728x90 AdSpace

Hot
Menu
Zon-ol na Donate

Latest News

Zunlampi Natna leh Na Zunlampi Cidam in A thahat ngiat na-ding.

Zunlampi Natna leh 
Na Zunlampi Cidam in 
A thahat ngiat na-ding.


Zunlampi natna ih cih pen, mikim phial in ih thuak ngei natna khat a hihi. Pawlkhat te zatui dawn kul lo in dam lel thei a, pawlkhat te ahih leh zatui dawn bek tawh damzo hi. Tua ahih zunsip, zunsa ciang bek ahih leh zatui nek akulloh hang, tua sang hong nasia zaw in ci hongs a in khua khawng hong sik leh bel akisam zatui zaha tawh kibawl ding kisam hi. 

1.    Zunlampi natna ih cih bang hiam?
Zunlampi ih cih ciang in, Zun paina mun, Zunpaina mun le zunkholna kikal lampi, zunkholna leh Kal te ih gennopna hi. Tua zun lampi ah natna lungno hong lut in pumpi damlohna hong piang sak leh tua pen zun lampi natna kici hi.

2.    Zun lampi natna hong pianna a hang
A.   Ekthak khit kisawpsiang dan manloh hang
Zunlampi natna pen Pasal te sangin Numei te in nei thei zaw uh hi. Bang hang hiam cih leh Pasalte sangin Numeite’ zunlam pi tom zaw hi. Numei te tung ah zun lampi natna hong pianna ahang atam zaw pen, pumpi siantho lohna le ekthak khit nung kisawp siangdan siamlohna hang hi.

Ekthak khit kisawp siang dan ding: 
Zun lampi ah lungno alut loh nadingin ekthak, zunthak khit tawsawp daan ki dop huai mahmah hi. Tawsawp ciangin tawvang sawp masa-in tua khitteh numei van na sawp pat leh tawvang ah a  bang eksung ah a ki hel natna piangsakthei (E.Coli) lungno tuamtuamte numei van pan zunlampi, zunkholna, kal leh naubu lam ah ki zeelsak thei hi. Tua ahih manin tawsawp ciangin  numei van sawp masa in tua khit teh tawvang sawp pat ding a hi hi. Tawvang sawp khit ciang zong numei van lam lawng kik kha kei in.  


B.   Zun-ip hang
Zun kholna ah zun hong dim ciang in sazang te thupuakna tawh zun hongsuak hi. Zunsuak napi zun ih thak pah kei leh zunkholna a satakte pen zun tampi akikhol zawhna dingin kikol sak hi. Zun suak phet thapah lo-in, ih iip-iip leh zunkholna satak te kikol in kigak kik thei nawnlo ahih man in zunthak sim in zunkholna ah tawmta kikhol den hi. Tua aki khol zun sung ah, lungno tamnuam mahmah a, tua pan in zong zunlampi natna hong piang thei hi. 

Tua ahih manin zun suah phet in thak pahpah ding kisam hi.

C.   Numeite kumtam khit ninkan hang
Kumtam khit nin hong kang ciang numei hormone ( Estrogen hormone) hong tawm semsem ahih man in zunkholna leh zunpaina a thazangte thanem in zunbu sungah zun hong kikhol zel hang leh hormone hong kiam hangin numei van keu a, lungno lut nuam deuh hi. 

D.   Numei leh Pasal omkhopna hang
Zun paina mun le numei van omna kinai ahih manin, nu le pa omkhopna pan lungno lut thei hi. Pasal tam tawh aom khawm mun numeite’n zunlam pi natna ngah nuam deuh hi. 

Sikhum, Zunkhum natna nei te, pumpi thanem te, AIDS natna nei te, Natna gil nei te, zatui a ne dente, naupaaite, zunlam pi ah mun khat peuhpeuh ah suang ataang te le zun thak theihna ding lampi aki thuah tawm te tung ah piang thei deuh hi.

3.    Zunlampi natna’ kihil zia te
-       Zunthak ciang zunsa ding
-       Zunsip ding
-       Zun suak pahpah ding ( Zun teivei)
-       Zun bu omna (Tai) na ding.
-       Zun’ mel san ding
-       Zun sianglo in dat ding

A tung a te sang a suk zawk a leh 
-       Cisa ding
-       Luaksuak in luakhia ding
-       Khua sik ding
-       Gilna ding
-       Nunzang (Ell) kham ding
-       Zunsungah sinai ki hel ding
-       Zun sungah Sisan tawmtawm kihel ding
-       Mai pawm ding
-       Khe bawk ding
            (Tua bang hong piang le kal dong ah lungno lut cih ki thei hi.)

4.    Zun lampi natna bang cih kibawl ding.
-       Zunlampi lungnop lut hi cih na kiupmawh leh anai aom siavuan khat peuhpeuh kiang ah kilak pah in. Kilak pah lo in ziakai kha le hang kal kisia thei-in, zunpai nawno thei hi. 
-       A nasiat kei a nang leh nang na kibawlnop leh
·         Tui tampi dawn in, tui tampi dawn leng zun kitha pah pah leh lungno tawm tuam ding hi.
·         Tui haikhat sung ah Soda vui sikkeu lang sawh in dawn le cin zunsung a Acid dat te kiam sak in nop tuam ding hi.
·         Na tai teng anat leh Tuilum tawh zut in. 
·         Vitamin C ne in vitamin c in zum lampi natna hong dal bek lo dam sak thei hi, Zunbu zong cidam sak hi.
·         Zu dawn ken, a khum lua tam dawn ken.

5.    Zumlampi natna apian lohna ding bang cih kidal ding.
-       Tui tam pipi dawn in
-       Natna dal zawh na ding in pumpi tha om nang hanciam in
-       Akisap ciang vitamin ne in
-       Sung khak sak kei-in
-       Zuan suah phet tha pahpah in, iip kha ken
-       Ek thak khit ciang tawsawp dan siam in
-       Pumpi san thona lam hanciam in
-       Nu le Pa om khopma sawp siang phot in
-       Nu le Pa om khop khit ciang zong zuntha in sawpsiang in
-       Bombi sungten asiang nikhat khatta laih in
-       Mi dang tawh puan, bompi kisilh khel kei in
-       Puan taih sitset in silh pan in

Deihsakna tawh,
Tuunnu’ Awnem

Ref:
healthcare.com.mm,
medicinehealth.com,
Nin Mg,
The Flower News

Zomi eLibrary/Laibusaal hanciamna tawh Laigelhsiam’te cial in aki gelhsak ahi hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Zunlampi Natna leh Na Zunlampi Cidam in A thahat ngiat na-ding. Description: Rating: 5 Reviewed By: Cinpu Zomi
Scroll to Top