728x90 AdSpace

Hot
Menu
Zon-ol na Donate

Latest News

Lt. Col. Son Kho Pau Tangthu. Agelh – Pau Mung

Lt. Col. Son Kho Pau Tangthu.
Agelh – Pau Mung

Lt. Col. Son Kho Pau pen Pu Huat Vum leh Pi Vung Kho Dim te sung pan July 1,1920 ni-in Tedim gam huam Thuklai khua-ah suak hi. Thuklai khua-ah tan 4 azawh khit ciangin Falam Government Anglo-vernacular High School ah sangkah hong zomto suakin tan 9 ciang hong zo hi. 1939 kumin Maymyo(Pyin Oo Lwin) 2nd Burma Rifles ah galkap tumin galkap atum zawh a sawt lo-in galpi nihna tawh hong ki-zomto pah hi.

Galpi nihna hongpiang tak ciangin Japan galkapte kawlgam ladingin Thaigam panin kawlgam sungah hong lutsukin Myeik leh Dawei Vanlengtual te baih takin hong lazo pah ziau uh hi. Japante kawlgam ah hong lutsuk tak ciangin Kawlgam laizang lam leh Kawlgam leitaw lam teng Japante in na lazo uh ahih manin British te India gam ah na nungkik uh hi. 1942,Jan kha sungin Japan galkapte leh Boyoke Aung San makaih BIA te'n Myawaddy panin Dawei ciang dong hong lato ta uh ahih manin British galkap sung pan 2nd Burma Rifles te zong Moulmein panin India gamah na nungkik ta uh hi. Tua hun laitakin Son Kho Pau pen 2nd Burma Rifles sungah (Platoon Sergeant) ahi hi.

India gam panin British galkapte hong ki kaikhawm kik uh a,asimtham in Kawlgam sungah lutin galdo dingin hong kipan kik uh hi. Tua bangin kawlgam sungah galdo akipat kik sawmna hang un Britishte in atuam vilvel in Chindits Force (lion) cih galkap kipawlna khat phuan khia uh hi. Tua Chindits Force kipawlna te makaipi pen General Orde Charles Wingate ahi hi. 1943 kum tak ciangin tua Chindits Force galkapte in Kawlgam sunga, aom Japan galkapte do hong kipan uh a,ahizongin hong gual zolo uh ahih manin India gam ah hong nungkik kik uh hi.



1944 kum tak ciangin Sergeant Son Kho Pau in 2nd Lt ngah in,tuakhit asawtlo in Lt hong ngah hi.1944 kum tak ciangin Chindits Force te Kawlgam sungah hong lutin Japan te do hong kipan kik leuleu uh a,baih takin Japante kawlgam sung panin hong nopkhia kik zo uh hi.Tua bangin British galkapte in kawlgam sungah galdo hong kipat lai takin Son Kho Pau pen Captain za pia in galkap Platoon khat makai-in Chindits Force te tawh akibangin hangsan tak leh nasiatakin gal nado hi.Chindits Force te'n Japan galkapte India gam leh Zogambup panin nahawl khia ngai zota uh hi.Galpi nihna hong veng khit ciangin Pu Son Kho Pau zong Kawlgam ah hong ciah kikin Major ah aza hong kikhan hi.

Kandy Thukimna (Kandy Agreement)
1945 kum tak ciangin Kawlgam galkapte mailam kalsuan zia ding tawh kisai thu kikupna Conference Srilamka gam Kandy khuapi ah kinei hi. Tua Kandy Thukimna tawh kizui in (Burma National Army) leh British khutnuaia,asem Mualmi galkapte kigawmin akilam thak Burma Army cih kipawlna phuan uh hi.Tua akilam thak Burma Army sungah (officers) thunei makai ding mimal 200 leh nautang mimal 5200 om in Battalion pen 15 pha uh hi.Tua Battalion 15 teng lak ah Burma Rifles mintawh Battalion 6,Karen Rifles min tawh Battalion 3,Kachin Rifles min tawh Battalion 2,Chin Rifles min tawh Battalion 2,4th Burma Regiment cih min tawh Gurkha te Battalion 1 leh Chin Hills Battalion cih min tawh Battalion khat hi-in, a kigawmin Battalion 15 pha uh hi.

1945 kum tak ciangin 2nd Chin Rifles te in Tedim khuapi phualpi in nei-in Son Kho Pau in (Second-in Command) Duh Tatzin Hmu sem hi. 1948 kum Kawlgam in suahtakna hongngah tak ciangin Son Kho Pau pen Lt.Col ah aza kikhan in 2nd Chin Rifles te Commander makaipi hong sem hi. Lt.Col angah in akum kum 27 bek phapan ahih manin Kawlgambup galkap Commander teng lakah akum atawm penpen ahi hi.(2nd Chin Rifles ah Lt.Col Son Kho Pau I sepma a, Commander asem Col.Dal Za Kam zong aza kikhan in No.1 Burma Light Infanty Division ah Commander sem hi.Amah pen Zomi(Chin) sungah Colonel angah masa penpen ahi hi).Lt.Col Son Kho Pau makaih 2nd Chin Rifles te'n Shwebo khua pen phualpi in nei uh hi.

Gamsung Tualgal Kidona, Anasiat Mahmah Hunsung Panlakna 1948, 4th January ni-in Kawlgam in suahtakna la a, tua khit asawt hetlo in gam sung buaina tualgal lianpi kipan pah hi. Suahtakna ngah mapek pan kipan in, gam makaite kikal kilem lohna, ngaihsut kibatlohna tuamtuam omin abuai mahmah khin ahi hi. Tua hang mahin zong amakaipi General Aung San leh alawmte aki suam lum ahi hi. Amasa pen in;
(1)  Suahtakna ngahma 1946, 13th July pekpan in Takhin Soe makaih (CPB – Red Flag) te in thautawi kipan khinta uh hi.
(2)  (2) 1948, 28th March in Takhin Than Tun’ makaih Communist Party of Burma (CPB – White Flag) te in kumpi lehdo kipan hi.
(3)  1948, 29th July in PVO te in kumpi lehdo kipan hi.  
(4)  1948, 18th August in Belpawl kumpi galkap ahi 1st Burma Rifles Battallion leh 3rd Burma Rifles pan in pawlkhat in kumpi lehdo kipan hi.
(5)  1948kum beikuan lam teh Karente so litlit ta uh a, 1949,20th January kim pawl panin Karen Nation Union (KNU)/ Karen National Defence Organization (KNDO) zong kipan in kumpi nasem Karen mi UMP (Union Military Police) te, Belpawl kumpi galkap No. (1&2&3) Karen Rifles Battalion te zong damdam in KNU/KNDO tawh kipawl in kumpi lehdo ta uh hi.
(6)  1st Kachin Rifles panin pawlkhat in zong kumpi lehdo lai uh hi.
(7)  Mon minamte in zong Mon National Defence Organization (MNDO) ci-in thautawi kipan uh a,
(8)  Rakhine gam ah Mujahids (Muslimte) te in zong amau suahtakna, a tuam in thuneihna deihna tawh thautawi kipan in kumpi lehdo uh hi.

Tua ahih manin CPB, PVO (White band), KNU/KNDO/Karen Rifles, MNDO, Mujahids leh No (1&3) Burma Rifles, No.1 Kachin Rifles, hih teng hangin suahtakna angah cil Belpawl Gam ( Union of Burma ) pen buaicih takin buai in mei-am bang hileh a san velval laitak ahi hi.

1949, January kha sungin tungsiahte thupiakna tawh kizui in Lt.Col Son Kho Pau makaih 2nd Chin Rifles te Pyimyo panin Tembaw tawh Moulmein ah vaipuak sem dingin kituah uh hi.Moulmein atung zawh uh asawtlo in Moulmein District bup pen galte khutsung panin lakik zopah uh a,Moulmein District bup Security vaipuak alen dingin Kachin Rifles te tung ah ap uh hi.Tuakhit ciangin Lt.Col Son kho Pau makaih 2nd Chin Rifles te’n Kyaikkami,Thaton leh Tanintharyi kim tengah galdo zomto suak uh a,singnuaimi MNDO leh KNDO te khutsung panin tuakhuapi teng nasut khia kik zo uh hi.

1949, 31st January in KNDO te in Yangon khuapi gei kumpi innpan 15-20 miles khawngbek agamlatna Insein leh akim a,khua teng nala uh a,Kawlgam Kumpi dinmun pen a sawt lo-in KNDO te khutsung atung thei ding dinmun ahi hi. Tuahun pan kipanin Kawlgam mun tuamtuam, atam zaw pen singnuai mite’ khutsung ah om hi. Gam tuamtuam thu ki zakna media te bangin kawlgam Kumpi pen Yangon kumpi cita uh hi, Yangon bek ah ukna nei hi aci nuam ahi hi. Tua nangawn a khua khung pan KNDO in a la dingin kipanpan ta uh ahih manin Kawlgam a dingin anak lauhuai mahmah dinmun ahi hi.

1949, 2nd Feb ni-in KNDO te’n Insein khua alak tak uh ciangin Kumpi te’n Yangon khua gei mah ahi Mingalardon a om 1st Chin Rifles te Insein gal huh dingin na sam uh a,2nd Kachin Rifles tawh pangkhawm sakin Insein galmai nado sak uh hi. Tuahun laitakin Lt.Col Son Kho Pau makaih 2nd Chin Rifles te pen Moulmein ah KNDO te adalin a om laitak uh ahi hi.1949 kum March kha-in Insein galmai hong nasiat semsem tak ciangin Mon gam lam ah vaipuak anei Lt.Col Son Kho Pau makaih 2nd Chin Rifles te pen Kumpi in Yangon ah Vanleng 4 tawh samin Insein galdo dingin puak uh a,2nd Kachin Rifles te pen Mon gam lam ki-puak kik in apanmun uh kikhek sak uh hi.Hih Insein gal kidona ah 2nd Chin Rifles pen (Second-in Command) Duh Tatzin Hmu Major Tual Khup in makaih in Commander Lt.Col Son Kho Pau in anung Mingalardon panin panpih hi.

Hih kidona sungah U-Set-Kain-Kyaung, Saw-bua-gyi-Gone, Point 112, Min-da-ma-Gone leh Duck Egg Hills cih galmaite pen lauhuai leh nasia mahmah hi.Tua lai ah Lt.Col Son Kho Pau makaih 2nd Chin Rifleste in Sawbuagyigone kido na ah KNDO te zo uh a,tuateh Min-da-ma-Gone kidona ah zong 1st Chin Rifleste in KNDO te nazo uh hi.1949,10th April ni-in Galte galpan na ahoih pen,a haksa pen Insein lutna (Duck Egg Hills) pen No (1) leh (2) Chin Rifles te kigawm in na sim uh a,na zo uh hi. Hih (Duck Egg Hills) kidona ah 1st Chin Rifles pan mi 14 si, 36 liam, 2nd Chin Rifles pan in officer 2 leh nautang 5 si-in,13 liam uh hi. 21st May in Zomi galkap Chin Rifles (1&2) pangkhawm in Sawtat Setzung nado uh a,tualai ah KNDO te in gallel in 1949, 22nd May in Insein panin nungkik ta uh a, Insein galmai pen kha 3 leh ni 22 sawt hi. Hih Insein gal sungin Zomi galkapte a si leh aliam 300 val bangin kiciamteh ahih manin Battalion khat dektak bang himawk hi. (Kawlgam galkap Zumpi (War Office) te ciaptehna ah 1948-1950 kikal sungin Zomi galkap asi 177,aliam 153 leh a omna akitheilo amang mi 16 pha uh hi ci-in na ciamteh uh hi).

Hih Insein kido hun sungin Zomi galkapte asi,aliam atam luat ciangin Col.Dal Za Kam in thuak zolo in amah ngiat in makai-in galkap ulian Lt. Col Hrang Thio leh Lt. Col Son Kho Pau tawh athum un Belpawl Gam I galvailam zumpi ah vapai-in, hih Karen tawh kikap na dingah Zomite in Karente tawh kikap lo in mun dangah vaipuak apiak nangin ngen uh hi.

Hih KNDO tawh buaina pen Kawlmi leh Karen mite minam kikal ki muhdahna hang hi ci-in Kawlmi leh Karen kikal ah kuama lam ah dinglo in alai ah aom nangin ngen uh hi. Ahih hangin angetna uh ngahlo bek thamlo in Col. Dal Za Kam nagawm mundang ah kipuak in a sawt lo-in Pension tawh tawpsak (force to retire) ziau hi.

Hih hunlai a,Zomi galkapte pen Hangsan mahmah leh galsiam bek thamlo-in muanhuai mahmah uh ahih manin athupipen galmai leh a lauhuai pen galmai ah mapangpi dingin vaipuak kipia in Insein gal nazawh pih uh hi.(Tua khit banah hih Insein gal hun sung 1949,1st May ni-in KNDO,Communist te leh Bo Naw Seng makaih 1st Kachin Rifles te kigawm in Yangon khuapi la dingin Kawlgam laizang lam panin hong kuansuk uh a,Yangon pan 50-60miles khawngbek a gamlatna Pegu leh Daik-U kikal ah Lt.Col Lian Cin Zam makaih (Chin Hills Battalion Anti-Tank Regiment) te tawh nakpi takin kikap uh a,tualai ah Lt.Col Lian Cin Zam makaih Battalion te'n kumpi langpang singnuai mite na zo uh ahih manin singnuai mite ngimna tangtung lo in na nungkik uh hi).(Hih hun laitak Kawlgam sung a,galvan thupi ,thaupi teng alen pen Lt.Col.Lian Cin Zam ahi hi.)

Tua ahih manin Zomi galkapte pen Belpawl gam (Union of Burma) akitamkham lohna dingin ahu leh adal pi te ahi uh hi.Tua hangin Kumpite in Zomi galkapte galhang hihna pahtawina nam tuamtuam tawh napahtawi uh a, Lt.Col Son Kho Pau makaih 2nd Chin Rifles sung bebek panin a sangpen thumna Thura Cross angah mi (12), a sangpen li na Tuyegaung matdanwin tazeih (သူရဲေကာင္း မွတ္တမ္းဝင္) angah mi (24), a Supreme Commander‘s Certificate of Gallantry Award (SCCOG) angah mi (27), Certificate of Honour (COG) angah mi (1) cih teng hi-in akigawm in mi 64 in minphatna pahtawina nangah uh hi.Tua lo adang Lt.Col Hrang Thio makaih 1st Chin Rifles sung panin Lt.Taih Chun in (Aung San Thuriya Title leh Thura),Lt.Ca Thuan (Thiha Thura),Lt.Hniar Ceu (Thura),Lt.Thang Sui (Thura),Lt.Ngun Nawl (Thura) leh Lt.Run ling (Thura) cih tengin galhang hihna minphat ngah uh hi.(mun dang Battalion sung a,asem 2nd Burma Rifles sung pan lance-Coporal Duh Tatzin ZAKAIA in zong (Thiha Thura) minphatna ngah hi).


Zomi galkapte in hih Insein tualgal kidona hong zawh khit uh ciangin gual zawhna pawi na bawl uh a,Lt.Col Hrang Thio makaih 1st Chin Rifles te'n kha nih sung tawl ngak khuan na ngah uh hi.Kha nih sung hong tawl ngak khit uh ciangin galdo hong zom to kikin 1949,5th August sun 12 hun pan ki-panin zingsang nai 5dong Lt.Col Hrang Thio makaih 1st Chin Rifles te leh KNDO te Hmawbi ah nasia takin kikapna hong om in tualai ah Lt.Col Hrang Thio in anung zui te pawlkhat tawh galdo galkapte thapia kawm ding leh aveh kawm dingin apaina ah lamkal panin KNDO te in na pangsim uh ahih manin Lt.Col Hrang Thio aphei leh akhe te galte’n na kapkha in nasia takin liamna hong ngah hi.

Lt. Col Hrang Thio in nasia takin liamna hong ngah tak ciangin Zato ah kipuak pah in,Doctor te’n aliamna nasia lua mahmah ahih manin akhe a tan sak sawm uh leh Bawlung sui thei nawmlo ding kahih manin ci-in amah na-ut lo hi.Anung ciangin tanloh pha mawh hong hita ahih manin Doctor te’n akhe langkhat natam sak uh a,ahizongin na ziakai ta uh a,khe muat natna (gas gangrene) alangkhat lam zong na kilawh ahih manin akhe langkhat zong na tanbeh sak leuleu uh a,ahizongin hong dam zo nawmlo in 1949 ,8th August nitak nai 4 hun in galhang Hrang Thio in gam adingin anumtakna napia khia ta hi.Lt.Col Hrang Thio asih tak ciangin 1949,15th August zingsang nai 9 hun in Kawlgam kumpi te in Lt.Col Hrang Thio vuina hun bawl nate nasiatak leh thupi takin nei in,tua akivuina hunbawl na ah Lt.Col Son Kho Pau ,Lt.Col Van Kulh leh Chin Affair Minister Vuam Tu Maung cih te-in thugen na nanei uh hi.

Burma Communist Party (B.C.P) Te Tawh Kinawkna 1950 kum pawl ciangin Zomi galkapte leh Belpawl Kumpi galkapte in KNDO singnuaimi te Thai leh Kawlgam gamgi dong ah nanop khia suak uh a,1950 June kha ciangin Kumpi galkapte in gamsung tualgal nadai sakzo ta uh hi. KNDO te gallel in anungkik khit zawh uh ciangin Lt.Col Son Kho Pau makaih 2nd Chin Rifles te leh Burma Communist Party (B.C.P) singnuai mite tawh kinawkna hong om leuleu hi.1950 kum kipatcil lam pawl ciangin Lt.Col Son Kho Pau makaih 2nd Chin Rifleste in (B.C.P) te ukna Pyimyo khuapi hong lazo uh hi.Tuakhit ciangin B.C.P te tawh kidona hong om suaklai in 1950,Febuary kha ciangin Thayet khuapi hong lazo leuleu uh hi.Thayet khuapi honglak khit uh ciangin Lt.Col Son Kho Pau in Thayet khuapi ahung dingin 1st Shan Rifles te tungah vaipuak a-ap khit ciangin Pyimyo pen 2nd Chin Rifles te phualpi dingin na zang hi. 1950,Oct kha in British Mission te vaihawmna tawh akibawl Burma Army Staff College ah kha 6 sung tentan vakah a,"A" grade tawh ong hi.

Tua Tentan kahna hong man khit ciangin a phualpi uh Pyimyo ah Lt.Col Son Kho Pau hong ciah kik hi.Tua leh nikhat B.C.P makaite Pyimyo kim ah hongtung ta uh hi ci-in Kumpi thukan simte in Lt.Col Son Kho Pau kiangah thu napuak uh a,tua thu azak phet in Lt.Col Son Kho Pau zong galdo dingin hong kithawi pah hi,ahizongin ama tung a,thunei Brigadier Col.Kyaw Zaw in ni tawmkhat ngaklai photni ci-in galdo akuan ding ani na sopto a,ni tawmkhat angak khit ciangin Lt.Col Son Kho Pau in B.C.P te ado vua leh ziakai ta uh ahih man in B.C.P makaite na suakta ngai khin mangta uh hi.

Hih thu hangin Lt.Col Son Kho Pau Brigadier Col.Kyaw Zaw tungah lungkimlo ahih manin galkap zumpi ah Brigadier Kyaw Zaw nakhia hi. Galkap zumpi ah Brigadier Col.Kyaw Zaw akhiat leh Kumpite in Lt.Col Son Kho Pau pen ama tung a,thunei pa ahilo pi-in mawhsak in thubawl hi ci-in galkap thukhun tawh kizui in Lt.Col Son Kho Pau pen apan mun panin 1951 kum-in nakhawl sak ziau uh hi.1957 April kha tak ciangin Brigadier Col.Kyaw Zaw pen B.C.P singnuai mite huhna piasim cihthu Kumpite in atheih ciangin Brigadier Col.Kyaw Zaw apan mun pan in nakhawl sak uh hi.1976 kum tak ciangin Brigadier Col.Kyaw Zaw zong B.C.P te phualsatna Kawlgam leh Sen gamgi ah pai-in B.C.P singnuai mite tawh hongkipawl khawm hi.Brigadier Col.Kyaw Zaw akihawl khiat khitzawh ciangin Lt.Col Son Kho Pau in apanmun lui mah ah panmun apiak kik na dingin Prime Minister U Nu kiangah nagen a, ahizongin na ngahlo hi.


Coffee Ciing Nasepna
            Kawlgam galkap ahihna pan akhawl khit zawh 1954, July kha in Prime Minister U Nu in kumpi Coffee Plantation ah nasem dingin nasam in lungdam takin nasang hi.Pu Son Kho Pau I pa pen Thuklai khua ah Coffee ciing nasep asem khat hi a,tuahangin Pu Son Kho Pau zong aneu tung a,kipan Coffee ciing nasep pen asem ngeisa khat ahi hi.1955 kumin Kumpi te teelkhiatna tawh Indonesia ah Coffee ciing nasep leh Coffee bawlkhiatna tawh kisai pilsinna kha 9 sung avakah khit ciangin Pyin Oo Lwin,Anisakan ah Coffee ciingna Plantation ah Manager vasem hi. Anisakan ah Kum 4 sung kumpi nasep asep khit 1959 kum ciangin Zogam ah Coffee ciing nasep sem dingin anasepna pan in nakhawl hi.Pu Son Kho Pau te innkuan pen Tahan myo ah teengin Theizang khua ah Coffee ciing nasep sem hi.Pu Son kho Pau I zi pen nurse ahih man in Tahan ah zatui sai phuan uh hi.1961 kum ciangin Pu Son Kho Pau in Kalay Valley Baptist Association ah Assistant General Secretary sem in,1962-63 kum sungin Part-time in Assistant General Secretary sem hi.

Tawlanzi (Revolutionary)

1962 kum tak ciangin Gen.Newin makaih Galkap Kumpi (Revolutionary Council) Tawlanzi Council in gam ukna honglak khit zawh July 4 ni-in Burma Socialist Programme Party (BSPP) hong phutkhia uh hi.1964 kum pan kipan in kawlgam sungah mipi neihsa Company,Setzong ,Sumbuk sai,Lo-Leitang leh Sum (Dangka) cihte aanaa tawh nasut mangin Pu Son Kho Pau te Zatui sai zong nasutsak uh hi.Tua bangin Gen.Newin I makaih Socialist Programme Party te gam makaih zia khutzepsa in en in aom zo nawmlo Pu Son Kho Pau zong hiamtawi in Tawlanzi Council te lehdo dingin 1964,28th April ni-in inn pan dingkhia in India gam lam ah hong zuan ta a,Zomi MP luite leh Zomi mitei pawl khat tawh kipawl in ANTI-COMMUNIST FREEDOM ORGANISATION (ACFO) kipawlna hong phutkhia uh hi.Tua aphut khiat uh (ACFO) kipawlna pen Pu.Son Kho Pau,Pu Dam Khaw Hau ,Pu Mang Khan Pau,Pu Hrang Nawl,Pu Son Cin Lian leh Pu Thual Zen cih tengin makaih hi.Tua (ACFO) pawlte pen India kumpi in sumlehpai leh an nek tuidawm te pia in,gamgi (25 miles) Tai 25 kimteng ah om theihna phalna pia uh hi.

Anung ciangin Pu Son Kho Pau leh Manipur-a Zomi makai Pu Tum Kho Pum te Mizoram Champhai ah hong kimu in tuapan in (ACFO) pawl leh Pu Tum Kho Pum hong kipawl in United Chin Government (Zo Kumpi) hong phuan khia uh hi.Tua UCG kipawlna ah Pu Tun Kho Pum pen Prime Minister, Pu Son Kho Pau pen Defence Minister, Pu Hrang Nawl pen Foreign Minister cih bangin panmun kiguan in Zogam galkap mi 57 te tawh East Pakistan (tu-in Bangladesh) gam ah galsiam sin in vapai uh hi.Galsiam sin Zogam galkapte Zogam kap dingin galvan namkim tawh hong kileh kik ding uh ciangin Pakistan Official te’n Champhai a om Pu Thual Zen leh a lawmte thu zasak in Zogam galkapte Arakan Hills leh Chin Hills tawn in (Teikhang) Sialkaltang ah hong lut ding uh hi cih thu na zasak uh hi.

Tua ahih man in Pu Thual Zen leh Pu Hrang Nawl makai in khen nih kisuah uh a,Pakistan gam a, Galsiam sin Zogam galkapte nuamtak I gam ah honglut theih na ding un pan deihtak nala uh a, Pu Hrang Nawl makaih Zogam galkap mi 80 te zong Falam leh Hakha lam zuan in pai uh a,Kawl galkap platoon khat omna Rihkhawdar khua ciang baih takin buluh zo a, Halkha khua la man loin nungkik kik uh hi. Pu Thual Zen Commander-in-Chief makaih Zogam galkap mi 700 val ten zong Tedim lam zuan in pai uh a,Tedim leh Mualbem khua kikalah Kawlgalkapte tawh nakpi takin kikap uh a,Tedim Khuapi lading acih uh hi-in Kawl Kumpi Gen. Newin Sawltak Col.Van Kulh leh Falam DC Pu Thawng Cin Thang te’n nanak khouhlua mahmah uh ahih manin Tedim khuapi nala kik lo uh hi.Tuaci bangin ana buai vengvungh lai-tak un,Pakistan gam a,galsiam sin Zogam galkapte Sialkaltang dung zui in,nuam takin Zogam nalut thei uh hi.

1965,June kha ciangin Pu Son Kho Pau zong a Body Guards te tawh Nagaland ah Naga National Council makai te tawh kimu dingin vapai uh hi. Nagaland apai na vuah lam kawmkal pan in 7th Assam Rifles te in na ambush in na man uh hi. Naga galkapte in dawn dingin gelna aneihsa uh ahih manin Pu Son Kho Pau in 7th Assam Rifles te pen Naga galkapte sakha ahih manin naleh dolo in 7th Assam Rifles te'n naman uh hi.

1965 kum tak ciangin India Prime Minister Lal Bahadur Shashtri leh Gen. Newin ten Rangoon-ah kihona nei uh a, tua takah India leh Burma gamgi dungah buaina a bawl leh bawl a sawm peuhpeuh kimatsak a, a gam kumpi tungah ki-aptuahna ding kilemna thukhun bawl uh hi. Hih thukhun hangin Zogam galkap makai te India Kumpi te mat natuak uh hi.Tua akiman te lak ah Pu Son Kho Pau, Pu Hrang Nawl, Pu Dam Khaw Hau, Pu Ro Thangte leh midang pawlkhat India Kumpi in naman takpi uh hi.Pu Son Kho Pau pen Imphal thong ah kum khat kia in,tuakhit 1966, 10th August ni-in India kumpi in Kawlgam Kumpi te kiang ah ap in,Mandalay thong ah nakhum uh hi.1970, April 21 pan 1971,Nov 7 ni dong Falam Thukhen Zumpi ah thusitna te aneih khit uh ciangin 1971,15th Feb ni-in Monywa Thong ah na kituah sak leuleu uh hi.1974 kum ciangin Tawlanzi Council Kumpi in gamvai nasepna hang tawh Thongkia te suahtakna apiakna vuah Pu Son Kho Pau zong suahtakna napia uh hi.

1974, 3th Sept ni-in Thong pan hong suakta in a innkuan pihte tawh cidam,ludam takin hong kimu thei kik uh hi.Thong pan asuahtak khit ciangin apian na khua Thuklai khua ah cidamna lam tawh kisai tuaksuak zatui bawl-in (Chin Taizin Sii) nasep hong sem hi.1977,14th Feb ni-in Tedim lampi bawlna ah nasep kuan dingin apai na ah lam kawmkal panin thakhat thu in a nuntakna hongbei vat ziau hi.

Innkuan Pihte

Pu Son Kho Pau pen Falam gambup ah Tuiphum biakna asuak masa penpen Pu Thang Cin I tanu Pi Esther Kyin tawh 1950 kum in kiteeng uh hi.Azi tawh akiteeng lai un a mopawi vuah Prime Minister U Nu zong va kihel in thapiakna te nanei hi.Pu Son Kho Pau in a it mahmah azi tawh Ta pasal 5 leh Ta numei 4 na nei hi.

Thukhupna
Pu Son Kho Pau pen a nuntakna hun sungah ahun atamzaw pen gam leh minam ading nasepna ah apiakhia khat hi a,Kumpi galkap sungah Zomi paltan te a makaih nate ah hita leh thau vui,thau tang tawh Singnuai zuan in gam leh minam a ding a sepna te khempeuh ah hita leh akhutnuai mi nautangte in itin,zahtak ciat uh a,tuakhit banah pil,siam,ciim leh thathat in amuan huai mahmah makai khat ahi hi.Kawlgam sungah Kumpi langpang singnuaimi thautawi kipawlna namkim hong om lai-in,Belpawl gam (Union of Burma) a kitat kham loh na dingin ahu leh adal te lak ah a mapang pi khat zong ahi hi.Galkap panin akhawl khit ciangin ama I uk Coffee ciing nasep sin in,Zomi te a dingin tua atheih pilna te Laibu in bawl in nahawm khia hi. Tuakhit banah Gen.Newin makaih (Revolutionary Council) Tawlanzi Council te gam makaih zia,khut zep in en mawkmawk zo nawmlo ahih man in Zomi,Zogam a dingin thau vui,thau tang tawh kipan in gam leh minam adingin nasem in,Zogam,Zomi a it,avei na te hong lak khia hi.Gen.Newinmaikaih Tawlanzi Council Kumpi-in kum tampi sung Thongah a khum na panin hong suahtak tak ciangin om mawkmawk lo-in Zomi te I zat-theih dingin Tualsuak zatui (Chin Taizin Sii) hong bawl khia hi. Atawp na ah ama I ahusangna abei dongin tawlnga lo in gam leh minam a it,aveina te hong lak khia hi.Tua ahih man in Pu Son Kho Pau pen gam leh minam a it, avei leh gam leh minam adingin apil,a siamna leh ahun,a thatang te it siitlo in zangin asem khia khat ahih man in mizah tak huai leh mi thupi mahmah khat hi a,khangthak Zomi te ading in et-teh takcing khat ahihna kimu thei hi.

References:
(1) ဒုဗိုလ္မွဴးၾကီး Son Kho Pau (ခ်င္းေသနတ္ကိုင္တပ္ရင္း (၂) မွ တပ္ရင္းမွဴး) ၏ ကိုယ္ေရးအက်ဥ္း By - Salai Van Cung Lian (UK).
(2) ဗို္လ္မွဴးၾကီး ဟရန္ထီးယိုးႏွင္႔ ၁၉၄၉ ျမန္မာျပည္ ျပည္တြင္းစစ္ၾကီး By - Salai Van Cung Lian (UK).
(3) http://www.rothwell.force9.co.uk/burmaw…/2nd_chin_rifles.htm.
(4) https://en.wikipedia.org/wiki/Chindits
(5) Pu Thang Za Dal Hamburg,Germany I agelh -An Introduction to the Zo People of Bangladesh,Burma and India.
(6) Dr. H.Thangtungnung I agelh -Tunkhopum Baite and His Chin Liberation Army In The 1960s
(7) Malaysia SDA Zomi Kum (3) cin,EBENEZER MAGAZINE sung ah akisuak sak (Zomi Galkap Ten Kawlgam Kumpi Ahutna From:Lt.Col.Thian Kho Khai)
(8) Sia Mang Tung Thang I agelh – Kawlgam ah Zomite’ Panmun Lakna.
(9) Khup Lian Thang I agelh - Belpawl Gam a honkhia Zomi galkapte leh Karen gal, tualgal.
(10) J. Thang Lian Pau , editor Zolawkta I agelh Zomi te' theihhuai thu pawlkhat .
(11) Kei I kagelh Lt.Col.lian Cin Zam (Zeya Kyaw Htin) Tangthu.

Photo Credit : Salai Van Cung Lian (UK)

Laigelh Siapa Pau Mung in Zomi eLibrary/Laibusaal ading in phalna ahong piak ahi hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Lt. Col. Son Kho Pau Tangthu. Agelh – Pau Mung Description: Rating: 5 Reviewed By: Cinpu Zomi
Scroll to Top