728x90 AdSpace

Hot
Menu
Zon-ol na Donate

Latest News

Donald Trump le Hillary Clinton. Agelh - Rev. Khoi Lam Thang

Donald Trump le Hillary Clinton.
Agelh - Rev. Khoi Lam Thang

America ka zin sung ka zintunna inn khat ah, gen kizom-in “America President kiteelna” ding thu ka gen kha uh hi. Clinton maw Trump ka cih leh ka innteek nu in Donald Trump mah thupi sa ing. Trump in President a ngah loh phawmawh hi, tua hi kei leh America Khristian gimnam nawn kei, hong ci phei suasua a, tua laitak mah-in innteek pa in Donald Trump pen a gam makaih ding zia policy gen nai loh, a maipuak le a muk teng mahmah zong President dingin kilawm sa limlim keng, hong ci ta leuleu hi. Gin neih loh pi-in innteekte nupa thu hong kisel dek phial uh hi. Ken zong, koi dih vou ka thu theih ngei khat: “Politicians shake your hand before election and shake off your opportunities after election” cih za ngei veng aw ci-in ka nui zaizai uh hi.
Tutung America President kiteelna pen pawl khatte in “deih loh veve nih sung pan a khat teel ding hi” ci zaw mai uh hi. Mi tampi in tu tung America kiteelna pen “America gam lamka bom ah adin hun ahi hi” ci uh hi. A siamna a hauhna uh ei bat phak ding ahih loh hangin, khang dang hun dangte sangin gam makai dingte a maineu zawk hun, mipi a huaikim zawh loh hun khat ahi hi. Tua President kituh nihte in:

HILLARY CLINTON (kum 69) pen a pa Dorothy Howell Rodham le a nu Hugh E. Rodhamte tanu hi a, minpi pen Hillary Diane Rodham Clinton ahi hi. October 26, 1947 ni-in Chicago khua ah suak hi. US President sem ngei Bill Clinton’ zi hi a, tanu Chelsea Clinton nei hi. 1968 a kipan Democratic party ah nasia takin mapang a, 67th United States Secretary of State (Jan 2009-Feb 2013), New York pan United States Senator (Jan 2001 -Jan 2009), First Lady of the United States (Jan 1993 -Jan 2001), First Lady of Arkansas (Jan 1983 -Dec 1992) ahi hi. America gam ki-ukzia tel mahmah ding hi napi President taktak dingin muanhuai kisa lo hi. “A kum tam” a kicih leh a mah’n “America’te numei President lak-ah a moi pen ding hiing” ci suk ziau hi.
GREATER TOGETHER” ci-in tangko hi. America thupi-na thupi sawnsawn sak lai ding sawm hi. Amau party in a thuneih uh a khang tam ta hi. Neih kibang kiteenna, nau siatsakna, biakna dangte munpiakna, minam khat le khat kinopmawhna cihte khangsak hi, ci-in kigen hi. A email hangin mawhmat nopna lian mahmah hi.
DONALD JOHN TRUMP (kum 70) pen Queens, New York City, NY ah  June 14, 1946 ni in a pa Fred Trump le a nu  Mary Anne Trump te sung pan suak hi. Zi thum nei khin a, Melania Trump (m. 2005-tu dong)Marla Maples (1993-1999)Ivana Trump (1977-1991) tanu tapa 5 (Eric TrumpDonald Trump Jr.Barron TrumpIvanka TrumpTiffany Trump) nei hi. “The Trump Organization” ah President sem hi. Political Party Republican (1987–99; 2009–11; 2012–present), Independent (2011–12), Democratic (until 1987; 2001–09), Reform (1999–2001) cih bangin tai kawikawi hi. Sum hau, Businessman, television personality, author, politician ci-in minthang hi. Sumbawl a siam zahin gam ki-ukzia siam lo dingin kilamen hi.
Immigration vai thupi ngaihsut mahmah a, Mexico tawh kikal kulh cian sawm hi. Christian upna hangsan takin dinpih hi. America gam hingkiam hi hang, ke’n President hong sem leng “America vangliansak kik ding hiingAMERICA WILL GREAT AGAIN” ci ziahziah bek hi.
America President peuhpeuh pen leitung bup kumpi zah a kingaihsun ahi hi. Leitungah America a minthanna mailam kum bangzah hong zom zo lai ding hiam, kum bang tan vei IN GOD WE TRUST a ci lai ding uh hiam, cih pen President tungah tampi kinga hi. Pasian in America thupha pia hen. A gammite zong thupha pia henla, America tung Zomi khempeuh zong pilna, siamna, liatna, hauhna le Pasian thupha sanna ah minam dangte mah bangin thupha hong pia ta hen. Pasian in Amarica President hoih pia ta hen.
(America ka zin ni 50 sung thu laibu neu khat ka bawl sawm, tu dong ka mahial theih nai loh laitak, kiteelpina ni hong tung petpet ta ahih manin Donald Trump le Hillary Clinton cih thulu ka guan pen hong khah khia ing: Nong simsak ka lungdam!)
Khoi Thang

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Donald Trump le Hillary Clinton. Agelh - Rev. Khoi Lam Thang Description: Rating: 5 Reviewed By: Cinpu Zomi
Scroll to Top