728x90 AdSpace

Hot
Menu
Zon-ol na Donate

Latest News

Pilsinna ah Zomite in a ciangciang, a dawldawl ah leitung tawh liangko kikim nading. Agelh – Siapi Kung Za Mung

Pilsinna ah Zomite in a ciangciang, a dawldawl ah leitung tawh liangko kikim nading.
Agelh – Siapi Kung Za Mung 
[B.A (Eco); B.Ed.(Credit);M.A (Theo.Magna Cum Laude)]

A. Minam leh kampau kipsuak nading
Zomite kumzalom khat sungin kikhangto vat a, leitung bupah kithehthang  hi. Minam citawm kawmkalah kilom-om zolo in, minam liante’ kawmkal ah ki thehthang ihih manin i pau le hi lai-te lim kep mahmah kul hi.

1. Zogamah tanbul sang-inn ah Zolai kisin thei napi, laivuanna ah zolai kihello cih thu tawh sia thadah, minam itlo pawlkhat in zolai lim hilhlo a, naupangte in zolai gelh thei lo, sim thei nawn lo hi. Sangsiate in thu hong ngaihsut mahmah uh kul ding hi.

2. Zogam pualam zomi lom-omna munte ah biakna pawlpi bulphuhin sangkongkhak sungin zolai sinna kinei hi. Hih pen sanginn ah zolai sin lo uh ahih manin hanciam mahmah ding nasep khat ahi hi.

3. Kawlgam, Vaigam, Mangkanggam mun tuamtuamah a tangciak zomi nu leh pa te in it ate, eimau inn sungah zopau, zolai, zotatzia cihte i zatpih kei leh i sesum minthang deihna pen minam beina hong suak ding hi. Nu leh pate in vaipuak lianpi nei uh hi.

Zomi khempeuh koikoi ah om taleng, zomi mah hi ding, zopau mah pau setset ding, hih pen niamna hilo, minamdangte tawh liangko kikimna khat a hihi. Zolai tawh kigelh laibute lei-in sim ni. Zomi hihna angtang ni.

B. A ciangcianga pilsinna
Mun tuamtuam ah teng ihih manin pilsindan zong a tuamtuam om ding hi.I omna mun ciatah gualtungtuang hih nading hanciam ni. A thupi ah mangpau manglai siamlo in pilna thuk bangmah kikalkhia zo lo hi. Leitung buppi’ zat manglai i siam mahmah ding thupi hi.

Zomin  khuakin minamdangte ban lah tuan lo napi hanciamna leh thukhun zuihna ah zomite in mi kipha zo lo hi. Matut zawh mateng hanciam tentan ding cih lungtang a nei zomi tampi kisam hi.

Hun tawh kizui in thukizakna manlang mahmah hi. Zomite in mi i phak zawh nading zogam khhua khempeuh ah khuaphiamei (Electricity) i neih kul hi. A bei ngeilo Pasian’ hongpiak tuitha,  uihtha leh nitaang panin khuaphiamei la a, leitung bup pi tawh ki zop den ding, khangno khempeuh in computer, internet zat theih ding kisam hi. Tua hi leh mi i ban bek ding hi.

Tu tadih sanginn lai kihilhdan pen ngaihsut cih omlo, siate in hihteng lotngah un acih peuhpeuh a thu a la tello pi-in a sim au-au lel uh hi a, leitung tawh kikim zolo ding hi hang. Hih laihilh dan zong a sawt lo in hong kikhel lel ding hi.

Gamdang tungsate in pilsindan hoih nono nuaiah kipattahna a ngahkha uh hi a, gual tung tuan ding hanciam ding bek hi lel hi.

Gam tuamtuam ah laitan (Standard) lawh dan a tuam tek a om hang in matriculation kici ciang pen pilna bulpiteng ki sin hi a, a tungsiah ah pilna hiang khat bek a tel a khawk in a kisin toto ahi hi. Doctorate degree pen pilna tungkhupna ci ni. Kum sawmnih bang hun leh sum tampi bei-in khuak nam lianga a kisin teh doctor kingah pan kimlai kumpi laivuan zong nawkkha ngeilo pipi-in deih ngama, sum tawmkhat lam-etna tawh a pia ziauziau ngam i om pen khantohna hilo in a mai zum huai mahmah thu khat hi zaw hi. Hih pen leitung bup tawh liangko kikimna hilo ahih manin mailam hunah a lak sawm leh a piak sawmte in thu ngaihsut huai hi.

Mun tuamtuam panin a dawldawl in sin toto a, i ngah pilna siamnate taw hi gam leh minam khantoh nading na khat teitei sep hamtang ding thupi hi. Zogam a ding phattuamna themno khat zong a bawl vetlo tuipi gala mipil mihau zomi sangin zogam ah nungta in singkung ankung khat a hah ngeipa thupi zaw hi. I hauh i pill eh zomi zogam ading hi sak ni.

C. Kawlgam sung zomite pilsinna ah khantoh nading thute
1. Hahkat taleh thadah taleh kha sum kibang sangte ah i deih zah pilna hong kiguan zolo ahih manin zomi lomtenna khuapi te ah pilna sawm kician phuanin deih sakna leh veina tawh pilna kiguat kul ta hi.

I milui uliante a vekpi phialun bawda kipattahna pan a khangkhia te vive hi. Siapi Phut Khua Suan in Lawibual sangpi ah nitak laisimna hong phuat leh tuaa kumin Lawibual sangpi-in zogam buppi ah tansawm result hoih pen ngah pah lian hi. Kawlpi ah Ciimnuai Pilna Saw mi neih manin khang kibottat siavuan sinna phualah zomi khangno tampi ki lut zo kik ta hi.

Cikha, Tonzang, Tedim, Kawlpi, Khampat, Tamu khuate ah hunbit bawda hon zawh nading hanciamin, ki-ukna khuahun kikhekna tawh ki zui-in private sanginn dong ngim ding kisam hi.

Socialist hun lai-in guktat, tangtat tawh kihau zo hi. Democracy hun ciangin kipawlkhopna bek tawh ma kitun zo ding hi. Sumhaute leh mipilte kipawlkhop kul ding hi. Kipawl siamna zomite lak ah kisam lai mahmah hi.

2. Tuhun ciangin na khat peuhpeuh kiva mahmah peuh leng nuntakna piang lel hi. Tua hi a, sanginn a subject kisin a siam hetlote ama’ kivakna muhkhiat saka, pattah ding thupi hi. Zinmuak siamna, ciamnuih siamna, kineih siamna, kimawl siamna cihte a kipan a uphuailo kivakna tawh mite in sum tampipi a luah ziahziah na thu thei-in lai siamlote a ut loh pi-in hih tentan luat loh ding thupi hi. Zomi laphuah lasak siam mikhat in “Ka tansawm lai-in OB (Optional Burmese) cih om kei leh degree ngah kei ning, leitung ah Mathematics ki beisak le hut ing” , ci-in ciamnuih leh cihtak thuah in gen zel hi.

3. A zai mahmah nekzonna ah thu kanin theih mahmah ding kisam hi. Sang kahkah ding, degree ngah teh kumpi nasep khat peuh sem ding cih bang leltak pen tupna nei kici thei nawn lo hi. I theih khak loh manin a kipelh thupha hamphatna tam mahmah ding hi. Internet mah tawh kopin thuhoih thupha, thuthak theite in im lo a, deih sakna tawh ki gen sawm pahpah ding kisam hi.

D. Thukhupna
Private sang hongin pilna siamna thu tuamtuam deihsakna takpi tawh kipantah lehang a sawtlo in leitung tawh liangko kikimin pilna tawh i nungta zo ding hi.


Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Pilsinna ah Zomite in a ciangciang, a dawldawl ah leitung tawh liangko kikim nading. Agelh – Siapi Kung Za Mung Description: Rating: 5 Reviewed By: Cinpu Zomi
Scroll to Top