728x90 AdSpace

Hot
Menu
Zon-ol na Donate

Latest News

Zomi Innkuan Laibu (History of Zomi Family) Laibu azom... Agelh - J. Gin Za Tuang

Zomi Innkuan Laibu (History of Zomi Family)
Agelh - J. Gin Za Tuang
Laibu pan azom.....
A sunga om Thute :
Khua 9 Tawh Kido
Kum 3 Sial Siah
Kam Hau Tedim Teeng (1856)

Siah Nam 8

Khua 9 Tawh Kido
24.   Khan Thuam, Mualbeem khua a tun zawh a sawt lo-in, Leitawhtan saklam-a khua om teng tawh kido dingin a tate, Kam Haul eh Pau Kam tawh a kuan uh hi. 
1. Vanglai, 
2. Tungkua, 
3. Tualzang, 
4. Belpi, 
5. Theumual, 
6. Thangkhal, 
7. Khuadai, 
8. Lalui, 
9. Tawtak khuate tawh a kido uh hi.

25.    Gal sim a ciah cianhin, Khan Thuam in, nidanga amah thah a sawm, Tedim, Lamzang leh Losau te tungah a lungdan nai lo ahih ciangin, tua khuate nawk kawm in, a zak dah, a ngaih dah theihtheih dingin a ki gawp ngi-ngei hi. Tua ciangin, tua khuate zong lau in Meitei gam lam zuan in a tai uh hi. Lamzang ah Hatzaw nam Khoi Lam, Chin Kim, Kim Tel, Tel Khat leh adang inn 7 bek a om lai hi.


26.    Phalamte in Lamzang khua sim a sawm uh hi. Tua thu Lamzang te in a zak uh ciangin a lau uh-a, “Gal hang, gal siam khat zong in ki uk sak ni,” ci-in, Khan Thuam’ tapa Kam Hau sam in, a ki uk sak uh hi. Lamzang hausa Kam Hau ahih a theih uh ciangin simngam nawn lo uh hi. Ni dang lai in khua khat ah a pil, a hang khat in a uk leh tua khua kuamah in a sim zo kei hi.

Kum 3 Sial Siah
27.   Kam Hau in Lamzang ah kum 5 a teen khit ciangin, Guite teenna Tedim khua ah a teeng nuam hi. Tua ciangin, Zahau gam Lamthuk innpipa kiangah, Tedim ah khua sat nuam ka hih ciangin, galte in hong sim leh hong huh in, tua hi leh kum 3 sim in sualpi khat kong pia ding hi,” a ci hi. Lamthuk innpipa in zong, “Kum 3 sim in sialpi khat hong pia ta in; galte in hong sim zawh loh na dingin kong huh ding hi,” a ci hi.

Kam Hau Tedim Teeng
(1856)
28.    Kam Hau in Tedim ah khau sat in, a innkuanpihte tawh, a vek in inn 8 a pha uh hi. A sawt lo-in galte in sim in, Lamzang ah a taikik uh hi. Ahi zongin, khua pihte tawh vaihawm kik leuleu in Tedim zuankik ah-a, inn 35 pha uh hi. Kam Hau Tedim ah teengkik cih galte in a zak uh ciangin a sim leuleu uh hi. Tedim khua mei tawh a hal gawp uh hi. Galte a ciah khit ciangin, Tedim mah a zuankik veve uh hi. Galte in a sim zawh loh na dingin Tedim khua kiim ah kan a to uh hi. Tua kan tu dongin kimu thei lai hi.

29.    Tedim khua nihvei tak galte in a sim tak ciangin, Kam Hau zong lungdam lo-in a thukki nuam hi. Tua ciangin, Darlang leh Lamthuk innpipa kiangah, “Gal sim dingin hong huh un,” a cih ciangin a huh ding mi tampi a kuansak uh hi. Tuate tawh, Vanglai, Tungkhua, Tualzang, Theimual, Thangkhal, Belpi, Tawhtak, Khuadai, Lailui khuate tawh a va kisim uh hi. A zawhsa khuate kiangah, “No, kei khua a masa in nihvei hong sim in, ka khua mei tawh nong haltum sak uh hi. Tu in, ken’ kong zokik khin hi. Na teenna gam uh, keima gam suak khin hi, Tua ahih ciang in, a nuau-a bangin siah nong pia ding uh hi. Hong piate bek kei gam sungah teeng thei ding hi,” a ci hi.

30.   Siah Nam 8
(1)  Kei gam lo in na khawh man un, kum khat in, inn khat in, taang seu khat nong pia ding uh hi. Tua pen “taangseu siah” kici hi.

(2)  Khua sat-a na teen man un, kum 3 sim in sialpi khat, khua khat in nong pia ding uh hi. Tua pen “sial siah” kici hi.

(3)  Na khawisa na ganhingte un keima gam-a lopate ne aih uh ciangin, a liang khat nonh pia ding uh hi. Tua pen “inn-saliang” kici hi.

(4)  Na sih uh ciangin, na gawh uh gan a taksa bak khat nong pia ding uh hi, Tua pen “dak sap” kici hi.

(5)  Na gante uh uk pua ah na zuak uh leh, na zuak man un, dangka peek khat nong pia ding uh hi. Tua pen “sial liang man” kici hi.

(6) Gampa lak-a om gamsa na mat uh ciangin, na mat uh a liang khat nong pia ding uh hi. Tua pen “gamsa liang” kici hi.

(7)  Tuk lai in khatvei, khal lai in khatvei, ka lo na kho ding uh hi, Tua pen “Tuk-tha khal-tha” kici hi. 

(8)  Gamdangah a lal na om uh leh na inn, na lo uh na zuak thei kei ding uh hi. Tuate keima aa a suak ding hi.

A zawhsa khua khempeuh in zong, “Kong pi amah ding uh hi, ko hong uk in,” ci-in a kiciam uh hi.

Tua khit ciangin, Kahgen khua sim in, hausanu man in Tedim ah a ciahpih uh hi.

Tedim a tun’ uh ciangin, Kahgen hausanu in, “Hong that kei un la, hong ciahkik sak un, khua khat a man khibah khat kong pia dinga, ka mipi dangteng na khut sungah kong tut zawh na dingin kong vaihawm ding hi,” ci-a a thuum ciangin, a ciahkik sak uh hi.

Kahgen hausanu in a kamciamsa mah bangin, khua khat a man khibah khat a pia hi. Tua ciangin, Lawzang mual leh Suangkhang mual kikal-a teeng khua, Khawnal, Lomzang, Takzang, Salzang, Phuntong, Ainah, Tualpi, Tonzang, Bunghu, Phaitu, Thanglaw, Gelmual,Khawmun, Zanlang, Khamzang, Sialmawng, Vomsen khuate ah pai kawikawi in, hi bangin thu a va gen hi.

 “Kam Hau in ei khua hong sim-a, I sih gam sangin, do lo-in, ama khut sungah ki ap pak lehang hoih zaw ding hi. Ngeina bangin siah pia in, amah ki uk sak lehang hoihzaw ding hi.”  a ci uh hi. Tua khuate zong thukimpah uh-a, Kam Hau kiang ah pai in, “Hong sim kei in la, hong uk ta in. Ngeina bangin siah kong pia ding uh hi,” a ci uh hi.

Source :
Zomi Innkuan Laibu
(History of Zomi Family)
Agelh - J. Gin Za Tuang

Zomi eLibrary / Laibusaal in hanciam in aki tei/type kik ahi hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Zomi Innkuan Laibu (History of Zomi Family) Laibu azom... Agelh - J. Gin Za Tuang Description: Rating: 5 Reviewed By: Cinpu Zomi
Scroll to Top