728x90 AdSpace

Hot
Menu
Zon-ol na Donate

Latest News

HALELUIYAH CHORUS LEH ZOMITE. Agelh - Pau Za Mung

HALELUIYAH CHORUS LEH ZOMITE.
Agelh - Pau Za Mung

1951- kum in, tu laitakaa a minthang mahmah, HalleluiYah Lapi in Tedim gam ahong tuntuung ahi hi. TBA huam Pawlpi tengah ki sin kawikawi ahih hangin  a sazo a omkei hi. Tua hunlaiin, TBA huam sungah, Keizaang(Ciingpikot) Pawlpi bang, Rev. Son Khua Kham(late)te pawlin, CE a makaih lai hi’n, thahat leh a khauhpai mahmah pawlaa a minthang ahi hi. Tuabang Pawlpite nangawnin a sinzawhloh hi, kici hi.

Laaitui Tuiphum Pawlpi CE te in asin uh leh, a ngahzo uh hi. Tua laitak aa CE te in, Pa Khup Lian Kham, Tg. Kham Khua Hau, Tg. Phung Suan, Tg. Neng Khua Vungh, Tg. Vungh Kham, Tg. Khup Za En, Tg. Ngul Tun, Tg. Tual Khua Gin, Tg. Awi Za Kham, Tg. Dai Khua Nang, Tg. Dai Khan Thawng, Tg. Gin Khan En, Tg. Gin Tual, Tg. Suum Khua Langh, Tg. Ziing Khua Gin, Tg. Ngul Khai, Tg. Zel Khua Vungh(84), Tg. Sian Za Kam,  cihte aa kipan pasal khangnote; Lia Ziing Zen, Lia Awi Za Don(94),   Lia Hau Khan Cing(Khandi)(86),  Lia Cing Khan Dim, Lia Nok Zen,  Lia Niang Lamh Cing, Lia Niang Za Niing(86), Lia Awi Khan Cing, Lia Kiim Ngaih Vung   leh Lia Ciin Suan Cing cihte aa kipan numei khangnote ahi uh hi. A Alto (numei aw) bang, Lia Cing Khan Dim leh Lia Hau Khan Cingte ahi uh hi.  Tua YAH LAPI Ngennung TBA Khawmpi (TUALL HANG GOLDEN JUBILEE) aa la ki demna ah asak uhleh, a khatna(First Prize) ngahna in nei uh hi.
        ………
NB. Tua lasate lakah,  asterisk tawh aki ciamtehte tuni ciangdong a  nungta laite ahi uh hi.
        Bangzahta in lungleen khuangaih huai ahiam?

Extracted from   LAAITTUI KHUA MUALSUANG.
                              L. LAAITUI CRUSADE.
                              Special Speech by, Yah Lian’ Pu.
                              Ihgam a cidam laiaa ih khuasak zia leh ih gualzawh nasate sutsutin,
                              Haanla in sadih ning.)

              ………
2005- kumin Tedim gambup ah Pawlpi khempeuh, mimal in 4,000 val ki helna Zomi Festival of Praise ah HaleluiYah lapi sakna  Video ka et leh Pawlpi tuamtuamte in abaan abaan in hongsa uh hi. Kei zong 1951- kumaa Tedim gam bupaa kuamah in hih lapi a sakzawh lohlai in  Ngennung Khawmpi ah sa in a khatna angah Laaitui Pawlpite ciktak ciangin ahong suaktaam maw ci’n ka ngakngak leh hong suaklo in a Video  hong beita  hi.

Kei zong hihbang munah Laaituite in hih lapi a sakna hong painai lo aa bei, cihbang hi thei diai hiam ci’n umlo in, ka lahsak kikkik(rewind) leh ki lamdan na a omtuan kei hi. Tua zaanthapaii ka ihmu thei kei hi. Banghang ahi taam? banghang ahi taam? cihtawh khua ahong vak hi.
          Laaituite ki hellohna ahang ka kan kawikawi leh, mi ki kaikhawm zolo cih thu ahi leltak hi. Oh! ih pate khanlai aa ana gualzawhna sa uh, Laaitui Kulhpi ana ciansa uh, ei khan ciangin cimhsak kikta ih hita ve maw!!! cih tawh ka tauu hiathiat bek hi.
….………………..
Extracted from LAAITTUI KHUA MUALSUANG.
                            L. LAAITUI CRUSADE.
                            Special Speech by, Yah Lian’  Pu.
                            Ihgam a cidam lohlaiaa, ih khuasak zia leh ih guallelh nasate suutsuut
                            Taamlawhin  Kahla in sadih ning.)

           A tungaa  thu tawh ki zomin, HaleluiYah Chorus tawh kisai ka tuak ngeithu  anuai aa bangin kong behlap nuamlai hi.

TEDIM CHRISTIAN FELLOWSHIP(TCF),
RANGOON.
(Zomi aki cite Lungsim liimlangh)
           1985, January 4 (Independent)ni’n ZOMI aki ci peuhmah, pau, beh leh phung, khua leh tuii  leh biakna (denomination) nawlkhiin, heemkhia, paampaih photphotin ki deidanhna om kilkelo aa ih kipawl theihtheihna ding tupna leh ngimna tawhin,  aki kaikhawm theisunsun, a muanhuai cingghtenggh  Zommi khangno 27-te in, YMCA ah TEDIM CHRISTIAN FELLOWSHIP (TCF), RANGOON  aphuan  uh hi.  Tua tungtaangin, adang dang aki sepma in,  mipi in ki lawmtaatna(fellowship) a neihtheihna dingun, kha khatin khatvei Combined Service neih ding ki thukim phot hi.
        
A masa bel, Combined Service in 3, February 1985 in, Pansodan aa Pa Pau Za Mungte inntungzaangah kinei aa, aki khawm vekpi 500- val kipha hi. Tua ki khopna ah, Rev. Hau Lian Khamin thu ahong hilh hi. Tha ki ngahlua mahmah tek hi. A nihveina March, 1985  in Student Center, Rangoon University Campus, Kamayut ah kinei in, mipi 600- val  kipha in, Rev. Kam Khua Thangin thu ahong hilh hi. Mi kheempeuh lawp mahmahin tha kingah semsem hi.           
         
Tuabang ciangin, ih Leitung mit tawh aki muhtheihpak kei hangin  kha-mit tawh aki muhtheihna in;  mi khempeuhin, kua’ khua leh tuii, kua’ beh leh phung, kua’ pau, kua’  pawlpi cih peuhmah ngaihsut in nei kilkello uh in, Zomi ahihna uh a talltunguh ah, va-nell bangin, ki paaktak tawhin a tot viu-viau tek uh hi.
         
Tuabangaa aki lawp mahmah tek na tawh ki zui in, maikaite in zong, lam tuamtuam tawh TCF ii BUUKMUN akhant na ding agel un ah; Docas te tawh ki kopin  Crusade bawl ding; amun ding Zangkung khuapi laizangaa Immenuel Baptist Church hiding; Zangkung khuapi sungaa Pawlpi teng, Pastor teng  khempeuh leh Dorcas leh a Pastor Rev. Tun Za Kapte kimtak aa samh ding; tuateng khempeuh baanah, Rev. Hau Lian Kham ii  special  request bangin HaleluiYah Chorus - 100 voices tawh sak ding leh Video laak ding ahi hi. 100- voices bel, Siamsin sangnaupangte kiang simloh  aki ngahtheih na ding lamdang ki hawilo ahih manin, sangnaupangte mah aki muang pah hi.  Tua ahih manin tua aa ding aki sam lamsap aa kipan abei ding teng ki iiksiit hetlo in a makai ding pa tungah piakhia pah hi.

Ahi zongin, tuabangaa aki gelna ah,  gimh leh tawll aa ki pan abei ding teng aki hihzawh sikhsekh khitzawh ciangin,  Crusade buppi aa apian theihlohna dingin lam tuamtuam tawh hong ki nawngkai sak dingin thu hong ki gingsak  hi. Makaite in zong, tuabang aa thu khat peuhpeuh ahong pian leh ahong ki nawngkai sak zawhlohna dingin, Zatkwet Council, Myonee Council leh Taing Council; Myonee Police, Taing Police; meivaak tawh ki sai in, Myonee Electric leh Taing Electric te kiangah zasakin huhna ki ngenpah hi.

Ahong ki nawngkai sakna danin; TCF in, Ngaingngaanzee Movement ahih manin MI(Thu-kan) te in kanin zui ding ahihna; Immenuel Baptist Church  Pastor pa in a biakinn a zatsak leh, thu ki sitin, thong ki khia ding baanah, a biakinn zong tawh ki kalh sak(seal) ding ahihna; aki hilhaa  aki manggsa Zangkung Zomi Pastor teng kiangah, TCF Crusade ah apai uh leh MI te’n manin,  thu  sitin thong kikhia ding ahihna, innvak  in na ki gen kawikawi hi.( Siate mah in ahong genkik uh ahi hi.)

Immenuel  Pastor pa ahih leh, laulua ahih manin, a biakinn zatsak dingaa ahong kamciamsa  hong nolhkik pah hi. Pastorte ahih leh a lauloh bek thamloh uh zong awl mawhlo, pautaulo leh liing hetlo in  ahong pai veve uh hi.

Immenuel Baptist Church ahong ki zatsak loh ciangin,  Upper Theinphyu Road aa Lutheran Church aki nget leh ahong piapah hi. Tuabang nangawn zong, a Pastor(Minister) pa uh phone tawh na ki lauthawnin, a biakinn a zatsak leh, MI te’n amah manin thusit in thong khia ding ahihna tawh ana  hopih lai hi. Minister pa in lungtangh natna nei ahih manin, diiphumhsa in hong ko hi. Ahih hangin aman asih leh sihpih zaw ding ahihna; aki deihbangin a biakinn aki zatna dingin ahong phal veve hi.  (Minister pa’n a hong genna ah, tuabangaa phone tawh a sampa in, Zomi aw suah ahihluat mahmah na; Zomi leh Zomi mah aki nawngkai sak aki hihna  ki ciantakin ahong genkik hi. )  

HaleluiYah Lapi bel, Crusade bawl dingma (05/05/1985) 0600pm aa Judson Church aa Rehearsal bawl dingaa aki gel ahih hangin, tua ni tua hun in tua aki gelna munah mi 100- val ding kimhlai, a makaite nih leh thumte simloh kuamah kuamah ahong pai kilkel kei uh hi. Athu aki kansak leh, tua Siamsin sangnaupangte a kaikhawm dingaa a makai aa aki sehte in, Crusade ki bawlnawnlo ding ahihna tawh thu na phuaktawwmin apai ding khempeuhte na pangin na hilh kawikawi in, na ki lehkik sak hi.   Reherasal mi bawlzolo ahih manin,  HaleluiYah Chorus, Lapi kisa zolo bek in, ni 3- sung Crusade aki bawlzo veve  hi.

NB. Video zong ki la in, tuciang dong  ki kemlai hi.


Excerpts from Pau Za Mung’s Memoirs.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: HALELUIYAH CHORUS LEH ZOMITE. Agelh - Pau Za Mung Description: Rating: 5 Reviewed By: Cinpu Zomi
Scroll to Top