728x90 AdSpace

Hot
Menu
Zon-ol na Donate

Latest News

Leitung ah Thumanna Om nading. Agelh – Pau Sian Lian

Leitung ah Thumanna Om nading.
Agelh – Pau Sian Lian

Thugil ngaihsun John Rawl in leitung ah koicih lehang mihingte gamtat pha-in, thuman na le diktatnate in mihingte uk dinghiam, cihthu a lunglut le a vei mahmah mipil khathi. Tua ahih manin mihingte’n ei-le-ei ih kidawm in, thuman thutak mah teelin ih nuntak pih theih na dingin “Ei-le-ei kitheih mawhbawl na Dial” (Veil of Ignorance) cih lungsim kisitna na ci ding ihhiam (thought experiment) khat ong phuangkhia hi.

Rawls patkhiat hih lungsim kisitna-in, ei-le-ei leitung ah a omlo dan in kituat-in, kuami kuasa ihhiam cih kitheih mawhbawlna tawh kipan hi. Ei-le-ei leitung ah a om nailo dan ih hih manin ih min, ihza, ih panmun le neih-le-lamte peuhmah a omngiat lohi. Tua laitak mahin ih lungsim ah ei om nading khua khat (society) khat a sat dingin kivawh le hang, leitung ngeina mah bangin mihingte kibat lohna, ki lamdanna tampite ahi a nuamsa diak, a zawng zawdeuh, a pil tuan, cihdante a kipan tampi ong omkul dinghi. Tua bek thamloh hih khua pen kua’n uk, makaih, thunei ding? Bang thukhun zangding?, cihte geelkul pah hi. Ahi zongin a ngaihsut huai mahmah khatah ei pen tuate lakah kuasuak ding cih kithei lo ih hi mawkhi.


            A zenzen in tua ih lunggel khua-ah  mizawng mihau, nampi namneu, ulian le naltang kideidan na khauhpai mahmah mawkleh ei-le-ei kua suak ding cih kigen thei ngiatlo ahih manin za lian kisuak thei a, mizawng, genthei khatzong ih suakkha thei dinghi. Tua ahih manin thuman lo pi-in kizawhthawh, kikhelbawlna a a omloh nading, a omphial leh zong a tawm theithei a hih ding ih ut dinghi. Mizawng mihau kikal ah zong neih-le-lam a kikhai lualo ding ih ut dinghi. A sia pen dinmun ah ihsuak kha phial zongin ei mahmah in diksa-in ih santheih, ih thuakngap dinmun ahi ciangkhat ih deih dinghi. 

            Hih lungsim sitna’ deihna bulpi-in, khensatna-khat peuhpeuh ah ei-le-ei ih hihna, ih za, ih panmun, ih minam, ih innkuanpih cihte ki mangngilh bawl photin hih thukhensatna a thuak ding mite’ dinmun ah ei-le-ei kivawhna a hihi. Hih ka thukhen sat-in mizawngte’ ading bang aci tam? Numei naupangte’n thudik a sa uhdiam? Mittaw bengongte’n thu vaihawm na-ah amau huam a sa uhdiam? Amau munah keiom in hihdan lian in thu ong kikhensat leh thuman ka sadiam? Dik kasa diam? Ka sangzo diam? ci-in ei-le-ei mah ih kidot masak khitteh khensat pan lehang thuman thutak kituak pen-in ki khensat, ki vaihawm zaw deuhding cih lametna hi.

            Lungsim kisitna dangkhat-in, mi a tamzaw simsim sa Stephen Covery gelh “7 Habits of Highly Effective People” laibu sung a kihel, ‘A Tawpna ding lungngai kawmsa in Masuan in’,(Begin with the end in mind) cih thu tawh zomni. Tua zong lungsim kisitna nam khat hi leuleu hi. Nang-le- nang na theih ngeingiat loh sihvui na khat ah a paidan in mitkha-ah na kibawl masa dihin. Sihvui na mun ah mi tampi omin na theih tawh theihngei meelloh tawh na tu ngeingai uh cini.

            Nang zong kua misi gal na hiam cih na ngawn theilo pi mahin tua hun bawlna a maipen ah na tu pahhi. Sihvui hungeelna-ah thugen ding mi(4) na om uhhi. A masa thugen ding pen a si pen tawh a ki-it mahmah a lawm khat hi. A nihna pa pen,  a si pen’ pawlpi sia pa hi-in pawlpi mite’ nuntak zia a tel mahmah khat cini. A thumna pen a si pen’ lampan inntek thu pulak ding hi-in, a tawpna pa pen a si pen’ zum nasep pih khat na hihi. Tua thugen dingteng pen misi pa/nu’ thu ip neilo, pumphat, pum gensiat cihbang a zangthei ngiatlo a hi bangbang in a gen tattakte uhhi.

            Tua teng na muh khit ciangin, nang zong a misi zong theilo-in sigal cih haivai ci-in, a hankuang na va-en a, a misi pen nang pumpi, nang a si na hi seisai mawk hi. Nang ong kivui ni na hihi. Tua ahih leh sihvuina-ah nang thu a gen ding mi 4 te’n nangthu bangteng genleh na deih hiam? Tangthu hoih gending na deihleh tu mahmah in nuntakna tawh na lahkhiat kul dinghi, cih nopna hi. Nuntak na-ah huntawpna ding lungsim ah ngaihsun khol densa-in gamtat ding thu a gennopna a hihi.

            A tung a ih gen thunih te pen kihualna mahmah hi. Na khat peuhpeuh ih geel laitak sepma, gamtat ma, khensat ma-in hih thu-in mi khempeuh santheih, a kinial theilo thudik, thutak mah hiam? Mizawng, mipoi, numei naupang, namneu, mi citawmte’ ading zong a thuman mah dinghiam? Mai phapiak tuam ka nei kha hiam? Tua khitteh a sita ding himawk leng ka’ tangthu koidan in ka sutsak nuam ding hiam? Ong kikoi cih genleh ka uthiam?, cihte lungngai-in lungsim kisitna ih neihzeel kulhi.

Source :
"Bucing khantohna leh Picing ki-ukna" Laibu.

Laigelh Pau Sian Lian in Zomi eLibrary/Laibusaal ading in Phalna hong piak ahi hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Leitung ah Thumanna Om nading. Agelh – Pau Sian Lian Description: Rating: 5 Reviewed By: Cinpu Zomi
Scroll to Top