728x90 AdSpace

Hot
Menu
Zon-ol na Donate

Latest News

Kuate in Politic ah Kihelthei? Agelh – Pau Sian Lian

Kuate in Politic ah Kihelthei?
Agelh – Pau Sian Lian


Colombia gamah pawlpi lian penkhat ahi, Mission Carismatica International pawlpi makai Cesar Castellanos zi tangthu phawkhuai hi. Sianu min pen Claudia Rodriguez Castellanos hi-in, nitak khat TV channel khat a et leh dawi biakna a ultung sak mahmah political party khat in kiteelna ading mipi na zol ziahziah mawk hi. Tua hun lian a kipan a kipan pastor pa zi in, keimah politic ah kihel lo-in ka upna ka kep keileh kua kihel nawn ding, ci-in parliament ah palai mun dem dingin khensat pahhi. Amau nupa gelh, “Dream and you will win the world” laibu sungah Sianu-in, politic ah lutin Pasian deihna tawh khauhtak ka din keileh kua ding nawnmawk dinghiam?, cih khauh takin ka lungsim ah ong kilo a hih manin politic ah ka kihel, cihi.

Tu hun lian laitak Myanmar gam parliament ah MP lakpan numei phazah tawm mahmah a, tuate sung pan ThanTlang te Pi Za Hlem zong kihel hi. Amah tawh khat vei ka kiho leh politic sepna-ah kihelna, MP suahna a hang pi pen-in a neu lai a kipan a khua uh ah, thau vui thautang tawh kido kithahna omin patau mun mahmah a hih man-in Myanmar gamah ah kido na om nawnloh nading, daihna om na dingin hanciam nuam lua ka hih manin politic ah kalut hi, ong ci ngeihi. amah zong vai tampi ah khuapi tading phul tantan ngam a, a khuapihte’n phattuam pih mahmah khathi.


Hih numei tegeel pen khat biakna makai zi hi-in a dang khat pen sangsia sem khat a hihi. Amau tegeel politic ah kihel na hangpi pen-in veina, lai natna hipi pen pahhi. NLD makai U Nyan Win-in, gamkhat makaih na dingin capacity cihte thupi mah a, a diak-in deihsakna takpi le khuakzattheihna thupi pen hi, ci-in interviewna khatah gen hi. Politic thu ih ngaihsut teh, a diakdiak-in Myanmar gamah politic vai ih geelteh eitawh kisai lo, papi pawl khat bek, ahih keh mi tuamdang ngiat pawlkhatte vai dingdan in ih sehsak pongmawk theihi. Ahih naciang khat om na pi’n hikhin samlohi.

Politic thu a ki sinteh political philosophy sin hamtang kul a, tua thute a vekpi phial-in thumanna, liangko kikimna, diktatna cihte in bang hi-a? Tuate omtheih nading in bang sephuai hiam? cih thute hipha pen mawkhi. Politic pen zuaukhemna, gitlohna, kizawh thawhna tawh kibang na pi’n politic thugil taktak-in thumanna, dikna om nading sepna hipi pen hi. Politic tawh kisai thugil theipen pawl-in kiciam teh John Rawls bang pen America-Vietnam galah kihel kha-in, mi tampi sih lawh nate a muhteh thukim thei mahmah lo-in, thumanna koicih zon ding ihhiam cih, vei mahmah na tawh lai gelha, ama laigelhte mah mi tampi tak-in simkik, siksan in kisin kik hi. Immanuel Kant, Michael Sandell cihte zong daihna ih cih taktak bang hi a, thumanna ih cih banghiam? cihdan thugil tampi ong gelhkhia a, politic ki sin na-ah tuate mah ki bulphuh pahhi.  Tua ahih man-in gam-le-minam na vei-in thuman thutak na deih nakleh politic a kisemthei lua hi a, veina thupi penhi ci-in a huam pi-in kigen thei ziauhi. Siamna, ki vakna, geeltheihna, muhkholh theihna cihte thupi mahmah na pin tuate nungthuap hi a, kalmasa-in veina taktak leh thuman thutak ih letnop masak kul limlim hi. 

Ahi zongin ngaihsut huai pawlkhat ong om leuleu hi. Politic pen veina nei peuhpeuh kihel theih ih cihteh, mi khempeuh MP ding kidem ngeingai-in kituh bawl ding cihna hi denlo hi. MP suak-in Hlutdaw tutna bek politic hi zenzen lohi. Pawlkhatte hlutdaw ah ong om kul-a, pawl khatte cimawh huhna, pilna lapsangna, media nasepna, Pasian nasepna-ah hunbit-in kihelna cihte zong politic sepna nam mah ahih lam phawkhuai hi. Koi panmun ah omleng lempen ding? kizang thei pending? Mipihte ading mazang pen dinghiam? cihte lungngaih masak huaiphot hi.

Tua bang khat mahin Pasian, gam-le-minam mintawh i kihel teh i biak Pasian min daisak, minam te zum sak i hih khak dingleh kihelloh mah ong hoihzaw dinghi. Tukum 2015 kum-in Nigeria gamah president ding kiteelna omin, president term khat a semkhin Christian biakna ahi Goodluck Jonathan leh Muslim biakna mi Muhammadu Buhari kidem uhhi. Biakna mit bek tawh ending hile hang Goodluck Jonathan deihsak huai ponghi. Ahi zongin Goodluck Jonathan pen gamtat sia mahmah khat hi-in, golhguk nek hat tuak mahmah a, ama uk sungin Nigeria-in leiba tampi nei ek hi. Tua ahih man-in a ki dempihpa Muhammadu Buhari in panmun ong ngah hi.


Tua ahih man-in politic cihpen gam-le-minam veinak leh kihel theihluat hi. Kihelna danding zong teelsiam huai-in, ih biakna, upna, mipihte ih maizum sak khak dingleh kihel loh zong hoihkik zaw bilbel hi, cih dinghi.


*******************************************************************************

Source :
"Bucing khantohna leh Picing ki-ukna" Laibu.

Laigelh Pau Sian Lian in Zomi eLibrary/Laibusaal ading in Phalna hong piak ahi hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Kuate in Politic ah Kihelthei? Agelh – Pau Sian Lian Description: Rating: 5 Reviewed By: Cinpu Zomi
Scroll to Top