728x90 AdSpace

Hot
Menu
Zon-ol na Donate

Latest News

Zogam Tuiphum Mission Tangthu Atomin (Kum tawh) Etna (1899 - 2013). Agelh - Kap Za Khai (Photoh)

Zogam Tuiphum Mission Tangthu Atomin (Kum tawh) Etna (1899 - 2013).
Agelh - Kap Za Khai (Photoh)


      Zogamah missionary Carson leh a zi hong tun kum a kipanin 2013 kum sung tengin a piang ahi Zogam Tuiphum mission tangthute a kum zui-in en kik ding hi hang. A cingin kigual/kikan zolo hi mah ta leh a thupi thupiangteng ka hih theihzah ahuam kim thei dingin  kaikhawmin hong gual hi ing.

  1. 1899, March 15 ni-in Sangmang Carson leh a zi, leh Thra San Winte Hakha tung uh hi.
  2. 1902, March 20 ni-in Dr East Hakha hong tung hi.
  3. 1902-1904, Dr East a gamah a ciah kik lai takin Dr Teebel leh a zi Hakha ah kum (2) sung bang teeng uh hi.
  4. 1904, Dr East leh a zi Hakha ah hong tung kikin lupna 20 a kita ding zato khat hong phut uh (Zogam ah amasa bel zato hi pah hi).
  5. 1905, May 11 ni-in Khuasak khua pan thu um masa pen ahi Thuam Hang leh a zi, Pau Suan leh a zite Dr East in  tuiphumna na pia hi.
  6. 1906, Jan. 1 ni-in Shiakhaw (Hakha) te tui kiphum uh hi.
  7. 1906, Sept. 5 ni-in Falam gam, Lumbang khua panin Thang Tsin tui kiphum masa hi.
  8. 1907, March 3 ni-in Falam gam, Bual khua panin Cong Kham tui kiphum hi.
  9. 1908, April 1 ni-in Hakha ah Sangmang Carson si-in kivui hi.
  10. 1908, Dec. 21 ni-in Cope leh a zi Hakha tung hi.
  11. 1910, April 10 ni-in Cope leh a zi Tedim ah kituah uh hi.
  12. 1910, Damlohna hangin Dr East leh a zi American ah ciah hi.
  13. 1910, Nov. 13 ni-in Dr Woodin leh a zi Hakha ah tung uh hi.
  14. 1915, Jan. 6 ni-in damlohna hangin Dr Woodin leh a zi Bamaw ah kituah uh hi.
  15. 1915, (1906-1915) hih hun ciang dongin Zogam ah Tapidaw 150 om ta hi. Tua kum mah in khawmpi kibawl a, mi 80 kah thei uh hi.
  16. 1920 (1904-1920), Hakha a kiphut Zato kiphiat khia/khawl hi.
  17. 1921, Insein Burma Bible School panin Sia Vial Nang in buaih hong ngah hi (Zogam ah amasa pen biakna sang aman masa pen leh Rev. a ngah masa pen hi).
  18. 1922, Missionary sangte Mangkang kumpi in tavuan la hi. Cope in Sangmang zaa pahtawina ngah hi.
  19. 1924, Zogam sunga om pawlpi-te amau le amau ding tawm thei ta hi.
  20. 1925, Oct. 2 ni-in Dr Strait leh a zi Hakha tung hi.
  21. 1925, Sangmang Cope hanciamna tawh Tedim lai-in phatna labu kizang thei hi.
  22. 1927, Zomite adingin na hoih tampi a sepna hangin Kumpi in Cope, kham (KAISAR-1-HIND) na pahtawi uh hi.
  23. 1928- Tualsuak Pasian nasemte adingin Strait in Hakha ah Lai Siangtho sang na phuan hi.
  24. 1928- Tualsuak Pastor-te tawh pawlpite ding zo ta ding hi cih  ngaihsutna tawh Karen Pasian nasemte kisam khiakik hi.
  25. 1934- Zomite adingin Lai Siangtho a let khiatna hangin Sangmang Cope tungah American pan in Doctor (D.D) pahtawina pia uh hi.
  26. 1936- Sangmang Cope hanciamna tawh Tedim lai-in Thuciam Thak Lai Siangtho kizang masa thei hi.
  27. 1937- Dr Strait hanciamna tawh Hakha (Lai) lai-in phatna la dawng 284 bang kilet khia-in kizang thei pah hi.
  28. 1938, June 1 ni-in Sangmang Cope Topa a khualzinzin laitak si a, a luang pen Carson’ han gei-ah kivui hi.
  29.  1940- Dr Strait’ hanciamna tawh Hakha lai-in Thuciam Thak Lai Siangtho kizang zo ta hi.
  30. 1940- Nelson leh a zi Tedim ah tung uh hi.
  31. 1941, Jan. 3- Dr Strait leh a zi American ah a ciah laitak galpi nihna piang ahih manin amaute gel Zogamah hong pai kik thei nawn lo hi.
  32. 1942, Jan. 29- Dr Cope’ zi pen galpi nihna hangin American ah ciah hi.
  33. 1942- hih kum ciang dongin Zogam-ah Khristian mi 4000 val omin, Thuciam Thak Lai Siangtho pen pau nam nihin kilet khia-in kizang khin a, phatna labu (Hymn) zong pau nam 5 tawh kilet khia-in kizang khin ta hi.
  34. 1942- 1946- Galpi nihna hun laitak ahih manin mission a sem a om loh hun laitak hi. Nelson leh a zi zong India ah galvai in a kihep laitak hi.
  35. 1946- Nelson leh a zi Tedim ah hong tungkik uh hi.
  36. 1947, Feb. 7- Johnson leh a zi Hakha tung uh hi.
  37. 1948- Mission adingin a kipia sumlepaite a kipiakzia leh huhna piakziate kikhel hi.
  38. 1949- Golden Jubilee pawi Hakha ah khaam uh a, tua lai-ah tui kiphumsa mi 18,000 kihel thei hi.
  39. 1951- Nelson leh a zi, Zogam mission nasep nadingin geelna leh kithawina a bawl dingin American ah ciah uh a, Zogam ah hong paikik thei nawnlo hi.
  40. 1953- Tedim ah Lai Siangtho sang kihong hi.
  41. 1953- Zomi Baptist Convention (ZBC) kiphuankhia hi.
  42. 1954- Tedim Lai Siangtho sang pen Hakha ah kituah hi.
  43. 1958- Zomi Acadamy High School Tedim ah kihong hi.
  44. 1959- Lai Siangtho sang pen Hakha pan Falam ah kituah in Zomi Baptist Theological School ci uh hi.
  45. 1962- Kum ciang dongin Zogamah Khristian tui kiphumsa mi 38,376, pawlpi 556, tualsung biakna kipawlna 8 cih ciang dong omta hi.
  46. 1966- A nunungpen missionary ahi Johnson leh a zi American ah ciah uh hi.
  47. 1974- Falam Lai Siangtho sang pen Zomi Theological Seminary ci-in min kilaihkik hi.
  48. 1983- Falam Lai Siangtho sang pen Zomi Theological College in kilaihkik hi. Matupi leh Tedim ah zong Lai Siangtho sang hon nading geel uh hi.
  49. 1983- Zogam bup Khristian suah theihna ding ngimna tawh Chin for Christ in One Century (CCOC) geelna a tangtun theih nadingin ZBC in 1981 in a khensat bangin nasep kipankhia hi.
  50. 1983-1986- Lungdamna thu tangko khiat nadingin 1983 kumin CCOC palai 87, 1984 kumin 107, 1985 in 176, 1986 in palai 50 leh sia 30 kikhahkhia hi. 1983-86 sungin Cin Khaw Thawn, Vung Khan Kham leh Bual Cung te in a nuntakna uh kipia khia hi. Hih CCOC’ the First Three Year Plan ahi kum 3 sungin thu-um mithak 6,453 kingah hi.
  51. 1986-1989- CCOC’ the Second Three Year Plan sungin thu-um mi thak 1,774 ngah hi.
  52. 1989-1992- CCOC’ the Third Three Year Plan sungin thu-um mi thak 2,201 ngah hi. Rakhine mission field kipan khia hi.
  53. 1992-95- CCOC’ the Fourth Three Year Plan sungin thu-um mi thak 4,535 ngah hi. 1993 in Yaw mission field kipan hi. 1992-2000 sungin zong Chin Diaspora Mission sep kipan hi.
  54. 1995-1998- CCOC’ the Fifth Three Year Plan sungin 2,865 ngah hi. 1996 in Ayeyawaddy mission field kipan hi.
  55. 1988- Thantlang Township, Hmawngtlang khua gei-ah Palai Ngai Za Siam si hi.
  56. 1994- Palai Hoi Lan (26th June) leh Palai Niang Lom Kim (5th August) te in mission sepna ah nuntakna kipia khia uh hi.
  57. 1996, Oct. 4 ni-in Palai Kap Cin Khai mission a sep kawmin si hi.
  58. 1999, April 1-4 ni-in Carson Hakha ah a tunzawh kum (100) cinna Chin Evangel Centenary, 1899-1999 pawi kibawl hi. CCOC nasepna kikhawl hi. CCOC nasep (1983-1999) kum (16) sungin sum bei zah K. 68,523,532, Kha mangthang kimat zah mi 20,051, Pawlpi kiphuat khiat zah 60, tualsung association phutzah 4, a ki-ap Palai1,849, nuntakna a pia khai Palai 7 ci-in a huampi in kimu thei hi. CCOC nasepna panin Centenary Mission for Christ (CMC) ah khel in “Jesus is Lord (Phil. 2: 5-11)” cih thulu tawh mission sep kalsuan kik ding kipan hi.
  59. 2003-04- Hih kum nih sungin CMC nasepna-ah Khrih ading nuntakna a pia khia CMC Palai teng- Palai Hrang Vung, Palai Maung Sann, leh Palai Than Aye te ahi hi.
  60. 2004, March in Siyin Region Baptist Association sunga om Khuasak khua ah Chin Christian Centenary (1904-2004) kibawl hi.
  61. 2010- Zolai leh Zolai tawh laibu tampi hong bawlsak ahi Sangmang Cope hong tun zawh kum 100 cinna Cope Centenial Jubilee (1910-2010) pawipi Tedim-ah kibawl hi.
  62. 2013- Tahan, Carson Baptist Church ah CMC zawhna lungdam kohna leh CCOC&CMC pai Palaite pahtawina pawi kibawl hi. CMC kum 14 sepna sungah kha mangthang kingah mi 4,260, field pai Palai 790, Revival Palai 421 leh sum bei vekpi Ks. 934, 869, 988 cih teng kimu thei hi.*Hih sung pan mah in ZTC sang min pen Chin Christian Institude of Theology ci-in leh, ZBC min pen Chin Baptist Convention ah kikhelin mission style zong CMC dan panin pawlpi khatciat in mission sem ciat ding cih style ah kikhel hi.
Reference:
- Salai Ram Ling Hmung, Notes from Baptist Christian Chin Missions, 2000, November…
- Chin Church History, Falam: Zomi Theological College, 2007.

*Hih thu pen CBC huang sunga kiphut ahi Centenary Mission for Christ (1999-2013) Monunental Stone pan kila hi. This stone was dedicated by Rev. M. Thawng Kam (ZBC-President) in 2nd April, 2013, ZBC, Falam. 11th Sep, 2013 ni-in CBC huangah ka lak hi.

Laigelh Siapa in Zomi eLibrary/Laibusaal ading in hong khak ahi hi.


Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Zogam Tuiphum Mission Tangthu Atomin (Kum tawh) Etna (1899 - 2013). Agelh - Kap Za Khai (Photoh) Description: Rating: 5 Reviewed By: Cinpu Zomi
Scroll to Top