728x90 AdSpace

Hot
Menu
Zon-ol na Donate

Latest News

TUALSUAK ZOMITE LEH PEMTA LUNGSIM. Agelh - Dr. L. Lam Khan Piang

TUALSUAK ZOMITE LEH PEMTA LUNGSIM
Agelh - Dr. L. Lam Khan Piang
(Jawaharal Nehru University, Delhi ah Sociology Asssistant Professor asep laitak hi.)


Manipur state sung a Tedim-Chin Union a kiphut zawh kum sawnga cinna souvenir vaisai pawlin thului hong ngetna bangin ka lungsim a kavei, bawldik tuak ka sak thute kong lui khia hi. Hih thului pen minam itna leh a hoihzaw ding geelna a hong kigelh ahih manin a sang siam tek dingin khat-leh-khat kingen masa hang. Thulu a ka zat ‘Tualsuak Zomite’ ka cih pen English in ‘Indigenous Zo people’ ka cihna ahi hi. Ei Zomite pen i pu-pa luahsa gam leh leitang teek a luah i hih manin pemta hi loin tualsuak minam ihi hi. Tua ahih manin i pemta lungsimte uh paikhia in i minam, ngeina, tawndan, gam, khua leh tui puahin zuun ding a thupi pen in ngaihsut huailua ta hi. Bang hangin eite in pemta lungsim nei danin hong gen ka hi hiam? Nautang kihonate khongah hih bangin thu kiza thei zel hi, ‘a gam neite,’ cih bang ahih kei leh, ‘gam nei lo minam,’ cih bangte kiza thei zel hi. Ei Zomite history limtak suut lehang, eite pen kuamah gamah teng ngei lo, bektham loin, Mikang kumpi in hong uk ma-in, kumpi dang kuamah ukna nuai-ah omkha ngei lo minamte ihi uh hi. Ei-leh-ei a ki-uh ngiat minam ihi uh hi. Mikang kumpi hong khangin Zogam bup hong uk khit uh ciangin, vaihawmna a baihzawkna dingin Zogam pen mun tuamtuam panin hong uk uh hi.


Japan Gal a bei ciangin Mikang kumpi in gam tuamtuam a ukna uh panin kizuuk khia uh a, ei Zomite pen gam tuamtuam ukna nuai-ah hong nusia uh ahih manin, tu ciang dong ei-leh-ei kivaihawm theihna ding hamphatna hong kipia lo hi. Hihte hangin tu ciangin Union of Burma, Union of India leh Bangladesh ah khenzak in i om uh hi.

Hih thului in Zo minam bup thu hong huap zo lo ding a, hih laigelh a telthei Zominam pawlkhat— Tedim Zomi i cih thu bek hong huap ding hi. A diak in Tedim-mi leh Paite tribe thu luikhiat ding ka ngaihsutna hi a, bang hang hiam cihleh kei ngaihsutna pan in hih Tedimmi a kicite leh Paite a kicite pen Zo minam sung panin bawngkhat/pawlkhat bangin ka ngaihsun hi. Bang hangin hih bangin a tuam liuliau bangin hong om kha hi hiam cih pen thu lamdang lua hi loin, ei sunga laithei masate in history a etzia uh tawm bang dik zo lo deuh hi ding hi. History i suut ciangin hun (temporal aspect) pen poimawh mahmah in, a thupiangte zong a pianhun teek mah bangin gelh ding ahi hi. Mikang kumpi hong tun ma-in Chin Hills cih bang mual min zong na om lo a, kuamah Chin Hills pan zong na kipem zenzen lo hi. Ciimnuai-Geltui panin milip i khan tawh kituakin i luahna gam hong zai semsem hi lel hi. Mikang Kumpi hong tun hun ciangin tu a Guite kual i cih bang a kiteng khin tham ta hi.

I luahgam hong lian semsem in Meiteite bang tawh va kigamgi kha liang kihizaw hi. Ahih hangin eite in kuama gamgi kikan kha lo hi. Chin Hills pan paikhia cih bang ngaihsutna a nei i a om kha ngei hi, tua bang ngaihsutna pen thudik in kisang thei lo ding hi. Hih bangin lai khong gelhin i tangkopih leh i gam hong etlahsak namdangte ading panmun khawhsak i suak ding hi. Tua ahih manin thudik lo tawh i gam zuakzuak kei ni. Namdangte in thudik lo nangawn tawh a gam uh venbit a sawm lai un, ei Zomite in thudik lo tawh i gam zuak kha i hih manin, i history a ciahkik in pemta lungsim nei kha i om leh manlangin paaikhia ding hi hang.

Lamka pan khangkhia khangnote in minam thu i thei loh zia pen a lungkham huai liang mah hi khong! Laisiam lah hi si, BA/MA bang hi lianluan ahih hang i history uh thei het lo kilkel bang zong na om zen hi. Khat veivei bang Tedim kam a ka pau pawlkhatte in a zak ciangin. “Nang Chinte maw?” cih peuhin hong dong thei uh hi. “Bang hang maw?” ci-in ka dot kik ciang “Chin pau in na pau a” hong kici sawnsawn lai. Chin pau cih na om tuam vilvel hi leh bel Chin state ah common language ding buai lo mah ding hi ve un. Lamkhat pan leuleu in, ka pau pen Chin pau ahih leh, hong dong pen pau bang hi ding hiam? Nidang Pu Tun Khaw Pum hun lai-in Paite National Council (PNC) makaihna tawh Chin Re-unification ding ngetna memorandum bang India Kumpi kiangah na khia ngei uh hi. Tua ahih leh kua teng Chin hi a, kua teng bang Chin hi lo cih pen laisim khangnote in thu i kan ding uh kisam mahmah ta hi.

Nautangte buaina tuamtuamte — Kuki bang hi a? Chin bang hi hiam? Hih ci kawmkal ah Zomi bang hi leuleu hiam? cih khong pen khangno laisiamte in theitel in mite kiangah i hilh ciat ding uh hun mahmah ta hi. Khangmasa laisiamte in history limtak na suut mel lo ahih manin hih bang teng, unau kal kitheihsiam lohna nangawn kituak kha hi. Amaute pen minam it lo hilo in, buaipih dingte sang buaipih loh dingte ah na kin zaw kha uh hi lel hi. Hih minam min tawh kisai-in kei ngaihsutna hih bang hi ziau lel hi. Tualsuakmi ihih manin tualsuak min i ngeina, tawndan, sing-leh-lo, khanggui, gam (mual-leh-guam), leh adg., tawh kizopna a nei minam min pen a manphatzia hong kithei semsem ahih manin Zomi pen hong kilaam sang ahihna theih huai hi. Mikang kumpi hong tun ma-in zong eite in Zomi, Zophualva, Zolengthe, Zovawk, Zozu, Zozam, leh adg., te ah Zo cih pen na kilimzat mahmah hi. Tua ahih manin, Zomi i cih ciangin i tualsuak minam min hi cih pen i theihtel a i lapsang ding ahi hi.

Lai thei masate in history a etdan uh dik lo kha ahi phial zongin, khangthak siamsin momnote in limtakin a dik a man bang hi hiam ci-in thu kan dingin tavuan lak hunta hi. Bang hangin i history etdan uh dik lo hi ci ka hi hiam? Hih history etdan dik loh manin bang teng hamphatna kitaan hiam? Bangzah in a ki-it dingte ki-el den kha hi hiam? Tedim leh Paite entity tuam bang a hong kilatzia thu pan hih a tung a dotnate suut ding hi hang. Tedim i cih khua min na hi masa in, kum 1550 A.D. kiim pawl a Guite beh Pu Gui Mang in a sat hi, kici hi. Mikang Kumpi hong khangin, Zogam hong lak lai takin Ukpi Kam Hau in vaihawmna phualpi in nei hi. Hih khua pen khua lian mawh lo khat ahih manin Zo pau nam tuamtuam a zang tampi na tengkhawm uh hi kici hi. Tua ahih manin, hih pau tuamtuam teng hong kigawm in kampau a tangzaizaw khat hong piangkhia hi. Hih pau pen Mikangkumpi in Kam Hau ukna sunga om tengin thei tek banah, amah ukpi vaihawmna a pau kizang ahih manin Kam Hau dialect na ci uh hi.

Mikang kumpi in Tedim khua panin a uk zawhna ciangciang pen Tedim Township ci-in administrative division khatin na koih uh hi. Mikangte hong tun tawh Ukpi Kam Hau’ lutlai kituaklian hi. Ukpi Kam Hau ukna gam pen na zai mahmah a, hih bangin la na phuak hi, “Setang kaihna sak ciang Teimei ka hialna Lamtui,” na cih hi. Alexander Makenzie in laibu sungah hih bangin kimu thei hi. Guite hausa Gou Kho Thang Meitei lengpa’n zekhemin a mat khit ciangin, Ukpi Kam Haute pata in Mualbem panin palai Kai Khual (kikoul) Meitei lengpa kiangah sawl uh hi. Tua ahih manin, Kam Hau’ ukna pen Meitei gam dong na hi hi. Tua lai-in Meitei gam pen neu mahmah a, Meitei lengpa’n a mite khalna pia-in a gam pua-ah a hawlkhiat ciangin Kak-Ching ahih kei leh Kwakta lak peuhah hawl khia zel hi. Hih hun lai-in Meitei gam leh ukpi Kamhau ukna a gamgi limtak kikhung ahih loh hangin, hih a tung a thu-leh-late in hong tel sak mahmah pah hi. Tua India leh Myanmar gamgi pen na hideksuai lo hi. Hih gamgi pen tua Guite kual i cih na mun khong ei Zomi ten i luahkhit zawh Mikang kumpi hong khan ciang bek hong kikhung pan hi.

Tua ahih manin PNC constitution, 1947 ah a kigelh Chin Hills pan Manipur/India lut i cih pen thudik hi lo a, a lauhuai mahmah thu ahi hi. Hih constitution in Paite i cih minam min pen definition pia ngekngek hi. Paite cih min pen limtak ngaihtuah phathak in, i history uh tawh taihtuah in hileng kisam sa lo kha thei ding hi hang. A hangin hih history muhzia in eite pemta hong suaksak thei khong ahih manin, aman langin kikuphuai mahmah thu khat hong hi mawk hi. Mite in Kukite pen nomad (pemta) hi uh, tribe min khat zong Paite hi, ci-in lai bang hong kigelh ciangin i zanuam het kei uh hi, tua ahih manin limtak ngaihsuthuai sa ing. Thu dengdel, sehnel bangin ut bangbang a khen lamdang theih, THU tungah i-minam, i-inn-leh-lo, i-khua-i-tui kingasak kei thei leng. Thutak, Suangpi bang a a-linglo, a-kip, kikhel ngei lo THU tungah i minam kingasak leng kuamah in a ut bangbang in hong suksak theih lo ding hi.

Hih bangin kituam lak ding ngaihsutna tawh i minam min phuakkha i hih manin, thudik mel lo tungah i identity kingakha hong suak hi. Tua ahih manin mite in hong simmawhsakin hong philsuk-philto se uh hi-in ka ngaihsun hi.

Khangnote in dotna tampi nei-in, ahih hangin dawna kician mu lo ahih manin, mailam kalsuan dinzia gelkholhna a haksatna lianpi om hi. Khangno pawlkhatte in ka kiangah thu hong dong thei zel uh a, adiakin Paite leh Tedim i cih pen bang dingin hih bangin na kikhen kha hi mawk hiam? cih thu teltak thei nuam tampi om hi. Tua ahih manin, Tedim leh Paite ci-in a tuam dan a kihuaite pen ahi ci ding mah hiam cih ngaihsunna lianpi ka nei thei zel hi. Kei ngaihsutna panin khat hi napi i khen teitei uh hizaw hi ci ing. Lam tuamtuam pan a malmal in suut leng:

1.    Nampuan: Zou leh Tedim in nampuan kibang zang hi. Paite in nampuan tuam phuak lo bang hi leh bel a kibang ding mah hi. Kei ngaihsutna ah bel Ciimnuai-Geltui a suak tengin nampuan hih bang teng kinei hi: puanlaisan, puandum, Khephiau, Zoniik, mongkhak, tualpuan (angkhi) leh tangciin. Puanmongvom kici pen i sanggam Thadou lam ten tu ciangin na zang phadiak uh hi.

2.    La: I Zolate un pumkhat hihna hong lak hi. Bang hang hiam cih leh “lamsai tawng e gual aw e, i sai thei dialdial na maw”. Hih bang pen Teizang pau lamte phuah hi ding in um ing, hih la bang pen Paite lamin na sa phadeuh se uh bang hi.

3.    Laam: Laam pen i neih taang uh hi napi-in, unau pasal teng pa’ go kihawm bang a, laam teng zong kihawm mawk. Minam tuam hih sawm teitei tentan.

4.    Beh: Beh tawh kisai a bel kuamah a tuam om lo hi.

5.    Pau: Pau pen a kaih bek kilamdang hi-in thei ing. Thelno khat-leh-nih pen a om koikoi ding mah hi ci-in ngaihsun ing. English tektek zong— American-English, Canadian-English, leh Australia-English ci-in na kibang khin sam lo hi. Ahih hang kilamdang liang zong hi tuan lo zel leuleu hi.
6.    Pawi tuamtuamte: I pawi tuamtuamte—Khuado Pawi, Sialsawm Pawi, leh adg te pen ni dang lai-in a nei tuam om loin khuacih in zang ngeingai a, ahih hang tu hun ciang a nei phadiak bang ki-omsak se hi. Pawlkhatte bang pupa ngeina pawite nei kha ngei lo mah bang zawzen hi. Hih pen i kituamlak nop tek man hi ci lel ing. Hih a tung a teng banah zong lamtampi-ah et theih lai ding hi. Hih pen Laithei khangmasate ngaihsutna tawh kibang lo kha ding a, tua ahih manin khangthak thutak kante-in hih sangin i telzawkna ding un hanciam ding hi hang.

Tualsuak minam khatin leitung bup dongah mite’n hong ciapteh theina dingin i ngeinate, i pawite (festivals), ki-ukzia, khangthu, tualsuak minam min, leh adg te kisam mahmah hi. Tuate i neih loh hi loin, I zuun loh man bek hi. Hih i pupa pan i luahsuk—ngeina, tawndan, pau-leh-ham, gam-leh-lei, leh adg te i zuun ciang mite in hong zahtak in minam picing in hong sang pan ding uh hi. I biak Pasian hoihna hangin, khanthakte in, i minam puahin zuun ding hongkipan ta hi. Tua ahih manin kuapeuh in itna tawh sem in, eima angsung bek khual loin, takhahna tawh takkheih! ci-in hanciam in mailamnawt ding hi hang. Phattuamna om het loin eite kituam lakin vaituam bang i hawmhawm phial zongin, cikhat-namkhat i hihna pen telkhialh ding hi peuhmah lo a, i khang thudik leh historyte ah i minam vai peuhmah nga-in hi lehang, thudik in hong gumkhia ding hi. Tu ciangin leitung khantohna sang mahmah ta in, tua ahih manin communication zong hong baih hiaihiai ahih manin i pau-leh-ham uh zong na kigawm hiaihiai ta hi. Tua ahih manin i pau-leh-ham te uh a luankhop hiaihiai bangin, a mite in zong Zotui bang luankhopna ding vai sawm thei dingin Pasian in i minam thupha hong pia ta hen.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

2 comments:

  1. Hoih mahmah e. Hiai exonym bang ziak a ana ki pom kha a, bang chi bang a ana ki politicise a chih ka ngaihtuah lai tak ahi.

    ReplyDelete
  2. Hih Dr. Piang i Article pen koi pan kiladawn ahia Cinpu? Ref: om kei si ... Thei nuam zel hang e?

    ReplyDelete

Item Reviewed: TUALSUAK ZOMITE LEH PEMTA LUNGSIM. Agelh - Dr. L. Lam Khan Piang Description: Rating: 5 Reviewed By: Cinpu Zomi
Scroll to Top