728x90 AdSpace

Hot
Menu
Zon-ol na Donate

Latest News

JEHOVAH’S WITNESSES TE THU. Agelh - Br. Hau Cin Lian

JEHOVAH’S WITNESSES TE THU
Agelh - Br. Hau Cin Lian


1959 kum panin hih pawlte laibu a tuamtuamte ka sim hi. Amau pawl min a lakna uh Isaiah 43:10, 11 pan hi a, tua thu a tomin: “Kei maiah Pasian dang om lo; kei nungah zong Pasian dang om lo ding; Keimah in a man Pasian ka hi a, gupkhiatna ka pia zo hi. Kei lo siah gupkhiatna a pia thei Pasian dang kuamah om lo hi. Hih thu a thei dinga kong teel, ka teci, ka nasemte na hi uh hi,” Jehovah Pasian in tanglai Israelte tunga a cihna ahih lam ka mu hi.

1962 kumin tuiphumna ka la hi. Tua laitakin Kawlgam ah teci mi 200 bang om hi. Tuin 1,660 val om ta hi. Gam dangte tawh tehna in kikhang het lo hi. Tuin a lawp mi hong om panpan hi.

Teci mi peuhmah in numei, pasal, a teek a khang cih om loin, mi kimin midangte tungah teci pangin Jehovah Pasian thu a gen ciat uh kul hi. Thuhilh sia pawl leh midang cih om lo hi. Numei vannuai-sanggamnu, pasal vannuai-sanggampa cihna (sister-brother) makaipipa Jesu Khrist, Muhna, ngahna lam zang zong numei leh pasal akikim lian hi (Matt. 23:8-10). Mihing ahi zongin, milim ahi zongin, pasian limin nei a zahtakna kipia thei lo hi (Isaiah 12:8). Topa Jesu pen lampi leh palai in kisang ciat hi (John 14:6; 1 Tim. 2:4, 5).


Thuhilhna panin tanglai a kamsang thu leh, thukham hilhna bang vive hi loin, Tuiphumpa Johan leh Topa Jesu khang panin Pasian maan gam bulphuh kihilh hi (Matt.6:9,10,33). Topa Jesu leh sawltakte sepna lim kizui a, minam kim, gam nam kim leh khua neu, khua lian ah inn sim dongin kihilh hi (Luke 8:1; 10:1; Sawl. 1:8; 20:20,21; Matt.24:14).

Hih thuhilhnate bangin mite in amaute thei khial zel uh hi. Topa Jesu a umte in thakhat in Jesu pen Kumpi suaksak pah nuam uh hi. Amah gam sungah na kihem hi. Mi honpi in kumpi suak nuam in a ngawh uh hi. Ama thukkikna thuman thutak hi a, a kicing hi (John 6:15; 18:36; 37). Sawltakte zong kithei khial zel a, satna leh thong kiatnate a thuak uh hi. Vantung mite in amaute thong sung panin khahkhia hi (Sawl. 5:19,20).

Tu hun nangawnin zong hih thu kitheikhialin a deih lo gam pawlkhat om lai hi. Hih thu a hong kipatcilna leh Lai Siangtho thukum lim taka i tel ciat ding kisam hi.

Hih bangin a hong kipankhia hi. Jehovah Pasian in Abraham kiangah, “Hih mun pan paikhia inla, kong piak ding gam hong mu in. Nang thupha kong pia dinga, na suan na khak tampi phasakin, nang hong mudahte ka mudah dinga, nang hong itte thupha ka pia ding hi,” ci in asam khia hi (Pian.12:1-3). Ama nuntak sungin tangtung lo ahih manin, a paina leh a omna khempeuh ah, amah leh a tate pen gamdang mi, zinte bangin a om niloh uh hi. Kuama vaihawmna kuppih loin, buaipih lo uh hi. A luah ding uh khuapi Kha Siangtho mittang tawh mu khol thei uh a, lungkim mahmah in a si uh hi. Topa Jesu in thu a neih lai a a dawn kiknate tawh na en kaak in. Tu hunin zong ei Khristiante khempeuh in, Pasian gam mitsuan a paite ihih manin, Abraham suan leh khakte omdan i zuih ding a kisam hi. Jehovah Witnesses pawl in tua bangin om in gam sung vaihawmna thute(nainganzi) ah kihel lo uh hi. Hih pen Topa Jesu Khrist paizia a zuihna uh ahi hi (John 17:14).

Taksa deihna leitung thu sangin mihingte in a tawntung nuntakna i ngah theihna dinga Jesu a hong sihna thu leh, Jehovah Pasian thu i theih ding poimawh zaw hi (John 3:16; 17:3). Eite tanga sihna a thuak Jesu Khrist deihna i sep zawh nang i hahkat ding a kisam hi (2 Kor. 5:14, 15). Amah in vantunga a kah ma in a nungzuite samin, leitung mi khempeuh thu hilh unla, Khristian suaksak un, ci in a vaikhak hi (Matt. 28:19-20). Hih nasepna a bulpi in Satan phuhsa thusia bul khempeuh lumlet in Khrist thu gualzawhsak nading thu ahih manin, eite Khrist galkap kihi a, i galhiamte taksa gal hiam hi loin, Thu (Lai Siangtho) hi, ci-in Paul in ahong hilh hi (2 Tim.2:3; 2 Kor. 10:4, 5). Hi bang teng ahih manin, thugen a vak thei sa ciangte bek tuiphumna kingahsak hi. Gam sungah kilemna a om a, lim taka thu i hilh theihna dingin kumpite leh uliante ading thu ngetsak dingin Paul in hong hanthawn hi (1 Tim. 2:1-3; 1 Pet. 2:13, 14). Pasian in a maan gam a hong phuh hun ding kuamah in a ni a kha thei lo hi (Mark 13:32). Tua hun matengin hih thukhunte lim takin i zuih theih ciat nak leh, biakna hanging gam sungah bangmah buaina a omkhak ding lunghimawh huai lo hi. Kumpite pahtawina Khristian pawlkhat in ngah thei zaw lai ding hi. Hih nasepna ah a nuai a laibute kizang hi.
1.    Watchtower Magazine: Jehovah Man-gam thu tangkona: khet khatin bu 13,045,000; kha khat in 2 vei; kampau nam 103 in gam 210 ah kihawmkhia hi.
2.    Awake Magazine zong khet khatin bu 11,250,000; kha khat in 2 vei; kampau nam 54 in kihawmkhia hi.
3.    Kawlpau in zong Magazine om a, khet khat in bu 7,000; kha khat in 2 vei; Regd.336 tawh kihawm khia hi.

Tua mah bangin hih Kalemyo pawlpi sung bekah zong Kawlgam sunga minam kim omte tawm tek hong kihel kim veve hi. Lai Siangtho thu tawh kituak ci-in thakhauhna leh lawpna in kinei uh hi (Mang.7:9). Jesu Khrist in tuu hon 2, tuu no hon leh  tuu hon dangte hong nei hi, ci-in kisang hi. Eite’n i ngah ding hamphatna zong a tuam tuak mah in kikhen hi (Lk.12:32;John 10:16).

Pasian Man-gam sungah tuu honte in Kha Siangtho nuntakna ngahin, vantungah Pasian leh Khrist siampi leh kumpi semin, Khrist tawh kum 1,000 sung leitung hong uk ding uh hi (Mang.20:6; 5:10). Amau pen ciangkhiahsa 144,000 pha ding uh hi. Tuu hon dangte pen ciangkhiahna om loin, simzawh loh leitung mi khempeuh a kihel ding uh hi (Mang. 7;4-8,14,16,17).

Hihte nuntak dan ding pen Mang.21:4, 5; Matt.5:5 sunga kigen bang hi a, leitung a luah ding uh hi. Sihna thuak loin, mi tampite leitung thak sungah  alut to ding uh hi (John 11:25). A sisate zong a thokik ding uh hi.

Hih banga a lungdamhuai upna kinei ahih manin, i thuhilhna hong hatsak a, lungnopna leh thakhauhna kingah hi. Topa Jesu genna kam a kiciam kha ahi hi. I gilkial lam zong kiphawk kha lo hi (John 4:23). Paul in, “Lungdamna thu ka gen leh, kisaktheihna ding om lo hi. Ka gen loh phamawh hi. Tua ahih manin thugenna ah hamphatna la loin a deih mite sum bei loin ka ngahsak leh, hamphatna a om zaw, a ci hi. Hi mah hi. Thugenna ah Kha Siangtho gah kingah taktak hi (1 Kor. 9:16-18; Gal.5:22). I thunget nading bang hiam? “Pasian aw, na thahatna leh na vangliatna thu, ka sam kang dongin khang sawnsawnte tungah hong gen theisak in,” i cih ding hi (Late 71:18).

Agelh - Br. Hau Cin Lian
C. 87, Bogyoke Raod, Kalemyo

Source : 
Zomi leh Biakna, Laibu 
Laimai - 77-80

Zomi eLibrary / Laibusaal in hanciam in "Zomi leh Biakna" Laibu pan aki tei/type kik ahi hi. Laibu bawl Rev. Khen Za Sian in zong Zomi eLibrary / Laibusaal ading in phalna ahong piak ahi hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: JEHOVAH’S WITNESSES TE THU. Agelh - Br. Hau Cin Lian Description: Rating: 5 Reviewed By: Cinpu Zomi
Scroll to Top