah i thahat mahmahse hi. Tua pen i pu i pate hunlai pekpan mailam thupiang ding i theinopna lungsimpen maban a zomtotolai hikha ding hihang.

Siampipa in mailam thupiang dingteng a tangko khittak ciangin numei leh pasal kikalhelh in, Phiitmut in lasa a, Sawm zui-in La kidem, phiitmutkidem in nopci mahmah hi. Hibangin zanthapaai gualnuamin Khuado Pawi kibawl ziahziah hi. Khuadola dawng zanihval bang aomte saziahziah a, ciah ding hun ciangin tawpna la khat om in tua la akisak khit ciangin ciahin, kikhen pan uh hi. Khuado Pawi pen nithum panin kalkhatval bang ki-omkhawm hi. Sun in Innkatau ah daklaam in khangnote gualnuam uh hi. Dak pen aw namthum om in soprano, tenor leh bass cih bangin aw zaknophuai takin kitum hi. Khuang leh zam, Phiit leh Dak te tawh la-aw a tuamtuam in tum in, zaknop mahmah hi. I pu i pa te hun lai-in amau khuahun tawh kizui-in music lam na khauhpai mahmah veve uh hi. Hibangin kalkhat sungbang Khuangtum, zamtum, sialkitum, Dak tum, Phitmut, Zola awi-in Zo Ngeina Khuado Pawi kumsim in nuamtakin kibawlkhawm ziahziah hi.

Thukhupna
Pasian hong piak i ngeina pawite hangin i lungdam hi. Ei uttel ahilo minam hangin angtangin, i ngeinate zuunin-puahin kemcing ding hihang. “Zomi-in kei kapiang a, Zomi bangin ka nungta” cihla aom mah bangin i minam itin ngeinate thupi-ngaihsut ding hihang. Minamkhat in hong kiciaptehna i ngeina pawi a manthanlohna dingin Zomi a it ulenau khempeuh aw i ngeinate kepsiam ding hihang. Khuado Pawi in Zomi khempeuh hong kipumkhatsak hi. Unaukhat innkuankhat i hihna hong kilangsak hi. Kampau hong deidanlo hi. Biakna hong deidanlo hi. Numei pasal hong deidanlo hi. Khangmoi khang-ham hong deidanlo hi. Mipil mihai hong deidanlo hi. Mizawng mihau hong deidanlo hi. Beh leh phung hong deidanlo hi. Zomi khempeuh i ngeina Pawi ahi hi. Khuado Pawi pen Zomite adingin Pasian hong piak thuphalian mahmah khat ahi hi. “Ngeina in minam kipin khosak a, Ngeina in minam tangthubu ahi hi.” Christiante nuntakzia hong hilh Zo Ngeina Khuado Pawi, Zosuan vontawi tun leh zua, ciin leh tuai aw zuunin puahciat ve ni.

(Hih Article pen 1991 kum Zomi Theological College ah B.Th ka kah lai a, ka gelh a kipuahpha kik ahi hi.)

Khuado La
a) (Do na lingling) 2 ee gual in kumkhua do na ling ling ee;
b) Gual in kumkhua do na ling ling ee, Do han ah nau bang va kap tang aw ee.

a) Kum kikhen e khua kikhen ee, zin in vang khua zong hen lawm aw ee;
b) Zin in vang khua lam zong hen la, siang sung tui bang siang hen lawm aw ee.

a)    Tuan a pupa, ma bang patsa, Zota kum khen, khuado pawi, tuang hong tung, tuang hong tung ta e; b
b)    Lia leh taang aw, i kimnam aw, ciin leh ka tuai, tun leh ka zua, gual ngaih teng aw, laambang paak laambang paak ni e.


Source :
Ciimnuai Khuavak. Vol : 2 Laibu.
Ciimnuai Zomi Philippines

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: ZO NGEINA KHUADO PAWI. Agelh - Thang Cin Lian Description: Rating: 5 Reviewed By: Cinpu Zomi
Scroll to Top