728x90 AdSpace

Hot
Menu
Zon-ol na Donate

Latest News

Census & ZOMI Self-Delusion (Census & ZOMI Ei leh Ei Kikhemna)

Census & ZOMI Self-Delusion
(Census & ZOMI  Ei leh Ei Kikhemna)



Lai Siangtho bulphuh:
“Gal vilpa in gal te hong pai a muh ciang iin mi khempeuh a theihsakna diing iin patau kona peengkul tum hi. Mi khat peuh in tua patau kona za napi don lo iin a om  mawk aa, a gal te hong pai iin tua mipa a thah leh ama sihna pen amahmah ngawh diing ahihi. Amah in patau kona za napi-iin don lo ahihman iin, ama sihna pen ama khialhna hang ahihi. Thudon hi leh a mah suakta diing ahihi.” Ezekiel 33:5

Thumasa:
Ni dang lai iin Pasian’ mi te a lampial uh ciang ahizong iin, mawhna a bawl uh ciang ahizong iin, thuman lo lampi a tawt  uh ciang ahizong iin warning pia diing  Pasian in mi pawlkhat (prophets) te tavuan (responsibility)  na pia hi. Kei pen prophet ka hi kei hi.Ahih hang, ih mi te sung ah Census leh ZOMI vai buaina hong om ciang iin muhkhialhna te, thuman lohna te gen diing pen Pasian hong piak mawhpuak (moral obligation) iin ka ngaihsun hi. Prophet te’n mawhna a kawk ciang mipi te’n  it lo, mudah, pawlkhat te a thah phial mah bang uun, hih ka gen thu te hang iin pawlkhat te’n hehna leh muhdahna iin hong nei diing cih zong theihsa hi.

Denmark mi philosopher & theologian Soren Kierkegaad  in: “There are two ways to be fooled. One is to believe what isn't true; the other is to refuse to believe what is true.”  “Haina  nam nih om hi. Khat pen amaan lo thu amaan sa aa upna hi aa, adang khat pen amaan gegu  khat pen upnuam lohna (letkhan nuam lohna) hi”  na ci hi. Census leh ZOMI vai tawh kisai  minam min pawlkhat beina diing (LZI president Pu Go Sawm Khup  in Chin State sung aa minam 53 te bei mang iin a tawpna ah ZOMI cih bek acian diing LZI ii policy Chin TV tawh interview ah gen) ahizong iin, ZOMI cih minam min khat bawl nopna tawh amaan lopi amaan sa, amaan gegu amaan lo aa mu, ei leh ei kikhemna (self-delusion) tampi hong om ciang iin gen loh phamawh pawlkhat gen kul hi. Hong sau sim pian diing hi. Lungduai tak iin nong sim sak diing hong thuum nuam ing.

Tulaitak Census leh ZOMI vai tawh ih buai mahmah hi. Hih thu te tawh kisai iin ih mi te sung ah kimuh khialhna leh kikhenkhapna diing thu te hong om ahihman iin lung hihmawh huai kasa hi. Ih buaina hang pen taangthu (history), lai (grammar), upadi(legal), leh gamvai (politic), hih nam 4 te theikhial, mukhial, mimal deih dandan aa kai/la (bias leh prejudice nei) ih hihman ahihi. Tua ahihman iin, hih nam 4 te atom iin kei muhna hong gen nuam ing.



ZOMI & Historical Self-Delusion
ZOMI minam (ZOMI nationality or ethnicity), ZOMI people cih pen tangtawng aa kipan a om ngeilo ahihi. Ih pu ih pa khang aa kipan ih minam min pen  ZOMI kici hihang cih pen ei leh ei kikhemna (self-delusion) hi aa historical support nengtawng khat zong om lo hi. ZOMI ih kicih ngei leh zong Zo man, Zo person ci aa mimal kicihna hi aa ZOMI minam cihna hi lo hi. Historians leh author te ahi Sir J.G.Scott, Francis Buchanan,Robert B.Pemberton, Thomas H. Lewin, Vumson, Vum Kho Hau, etc. te atna/gelhna ah “Zo” minam bek naci uh aa “ZOMI” minam cih kammal na zangh lo uh hi. “Zo” cih pen azaipi ahuam (inclusive) kammal hi aa beh min, phung min hi lo hi.Namkee min zong hi lo hi. Zaipi a huam minam min ahihi.

Ataktak iin, Chin state sung aa om mi tamzaw, adiakdiak iin kamphen kul lo Tedim leh Tonzang township sung aa om teng pen Zo sung ah a kihel vive ih hihi. Mimal (individual) pen Zo mi (popular spelling iin: Zomi) ih hihi. Ih minam min pen Zo minam (Zo nationality or Zo people) a hihi. Siapi Hau Go in Zomi Baptist Convention aphuh lai iin “Zomi” cih kammal zangh ahihman iin “Zomi” pen minam min hi diing iin pawlkhat in ngaihsun hi. Maan lo hi. Falam, Haka, Tedim kampau mi te khempeuh pawlpi vai tawh kipawl theihna diing a huam pen diing leh a neutral pen diing aa avoh min hi. Biakna lam kivaipuakna diing min (religious terminology) hi bek aa minam min (nationality) kipsakna (confirmation) hi lo hi. Siapi Hau Go mahmah in “Zomi” cih pen minam min ahih lohna  leh “Zo” cih pen bek minam min ahihna meeting minutes record abawlna Mang lai tawh hih bang iin record na bawl hi: “The Tedim people call themselves ZO, the Lushais MIZO, In Hakha, ZOTUNG, ZOPHEI, ZOKHUA. In Gangaw area ZO is pronounced as YAW, in Mindat, JO or CHO, and in Paletwa KHOMI. In Prome, Thayetmyo, Sandoway, and Bassein areas they call themselves A-SHO. So I am convinced that in spite of slight variations this ZO is our original historical national name” (source: Sing Khaw Khai, “Zo People and their Culture” 1995, p.69). Atom iin translate leng: “ Hih ZO cih pen tangtawng aa kipan ih minam min, ih min zungpi/bulpi ahihi.” 

ZOMI minam (ZOMI people) cih kammal (terminology) pen historical national identity (tangtawng aa ih hihna )hi lo hi. Asawt nai lo aa hong kiphuak tawm political term ahihi. July 7, 2013 in Yangon, Sanchaung Tedim Baptist Churh-Yangon (TBC-Y) pawlpi ah pu Col.Khen Za Mung in thu a genna ah, “Tuni ka thugen pen kong vaikhakna uh zong hita mai hi. Ko neulai iin “Zomi” cih bang om lo hi. “Zo” te bek na om hi,” ci’n gen hi. February 2014, Malaysia ZOMI Cup bawlung kidemna honpawi (opening ceremony) ah Dr. Hau Za Cin in, “No ZOMI tu’n na buai pihpih uh hang iin, ko India lam ah tuma kum 20 pek pan ZOMI akici khin hi ung,”  ci hi. Cihnopna ah, ZOMI cih pen a sawt nai lo aa hong piang political movement hi aa, tangtawng pek pan aa ih hihna (National identity) hi lo hi cih kimu thei hi. Ih hihna (identity) taktak pen Zo or Zo minam ahihi. Tua ahihman iin, ei leh ei mimal ih kisap ciang iin “Zo Mi/Zo mi” ( Zo Man or Zo person or Zo people) ih kicih diing hi aa, ih minam (nationality/ethnicity) pen “Zo minam” ih kicih diing ahihi.

Hih a tung aa te en pak leng tulaitak a ciakciak pawlkhat te’n tangtawng ih pu ih pa khang aa kipan ZOMI minam kici hi hang a cih uh pen zuau bulum, ahih kei leh tangthu a theih lohman uh, ahih kei leh a theih gegu uh a man bang aa sang(letkhan) nuam lo uh cih kimu thei hi. A man lo khat maansa, a maan gegu khat maansa lo, ahih kei leh a maan bang aa um/letkhan nuam lo ih hih leh Soren Kierkegaad  gen mihai nam nih sung ah ih kihel khak diing lauhuai hi.


ZOMI & Grammatical Self-Delusion
Minam vai tawh ih buaina bulpi khat pen Zo Lai grammar kician ih neih nai loh  man zong a hihi. Zo Lai pen  ei deih bang tek iin kigelh/at hi. Khat bek ii gelhna na ngawn laimal a kigamla, a kinai diing te a tawntung iin kibang den lo (consistency om lo) hi. Gentehna iin:

Zo (noun)  + gam (noun) = Zogam
Zo (noun) + pau (noun)   = Zopau
Zo (noun) + vok  (noun) = Zovok
Zo (noun) + thau (noun) = Zothau
Zo (noun) + mi  (noun)  = Zomi….., etc..etc…

Hih te en leng noun nih kigawmkhawm hi. Buaina om lo tawh kibang hi.Tua leh Consistency a omna diing iin noun nih gawmkhawm den leng ae leh?
Zo (noun) + an (noun)      = Zoan (Zofood) cih kul hi
Zo (noun) + inn (noun)    = Zoinn (Zohouse) cih kul hi
Zo (noun) + ak (noun)      = Zoak (Zochicken) cih kul hi
Zo (noun) + ngeina( noun) = Zongeina (Zoculture) cih kul hi
Japan (noun) + gam (noun)       = Japangam  cih kul hi
American (noun) + gam (noun) = Americangam cih kul hi
Khamtung (noun) + mawtaw (noun) = Khamtungmawtaw cih kul hi.
American (noun) + mi (noun)   = Americanmi cih kul hi., etc…etc..

Noun nih ahih leh gawm lo zaw iin khen leng Consistency, simplicity, leh clarity om zaw diing ban ah ih buaina te tampi tawm tuam diing hi. Gentehna iin:

Zo (noun) + gam (noun)  = Zo gam ( Zo land)
Zo (noun) + inn (noun)    = Zo inn    (Zo house)
Zo (noun) + ak (noun)     = Zo   ak   (Zo chicken)
Zo (noun)  + thau (noun)  = Zo thau (Zo gun)
Zo (noun)  + ngeina (noun)= Zo ngeina ( Zo culture)
American (noun) + mi (noun) = American mi
Khamtung (noun) + mawtaw (noun) = Khamtung mawtaw
Zo (noun)  + mi (noun)     = Zo mi, (Zo people/man/person), etc…etc…
(* Noun nih gawmkhawm den iin Zomigam, Zomiinn,Zomiak, etc..ci leng hong nuihzak huai mahmah diing hi ).

Consistency om kei leh Zo lai hilhna buaihuai mahmah diing hi. Gentehna iin, sang naupang khat in “bang hun iin noun nih gawmkhawm aa at/gelh diing a hi hiam?” ci’n hong dong leh, “na ut hunhun, kilawm na sak hunhun, na deih bangbang iin at/gelh lel in” cih kul mawk diing hi.

Siapi Hau Go leh Pu T.Go Gin (ama’n T.Gougin ci’n malgawm) te’n khen diing aa kilawm noun nih khen lo in   “Zo” (noun) leh “mi” (noun) “Zomi” ci-a hong malgawm uh ciang iin tuni dong ih buai pih hi. Mipil masa te ahihman un amau zatdan hoih maw? Hoih lo? Man maw? Man lo?, cih kua mah in “Critique” na kibawl lo iin a kizangh suksuk ahihi. Pu Go Gin bang in a min pen “Gougin” ci’n malgawm hi. Maan lo hi. Bang hang hiam cih leh ei Zo ngeina ah min malkhat in khiatna nei hi. Min mal khempeuh ih gawm teh  a khiatna omnawn lo hi. Cihnopna ah, ih mipil masa Siapi Hau Go leh T.Go Gin te’ Zo lai (grammar) zatdan  na maankhin,hoihkhin, dihkhin tuan lo hi. Critique ih bawl kul hi. A hoih te zangh iin a hoih lo te paih diing ahihi.

Tua ciang, ZOMI cih zong a maan lo zatdan khat a maansa, ahih kei leh a maan loh lam zong thei lo (critical analysis om lo) aa ih zat a hihi. “Zo Mi” a hih kei leh “Zo mi” cih diing hizaw hi. Bang hang hiam cih leh tomkaihna (abbreviation) te bek ah capital letter vive kizangh hi. Gentehna iin, United Nation (UN), North Atlantic Treaty Organization (NATO), etc..cih dan iin kizangh hi. Zua Omna Mi te Innkuan (ZOMI) or Zu Omna Mun Inn (ZOMI) cih bang aa tomkaih laakna a hih kei leh capital letter vive tawh ZOMI ih cih pen zatdan man lo ahihi.

“ZOMI” leh “Zo Mi or Zo mi” kampau (spoken language) tawh ih gen ciang kilamdanna om lo hi. Lai tawh ih gelh/at (written language) ciang bek aa buaina (problem) hong om a hihi. Zo Minam Ni (Chin National Day) pen kampau tawh ih gen ciang kibang lel na pi’n lai tawh ih at ciang pawlkhat te’n “ZOMI Nam Ni,”  pawlkhat te’n “Zo Minam Ni” cih bang iin ki-at/gelh hi. Grammatically iin gen leng, “ZOMI Nam Ni” pen Mang lai iin  “ZOMI  Tribe Day” cihna ahihman iin man lo hi. Tua ban ah, Chin National Day pen ZOMI Nam Ni  ci’n translate leng Chin=ZOMI cihna hong hi diing hi.  Zo Minam Ni pen “Zo National Day” cihna ahihman iin man zaw hi.

Zo lai grammar kician ih neih loh man iin, lai atdan (kinai sak, kigamla sak, etc.) tawh kisai tawlkhat sung ih buaibuai lai diing hi. Ahih hang iin, tutadih iin “Zo mi”  “Zo minam” kici ziau leng tu aa ih buaibuaina te the betkhiat hong bang pah lel diing hi. ZOMI uang sak nuam lua in a man lo pipi a man sa, a man hi ci’n thei napi’n letkhan (accept) nuam lo aa ih om leh  Soren Kierkagaad cih mah bang iin haina nam nih sung ah ih kihelkhak diing lauhuai hi.

ZOMI & Legal Self-Delusion
Pawlkhat te’n Chin nuai ah ut loh man iin ZOMI movement a kibawl hi ci uh hi. Chin cih pen Chin State sung aa om mi khempeuh huam aa genna “legal term” ahihman iin ei deih, deih loh tawh kisai lo hi.  Chin cih pen adang min khat peuhpeuh tawh legally aa ih khel zawh ma teng (cih mah hun iin bel khel zo nawn kei ni) Chin tawh kipelh thei lo diing hi hang. Hih pen ei deih, deih loh tawh kisai lo aa “legal reality” ahihi. Pawlkhat in Chin pen ZOMI tawh a khel zo diing kisakha, lam etna nei uh hi. Hih pen ih lung nopna diing aa ei leh ei kikhemna (self-delusion) lianpi khat hi. Chin tawh a kipelh nuam te pen “legal reality” a mu thei lo, a thei lo, thei mah leh zong a letkhan (accept) nuam lo te hi uh aa, Soren Kierkagaad ii gen haina nam nih lak pan khat penpen ah kihel kha diing hi.

Chin TV tawh interview bawlna ah LZI President Pu Go Sawm Khup in Chin State sung aa minam 53 te khat khat iin beimang iin a tawpna ah minam khat bek (ZOMI) cian/om sak diing cih thu LZI ii lungtup (goal) gen hi. Hih pen legal reality muh lohna, theih lohna, ahih kei leh kitheihmawh bawlna ahihi. A thu (conceptually) iin bel Chin State sung aa khempeuh minam khat bek iin ding zo leng bel a hoih mahmah diing hi. Ahih hang, legal reality ih et cieng a piang zo lo diing thu ahihi ( it is only a pipe dream to believe otherwise).

Tuma kum za lom (1900 pan 2000) sung Kawl gam ah Census thum (3) vei kinei hi. British te ukna nuai ah khat vei (1931), Kawl kumpi ukna nuai ah nih  vei  (1973 & 1983) kinei hi. Hih Census te ah British government ahizong iin, Kawl kumpi te’n ahizong iin “ZOMI” minam ci’n legal recognition na pia lo, na nei lo uh hi. “Zo” minam bek legal recognition na nei/pia uh hi. ZOMI minam  om hi leh kum za val Kawl gam a uk British kumpi leh Kawl kumpi te’n thei mahmah diing uh hi. Om lo ahihman legal recognition na pia thei lo uh hi. Hih pen historical fact ahihi. ZOMI minam cih bang legally iin om lo pipi a om sa, a om sa Zo minam pen a maan lo sa (or letkhan nuam lo) ih hih leh  Soren Kierkagaad cih mah bang iin haina nam nih sung ah ih kihelkhak diing lauhuai hi.




Census & ZOMI Political Self-Delusion
Siapi Hau Go in, “.... this ZO is our original historical national name,” “ Hih ZO cih pen tangtawng aa kipan ih minam min, ih min zungpi/bulpi ahihi.”    a cih pen tuhun iin mi tampi te’n thei lo uh hi. Pawlkhat te’n thei napi’n letkhan (accept) nuam lo uh hi. Tua ahihman iin, personal ahih kei leh political benefit (meetna) deihna tawh a om ngei lo ZOMI minam bawl diing hong kipan uh hi. Zomi National Congress (ZNC) hong kibawl hi. “Zomi National” (Zomi minam) cih bang na om ngei lo ahihman iin kiphiat sak hi. Tu’n Zomi Congress for Democracy (ZCD) kici hi. Tua  na ngawn ZCD leh ZNC kibang a sa, kibang hi ci-a um tuni dong mi pawlkhat om lai hi. Zomi national a om a sa pawlkhat omlai. Ih lungsim sung ah ‘prejudice’ tam nei khin lua ih hihman iin facts pen facts bang aa mu thei nawn lo, reality pen reality bang aa sang zo nawn lo cih mun dong kitung ta hi.

Pawlkhat in kamphen kul lo Tedim leh Tonzang township sung aa teng “Zomi” ah kigawm diing deih uh hi. Ahih hang, Siapi Hau Go in ZBC a phuat lai iin “Zomi” cih min in Khalkha leh Falam township sung aa mi te zong na huam khin hi. Cihnopna  ah, tu hun Zomi political movement te ii “Zomi” a cih uh leh ni dang historical “Zomi” ii a khiatna, a huamna te kibang lo hi. History leh politics gawmkhawm nianua ih hihman iin buaina tampi hong piang to hi. Political movement tawh ei mi te ih kigawm nop hang kigawm zo lo diing hi hang. Tangtawng pan aa ih hihna (historical identity) ah kigawm sawm leng hoih pen diing, zong kigawm zo khathei diing hi hang.

“Zomi” min tawh political movement (ni dang iin ZNC, tu’n ZCD) hong kipat zawh kei theihna ah a tawm pen kum (20) val bang hong hi ta hi. Hih hun sung ah, ZNC in ahizong iin, ZCD in ei mi te  phattuamna diing bang teng sem khin? Bang teng matutna nei khin uh hiam? Muh theih diing result bangmah om lo hi. Ih mawtaw lampi sia te hong puah sak uh hia? (Taingen pan Falam lam pai  leng lampi hoih mahmah na pi’n Tedim, Tonzang lam paina lei vuikhu kitung). Zato inn, sang inn, etc., bangzah hong lamsak khin? Ih tuinaak te hong puahsak uh hia?(Tedim khuapi sung ah tui hamsa mahmah ta).

CNF te’n Falam, Khalkha, Thantalang lam ah mipi phattuamna tampi bawl zo uh hi. UN tawh gamdang ah Khalkha lam te mi tampi refugee a pai theihna uh zong CNF te sepna leh huzaap tampi om hi. A sawt nai lo iin  Tonzang township dong ah antang hawm iin mipi huhna piak  diing gelna nei ( a pia khin uh hiam cian lian keng) uh cih thu kiza hi. A tom iin, mipi phattuamna diing a sepna te uh kimu thei hi. Ih lawm te’n district nih bang a ngahna uh pen CNF te huzaap (influence) kihel kha  diing iin um ing. ZCD in Tedim, Tonzang, Cikha township khat peuhpeuh ahizong iin, a kigawm iin ahizong iin district khat ih ngahna diing bang hang iin political leadership nei zo lo? Amau bel minam vei kisa, minam aa diing gim kisa kha diing uh hi. Bang zahta aa ih gim zong iin matutna ih neih kei leh bangmah sem lo tawh kibang veve hi. Physics concept ah nasem (work)ih hihna diing iin tha (force) leh kikhinna (displacement) a om kul hi (W = F d). Gentehna iin, na lo lai aa suang tumpi khat pen sun niloh na sawnsawn hang iin bangmah kikhinna a om kei leh nasem lo mah na hihi. Cihnopna ah, political movement (Zomi movement) khawng, political party (ZCD) khawng bawl napi’n mipi te phattuamna diing bangmah matutna (result) na neih kei uh leh na kimanna uh om lo hi. “Hiah tu in la pau kei in” a cih bang iin tu khinkhian lecin  na tawldam zaw diing hi. ZCD, GZA, etc.. te tha ih piakpiak pen mipi te’n a mittaw (blind),bangmah phattuamna hong pia zo lo, phattuamna diing sem thei lo saipi (elephant)  an ih piakpiak tawh kibang kha diing hi.

Tuni ciang ciang ZCD leh a dang  “Zomi minam” min a deih organization tuamtuam te sepna a gah ih et ciang iin, ih mi te sung ah  kilemna hong susia cih loh  mipi’ phattuamna diing bang mah kimu thei nai lo hi. Kikhelna hong neih kei uh leh mailam hun ah zong bangmah kilamdanna hong om tuan lo kha diing hi. Sep ngeisa khat sep ngeidan aa semsem in a result hong kilamdang diing cih upna pen haina hi. Albert Einstein in “Insanity is doing the same thing over and over again and expecting different result,” na ci hi. Cihnopna ah, ZCD, GZA, LZI, etc., te makaihna tawh  kamphen kisam lo ei mi te sung ah kilemna hong om sak zo diing, hong gawm tuah zo diing, mipi te phattuamna om diing, etc.. cih bang aa upna leh lametna ih neih khak leh facts and reality a ngaihsun kha lo cihna hi-a ei leh ei kikhemna (Self-Delusion) lianpi khat ahihi.

Census 2014
“Zo” cih pen a tung aa ih gensa bang iin ih original minam min hi-a, tangtawng pek pan aa ih  hihna (historical national identity) ahihi. Tua hi napi’n Code numbat ih neihsa “Zo – 421” zangh nuam lo (lungsim gitloh man leh Zo min pua Zo te elna, muhdahna hang) in peemta, minam min nei lo te kiciaptehna Code – 914 zat diing GZA,ZCD, leh Zomi kipawlna  tuamtuam te’n ong hanthawn uh hi. Hih pen ngaihsut khialhna lianpi leh makaih khialhna (failed leadership) lianpi khat ahihi. Kilemna diing, kithutuahna diing ih deih taktak leh ih hihna maan (true national identity) tawphah lo iin piang zo lo diing hi. Tua ahih kei leh ei leh ei kidodona tawh ni hong tum diing hi.

“ZOMI” ah kigawm diing cih pen lungsim zaina, buuk mun khanna (Isa. 54:2) khawng pawlkhat in sakha hi. Hih pen lungsim toina (narrow-mindedness), thu deihkaihna (bias & prejudice), leh tangthu bawltawmna (revisionism) ahihi. Ih buuk mun khan nuam taktak ih hih leh “Zo” minam ah ih kigawm diing ahihi. “ZOMI” pen inclusive term hi lo hi. A toi (narrow) mahmah kammal (term) hi. “Zo” cih in a zai penpen, a huam penpen, a maan penpen kammal (term) ahih lam ih gen khin zo hi.  A om sa ih hihna maan (true identity) ah kigawm nuam lo, deih lo ih hih leh a om nai lo, ih hihna maan lo ( ZOMI =false identity) ah  koidan iin kigawm khawm thei mawk diing ih hi hiam?  Mailam hun diing saupi ngaihsun lo aa mimal meetna (personal benefit) diing leh political motive tawh sepna pen sehnel tung aa inn lam (Matt.7:26,27) hi gege cih mi tampi’n phawkkha lo uh hi. 

Pawlkht in Pu Zo cih bang om ngei kei ci uh hi. Tua ahih leh bang hang aa “Zomi” kici diing? Pu Zo pan aa piang hi kei hang ih cih leh “Zomi” ih kicihna diing tawphah (foundation) om lo hi. “Zo” te pen mual sang lam a votna mun ah na teng (na om) ahihman un Zo kici hi ci’n pawlkhat in gen. Tua ahih leh asa gam “Sim” gam aa teng/om te bang hang iin “Zomi” kici diing? Tawphah (foundation) om ngiat lo hi. “Zo” cih kammal koi pan hong pai hiam cih ngaihsut huai hi.

ZOMI ah kigawm diing cih a deih te ii reasons pawlkhat en leng:
1.    “Zomi” in ih vek khempeuh iin ong huam hi. Hih pen thumaan  hi lo hi. “Zomi” pen minam (nationality or ethnic identity) min hi lo, mimal (person/individual) kilawhna cih ih gen khinzo hi. Minam sung bek ah kigawm theihna om aa, mimal sung ah kigawmkhop theihna diing thu om lo hi. Zo minam sung aa kihel/ a paa mimal te  “Zo mi” or “Zomi” kici ahihi. Zo minam sung aa kihel lo te Zomi kici thei lo hi.
2.    “Zomi” kici leng kithutuahna (unity) om diing. Hih pen sun mang (pipe dream)hi lel. Zo in code neikhin, Zomi in code tuam khat hong nei leh automatic aa kikhensa ih hi diing hi. Ih vek khempueh iin Zo suan hihang kici napi’n Zo cih Code  khat sung ah kigawm nuam lo ih hih leh Zo leh Zomi Code nih nei leng unity om diing cih pen ei leh ei kikhemna (Self-delusion) lianpi khat hi.

A tung aa  te en leng Zomi ah kigawmna diing ih tawphah (foundation) thu pen khauh pai het lo, kip het lo hi. Ahih hang, “Zomi” kici leng ih vek iin “Global Zomi Alliance,” “Zomi Congress for Democracy,”  cih te’n ong huam pah diing hi. Tua ahihman iin, “Zomi” ah kigawm diing cih pen GZA,ZCD, leh a dang kipawlna pawlkhat te ii political game (nainganyee kimawlna) cih kimu thei hi. GZA leh ZCD te political game kimawlna ah “unwitting victim” (thu thei siang lo pi aa khut lamlam) ih hih loh diing thupi hi.

Warning:
Census Code numbat ngahsa Sihzang, Teizang, Zo, Saizang, etc., te’n na Code numbat uh nusia aa Code – 914 (Others) na zat uh leh Census result ah, e.g. Sihzang = 0, Teizang = 0 cih dan hong hi leh mai lam Census ciang Code numbat hong kipia nawn lo diing aa na minam min a mangthang, a beimang (legally extinct) hong suak diing hi. Hih pen LZI policy (Pu Go Sawm Khup Chin TV tawh interview na youtube ah ki-en thei) hi. Hoih tak ngaihsun pha mahmah un. Na minam min mang/bei diing na deih kei leh na Code numbat mah na zat diing thupi hi.

Census Code – 914 zat diing GZA, LZI, ZCD, etc., te’n ong hanthawn uh hi. Thukim lua, support lua kisa khuttum liik aa “Amen,” “Hosana” “Halelujah” a ci mipi pawlkhat te Census man khit ciang amau teng mah  makai te gensia masa pen, makai te tung aa lungso penpen te hong hikha diing uh hi. Bang hang hiam cih leh Code – 914 pen minam min nei lo, Kawl gam ah minam aa kisim lo (e.g. Zomi, Rohingya, etc.)  te’n  hong zangh diing uh hi. ZOMI a kici te bek in Code-914 a zangh diing sa peuh mah ke’n. Mi tampi hong om diing hi.

Ei minam min vai tawh ih buai mahmah hang, Census 2014 ii primary objective pen economy hi-a  minam vai hi lo hi. Immigration Minister U Khin Ye in “na minam min na deih bangbang at thei teh” a cih pen lungmuang in “ZOMI” at leng hong ki recognize pah diing sakha. Census Form ah Code: 914 – Zomi ci-a na at/gelh hang Computer in # 914 bek sim iin “Zomi” cih (khut tawh na at pen) a sim diing hi peuh mah lo hi.Code – 914 and its corresponding designation pen “Others” ahihman iin computer in Code – 914 mimal bangzah in at hiam cih bek result hong pia diing ahihi. Gentehna iin, mi 10 in Code – 914 at ci ni. Tua lak ah “Zomi” 4, “Rohingya” 4, “Penglam”  2, ahih leh computer result in “Others = 10” hong ci lel diing ahihi. Mi bangzah “Zomi,” bangzah “Rohingy,” bangzah “Penglam,” bangzah cih theih nop leh Census form (50 – 60 millions) teng khempueh khut tawh sim ciatciat (manual count) lo iin kingah lo diing hi.

Manual count diing hi leh sum tampi, hun tampi, tha leh ngal tampi bei beh kul diing hi.  Khut (manual count) tawh  50 to 60 millions forms sim diing in record bawl ding hi leng bangtan vei a sawt tam? Check – encode – record bawl hi leng Census form khat in a tawm pen minute 3 pan 5 sung hun la diing hi. Hih rate tawh 50 millions form ciang 250 millions minutes ( or 4.16 millions hour) kisam diing aa, mi tul (1,000) in nisim nasem (8 hours/day) hi leh ni 520 val (kum khat val) sem diing uh hi. Mi tul khat ni 520 val nitha pia diing hi lecin sum bangzah bei diing ? (Kawl gam nitha a tawm pen tawh hi leh zong Kyats 2 billions kiim bei lai diing). 
Dotna:
(1)   Census Code – 914 ah minam bangzah, kua teng om hiam ci’n Kawl kumpi’n Census result kum khat val hun leh thazung thatang tampi bei iin hong sem diam?
(2)  Census Code – 914 ah minam bangzah cih theihna diing iin Kawl kumpi’n sum Kyat 2 billions kiim  bei beh iin na hom sem diam?







ZOMI & Religious-political movement
Phuahtawm minam min “ZOMI” ah kigawm diing ZCD member te bek tham loh Pasian nasem pawlkhat te’n zong actively iin na hong sem uh hi. Gentehna iin, Rev.Do Suan Mung, Rev. Go Chin Zam, Evan. Langh Do Khup, Dr. Gin Khan Khual, etc., te’n ZOMI political movement ah actively iin a kihelna te uh kimu thei hi. “Pasian nasem” kici te  pen a hoih kei phial uh zong iin gensia diing ka ut kei hi. ZOMI political movement ah Pasian nasem te zong kihel hi cih dawksak (highlight) nopna  hi lel. A dang gen leng kam val suak kha in teh.

Thu khupna
(1)  “ZOMI” minam tangtawng aa kipan na om ngei lo hi.  Phuahtawm hi. “Zo minam” bek na om hi. Zo minam sung aa mimal khempeuh  “Zo mi or Zomi” ih hihi. Phuahtawm minam min ah kigawm khop theihna diing hamsa diing hi.  Ih hihna (identity) a maan pen “Zo” minam ah ih kigawm mateng unity hong om lo diing hi. ZOMI ah kigawm diing cih pen lungsim neuna, thutang pekna, tangtawng aa ih hihna maan manpha saklohna, tangthu kawi hek aa deihkaihna (historical revisionism), lungsim gitlohna leh a dang tuamtuam te hang ahihi.
(2)  Zo lai grammar kician ih neih loh in tampi hong buai sak tuam hi. ZOMI = “Zuau Omna
Mi te Innkuan” or “Zu Omna Mun Inn” ci-aa tomkaihna (abbreviation) ahih kei buang leh ZOMI cih pen zatdan maan lo ahihi. “Zo mi” ahih kei leh “Zomi” cih diing ahihi. Zomi ih cih ciang iin minam min genna hi lo aa, mimal genna hi. Pu Zo suan teng Zo mi ih hihi.
(3)  Chin pen ZOMI tawh khel diing cih pen legally iin a piang zo diing thu hi lo hi. 
(4)  ZOMI movement in minam min te damdam iin hong beibei iin a tawpna ah “ZOMI” bek om sak nuam ahihman iin, Sihzang, Saizang, Zo, Thado, etc.., te’n na minam min uh na beimang sak nuam kei uh leh Census 2014 ah na Code numbat na zat uh kul diing hi.
(5)  ZOMI political movement ah Pasian’ na sem te zong pawlkhat kihel uh hi.
(6)  ZOMI political movement hang iin, mimal hi ta leh pawlpi sung hi ta leh kideidanna leh kikhenna tampi hong piang sak hi. “Zomi” min bulphut iin pawl tuamtuam hong piang hi. ZOMI political movement ii a gah hoih lo hi cih kimu thei hi.
(7)  Kamphen kul lo, pau kithei teng pum khat iin ding thei, kigawm thei leng ut huai mahmah hi. Ahih hang, ih hihna maan lo (false identity), phuahtawm identity tawh piang thei lo diing hi. Tangtawng aa kipan ih hihna maan (historical true identity = Zo minam) ah  ciah kik leng tui bang ih luang khawm thei pan diing hi.

Bangbang ih ci zong iin, ci leh sa tawh ahizong iin, kam pau tawh ahizong iin, ngeina tawh ahizong iin ki-en leng unau sanggam vive hi hang. Tutadih, samgi bang ih kikhenkhen hang, kikum toto leng ni khat ni ciang Pu Zo suan, Zo ta te va bang hong pil iin tui bang ih luang khawm thei diing hi cih ka lam etna hi.

(a)  Ei teng khawl khawm a tuam om lo
Van nuai ci peuh kul aa piang
Tun sung khat pan piang hi ngeingei ee.....

(b)  Tun sung khat pan piang hi ngeingei
Suahpih sanggam, laigui zom te hi ngeingei ee......

Source :

http://www.opleid.info/census--zomi-self-delusion-census--zomi-ei-leh-ei-kikhemna.html

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Census & ZOMI Self-Delusion (Census & ZOMI Ei leh Ei Kikhemna) Description: Rating: 5 Reviewed By: Cinpu Zomi
Scroll to Top