728x90 AdSpace

Hot
Menu
Zon-ol na Donate

Latest News

Global Warming. Agelh - Khup Khan Thang

Zakna pan-in upna hong piang a, simna pan-in theihna kingah in, muhna pan-in veeina hong khang hi. Upna, theihna leh veina thuahkhawmleeng kisemkhia pah hi. Hih thu tengteng hangin hih thului’ (Article) hong at ka hihi. Numei naupang teltheih dingin hih sunga, terminology te zong ka’ hihtheizah-in, ei Zopau-in kong lekkhia a, note leehkhiat nopdan tawh a kibat kei leh zong hong telsiam ciat ta-un.
                                    Khup Khan Thang
                                                January 1, 2008


Global Warming

Global warming na cih den keei-uh bang ahia?
Greenhouse effect hang’a leimaitang satna hong khan’ semsem naleh leitung bup khuahun khenna te hong kilumlet na-in global warming ki ci hi. Tu nai deuhdeuh kum 10 lom sung a, leitung puumpi ii leimaitang satna hong khan’khaan lam muhkhiatna zong global warming mah ahihi.

Bangin global warming piangsak hiam?
Aciim sinsen scientist a tam zaw-in, global warming a vekpi phial pen greenhouse effect a cih-in, piangsak hi ci’n um uh hi.

Greenhouse ih cih bang hipahphot ahia leh?
A ngektang singkungno te leh khuahun zui aa, apo thei bek sing kungte suan’na ding/kepna ding aa, akhum leh akawm (The roof and the wall) khimuthol maan or plastic tawh kilam inndei or innpi ahihi.  Asatna, avotna, tuikhu nelna leh khuavak, singnote deih bangbangin, a’ kibawltheih nading aa kilam inndei/innpi a hihi. 

Greenhouse effect ee leh? Ama’n bangci nasep?
Greenhouse innkhum tunga, khimuthol maan bang a, leitung tuam huihpi-in, nizangluum hong tumsak aa, awngthawlpi sungah a pusuahkik theilo nang’ in, a’ kikhaamna/dalna penin Greenhouse effect ahihi. Tua-in Greenhouse sung/ leitung maitang asatna khangsak hi. Leitung tuam huihpi sung aa,Tuikhu leh Carbon dioxide in innkhum khimuthol maan bangin, nizanglum hong lutsak a, ahihhang pusuakkik sak lo hi. Hih huih tegel greenhouse gas ki ci hi.

Namdang khat-in gen leng: Tungsunni pan, muhtheih asan sang’ a sanzaw (infrared) nizangsan-in leitung tuam huihpi kantanin, hong pai a leimaitang tawh hong kitalsik teh, leimaitang satna ahong khankhanna-in greenhouse effect ahihi. Hih nizangsan-in ahatna tha pawlkhat khahkhia a, asau zaw wavelength tawh hong zuankik-in, awngthawlpi sungah pusuak nawnlo-in, leitung tuam huihpi sungah hong kitokzau hi.

Greenhouse effect siahuai/lauhuai maw leh?
Ahuampi-in gen leng siahuai/lauhuai lo hi. Amah pen leimaitang satna, asangsak aniamsak thei leh ahiding zah sang’aa, leipumpi alum sak zaw ih muhthei leh, zongh ih ngaihsuttheih pian’ngei ahihi. A’taktak-in cileng, greenhouse effect omkei leh, ih theihsa mah bangin leitungah nuntakna omtheilo ding hi.

Tua ahih leh abang poimawh ahia?
Greenhouse effect in a hoihbek aa kilemsa set bang khat hi a, a ngektang a hoihbek aa, a kilepna kisia kha zenzen leh a lauhuai mahmah dongin leimaitang hong saa ding a, leitung aom nutakna zosiah tungah siatna taktak hong tung thei kha ding hi.

Global warming hang’ aa, apiang thu bang teng?
Hih bangteng piang lian’ ding hi ci’n genkholh theihna omlo hi. Ahizongin, tuipi maitang hong khangto thei ding aa, leitung mun tuamtuam aom, leimaitang a niam teng tuipi-in hong tum ding hi. Huihpi guahpi hong tam semsem ding a, guah zuulo khuakhalpi, leh leikeeu hong piang zelzel ding. Sehnel gam hong zai semsem ding. Hih khua lum hang’in, a lauhuai miksi thovai lungno aaino tampi tampi-in hong pung thei ding leh ganhing tuamtuamte alomlom-in, nek ding omlo, omna ding omlo-in hong puul ding hi.

Mihingte khuasakna-in global warming akhangsak hia?
Khangsak mah hi. Tu-in ih leitung puumpi tuam huihpi sungah, greenhouse gas lak-ah a khauhpaipen carbon dioxide (CO2 )in aom ding zah sang’in dimlet khin zo hi. Leitung tuam huih sungah tuma kum tul kum theen aa kimu ngeilo carbon dioxide tamdan, set tawh nasep hong’ kipat aa kipan, hong khang to hithit hi. United Nations Intergovernmental Panel on Climate Change, the world’s foremost scientific authority on the subject, te’ 2007 kum thupulakna sungah, “Khuahun luum semsemna  pen sanggam meelmak hi nawnlo-in ki langh sinsen ta hi” “1750 kum aa kipan, mihingte khuasakna-in, (Industrialization) leitung puumpi tuam huih sungah carbon dioxide a dimlet saklam ka tel sinsen uhhi” ci hi.

Hih apoimawh te a pian nading  ei te’n bang hih ii hia?
Nisim ih nuntakna/khuasakna-in, taanglai ganhing singkung lopaa te pan’ aa piang akang’thei/ akuangthei (Fuel) leisung naamgim, suangmeihol, leipian’ngei huih te pan a, kingah hydrocarbon ih haal cianga ih ngah’ tha (Power) tungah kingam linlian’ hi. Hih akaangthei/ akuangthei nate-in amau sung aom hydrogen leh carbon kipomna hongphel ciang thagum (Energy) hong pia’n mah bangin huihlak ah zong carbon dioxide leh greenhouse gas tampi tak hong khahkhia hi.

Global warming a omngei na’ leh?
Mihingte pian’ maa-in, omngei zelzel hi. Leitung tuam huihpi sungah greenhouse gas te dimlet aa, lei maitang satna khang mahmah ngei hi.

Global warming a omngei lam bangci thei ii hia leh?
Bang ha’ng-in, tanglai greenhouse gas level leh khuahun satna bei/maimang hiam cih thu ih teel zawhloh hangin, leisung suangte’n teci pan’na tung tawnin, global warming aa pian’ngei lam ih thei’ thei hi. Tua mei zom aa, leisung suangte kum, sang’ 280 pan 230 kikal, (Geologic period that begin about 280 million years ago and ended about 230 million ago) kum sang’ 251(251 million years ago) pawl a, ganhing, singkung, lopa te leimaitang pan, kum 160,000 sung bek aa, a pul/beimaangna, thute zong ih ngaihsun thei hi. Leisung suang’kum adingin hih kum 160,000 pen mit phiatkal hun zah bek a kituat hi. (160,000 years- the blink of an eye in archaeological terms)

Mailam-ah zong global warming-in ganhing, singkung, lopa teng hong beimangsak kikding, a’ cii ih hia’leh?
Hi khinpah sam kei e, ai zong hithei awm tak. Biologists tampi tak-in, leitung bup aa, nam kibang gahing/lungno aaino leh singkung lopaa te atul atul in, damdam aa, hong pul/beimang’ na-in, global warming hang’ hi ci’n teci pang uhhi.

Global warming a ki dal thei dia?
Daal zawh nang’ lampi tawm mahmah inteh, ahi zongin ki ziakai sak thei ding a, tua bekthamlo-in, asiapen/apoipen ding pawl khat bel kipelh thei ding hi. Mailam mihingte khuasak dan-in global warming atawpsak zawh leh zawhloh ding ahizong-in, a kilehzial sakthei leh theihlo ding scientist te’n a kan’kaan laitak hi.

Global warming daal ding tu’n kipan leeng e, a’ ziakai’ lua dia?
Ziakai’ lua cih om ngeilo ding hi. Tusawng teng kiim le paam ganhing singkung lopate, hong pian’dang dan ih ciapteh/phawkna-in, global warming ziak aa, hong piang thu pawlkhat ih pelh theih loh hang’ a dau zawdeuh hong sukpoi nading kigin kholhna hi ih ci thei hi. Global warming ih dal thei nading lam tampi om a, adiakdiak-in, green house gas ih thohkhiat khiam bek leng, global warming hangin, hong piang thei ding hi, ih cihte lakah asiahuai pente a ngawng-tantan ihhi hi.

Hih thului pen 2007 kum “Time magazine” te ii suahsak (GLOBAL WARMING; The Cause, The Perils, The Solution, The Actions: What You Can Do) pan a, mikim teltheih ding deihna tawh, ka lehkhiat hi a, ka’ maahialbawl zawh sawtsimta himah tase leh, ka thawlh kikkikna hangin, tu’n hong khahkhia zo pan hing. Mailamah Global Warming a’ lauhuaina, a’ thoihkikna leh sepkhiat dandingte hong suah’ nuamlai ka hihman’in thungetna tawh hong panpih ciat ta un. 

Journal, magazine sungah a’ suaksak nuam na’ om uhleh phalna ka hong pia hi. 

Lungdam’na tawh,

Khup Khan Thang
5104 Ladbrook street
Norman, OK 73072
U.S.A.
khupkhanthang@yahoo.com
(405) 409 0536 (Cell)
March 4, 2008

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

1 comments:

  1. obat penggugur kandungan cytotec merupakan obat aborsi yang sangat ampuh manjur serta aman 100% tuntas untuk menggugurkan kehamilan.
    Hub: 0822 8391 0000 - Kami Jasa Rental Mobil Padang, Sewa Mobil Padang, Bukittinggi, Indonesia, menyediakan berbagai jenis mobil sewaan.
    salam
    Jasa Seo Surabaya
    Jasa Backlink

    ReplyDelete

Item Reviewed: Global Warming. Agelh - Khup Khan Thang Description: Rating: 5 Reviewed By: Cinpu Zomi
Scroll to Top