728x90 AdSpace

Hot
Menu
Zon-ol na Donate

Latest News

AKhuasuak Ding Khangno. Agelh – Bob Tuangpi (Mauvom)


AKhuasuak Ding Khangno
Agelh – Bob Tuangpi (Mauvom)


Leitung mihing kici khempeuh khuasuakin lawhcing nuam tek uh hi. Ahizongin tua bang gualtung tuang khuasuah ding pen amawkna-in kingahlo aa hanciamna, kikhalna, tupna le thasanna neih det kul hi. Adiakdiakin khangno laite nisim nuntakna ah lungkiatna le thanemna tampi in vulhnelh thei zel ahih manin, mi khuasuak ding tuailai momno tampi tak matun zolo-in, lamkal ah gammang thei tawntung uh hi. Aciim apil mahmah le akizen mahmah khangno pawl khat leuleu ciangin pumpi kikhalna (self-displined) neih zawhloh man leh lungsim kepzawh loh manin mawk ciakciakin neek theih neek mawh ne uh ahih manin, atangpha mahmah ding aksipi tampi taktin mual hong liamsan ta uh hi. Tua ahih manin, khangnote in akhuasuak le igam iminam ading atangpha aksipi khat isuah theih nadingin bang teng zuihkul, nusiat kul leh bangci danin nisim nuntakna ah khuasa ding cih hunsimin khuaphawk ding ngaihsutna tawm sungkhia nuam ing.

Sunmang Gol Pipi Nei Ding ( Have a big dream)
Leitung ah mi gualzo mi minthangte amau upna leh lametna tawh na nungta uh ahih manin sunmang gol pipi na nein gam uh hi. Nisim nuntakna leh khuahun kikhelzui-in mihing’lungsim kikhel thei zel mah tase leh tua bang mite in a sunmang uh leh atup angimna uh in zo zaw mukholhna(vision) na nei uh aa, bangbang haksatna langpanna om mah ta leh a upna uh lampi tangtakin na zui suak uh ahih manin, atawpna ah leitung tangthu akikhelsak le leitung ading mi manphate hong suak uh hi.

Sunmang lian pipi man ding hihang! Zomi te atamzaw lungsimneu thei hamtang hi. I hau nai kei aa, ipil pah kei zongin ahau ding apil dingin sunmang lianpipi neihsawm masa beek dih ni! Huihlak ah zong innlian pipi lam akisap hun om hi. Leitung tangthu akhel mi hangsan le mi liante in khat veivei huihlakah inn lian pipi na lamh uh aa, tua teng ahun acin teh leitung in amaute mai ah kunin zahtakna pia lel hi.  Leitung aa kipawlna lianpipi (international corporation), kumpi nasepna lianpipite(government organization), leitung akhutsungah akoih apeipei leitung khuahun lampi asialte( policy maker), gam-uk kumpite ngaihsutna apiapawlte(think tank) ciang bang itun nailoh hangin tunsawm limlimin sunmang manphot ding hihang Zomi khangnote aw! Leitung kipawlna (United nations organization) khongah thuzeekpi (Secretary-General) hih dingin hanciam ding le tunzawhna ding sunmang lianpipi man phot dih ve ni e. Sum piak lah hizenzenlo!...

Sinnopna Le Thumanna Neihkul ( Life long learners& Obedient Life)
Tuhunin thukizakna baihlua mahmah hun(information technology age/global village) hun ahih mah bangin leitung thupiang khempeuh munkhat mek ziauziau(just one click) hun ahih mah  bangin, zannitakin London khuapi ah Lady Gaga in alasakna stage tungah  asilh puandan zingteh Yangon ah akisilh hizen hi. Tua ahih manin, hun tawh kituakin sinbeh ding muhna thak, pilna thak adiil ahaa-in dimden ahih manin, na nuntakna na mailam ah phattuamna hong pia ding thu-le-late simin, thukhinkhaina(critical thinking) tawh buptuah tawntung inla na thumuhna, leitung na muhzia(world view) thaksuaksak (update) den ding kisam hi. Tua bang hikei leh leitungin hong taisanin mite’nungah khuanung phawk den ding hi teh! Khangno khat hihna tawh nuntakna ah tuahkhak pilna(experienced) anei khangham taaltaakte kiang panin sin theih ding pilna, ngaihsunna thakte kanin,thudon den inla tuhun tawh kituak dingin khinkhai siam den ding kisam hi. Tulai khangno pawl khatte in uham pilna nei pawlkhat thusimlo-in neu muh bawl mawkmawkin pilsinna tawmtawm aneih sunsun( training school) ah asinkhak sunsun le laibu tuamtuam asim teng tawh hi kisa lua thei mawkmawkin mun citengah athei pen danin siapipa cih ding ut pong mawkin pau phaupahu thei dih zen uh hi . Tua ahih manin, khangno khuasuak khat hihna dingin ei sang akhangham zawte, thuahkhak pilnate pan pi le pu, nu le pa te lamlakna le makaihzia zong zuihsiam mahmah ding kisin kul hi.
           
Hun tawh kizui-in gam ki-ukzia le nuntak khuasuak kikhelnate ah zong mun citengah hamphanate om ahih manin, khuadak siam leh ngaksiamna (wait&see) neih kul ding hi. Khangno khuasuak khat hih nadingin kuakua kiangah hita leh na galte ahiphial zongin na deih phattuamna leh na nuntakna ah pilna ngah nang ahih naak leh zahtak ding leh sia cih ding hamsa sa kei in! Ei pawl amau pawl(us &them) ci aa ngaihsutna nei kiukiau khat tawh mi langbawlna le lungsimtoi (narrow minded) nei kha hetlo ding pilvan huai mahmah leitung hita hi. Tua bang lungsim in na nuntakna ah khantoh nang tampitak hong khaktan ding hi. Khantoh nadingin sum leh paii hi masa pahlo aa, mi tawh kikholhsiamna bulpi (social capital) tuhun ah kisam mahmah hi. Bang hang hiam cih leh mihing pen khat leh khat ikizop kikawm, kiho ciangin, pilna leh nuntak khuasakna (social being) hong piang khia ahihi. Athupi mahmah khat ah bangbang na hih na bawl zongin kiphasak ki uangsaklua pah kei in. Leitung in kidemna galphual hi aa, atawmtung lawm omlo, atawmtung gal omlo hi cih phawk tawntung in!

Akhuasuak Ding Khangno Tangzangin Lungkialo Hi (Active & Perseverance)
Akhuasuak ding khangno in zahtakna le omdan khawldan siamna( respect & polite) nei aa, mite mithek gamtat kampaute khentelsiam-in banghun, bangmun ah kuate kiang bang gen ding cih kiim-le paam khuahun(circumstances) etsiamna nei ahih manin phengciakciaklo-in, kimanna neimello huihbungpi tawh mawk ciakciaklo hi. Tangzang setset kizenin asepna khat pepeuh ah matut dong haksanate nawksuakin kuhkulna (perseverance) nei den hi. Kamkizomloin, khangno  a etteh huai kasak Kawlmi khangnote omdan etteh huai tawmno hong suut nuam ing. Kawl khangnote pen khat leh khat thu kikumin kisel tangtang uh aa, thupiang khat pepepuh le hamphatna ding thu  (event& opportunity) kihawmsawnin kinial tangtang (debate &discussion) nei siam mahmah uh aa,  zingsang zong sepluat ding a omloh hangin tho baih uh aa, niangtuisai (tea shop) ah nih le thum tu-in thuthang (news) khat pepeuh kihawmsawn (sharing) nei thei uh hi. Lamgei ah van nengneng zuak nupi naupang ciang dong nangawnin tuni gambup innpi (Union Parliament) ah bang thu kikum, bang thukhun thak ki kipsak, kiphiat cihte nangawn kikum tanghtangh uh ahih manin,  tua bang ngeina leh tatdan aneilo ei Zomi te sangin khangto zaw pah uh hi.  Ei Zomi khangno atamzaw thu ki-uuklo banah zingsang kilumlum lel-in iluzangah ni hong tann teh kitho thalthal pan pian mawk den hi (he he ong sukha pianpian e!..)hamphatna thuthak teng in ong taisan khin pahpah hi.

Kepcing Ding Le Paih Khiat Ding (Does &Don’t)
Akhuasuak ding khangno khat in hong piangsak hong siam Vanglian Tung Pasian zahtakin mangngilh loh ding banah amah umin nisim nuntakna leh amailam ading belh le muan in aneih pello kisam hi. Ei  hong dong kilkello-in, ihihna leh iminam ah hong piansakna( not our choice but it is a given by our divine creator) ah lungkimin a minam hihna ngeina, zia-le-tong, lai le pau, tatziate (our Zomi identity) akep cing ding pen apiangsak Vanglian Pasian le aminam in aliangko tungah asuat apuak ding hakkol/vaipuak (responsibility) ahih lam phawk tawntungin nuntakpih sih pih  ding kisam hi.

Ahizongin, abeisa thu ah minam sung, beh sung, pawlpi sung ah lungsim ong nawngkaisak thei thu tuamtuamte ka pu in na ciam teh in ong cih, ka nu le pa in hih beh hih pawlpi te igal isa hi, ilang ong pang ngei hi cih khuata lungsim (local mindset) le hun tawh kituak nawnlo ngeilo hoihlo ciin (tradition) pan pusuakin leitung gammi leitung khat, mihing ciatciat cih kizahtakna le picinna (global mindset &mutual respect) tawh khangthak Zomi momno Sianmang’ lungdeih gam le minam aksipi dingte ngaihsutna zaitakin kalsuan diamdiam ding hun hita hi.

Mahial bawl hileeng, tuhun ah akhuasuak khangno khat hih nading leh mailam ah gam le minam vaang alamsang ding khangno khat in amah le amah kizahtakna, hun tawh kizui-in pilna muhna thak sinbehnopna, khanghamte tung pan theihhuai pilnate sinsiam le laksiamna, zuih huai leh paih ding kilawmte nusiat ngamna, mailam ading hangsaktakin, kuakua in bangbang gen ta leh a upna lenkipin lametna tawh mainawt ngamna cihte aneih naak leh akhuasuak ding khangno khat ii lampi tung asik hita hi. Hangsanna tawh sunmang gol pipi man aa nungkiklo in aphulsuak zote in leitung a uk hi cih tangthu bek ah asinsin hi nawnlo ding aa, ama tangthu leitung in sin ta ding hi. Sunmang bek agengen, mang amanman pong mawk lel (idealist) panin sunmang gol pipi I matte Zomi momno khangno ten atatak nuntakna ah azangh pah (realist) ihhi naak leh hih vanpi nuai sim leitungah apiang theilo bang mah omlo hi.

 Laigelh Bob Tuangpi(Mauvom) in Zomi eLibrary/Laibusaal ading in hong piak ahi hi. 

from:Kham Tuang 
to:cinpuzomi <cinpuzomi@gmail.com>
date:Wed, Nov 2, 2016 at 8:52 AM
subject:Article Khakna
mailed-by:gmail.com

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: AKhuasuak Ding Khangno. Agelh – Bob Tuangpi (Mauvom) Description: Rating: 5 Reviewed By: Cinpu Zomi
Scroll to Top