728x90 AdSpace

Hot
Menu
Zon-ol na Donate

Latest News

Gambup Kilemna ding tawh kisai Kawlgam Kumpi Thumeilette Khinkhaina leh Zomi-te Maban Gal-etna. Agelh - GSKhup

Gambup Kilemna ding tawh kisai Kawlgam Kumpi Thumeilette
Khinkhaina leh Zomi-te Maban Gal-etna
Agelh - GSKhup

Tuni, hih anuai a thusuahte ka velvel aleh, ngaihsut huai ka sak thu tampi hong om e, lawm leh gual in bangci ngaihsut nahi uhhiam cihlah theinuam, a madawk Makaite sandan zong theinuam, a geelna uhzong theihpih nuam simpian cihteng tawh keima mimal ngaihsutna teng ka gelhgelh leh, hong sau zawzen..

1.    Gamvai kikup dan tawh kisai Thukhunte etkikna leh sittelna:
·         Abeisa hun a USDP Kumpi makaihna tawh kikhung Thukhunte kilawm kituak kisalo a etkik ding leh sittel ding cihna ahihteh, tu’n NLD Kumpi makaihna tawh a enkik khinta in kingaihsun hileh, hih kalpi masa kizota cihna ahitam..
·         Thukhunte a enkik pawl sung ahbel Zomi-te kihel zo ih hia, kihel zo samlo hileng kilawm sa ing, anung lam ah kihelkik ahi zaw hiam ah..

2.    Gamvai kikup dan tawh kisai Thukhunte puahphatna:
·         NLD Kumpi makaihna nuai ah Gamvai kikup dan tawh kisai Thukhunte enkik in puahpha khinta ahihteh, hih kalpi zong kisuankhin a hiding hiam aw ..
·         Gamvai kikup dan tawh kituak in Gam buppi tawh kisai thute kipsap theihna pen Gambup Innpi (Parliament) tung ah kinga in, a kum thei ding leh gatang akai thei dingin Kumpi pawl, Innpi pawl, Galkap pawl, Gamnuai thautawi pawl, teelcing Party pawl, leh teelcinglo Party sung pan teltuam pawl khat cihte kihel thei, tualo, ngaihsutna leh deihsakna a sung thei, a ko thei dingin khua leh tui kipawlna tuamtuamte, leh mipi holimnate cihte kaikhawm in kingaihsun ding cihciang hiphot..
·         Zomi-te Maban (Zomi Movement) tawh kisai in, Gamvai kikup dan ding ageel pawl leh a tanu pawl sung ah Zomi Tangmite kihel thei in a kimainawt in kiciamteh thei,


3. Akikipsak Gamvai kikup dan tawh kisai Thukhunte zui in Gambup Kilemna Khawmpi – Kumzalom 21 Panglong Khawmpi bawlna:
·         August 31, 2016 ni a kipan Gambup Kilemna Khawmpi – Kumzalom 21 Panglong Khawmpi kibawl a, thukong honna thugenna tawh ni li sung hun kizeek zo, Khawmpi thusunnate pen Laipi tawh Khawmpi Tanupawl tung ah kipuak in tua Thusun teng kaikhawm in kivelkik ding, kikhilpha ding cihciang tungta cileng, hih kalpi kisuanta in kizo nailo cih thei..
·         Zomi-te Maban tawh kisai in, Khawmpi ah Gambup Innpi pawl pan leh teelcing Party pawl panin Zomi Tangmite kahzo, bek thamlo, Khawmpi Thusun dingin Zomi Party in Laipi phahzo ahihteh kimainawt cihdingmah ahi dinghiam!
·         Ahi zong, Aug. 31 ni a kipan ni li sung a kibawl Khawmpi pen Khawmpi honna leh thukong honna thugenna cihciangbek hi in, Khawmpi Thukikupna taktak omnailo, thusun teng kha guk sung lemtuah in, akik Khawmpi nihna hun sung ah kikupnawi theihna dingin kigual ding hipan,
·         Akik Khawmpi ciang, Zomi-te Maban tawh kisai Thusunte a kithukim zawhna dingin Khawmpi kuateng kah ding, kua tengin thusun kuppih zo ding, kuateng in Zomi-te thusun akisan zawhna dingin pawlkai in hanthawn zo ding, thukhensatna ah Zomi Tangmi bangzah in Vote nei ding cihte pen Zomi-te maingat maban lianpi hi thei ding..
·         A hun tawh kisai in, Daw Aung San Suu Kyi makaih Khawmpi Tanupawl (UPDJC) in kha guk halin Khawmpi bawlkik ding cih geelphot zawzen, tua pen Khawmpi a nihna bek hilo, kha guk cinsim a Khawmpi bawl toto a, thum vei li vei bawl thei cih vai kicianlo a kigeel, tuaban ah, Khawmpi masa khitciang a, Laipi phah a thusun teng kilemtuah zo hileh kikupnawina ah vai tangzang ding himah leh, kilemtuah zokei in, deihna leh a thupai dan mahmah kilehbulh, kitukalh, kikelki cihkhawng hi lehbel, thusunna zui in suakta takin, thudam tawh kikupna hun akibawl zotam…

4.    Kumzalom 21 Panglong Khawmpi sung a thukimna tungtawn in Gambup Thukimna bawlna
·         Buaina om peuhmahlo a, thusunte kisang theidiamdiam in, thukikupna alawhcin ciangbek a, Khawmpi Thukhensatna leh Gambup Thukimna a kibawl zo ding cile’ng.. tu laitak a Kawl gam sung dinmun tuamtuam, kikapna leh thu leh la tuamtuamte hangin cikciang thukimna a kingah zo tammaw! Ahihkei leh, Kumpi leh Galkap pawlin pawl tuamtuamte thusim khollo a, Kawlte zia bangin Khawmpi Thukimna khat hong phuangmawk uhtam..
·         Zomi-te Maban tawh kisai ah, Khawmpi Thukimna akibawl zawh taktak ding ciang, Zomi-te deihnate bukim takin a kithumin zotam, a taksuak zotam, a thu a kikhung zotam..
·         Zomi-te in Minam khat hihna tawh thuneihna bukim angah theihna ding leh pupa satsa gam leh leitang teng Zogam in a kikipsak zawhna dingin Khawmpi Thukimna a kibawl ding ciangin Zomi khempeuh ciptak leh kiptak in kipumkhat in, a madawk Zomi Makai Tangmite nung thuap a, hangsan takin ma akipang zotam, pankhopna a kisam mahmah ding dan hi… Khawmpi Thukhensatna a kibawl ciang, gatang akai thei, Vote akhia thei Zomi Tangmi taktak a kicing kisam peuhmah ding cile’ng.. Gambup Innpia pawl pan bangzah, teelcing Party pawl pan bangzah.. Gamnuai Thautawi pawl pan e, Zomi Tangmi kibehlap theilai hileh.. akisap leh mipi tha maw, thagum hatna maw.. gamnuai gamsung gampua pan kisam theitak maw..

5.    Gambup Thukimna tawh kituak in Gambup Thukhunpi puahphatna leh kipsakna
·         Kumzalom 21 Panglong Khawmpi hong lawhcing takpi a, Khawmpi Thukimna kician khat a kingah zawh takpi lehbel.. Kawl gam bel anuamlua ding hita.. NLD Kumpi inbel Thukhunpi puah theihna ding a Gambup Innpi sungpan a zawhloh ciang, Panglong Khawmpi pan Thukimna kingah hileh, tua Thukimna in Thukhunpi puahphatna ding a thunei ahih gigena siksan a, Panglong Khawmpi hong sam tengtung hingel cile’ng, Khawmpi Thukimna tawh Gambup Innpi (Parliament) in, taangpi thukimna (Referendum) kisam nawnlo a, Gambup Thukhunpi puahphapah ding cihna hi theitak maw, tuazong tu laitak Kawl gam dinmun a’ding atangzang pen hi maithei..
·         Zomi-te Maban tawh kisai ah, Khawmpi maban pen hih dinmun atun takciang Zomi-te deihna teng a kikhungkhin hileh.. Zomi Movement alawhcing lam hita, ahihkei leh, mual khat kikhum leuleu ding cihna.. Khawmpi Thukimna sung ah Zomi-te deihna a kikhun keimawklehbel, Gambup Innpi sung ahzong kisung zo nawnlo ding ahihteh, ngapngap, kithawi a mabanthak, lomathak pat akul thei ding ..

6.    Akikipsak Gambup Thukhunpi zui in Democracy dan zui a Party vannuai kidemna tawh Gambup Kiteelpi bawlna
·         Gambup Thukhunpi athak zui a Kiteelpi kibawl ding cile’ng, dinmun tampi hong kilaih ding cih theih, ahoih lam in, Federal Union takpi dingin Thukhunpi a kikhun zawh a lehbel, Kumpi sem ding kituhna Kiteelpi bel abeisa a Kiteelpite tawh kibang nawnlo ding cih kimuthei, Federal ngahna ding cihzong hinawnlo, gam apuah ding, Kumpi sem ding kuate muan huai, kuate siam pen ding, mipil misiam kuateng kikan tave ..
·         Hiciang hong tung a, Zomi-te deihna bangin Thukhunpi a kigelh takpi taakin, Zogam sung a Kiteelpi zong Mizoram Kiteelpi hong sun thei ding dan hi.. Minam min suang Party tuamtuam zong ong ding ngeingai thei, teelcing theihna ding a sumtha pawltha ahat lamlam zong kidelh thei… Zomi-te deihna kician takin Thukhunpi sung ah a kikhun zawh naikei mawk lehlah… Minam mah siksan a ma pankhopzel ding hi tave..
·         Thu khat ah, Panglong Khawmpi sung a Thukimna bangin Thukhunpi kipuahpha ding a, tua Thukhunpi zui in Kiteelpi kibawl ding ci ahihteh, Khawmpi sung ah Thukimna manlang takin kingah bilbel lehbel, tu zawh kum khat kum nih sung a, Kiteelpi a kibawl kikpah thei ding dan.. alang khat ah, Khawmpi sung ah Thukimna kingah zo mahmahkei henla, Kawlte leh Mualtung mite maw, Kumpi leh Galkapte maw, Mualtung mite leh Galkapte maw… hong kinawk tawntung lehbel… kum nga sung a Kiteelpi nangawn bawl takeile uh, dinmun a kibang hong hilel ding…

7.    Gambup Kiteelpi sung pan teelcing Kumpi makaihna tawh Democratic Federal Union lamna
·         Panglong Khawmpi sung ah Thukimna kician kibawl zo a, Gambup Thukhunpi hong kipuahphat takpi a lehbel, mipi teelcing Kumpi in Kawl gam pen Democratic Federal Union dingin makaih zo takpi tasam in um ing.
·         Tua ciangbel, “Kawl” gam zong kici nawnlo maithei, Kawl pau zong pau kul nawnlo maithei, State Division cihte zong kici nawnlo a min tuamtuam hong kivawh maithei…
·         Zogam zong e.. Zomi min zong e… Zogam leitang Zongeina Zolai cihte zong e..
·         Hih dinmun ciang a tun zawhna dingin kalsuan ding Zomi-te Maban saupi omlai, vaihawm ding zong tampi omlai, sep ding bawl ding zong e..
·         Thu khat panin, Democratic Federal Union akilawm zawhciang bek in Zogam puahna maban kipat pansang in, minam dangte nung ah kiziakai khinta ahihteh, tu a kipan Zogam khantohna ding nasep kipan pantale’ng gual kipha zo theilai.. tua dingmun ih tunma hun sungteng, tu leh tu a kipan, Zogam leh Zomi-te khua leh tui khantohna (Social & Community Development) lam ah vaihawm theih, sep theih, bawl theih, vaan theih, sai theih, phu’t theih, kinbawl theih, hanciam theih thu leh la tampi om ahihteh …

Tuipi galkhat pan mimal ngaihsutna vive hi ei.. tuni hizah ciphot dihning…


GSKhup
Tulsa, Oklahoma
October 19, 2016

Zomi eLibrary / Laibusaal ah suahsak ding in Phalna ahong piak ahi hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Gambup Kilemna ding tawh kisai Kawlgam Kumpi Thumeilette Khinkhaina leh Zomi-te Maban Gal-etna. Agelh - GSKhup Description: Rating: 5 Reviewed By: Cinpu Zomi
Scroll to Top