728x90 AdSpace

Hot
Menu
Zon-ol na Donate

Latest News

Gam ki beelpawl khawmte a gam min uh le Zomite lawhna. Agelh - Tg. Nang Khan Lian

Gam ki beelpawl khawmte a gam min uh le Zomite lawhna
Agelh - Tg. Nang Khan Lian


(1)
“Gam min na ngawn zong koi ci sap/lawh ding cih akipan thubuai huai pi khat ahi hi.” Ci’n Daw Aungsan Suhkyi in Havard University ah a hawhlai in interview na sungah na gen ngei hi.

Tunung in Naypyidaw aa akibawl a nihveina Panglong khawmpi ah New Mon State Party (NMSP) makai khat ahi Pu Naing Han Sar in gammin tawh kisai in a thak khat phuangkhiat ding thusunna a neih lam ithei kim ciat ding hi.

Hi bangin a kician mel omlo ih gam min hangin mipite (adiakdiak mualmite) aading in a lungman huai thu khat ahi hi.

(2)
Minam tuamtuam omna, mual le zang omkhopna leitang, India, Bangladesh, Thailand, China gam kikal teng aa om Kawlgam le Mualgamte ki belpawl khawm in gam khat aa dinkhop ding a thukimna ziak hang un Mikang te tungpan suahtakna ngah ciangin tua gamte gam khat in hong ding khawm uh ahi hi. Ahizongin a gam min ding gelkholhna, kupkholhna bangmah a om kei a, suahtak na ngah ding bek mah thupi in a ngaihsun uhi. Tua hi aa Kawl zanggam mintap suak in Kawlgam (Burma) kici suak phot ahi hi.


Phah Sah Pah Lah in Kawlgam suahtakna ngahkhit ciangin zat dingin a suaih uh ahi Gambup Thukhunpi (1947 thukhunpi) in “Gamke te kigawmtuahna thubulpi ahi Federal gam” cih bulphuh ding ahi hi. General AungSan mahmah in zong “Minam lian khat bek tawh gam ding ding cih pen hithei lo hi. Federal zia dan mah ahih kul hi” ci’n a gen kholhna hang zong ahi hi. Ahi zongin tua thukhunpi manglai tawh akigelhna sungah gamte kigawmna tawh kisai in kammal te ahi “confederation” ahizong “Federal” cih kammalte kihel vetlo hi. Tua kammal tangin “Union” cih kammal na kizang hi.

“Union” cih kammal in “Federal State” cih nopna tawh akibang in a zang ahi tua hun lai in “Soviet Union” etteh hi dingin i lamen hi. Ahi zongin “Soviet Union” (Soviet Beelpawlgam) gambup thukhunpi Numbat 13 (Phoh mah 13) na ah “Soviet Socialist Union Mipi gam in Federal gam khat ahi a, akibang kiim Soviet Socialist gamte amau thuciat aa thukimna tawh kizui in aki Beelpawl uh ahi hi” (The Union of Soviet Socialist Republic is a federal state, formed on the basis of a voluntary union of equal Soviet Socialist Republies.) ci’n kiciantak in na gelh uhi. Ahi zongin 1947 kumin Pha Sah Pah Lah bawl ahi gambup thukhunpi sungah tua bangdan in Union cihna tawh kisai in gencianna omlo hi.

1947, June 17 ni in akibawl gambup innpi thukikupna (Tai piuh Pay piuh Lot daw) ah Pha Pon khua MP ahi Saw Willi Kyaw in “gamke kigawm Kawlgam pen manglai in Union of Burma ci’n kigelh mawk hi. Hi bangin a kigelhna ka muh ciangin a khiatna ka telzo mel kei hi. Kei thu bang hileh gamke te kigawmna, ki beelpawl khopna ahih manin Federal Union of Burma ci’n gelh in sam/lo zaw leng kitel baih le a khiatna kicing zaw kasa hi” ci’n thu sunnna a nei hi.

Hih thu tawh kisai in General Aungsan in a dawngkik na ah
“Himun ah eite in Kawlpau zangin thu i sung hi. Nidang ciangin hih Gambup Innpi panin gambup thukhunpi suaih ciangin zong Kawllai mah a bulpi in zat dingin ka ngaihsun hi. Tua ahih manin hih Authorative Version pen kician takin ih ngaihsut theih nading in ih thusun lai in izat Kawlpau deihna dan mah hong hilel ding hi. Manglai aa akigelh kikna laite ciangin Kawllai tawh kigelh ih thusunna te akitel zawk deuh na ding cih hilel hi. Ken zong thu kong sun lai in Kawlpau mah tawh hong sung hi ingh. Tua ahih manin thusun lai in izat dan mah bangin Gambup Thukhunpi sungah “Myanmar Pay thaung Suh Naing Ngan Daw” cih ziauh ding simloh adang bawl ding, puah ding kisam lo hi. Pay Thaung Suh Myanmar NaingNganDaw ci’n kitel tak in at khit nung sang (Sahang in pet cih khit nungsang natna sau (chronic illness) maw) cih bang dot teitei te pawl kulsa khol kei ingh. Tua khit ah Mang pau in cileng ‘it is only a question of nomenclature’ min kitel ahi hi. Min lawh nop nading in tua min a ki lo zel ahi lel hi. “ aci hi. Tua hi aa General Aungsan muhna ah Union ahizong Federal cih ahizong thupi masa lo in Pay Thaung Suh cih Kawlpau pen a lakziauh ahih lam imu thei ding hi.

Ahi zongin PyithaungSuh (Belpawl gam) icih khit nung ah minam khat i min lawh kik teitei na pen bang deihna hi ding hiam cih kithei zo tuanlo hi.

(3)
Gambup Panglong Khawmpi a (2)na ah gambup min vai tawh kisai in Mon minam thautawi makai Pu Naing Han Sar in hi bangin na gen hi. “ Federal Democracy Union gam pen Kawl laitawh ahizongin Manglai tawh ahi zongin Myanmar (ahkl) Burma ci aa akisap pen a dik vetlo ahi hi. Myanmar icih pen nidang lai in Kawlte cihna hi a, tuhun lam ah Burma kici in anih aa Kawl (Burma) minamte kilawhna min ahi lel hi. Minam khat bek i gam hi zenzen lo a, Tualsuak minam kim ki belpawl khopna gam ahih manin Minam khat i min bek puasak lo in, tualsuak minam kim liangko kikimna a lakkhia thei, minam kim a huamthei pen gam min thak khat i ngaihsut khoploh a phamawh thu ahi hi.”

(4)
Daw Aungsan Suhkyi in interview na ah “Burma pen adik ahi hi. Suahtakna ngah tungin i gam min pen Union of Burma kici in, a etlawm, a tangpha Burma kici gam pan a khangkhia khat zong ka hi hi. Myanmar cih kammal pen ka deih kei zaw hi. Galkap ngongtat makaite Burma cih pen minam khat ii min hi a, Myanmar aa laih ding ci’n zawhthawh thu tawh abawl uh min ahih manin adik hetlo ahi hi. A taktak in cileng Burma icih in minam khat bek min hilo hi. Ken kahih leh Burma gam cih mah ka zang ding aa, ahi zongin zawhthawh thu tawh Myanmar pan Burma ah ka khelsawm kei hi” ci’n na gen hi.

(5)
Hanta Wati U Win Tin a nuntak lai in RFA tawh interview khat ah zong hi bangin na gen hi. “Gambup huam pen Burma ci’n lo/ciamteh ingh. NLD in zong a thu in sangtheilo hi ungh. Ahih hang Japan pen Nippon kici uh a, Leitung in Japan ci’n lo uhi. Sen zong hidan mah hilel hi Bangmah kilamdanna buaina pi omlo hi ci lel ingh.

Myanmar cih pen mualmi khempeuh tawh zong kisai in huam hi ci’n Galkap kumpi te in zawhthawh thu tawh a hong kipsak uh ahi a, a taktak in cileng amau khial zaw uhi. Pagan kumpi hunlai aa kiphut ahi Mya Siti Mualsuang tungah Mon, Myanmar, Parih, Pyu cih bangin ka kigelh hi. Tua hun in Bamar le Mon cih bangin na zanglo hi. Myanmar acih ciangin Irrawaddy gundung a om Pagan, Innwa, Pinya cih bang munte a om minamte a lawhna ahi hi. Tua Pagan kumpi gambup huamin Bamar na ci uhi.

Myanmar pau a zangte pen Myanmar minam ahi pah hi. Shan pau apaute Shan minam, Monte Mon pau in pau cih bang ahi pah lel hi. Myanmar minam, Mon minam, Shan minam cih bangte a lawhkhopna in Bama gam kici hi. Galkap kumpi in gamvai tawh kikopin Myanmar le Bamar vai a phuang uh ahi lel hi. Tua gamvai icih pen galkap gamvai ahi lel hi.” Ci’n na gen hi.

(6)
Galkap kumpi hunlai in pilsinna sangte pan ahi zongin zum nasep na leh media te pan in Myanmar pen gam min hi in, Burma pen minam min hi ci’n gelh, gen in zong zangsak pah uhi. Tua tawh kizui in Myanmar Sar (Kawllai), Myanmah Yoyar YinkyiMuh (Kawl ngeina) ci’n gambup level in gambup lai, gambup ngeina mun ah Kawl lai, Kawl ngeina hong thun suk in, tualsuak minam Mualmi te laite/ngeina te sinna, kepna khaktan pah uhi. Amin aki banglo in a deihna bulpi a kibang tuak ahi hi.

Ih Zolai/Zopau in Myanmar Nainggan/Burma pen Kawlgam icih a khiatna man ahih sam hangin akisam khat om tawh akibang hi. I gennopna ah Kawlgam = Kawlte gam bek hilo in Kawlgam, Zogam, Shan gam, Karenni gam, Kachin mualtung gamte kigawmkhopna ki belpawlkhopna min ahih manin ei pau mahmah in tua thute a kilangsak kammal khat nei zo leng a dik ahi hi.

Kawlgam icih na hangin kizopna haksatna mun lam aa om, mipite leh naupang pawlkhatte lungsim ah Kawl minam te gam sa in ih pianna Zogam leitang mahmah nangawn ah zong inntek lungsim kipua lo in aki om thei ahih lam ka phawk hi. Kawlpau, Kawlte thupi sak ci’n khat le khat iki mawhsak kawikawi hi. Hi bang dan thute a piangsak ahang tampi te lak ah i gammin lawhna ahi ‘Kawlgam’ cih kammal in a hang khat hi dingin ka um hi. (Kammal khat i impact gennopna)

Thukhupna
A beisa hun pawlkhat lai in Lai lam nasep pih lawmte tawh gammin lawhna vai tawh kisai in ka kikum khawm thei zel uhi. Kawllai, Manglai in Myanmar/Burma akici photphot zongin Zolai, Zopau tawh I gambup ih gennop ciangin Kawlgam icih pen khel zoleng hoih ding hi ka ci uhi. Tua hi a, ei Zopau tawh Belpawl gam (Union gam) cileng akituak pen dingin ka ngaihsun uhi.

Galkap kumpite idea ahi Myanmar cih pen minam min hilo in gam min hi ci’n hoih asa zong ki om hi. Tua hi aa Myanmar gam cih ding hoih sa lel uhi. Ahi zongin lam khat ah igen samah bangin Myanmar sar (Kawllai), Myanmah YinKyiMuh (Kawl ngeina) mah na suak zel ahih manin Myanmar cih pen Burma cih tawh akibang mah hilel in, khemna khat in ka tuat hi.

Tua hi a Manglai, Kawllai in Federal Union (PayThaungSuh) akilangsak kammal te a kiguan mah bangin i Zolai/Zopau te ah zong minam kim kipawlkhopna gam ahih lam a kilangsak kammal zat ding hoih kasa hi. I gammin in bangbang ahi phial zongin tua min in minam kim kihelna le ki belpawlna a kilangsak min ahih ding adik ahi a, ih Zolai/Zopau mahmah ah zong tua bang kammal te tawh lawhzawk ding pha kasa hi.

Etkak laibute :
·         U LaNanBawk, Kachin Pyinee Phit Paw Lar Pong.
·         Naing Han Sar, speech on 2nd Panglong conference, Naypyidaw.
·         Daw Aung San Suh Kyi, interview video in Harvard University, American.
·         Hanta Wati U Wintin, interview by RFA.

Source : 
from:   Tang Khanno @ Nk. Khanno
to:        Cinpu Zomi <cinpuzomi@gmail.com>
date:    Tue, Oct 11, 2016 at 9:09 AM
subject:            Laikhak
mailed-by:       gmail.com

Laigelhpa in Zomi eLibrary/Laibusaal ading in hong khak ahi hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Gam ki beelpawl khawmte a gam min uh le Zomite lawhna. Agelh - Tg. Nang Khan Lian Description: Rating: 5 Reviewed By: Cinpu Zomi
Scroll to Top