728x90 AdSpace

Hot
Menu
Zon-ol na Donate

Latest News

“SALIAM NUN PAN MILIAM NUN AH” 2013 GZA LUNGDAM KOH NI SERMON: TBC-Y YANGON. Agelh - Khoi Lam Thang

“SALIAM NUN PAN MILIAM NUN AH”
2013 GZA LUNGDAM KOH NI SERMON: TBC-Y YANGON
Khoi Lam Thang

1Khang 17:16 Tua ciangin Kumpi David tumin Topa’ mai-ah tu a, “Topa Pasian aw, nangmah in hih ciang dong kei nong tunpihna kei kua hi a, ka innkuanpihte bang ahi hiam? 17 Hih a beisa thu pen nangma mitah na neu khat ahi hi, Pasian aw. Nangmah in a hong tung ding hunpi khat sung tang ding na nasempa’ suanle khak tawh kisai thu zong na gen khin a, mailam a khang dingte thu kei nong lak khin hi, Topa Pasian!

Late 50:23 Biakpiak nadingin lungdam piakna hong paipih mi in kei a hong pahtawi ahi hi. Ka thu a mang mite khempeuh ka honkhia ding hi,” a ci hi.

Tuni hi bang a hunzang thei ding a hong kiseh manin angtang mahmah ing. Tuni GZA pen Zomi khempeuh tungah hong kitangkona tausangpi bangin ka ngaihsun a ka lungdam mahmah hi. Makaite in hun zangin hong she uh ciang zong, “hong kisinsak nuam hitah” ka ci a, ka law nam ahih manin hong ding ing.

Zomite lakah 2005 lai a kipan in “Zomi bup Lungdam koh ni” cih na kivaihawm ngei zo hi. Cope topa hong tun November kha bei hi a, Kumza cin CCJ zong 2010 kum November kha bei in kibawl hi. Tua pan in GZA hong piang a, tu in “Zomite’ Lungdam koh ni” minam bup in a zang thei ihi hi. America-te THANKSGIVING DAY tawh zong kinai sawnsawn lai hi. Tua bang hunpha i ngah laitakin i pu i pate hun laia kipan thungen tangtang, lungdam a ko tangtang ihihna Neino tangthu tawh thu hong pan nuam ing.

Zomite’ Neino tangthu tawh i thu pan nuam ing. A tangthu vekpi hi lo hi. Neino pen Tawpi’ khut sung a tun khit ciangin a tankhia dingin Phucil le Nantal va kuan uh hi. A va tatkhiat khit uh ciang hong ciah lamin tungtun dek khat ah an ne dingin tawlnga uh hi. Tawpi in khua nung theih a, heh mahmah ahih manin Phucil le Nantal hingkhawi lo dingin nungdelh hi. Tua tungtun dek ah va pha ahih manin a ne dingin khuaimu in va lam diaidiai hi. Tua laitakin vantung pan Pasiante in “Miliam gum zaw ding maw saliam gum zaw ding” ci-in kikum uh a, “Saliam in ne le lah ne lawlop, dawn le la lawn lawlop, ka siam ka zai ci kei, Miliam in ne le lah ka siam aw ka zai aw ci, dawn le lah ka siam aw ka zai aw ci, mi liam gum zaw ni ci in a khensat uh hi. Tua phetin Pasiante’ kiang pan thu hong tunga “Nantal, Nantal na tung a khuaimu” ci hi. Nantal in zong pasian aw za in a cih nopna thei pah ahih manin a namsau dok-in a vat leh Khuaimu a pumlai pan vat tan lian hi. Tua pan in inn ciahsuak uh hi.

Zomite LUNGDAMKOH NI ah i tangthu siksan in “SALIAM NUN PAN MILIAM NUN AH” cih kikum leng ut ing.

I Lai Siangtho tungtawnin LUNGDAMKOH NUNTAK a nei Israel-te tangthu banah, America-te Zomite tangthu hih tangthu tom thum sutin “Ka siam aw ka zai aw ci-in lungdam a ko Minam” i suah nang, kong hanthawn nuam hi. Ei Khristiante zong tua bang a lungdam thei dingin Lai Siangtho (Ef 5:20, Ph 4:6, Col 3:17, 1Th 5:18, 1Ti 4:4) in hong hilh hi.

Israelte Lungdomkohna:
Isrealte in Lungdamkoh biakpiakna thupisak mahmah uh hi. (Lev 7:12, 22:29, 1Ch 16:8, 2Ch 29:31, 33:16, Ps 116:17, Ps 50:14, 92:1, Jer 33:11,). A thupisak mah bangun Pasian tawh kizopna in nei uh a, a nunlui uh phawk-in Pasian khutmate simsim uh hi. Siampi laibu sungah Biakpiakna tuamtuam om a, tuate lak ah Lungdamkoh biakpiakna (Sacrifice of Thanks giving) na om hi. Tua khempeuh ma in a neih uh Paisan pawi (Passover) pen a lungdamkoh biakpiakna ahi hi. Jesuh in tua Paisan pawi thupisak mahmah hi. Nekkhawm pawi zong tua Paisan pawi pan hong mengkhia ahi hi. “Anlum la in, …  hai zong la in, lungdam a koh khiat ciangin” kici hi. Izip pan a suahtakna uh mangngilh loin hih bangin lungdam a ko uh ahi hi.

Abeisa hunte phawk in lungdam a kjh theih nadingin Paisan pawi a bawl uh ciangin khua pua lam ah hampheng lam uh hi. An lim lo pen (silngo sawh loh an) le citui, meh kha tui peuh ne uh hi. “Bang hangin silngo sawh loh an pen citui tawh kimeh a hiam” ci-in , a pate tungah tate kidong sak-in, a pate in Izip pan suahtakna thu le Pasian bawl nalamdangte gen kikkik uh hi. Suut kikkik uh hi. Mang ngilh loh dingin satssuah kikkik uh hi.

America-te Lungdamkohna
England gam-ah Biakna suahtakna a om loh manin a tuam om pawl (separates) 102 in 1620 kum September ni 6 ni-in England gam nusia-in ni 65 sung sawt hi. Nuntak giautauna lianpi kawmkal, khua dam mahmahna lak pan 1621 kumin a masa pen an la uh hi. Tua hun a kipanin Pasian tungah “Lungdam kohni – Thanks giving Day” hong piang hi. 1863 kum ciangin America President Abraham Lincoln in gambup ni thupi ni dingin tangko khia hi. Tua bangin kum sim November kha, a li veina laithai ni pen THANKSGIVING DAY in ciamteh uh hi. Sai-ak sa ne in, innkuan kikaikhawm uh hi. Pasian tungah lungdam ko uh hi. Upna sihpih ngam makai masate’ patkhiat hi a, Pasian lo ngal muan dang nei lo uh ahih manin “In God We Trust” a ci cinten mite ahi uh hi. Samoset, Abnaki leh Squanto

Zomite Lungdamkohna
Tuma kum 100 val diak lai-in, gamsate tawh a takhawm Zomite, Jesuh’ lungdamna thu hangin kum 100 sungin leitung mi namdangte nuntak a ciam kha ihi hi. Hihte khempeuh Lungdamna thu hang liuleu ahi hi. Pasian tungah i lungdam hi. 2010 kum Cope Centennial Jubilee khit ciangin “Zomi Lungdam koh ni” ciamteh in kumsim a bawl ciatciat ihi hi.

Zomite pen pu le pate’ teenna khamtung khua le gam a nu siasia minam ihi hi. Gamdang pai tampi i om a, India, Thailand le Malaysia tawn a tungte vive hi pian hi hang. I Exodus na mahmah hi. Minam bup ading bek hi lo, mimal le innkuan ciat in Pasian tungah lungdam koh ding leiba tampi i nei hi. Lungdam a ko siamte Pasian maipha a mute hi pah hi.

Lungdam koh na a pian theih nading thu guipi nih om hi.
(1)  Lungdam koh taak Pasian ahi manin a tungah lungdam ko ni.
Lungdam nading la a phuakphuak Kumpi David in lungngaingai in, “Topa’ mai-ah tu a, “Topa Pasian aw, nangmah in hih ciang dong kei nong tunpihna kei kua hi a, ka innkuanpite bang ahi hiam? 17 Hih a beisa thu pen nangma mitah na neu khat ahi hi, Pasian aw. Nangmah in a hong tung ding hunpi khat sung tang ding na nasempa’ suanlekhak tawh kisai thu zong na gen khin a, mailam a khang dingte thu kei nong lak khin hi, Topa Pasian!” ci hi.

David vantung mi hi lo hi. Cilesa tawh kikop hi a, a picin lohna tam mahmah hi. Tua teng mah phawk kikkik a, Pasian hoihna a lungngaih ciangin “Topa na itna kiciang tan hi leh kei hong ban kei lua siinteh” cici mai hi. “Pasian hoih hi kei adingin, Pasian hoih hi ka innkuan adingin” cici mai hi. Tu ni-in Tedim kampau Zomite i dinmun taktak kimu-in, Pasian mai ah kiniamkhiat dih ni. Lungdam kohna in Pasian a phat taak Pasian ahih lam phawk kikkikna ahi hi. Israelte in na tua cih khin uh hi. Americate in na tua cih uh hi.

(2)  Lungdam koh ding hong ngen Pasian ahih manin Lungdam ko ni.
I hihna taktak tawh Pasian pahtawi ding hi hang. Late 50: 23 sungah “Biakpiak nadingin lungdam piakna hong paipih mi in kei a hong pahtawi ahi hi. Ka thu a mang mite khempeuh ka honkhia ding hi,” a ci hi. Lungdam koh biakpiakna in Pasian pahtawina sang pen ahi hi. A phatngai Pasian ahi hi. Lungdam koh ding hong na ngak gige Pasian ahi hi.

I Biak Pasian phat taak bek hi loin, phat ngai mahmah Pasian ahi hi. Zo tangthu sungah Dahpa ton lai in a khuang dol a, a pho leh ni zang in a khuang laksak hi. Tua khuang a lakkik nadingin van khawh dongin tausang lam a, ahih hangin leikha bia kha lo ahih manin tausang kicim hi, cih tangthu i nei hi. I biak Pasian in i phat khak loh manin hong dantat lo hi. Ahih hangin a phat kha, lungdam a ko kha mite tungah a lamdang taktak in thupha pia hi. Late 50: 23 Biakpiak nadingin lungdam piakna hong paipih mi in kei a hong pahtawi ahi hi. Ka thu a mang mite khempeuh ka honkhia ding hi,” a ci hi. Late 91: 14 Itna tawh hong bel ahih manin amah ka honkhia ding a, ka min hong thei ahih manin mun sangna-ah amah ka koih ding hi. America-te thugen siam khat in “Ko America-te pen minam dangte sangin hoih zaw lo hi ung. Ahih hangin hizahta Pasian in America mite thupha hong piakna pen Thanksgiving Day ka neih man uh ahi hi” ci tanghial hi.

Lungdam koh taak ahih manin lungdam i ko a, lung dam i koh ding hong lamen ahih manin lungdam i ko hi. Amah a phat a pahtawi mite tungah amah lungkim a, haksatna pan honkhia lailai hi. Phat taak Pasian ahih zahin phat ding hi hang. Lungdam koh taak Pasian ahih zah in lungdam ko ding hi hang. Pasian pen a hoih pen tawh kilawm hi. A siang pen tawh kilawm hi. A thak pen tawh kilawm hi. A siam pen tawh kilawm hi. Tua bangin i biak manin amah a pahtawi ihi hi.

Pasian tungah tua bang lungsim i neih ciat nakleh, i nuntakna damdamin hong kikhel dinga, Pasian tung bek hi lo, midangte tungah, nu le pate’ tung, makaite’ tung le a zahtak huai mite tungah Lungdam i ko thei ding hi. Hih Zomite’ Lungdam koh ni pen minam vai in i ngaihsut ban ah, mai lam-ah a behbeh in a inn kuankuan in nei leeng, tua bang hun ciangin zunek sanekna in zang loin, nunlui lampi suutkik in Pasian tungah lungdam kohna hun  hi sak leeng Pasian in thupha hong pia thuahthuah lai ding hi.

Lungdam a ko siam lote salaam nun hi a, lungdam a ko siamte miliam nun nei ahi hi.

Saliam nun pan Miliam nun ah

 Laigelh Siapa in Zomi eLibrary/Laibusaal ading in Phalna ahong piak ahi hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: “SALIAM NUN PAN MILIAM NUN AH” 2013 GZA LUNGDAM KOH NI SERMON: TBC-Y YANGON. Agelh - Khoi Lam Thang Description: Rating: 5 Reviewed By: Cinpu Zomi
Scroll to Top