728x90 AdSpace

Hot
Menu
Zon-ol na Donate

Latest News

KIMAKAIHNA LE VANGKEPNA (Sahangin a gial zahtak). Agelh - Rev. Khoi Lam Thang

KIMAKAIHNA LE VANGKEPNA
(Sahangin a gial zahtak)
Agelh - Rev. Khoi Lam Thang


Thupatna
“Kimakaihna le vangkepna” cih thulu pen ei Zomite paunak “Sahang in a gial zahtak” cih bulphuh kawmin Zomite tatzia le ngeina pan kong phuangkhia nuam hi. “Sahang in a gial zahtak” cih pen i pu i pate’ paunak thupi mahmah khat ahi hi. Rev Thang Kam in hih paunak khiatna pen “Sahang in a vang kem a, miliante in zong a min a za le a vang kem hi” ci-in Zomite’ Paunak le thugil laimai 99 sungah gelh hi. “Sahang in a khekhap zahtak” a ci zong om hi.

Pulepate pen sabengsiamte ahi uh hi. Liangpaih bangzah kap cih pen pasal kidemna ahi hi. Sa kap uh hi. Sa ai uh hi. A sih uh ciangin sadial tampi khai uh a, a kivui uh ciangin sala sa uh hi. Za Kap, Za Tun, Za Ai, Kap Thang, Cin Kap cih bangin khangsimna min phuak uh hi.

Tua bang hun lai-in gamsate’ zia le gamsate’ lungsim nangawn theithei uh hi. Upmawh hi lo hi. A tuahsa a theihsa thu uh ahi hi. Tua hi a, sahang in a gial zahtak cih thu pen pulepate’ tung pan i luahsuk kithuhilhna paunak manpha ahi hi. Hih paunak siksanin kimakaihzia, vang kipiakzia, vangkepzia thu pawlphat kong sung nuam hi.


1. Luahsuk le khanglam kikop makaihna
Sahangte pen pulepate in gampute na ci uh a, lian-in hat hi. Zahtakhuai hi. Sangak khawng, zawhngeu khawng gampute kici ngei lo hi. Ngal khawng, vom khawng, sakhi khawng a hat mahmah hangin sahang suak ngei lo ding hi. Sahang pen Sahang ahi hi. Sahang pen sahang ahih manin gampu kici hi. Gampu ahihna uh pen a kiguizui, a kiluahsuk ahi hi.

Zomite nuntakna ah hausa-upa a sem ngeite mah a ngaihsutna uh picing zaw hamtang hi. Lungduai zaw, thukhual zaw hamtang hi. A lungsim uh picing ahih manin makai a na suak ahi uh hi. Makai a suah uh ciangin picing semsem, lungduai semsem, thukhual semsem uh hi. A pute vang kem uh hi. A pate vang kem uh hi. Tua bangin a vang uh kithuap in lian semsem hi.

Tu hun ciangin mi khempeuh liangko kikim hun ahi hi. Sila om lo, sila lo om lo, numei om lo, Pasal om lo cih hun ahi hi. Mikhat peuhpeuh makai a suah nadingin khaukhihsa cih bang om nawn lo hi. A pa makai ahih manin a ta zong makai hipah ding cih bang om nawn lo hi. Siampi Eli suan le khakte siampi gui hi den dingin Pasian in kamciam khin ngei hi. Ahih hangin Eli tate in siampi ngeina bangin a gamtat loh uh ciangin siampi thupha Samuel tungah kisuan hi. Siampi vang a keploh uh ciangin siampi innkuan hinawn lo pah uh hi. 1Sam 2:30 sungah:
Tua ahih ciangin Israel-te’ Pasian, Topa in thu hong genin: ‘Nangma innkuan le na behte keima mai-ah sungtumin pusuak tawntung ding hi, ci-in thu ka ciamsa hi,’ ci hi. Ahih hangin tu-in Topa in thu genin: ‘Tua bang hi nawn lo ding hi. Bang hang hiam cihleh kei hong pahtawite ka pahtawi ding a, kei hong simmawhte ka simmawh ding hi. ci-in na om hi.

William Shakespeare in “Some are born great, some achieve greatness, and some have greatness thrust upon them” a na cih bangin, pianpih le guizui a, a lianngiat mi a om mah bangin, a khan sunga na lian tampi a vaihawm a semkhia thei mi tampi om hi. Tua ahih manin makai cih pen luahsuk zong hi a, khanglam zong ahi hi.

2. Vang kipia le vang kisuan diamdiam minam
Saite, ngalte a liatna a hapak tawh kiteh hi. Zangsialte, sazukte a picinna a ki tawh kiteh hi. Sahang a liatna a gialtawh kiteh hi. Ahih hangin sahangte a suah cilin gial pah lo hi. A kum tam ciangin gial pan hi. A kum tam deuhdeuh leh a gial kilang deuhdeuh hi. A kum upa deuhdeuh leh a gial hoih deuhdeuh hi. A kumtamte a gial tam hi. A khankhin sahangte a gial pha mahmah a, vangnei mahmah uh hi. A ma phacia sangin a lianzaw in kimu hi. A gial in zahtak baangsak hi. Tua bang a gial tamte a kum tam ahih manin a theih tam hi. A tuahkhak thu tam hi. A samat tam hi. Hat hi. Sahang dangte in zahtak uh a, gamsa dangte in kihta uh hi. A gial tam sahangte a omna gamkuam ah gamuk hi pah hi.

Sahangte a vang neihzia a gial tungah kilang ahih manin a kumtamte in vang nei cihna ahi hi. Tua mah bangin khangluite in “Van vom mu masa” ci in a upa zawzaw kizahtak uh hi. A piang masa, khua mu masa, thu thei masa kizahtak uh hi. Kum upate sasin-salung khiltuam-in kipia hi. Zunekna munah zu kimasak hi. Ak gilpi kinesak hi. Duhgawh theih thu hi lo hi. Zong ki-eng se lo hi. Amau zong kisuang het lo takin ne uh hi. Hih pen Zo ngeina ah kumtamte a kizahtakzia ahi hi. Kum upatna siksan in a kizahtak dimdiam minam ihi hi.

Ahi zongin hun khat ciangin khangham nulepate in a tate uh picing ta, muanhuaita a sak ciangin sasin-salung nesak uh hi. Ak gilpi pia uh hi. Tate in piak peuhpeuh ciangin ne pah laplap lo uh hi. Kilawm kisa nai loin nial uh hi. Tua bang ciangin khanghamte in “Keima kong piak hi. Ne peuh in” ci uh hi. Tua bangin nulepate in tate a piak ciangin tate adingin thukip suak hi. Thu kho in kingaihsun hi. Tua pate’ kammal in a tate picing ta, ahihna kipsakna ahi hi. Tua bangin pate piak sanam khat vei ne khakhin peuh leh a banin nek theih nading phalna a ngah ahi hi. Ak gilpi a peh zawh nawn loh man, ha a neih nawn loh man hi lo hi. Hih bangin Zomite khanglui nuntakzia ah khanghamte in khangthak vang suan uh hi.

Tu hun ciangin kumtam man bek-in gialtam kici thei nawn lo ta hi. Sinna, siamna, theihna kidem hun hi a, kum 30 kimkimte in CEO a sem hi ta hi. Kum lah tam gial lah tamte zahtak huai mahmah hi. Kum le siamna tawh kop gial tuamtuam neih hun ahi hi. Leitung khantohzia bangci bangci in kihei taleh khangluite in van vom mu masate, khuasat le tuikhuatte, mualkhawl masate a zahtak uh kiatsuah ding hi lo hi.
3. Gial zahtak vang kepsiam ding kisam
Sahang pen sa minthang ahi hi. Sa vanglian ahi hi. A tha hat a, kihtak huai hi. Sahang nam a tuamtuam om hi. Pulepate in mualzul, keivom, kamkei, gialbem, innsun tuah cih bangin min tuamtuam na pia uh hi. Bol, sangak, zawhngeu-te tawh zong innkuan khatin kiciamteh hi. Pulepate in “Sahangte” pen a min sia-in sam ngam lo-in “gampute” na ci uh hi. uh hi. Sahang ci-in sam kha leng, tho in na puak a, thakhat thu-in thei uh hi.  Heh uh ahih manin hong pet thei, hong khem thei hi”, ci uh hi. Gamsa dangte in kihta uh hi. Mihingte zong hong pet thei ahih manin kikihta hi.

Makaite pen sahang banga kihtak ding cihna hi lo hi. Kenneth Blanchard in “The key to successful leadership today is influence, not authority” na ci hi. Thuneihna tawh kimakaih hun hi nawn lo a, thuzawhna tawh kimakaih hun ahi hi.

Sahang in a gial zahtak cih pen sahang liante in a gial tawh kizui-in gamta hi, cihna ahi hi. A tunga i gensa mah bangin, a gial pen a liatna, a hatna, a picinna lim ahi hi. A phatan ciaptehna ahi hi. A liat leh a liatna tawh kizui-in thupisim dingin omsiam cihna ahi hi. A gial in amah kem hi. Gial kicing nei napi lungtom phangphang lo hih tuak hi. Gial tawh kizui-in naupang tat lo hih tuak hi. Naupang vai le picih loh vai khempeuh a gial tawh a tehkak ciangin a gial thupisim zaw ahih manin a gial tawh kituak dingin nungta zaw hi. Ama lupna ding mun ah lum a, ama tutna ding munah tu hi. Ama hamzia dingin ham a, ama tatzia dingin gamta hi. Sahangin a gial a zahtak ciangin, a gialin amah kem kik leuleu hi. A gialin a khengval lo dingin kem hi. A gialin a uang lua lo dingin len hi. 

Leitungah amah le a mah a kiphasak khop dingin a vang lianlua kuamah om lo hi. Bang hang hiam cih leh mipil i cihte amau le amau pil kisa nai lo deuhdeuh uh hi. Milian i cihte a kiniamkhiatzia uh bat zawh ding hi lo hi. Tua mah bangin amah le a mah a thanem khop dingin a vang nei lo lua kuamah om lo hi. Hihna bangbang thupisim a nuntak ding thupi hi. Mihingte vang neihna pen kum tamna hang hi thei hi. Panmun letna hang hi thei hi. Sin sanna hang hi thei hi. Huahna hang hi thei hi. Pahtawina le ciaptehna tuamtuam hang hi thei hi. Pasian’ nasemte siampiza ngahna hang hi thei hi. Banglam banglam tawh hi ta leh mi khempeuh in a mun a mual a khuahun tawh kizui-in a dinmun a zahtak ding ahi hi. Panmun a thupi leh a thupizia tawh kizui-in zahtak semsem ding ahi hi. Puansilh-nikten, kampau-mukpau, gamtat-luhek a kipan na khempeuh ah a kilawm a kituakin nuntak ding ahi hi. Tua in vangkepna ahi hi. Vang a kemsiamte kizahtak hi. Vang a kemsiamte kithupi sim hi. Vang a kem lote a vangsel hi. Vang a kem lote amah le amah a kiselpho ahi hi.

Papi khat in a papi hihna a zahtak ding ahi hi. Tua in vangkepna ahi hi.
Nupi khat in a nupi hihna a zahtak ding ahi hi. Tua in vangkepna ahi hi.
Sangsia khat in a sangsia hihna a zahtak ding ahi hi. Tua in vangkepna ahi hi.
Sumhau khat in a sumhauhna a zahtak ding ahi hi. Tua in vangkepna ahi hi.
Pawlpi upa khat in a pawlpi upa hihna a zahtak ding ahi hi. Tua in vangkepna ahi hi.
Pastor khat in a pastor hihna a zahtak ding ahi hi. Tua in vangkepna ahi hi.
Hausa khat in a hausa hihna a zahtak ding ahi hi. Tua in vangkepna ahi hi.
Zomi khat in a Zomi hihna a zahtak ding ahi hi. Tua in vangkepna ahi hi.

Thukhupna
SAHANGIN A GIAL ZAHTAK cih paunak tungtawnin sintheih laktheih ding thuthuk tampi gen khin hihang. Kimakaihna pen luahsuk zong hi thei a, khanglam zong hi thei hi. Makai ngei hih manin a guizui-in makai suak pah ding cih theih om lo hi. Ahih hangin makai ngeite mah in makai lungsim pua zaw hamtang hi. Thukhual zaw hamtang uh hi. Zomite ngeina ah khanghamte vangpia-in, zahtakna a pia minamte i hi hi. Tua mah bangin khanghamte in zong a tate a naute tungah vang a suatsawn ding mangngilh lo uh hi. Vang a kipia khial lo, vang a kisuan diamdiam minamte i hi hi. Mihing in a hihna munmun ah zahtak baang dingin a om siam ding thupi hi. Tua in vang kepna ahi hi. Ganhingte nangawn in vang kem thei ahih leh mihingte in a kepsiam mahmah ding kilawm hi. SAHANGIN A GIAL ZAHTAK HI.


**** Bei ta***

Laigelh Siapa in Zomi eLibrary/Laibusaal ading in Phalna ahong piak ahi hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: KIMAKAIHNA LE VANGKEPNA (Sahangin a gial zahtak). Agelh - Rev. Khoi Lam Thang Description: Rating: 5 Reviewed By: Cinpu Zomi
Scroll to Top