728x90 AdSpace

Hot
Menu
Zon-ol na Donate

Latest News

Zomi Khangthakte ki Makaih ziading. Agelh – Pau Sian Lian

Zomi Khangthakte ki Makaih ziading

Agelh – Pau Sian Lian
A 6 veina Siamsin Summit le A 5 veina Medical trip Langzang Khua.

Zomite lawhsapna tawh kisai Zomi makai pipa Dr Simon Pau Khan En in thu thum hong pulak khia ngei-a tuate lakah makaihna tawh kisai lawhsapna (leadership crisis) zong khatin hong helhi. Hih makaihzia lawhsapna gu Zomite in thuaklah diak kasa a, ki puahzo lehang a dang lawhsapnate hun la in kinung puah toto theileh kilawm kasa hi. Makaihna pilna tawh kisai ih zakkhak, simkhak thugil tampi mah omkhin zihziah a, a diakin ei Zomi te in makai ih teelteh, makaihna ah panmun ih gualhteh lungngaih huai kasak thu (2) te kongsung dinghi.

Zogam pen Myanmar gamhuam sungah ki-om hihna tungtawn in Kawlte ngaihsutna le lungsimpuakzia in Zomite hong huzap zo khophi. Kawlte tawh ih ngaihsut zia kibang tampite lak-ah makaihna tawh kisai ih sanzia khatin salpha biakna (hero worship) ngeina khat kinei hi. Ih makai pawlkhat te amau dinmun tawh kituak in ih pahtawi siam naikei hi.  Ahi zongin huam et lehang Zomite pen ih phunphun, ih hanhan samhang makaite thu pen kimang tangtang zaw kasa hi. Makaite ih koko samhang makai ih panpih nop a omteh lah ih makai deih nu/pa pen vantung pan hong kia phau zahphial in ih phatphat maihi. A khial thei ngiatlo dan in ki pum panpih theihi.


Mailam khangthak Zomi te sungah makai tel-in tha ih piakteh, a mi en masa nawnlo-in a thu et masak huai kasa ta hi. Makai pum biak masa lo-in hih nu/pa in bang idea nei, banggel, bang lampi tawh hong makaih sawm a, hong koicih kalsuan pih theidiam cih te et masak huai kasa hi. Tanau khat hih man, beh khat phung khat hihman leh ih party deih khatpeuh pan ahih man mihon in pum thapiak khale hang a tawpna ah mimal gu (personality cult) thuak lah in ki lampial thei mahmah kha dinghi. Mimal khat thuneih na ahi galkap ki-ukna pan democracy ngeina tawh ki makaih thak na-ah tangpi vai mungpite (institution) ahi thukhun (law), kipawlna kilamzia(organizational structure), policy cihte khauhpai zo pah nailo ahih manin ih makai hong mapi zia hong thupi pha mahmah a, ih makaite’ dinpih, kep, neih idea te in thu hong gen mahmah hi. Tua ahih manin Zomi te in mailam minam vai kalsuan na ah a mi en masa lo-in a thu (idea) et masak huai ta kasa hi.

Hih idea te koipan ngah in, idea hoih neite koi cih zon ding ihhiam, cih zong hong lungngaih huaihi. Democracy ngeina ah ih omteh mipite-in suahtakna kingah semsem in idea hoih neite kimuh theihnading lampi tampi kihong ta-a tuate lakah lampi khat in kiteelna hong hipah hi. Kiteelna ah mittaw sialkhau let bangin party khat bek pum thapiak masak sawm lo-in ih mithak gige in party tampite kidemna etphat huai mahmah hi. Party tampi te-in a idea te uh hong sung ngeingai ding uh-a ei tawh a kilawm, kituak policy, strategy, idea  nei mimal le party te bekmah thapiak huai pahhi. Democracy ngeina pan a kingah hamphat nate-ah a gil penpen khat-in kidemna (competition) hi-in tua kidem na-ah party te in mipite metang ngah nading in thuhoih lahoih tampi geelna leh sepnate tawh hong kidem ngeingai dinguh a, mipite in ei paktat penpente teel ding hong hiziau lelhi. Tua dan kidemna om theih nading zong mipi lampan lamhon sak kul mahmah hi.   

Thu nihna-ah nuntakzia tawh kisai Zomi te pen midang te tawh a kipawl thei meello, ton khawm theilo in ih minthang hi. Midang cihteh ei Zomi sungteng mahmah ahzong a tuamtat tek nuam diak (individualism) pawlte ih hihi. Mailam minam ki makaih na ah tuamtat napan honsepna (collective action) pai hun ta hi. Tuamtatna tawh a kimakaih napan, a hon in kimaih khopna (collective leadership) kisam mahmah ta hi. Collective Leadership cihteh zong nam nih om laihi. A masa pen in makai kician pawlkhat in hong hon makaih khopna a hihi. Zomi sungah minam a it takpi, a ki piakhia nuam takpi, a pil takpi mimal 4-5 omin semkhawm ziau le uh vai honpi khat kizo phangphang khin ngel dinghi ci-in ka ngaihsun kha den hi. 

A muanhuai mahmah mimal khat kia-in hong makaih gawp lehzong a lem mahmah na om mah hi. Ahi zongin mihing cihpen ki cina thei, gim thei, tawl thei-in zong a kisi thei ahihi.  Mimal khat ngap leh ngap lohtawh minam bup, gambup vaite ih hawm leh ki picing zo ngeilo dinghi. Lungsim kihong a vision kician a nei makai 3-4 bangin hong hon makaih khop le-uh minam vai ki mazang mahmah dinghi. Tua ahih manin mailam khangthak te in minam bup hong makai ding mi ih teelteh kuamah tawh kipawl kiho theilo, kipawl nuamlo, tangtat a uk, a tuam tattat makai khatpeuh ih teelkhak lohding thupi mahmah hi.

Tua khitteh collective leadership ih cihteh tua hon makaih khopna sung ah ei mahmah zong ih kihel lam phawk huaihi. Hon makaih khopna in makai mimal tawmkhat te bek vai khempeuh ap siangna hilo hi. Collective leadership ah nang-le-kei mahmah in zong kipia khia-in sepkhiat na tawh kihelna ahihi. Na hoih sepna khat peuhpeuh ah makai lamte in hong pat man kei uhleh amau mawhsak thapai lo-in hangsan takin sem khia-in kipiakkhiatna (initiative) lakna zong ahihi.  Idea piak leh sawlna pen leitung ah a baihpen nasep pawl ahih lam phawkin gam leh minam phattuam nading septheih na hoih ih muhleh midang konlawh thapai nawnlo in kipia khia-a sep pahpah hun tahi.

Tua ahih manin tangpi phattuam nading idea hoih neite ih zonteh a tawmpen in dot nam 6 kici (who, what, when, where, why, how)  cihte tawh a idea te uhhong genthei takpi hiam cih ethuai hi. Tua lopen a mawkciak hi lel-a, ciak bek pen baih mahmah hi. Tua bangin ki sit tangtang khitteh, tangpi phattuam nading ei mimal ai-in vaipuak la ngiatin kihon makaih lehang ih buaipih mahmah makaihzia lawhsapna pen ki gualzo to dingin ka um-a, a dang ih buai pihpih vai hon pikhat zong zawhsa hong suak ngellel dinghi.  

Pau Sian Lian


Source :
from:   Lian
to:        Cinpu Zomi <cinpuzomi@gmail.com>
date:   Fri, Oct 21, 2016 at 9:25 AM
subject:          Article thak khakna
mailed-by:      gmail.com

Laigelhpa in Zomi eLibrary/Laibusaal ading in hong khak, Phalna ahong piak ahi hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Zomi Khangthakte ki Makaih ziading. Agelh – Pau Sian Lian Description: Rating: 5 Reviewed By: Cinpu Zomi
Scroll to Top