728x90 AdSpace

Hot
Menu
Zon-ol na Donate

Latest News

Zomi Numeite in Pasalte Bangci Phaak Theih Ding. Dr. Tg. Hau Za Cin

Zomi Numeite in Pasalte Bangci Phaak Theih Ding
Agelh - Dr. Tg. Hau Za Cin

Photo : A (2) veina Zomi Numei Seminar
5th November, 2016 TBC-Y Yangon, Myanmar

“An invasion of armies can be resisted, but not an idea whose time has come!” 
- Victor Hugo

Deihsakna lianpi tawh Florida Zomi Innkuan (FZIUSA)-te’ kumnga cin’na laibu sungah thului khat gelh thei dinga ‘hunpha’ ka ngah manin ka lungdam hi. Ahi zongin USA pen ka mit tawh ka muh nai loh, ka khe tawh ka sik nai loh, a huih siang leh McDonald zong a ciam kha nai lo ka hih manin tua gam tung sate’ lunglutna leh thupi simte ka thei kei hi. Bang kisam-a, bang sep tuak hiam cih zong ka thei kei hi. Ahi zongin numeite laptohna ding kisam sa hi ding uh hi, ci-in hih thulu hong piaksa uh ka siam bangin k’ong at hi.

Zomite gen loh mikangte mahmah zong numei tawh kisai ngaihsutna kibang lo ding hi. Zomi teekteek zong India leh Kawlgam teengte’ ngaihsutna kibang lo ding a, inn ngakte leh gam kuante’ lungsim zong kibang lo ding hi. Tua hi-a, i kikup ding thulu zong hong lamente lamet bangin ka gelh theih loh ding ka lau mahmah hi.

Numeite’ din’mun gen ding i hih manin numeite i muh dan, i koihna ciang, i pattah dan leh suahtakna i piak zah zong kibang lo hi cih thei masa ni. Tua ahih manin koi ciangah logi khung-a, koi ciangah gamgi bawl-a, koi ciangah bantan ding cih ka buai hi. Zomi numei innlum nusia-a leitung gam tuamtuam-ah a kithehthaangte zong i khual kul lailai! Bangbang hi leh i thulu — Zomi Numeite in pasalte bangci phak theih ding — cih pen durbin tawh en pak leeng Numeite niam zaw-a, pasalte sang zaw takpi hiam? Ciik tak-in ngaihsun kik dih ni. Numeite in pasalte hong pha lo takpi uh hiam? Ahih kei leh hong phak theih nading uh suahtakna i pia hiam? Bang-ah hong pha lo uh hiam — tate pattah dan-ah maw, innkuan sung kepna-ah maw; ahih kei leh kipawlna khat peuh makaihna-ah? Ahih kei leh annhuan, kuangsawp, puansawp, tuitawi ...? Leitung pilna siamna sinna ah maw, biakna zuihna ah maw, ahih kei leh sum leh pai zon’nna-ah? Bang-ah hong pha lo uh hiam. Bang hanga hong phalo uh hiam. Hong pha thei taktak ding uh hiam, kipattahna tawh a piang thei thu ahi hiam?

Hong pha lo takpi uh ahih leh a khuak uh neu zaw cihna hiam? Ahih kei leh thuak hat lo lua uh hiam, ahih kei lai leh kuhkalna kisam uh hiam. Thadah lua maw? I pattahtah hangin mi pha thei lo-in, gual ban zo lo uh hiam? Buhsih leh aksa tawh vaka, huihsiang tawh i nun’taaksak hangin, singno tui a kibuahbuah hang-a a khang theilo tawh kibang uh hiam, guai! I khialhna a om kha hiam, enkik kawm-in bangci sep ding cih tomno-in kikum dih ni.

I.              I pattah loh man hi:
Kei’ muhna-ah Zomi numeite in Zomi pasalte pha lo hi lo hi. Pha lua thamtham uh hi. Pasalte'n hong phaakna dingin pantah lo zaw hi hang! Pasalte huaiham lua hang-a numeite pantah lo hi hang, ka ci nuam hi. Bang hangin maw? Pasal’ tun’na ciang a tun’ theihna ding uh hun, sum, pilna pia lo hi hang. Nu leh pa te’n tapate a pattah zah-in tanu pantah nailo hang-a, tua manin i Zomi nam sungah numeite’ din’mun, pasalte’ din’mun sangin niam zaw lai hi. Daniel pen a lawmte tawh a kibangin pilna kisinsak-a, a kikim-in na kiseemsak-a, a thuzaak uh kibanga, a siamding uh kibang-a, pilna sangah tutna kibang ah kitusak-a, tua zawh ciangin a siamna uh ki-en-a, a siam zawkna kimu pah hi. I Zomi numeite zong tua bangin i pantah hiam. A kipattah zawh ciangin pasalte tun’na ciang a tung uh hiam? Numei engineer, doctor, mechanic, artist, politician, leader, enterpriser, etc. tampi om hi.

Pasalte pen numeite sang angsung theizaw hi hang. Unau lakah sum leh paai haksat ciang, pasal sang kikahsak masa zaw hi. Pasal kiteel masa -, numei in zui pan hi. Bang hangin maw? Innluah ding ahih man (numei pen pasal nei ding hi ve’n!!). Lamdang lo hi.

Nurse seem ding, naupaai ding leh anhuan ding bek-a numei ngaihsutna lungsim Zomite lakah lianlai ahih manin numeite kinunungsak den hi. Anneek ding ciangin pasal in ne masa, numei in zom; niangtui dawn masa, numei in zom. Sangkah masa, numei in zom. Biakinn sungah zong pasalte'n hun zang masa, numei in zom (hun awng a om leh). 'Pasal masa, numei in zom' cih hi den hi. Jesu hun lai bang zezen hi. Numei leh naupang simloh mihing tulnga cihte pawl bang in. Tua pen kum tulnih beisa hun hi! Tuhun ciang Mikangte’n 'ladies first' cih nei uh-a, ‘numei masa un’ cihna hi. Mipi om khopna munte-ah a hatlo zaw numei leh naupang te masak zeel uh hi. Tua pen Zomite in zong thei ta-in (tu naai diak pan) mipi anneek khop ciangin nute in a tate uh an na pia masa ta uh hi.

Pasal zah mah in innsung neek leh taek, sum leh paei zong zong thei, innkuan vak thei dingin numeite i pattah hun hi.


II.            Pasalte'n lungsim kheek ding kisam ta:
Lungdamna thu i zaak ma, i zaak zawh, Cope leh Carson-te hong pattah zawh pekpek pan tuni dongin Zomi pasalte in ‘kipasalsak’ taka taptung pan taiteh tawh vai hawm nuam a sate hi hang. Numeite’ gen peuhpeuh thupi sim’lote hi hang — “numei’ thu leh sialpi ki-in kilaam ngei lo hi” ci-a ‘mittaw sialkhau let’ tentante hi hang. Numei in innsung a vaihawm siam zawk hangin pasal’ thuthu tawh a paisak vanvante hi hang. Zi zo lo cih pen i thangpaihna lian peen khat hi-a, gual lelhna lian peen leh lawm leh gual mai-ah maizumna-in kituat hi.

Tuma kum sawmnih hun khawng panin numeite zong pilna sin hun kipia ta-a, pasal te in a lungsim uh liansak ta-a, a khuamuhna uh a liat tawh kiton-in numeite it bawl ta uh hi. Tua manin numei zong pilna sin khuan kipia ta-a, tu khangthakte, zong hong pil ta uh hi. Nupa zong, a numei a pil zawk-a, a hau zaw innsung pan ahi phial zongin — Kei pilzaw ing, kei hauzaw ing, kei siamzaw ing — cih lungsim kisuan’na (false pride) nei nawn lo uh hi. Tua bang hunte millenium masa hi-a, tu millenium thak-ah tua bang om nawn lo hi. Leitung kiuli thupiang thei ta uh-a, a khut vuah TV remote tawi-in BBC, CNN, HBO, Movies, local channel meek ziauziau ta uh hi. Numeite a kisimmawh hun bei ta-a, numei kihisak leenlaan cihte om nawn lo hi. Pasian’ thu hang maw, leitung pilna khan’na hang?


III.           Leitung khempeuh mitsuan hun hita:
Pasian’ mit in vantung panin leitung khempeuh en kawi kawi-a, a hoih leh hoih lo, a sia a pha, mi hoih leh mi sia a kibangin mu khin hi, cih i thei hi. Leitung pen khuata bangin kiu khat thupiang kiu khat pan a nainaiin kithei ziauziau ta ahih manin hong toi mahmah ta hi. Nidangin Zomi khua khat leh khua khat kikal kigamla lo napi kihawh ding hamsa-a, nun’tak dan kimuhna tawm hamsa hi. Pute zukholh ding bek zong nasep ding tam luat manin kipai meengmeeng thei lo uh hi. Sih leh nat zong kiveh tuah zo lo-in, a luhawm cianga kidelh pan zong tam zaw ding hi. Tua manin amau’ khuaciat gamtat dan pen a hoih peen hi pah-a, a hoih zaw a om phial zongin thei lo, mu lo hi.

Zi leh pasal zon’na-ah zong khua khat sung pan zon’ hi pah lel-a, nisim lokuan khawm, nitak ciang kihawh-in, kikhawl den uh ahih manin misia, mipha kithei uh-a, kiteen’ hamsa lo hi. Mo hoih, maak hoih a kigen ciangin zong, nu leh pa thumang, nasep hat leh thanuam, cidam, thatang lian leh phatuam ngai ci-in tehna (a kigelh hilo) om-a, amau’ gamtatna ciangah a pil peente mah na kila masa hamtang uh hi. Neih leh lam ki-en napi a masa in koih tuan lo uh hi. Meel hoihna zong ki-en-a, ahi zongin thupi peen-in kituat lo hi. “Meel hoih ningzu kidawn thei lo” kici lel hi. Mo ding, maak ding zon’ ciangin na kidawm mahmah uh-a, tuhun ciangin zong tua tehna (value system)-te kip lai veve hi.

Tuhun ciang Zomite in leitung khempeuh holh-in tuancil ta hang-a, Lenmual dawn pan gal et bangin kimu ta hi. Tua banga zinkhia thei lote in zong Vaphual tungah tuang a gamhawl i hih loh hangin i tutna pan TV hong-in mun tuamtuam thupiang kithei-a, thukizaakna-ah misiam, mipilte’ lai gelh i taptung ah kisim thei ta hi. Tua manin ngaihsutna zong hong zai ta-in mitmuh zong khuasung khat bek hi nawn lo-a, leitung bup hi ta hi. Tua pen nakpi tak-a i khan’toh zeel nading, leitung mitsuan kawm-in i kalsuan zeel nading hi ta hi. Ahi zongin leitung paidanah a hoih om-a, a hoih lo zong om veve hi. Namdangte’gamtatna sangin Zomite’ gamtat dan a hoih zaw om-a, namdangte gamtat dan i zuih ding a hoih zong om hi. Sia S.T. Hau Go in “Bangci gamtat ding” cih a gelhna sungah:

A lui khempeuh sia kim lo-a,
A thak khempeuh hoih kim lo hi.
A lui lak pan a sia nolh-in,
A thak lak pan a pha teng leeng....
na ci hi. Tua mah bangin thukizakna tuamtuam pan i theih thute, a hoih teng-in a sia pai leeng, Zomi numeite zong pasal tawh liangko kim-in i koih thei dinga, a phaak zawhna ciang vuah i laamto thei ding hi. Ahi zongin i theih ding khat pen, pasal’ hih theih khempeuh numei in hih kim thei ngeingei lo ding hi!


IV.          Zomi Numeite’ thupina:
Leitung bup i et ciangin nupa kikhenna tam mahmah hi. Sweeden gam-ah za-ah sawmli kiteeng loin ta nei uh-a, tua zah mah a kiteen’ uh hangin kikhen uh hi. US gam zong nupa kikhen tamna gam hi-a, numei kipattahna gam zong hi. Zomite pen kiteen’ zawh cianga kimawk khen niipneepte hi lo hang-a. innkuan ki-it tak, inkuan kingai tak leh inkuan kilem tak-a nungta diamdiamte hi hang. Hawmsiam nungta, nebum si ci-in a nei lo zaw ki-en hi hang. Kikhoi hi hang. Kivaan hi hang. Tua pen i paunak-ah zong i neihsa hi. Hih thu-ah leitung in hong paakta hi. Zomi numeite pen thupi hi. Tua manin ‘numei khat bek inn suang zo, pasal khat bek inn suang zo lo’ upate in na ci uh hi. Pasal in zi deih kik pah-a, numei in tate tulpih uh hi. Zomi numeite’ thupina tua hi. Zolia mah deih ing, a kicihna tua hang hi.

Thukhupna:
I thulu panin ka gennop pen ahih leh Zomi numeite pen itna nei, sia leh pha thei, a pil, a siam hi uh-a, ahi zongin pasalte in i pattah ding zah-in pantah lo hi hang. (Hih pen i ut loh hi lo, i neih leh lam in cin nai lo, economic strain kihi lai hi.). Pantah lehang pasalte zah-in, innsung keem thei ding, innkuan vak zo ding, khuasung vaihawm zo ding, gam khat vaihawm zo ding uh hi. Thukhen thei ding, mailam khual-in; a thak lak-ah a hoih teng thei-in, a lui lak pan a sia nolh thei ding uh hi. Tua bang hong pian’ nadingin pasalte in i khanglui ngaihsutna pawlkhat i kheek kisam ta hi. Numei zong pasal mah bangin suahtakna i piak nak leh pasalte tun’na ciang hong tung ding uh-a, pasal hong pha to pah ding uh hi. Zomi numeite maw, a sawmna vanglak vuah pasal sangin pasal zaw uh a’i ve!

Source :
[Hil lai, 25 JUL 05 MON ni-in kingah hi.]
Vahui Magazine 2006
Page  106  of  200.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Zomi Numeite in Pasalte Bangci Phaak Theih Ding. Dr. Tg. Hau Za Cin Description: Rating: 5 Reviewed By: Cinpu Zomi
Scroll to Top