728x90 AdSpace

Hot
Menu
Zon-ol na Donate

Latest News

Leitung Lungdam, Topa Hong Pai (Joy to the World). Christian Hymn-te’ Tangthu. Agelh – Zam Khat Kham

Leitung Lungdam, Topa Hong Pai
Joy to the World
(Late 98)
Agelh – Zam Khat Kham


Isaac Watts (1674-1748)                                                               
Possibly adapted from George F. Handel (1685-1759)
Arranged by Lowell Mason (1792-1872)

            Lungdambawl hun laitakin “lungdamna” cih thu mah a ultungpen thu hi a, Christian-te’ adingin Pasian ngiat  leitungah hong pai-in mawhnei mite a tawntunga a nuntak theih nading lampi hong khunsak hi, cih thu kana a lungdam huaizaw thu dang om lo hi. Hih la pen Lungdambawl la khempeuh lakah a kilawpsak theipen la hi a, a aw leh a mal mahmah kituakin a sak nuama a sa mite’ lungsim lawpsak takpi hi. A sate in nuamsa keiipong cih bang hi lo-in Zeisu Khazih in eite’ ading bang hong sepsak cih hong hilh la ahih manin a khiatna nei mahmah la ahi hi.

            1719 kuma kikhen Isaac Watts’ labu Psalms of David Imitated in the Language of the New Testament sunga kihel la khat ahi hi. Isaac Watts’ deihna taktak bel Thuciam Lui sunga Late Thuciam Thak khiatna leh Thuciam Thak dan-a phuah ding ahi hi. Tua zahkhat-in 1719 kumin Late 150 lakah 12 longal a vekin Christian la-in phuak hi. Tuate’ lakah hih “Leitung Lungdam, Topa Hong Pai” zong khat hi a, Late 98 kiphuak ahi hi. Late 98:4-9 ah:


                        Leitung khempeuh aw, lungdamin TOPA tungah kiko un,
                        tumtheih tumin lungdamna la sakhia zuahzuah un;
                        harp tumin TOPA tungah gingsak unla,
                        la awging le harp thuahkhawmin
                        pengkulte le tuutal kite gingkhiasak unla-
                        Kumpipa ahi TOPA mai ah lungdamin awng un.
                        Tuipi le a sunga om khempeuh le
                        leitung le a tunga teng khempeuh kithawn uh hen.
                        Gunte in a khut uh bengin mualte in lungdamin la sakhawm uh hen.
                        Leitung thukhen dingin TOPA hong pai ahi manin
                        ama mai-ah amaute in la sa uh hen.
                        Amah in leitung buppi thumaanin thu khen dinga,
                        guptuam paihtuam nei loin mite thu a khen ding hi.(ZIV)

            Late 98 pen Pasian in a mite hu-a, a ngei a batsak kikna hanga lungdamna la ahi hi. Hih Late sungah ni khat ni cianga Yahweh leitung bup Pasian hi a, minam khempeuh in Israel-te’ thukhamte a zuih nading lam-etna kimu hi. Watts in hih thute thei gige-in Thucian Thak khiatna nei dingin phuaka, Pasian mahmah mihingin hong pianga Bethlehem Naungeka hong suahna leh Adam’ mawhna hanga hamsiatna khempeuh a hepkhiatna la-in phuak hi. A tungin hih la thulu, “The Messiah’s Coming and Kingdom” kici hi.

            Isaac Watts bel England gam Southampton ah July 17, 1674 ni-a suak ahi hi. Anglican pawlpi pana  paikhia dissenting Congregational pawlpi sunga pilna sangpi a nei upa khat’ tapa hi a, unau 9 a phakna vuah a upen ahi hi. Isaac Watts pen a pa a nonconformist upna hanga thong a kiat laitaka  suak ahi hi. (“Nonconformist” i cih England gamah 1662 kuma kibawl “Act of Uniformity” zui nuam lo-a Church of England pana paikhiate ahi hi. A masa lamin “dissenters” kici a, a nunung lam ciangin “nonconformist,” “Free churchmen” zong kici hi. Tu hun ciangin England gama nonconformist a kicite Methodist-te, Baptist-te, Congregationalists-te leh Presbyterian-te hi a, ahi zongin Scotland ah Church of Scotland pen Presbyterian hi zawsop bilbel-a, a nonconformist-te pen Episcopal Church hizaw hi. ZKK).

            A neu tunga kipan mah-in lailam va pah a, kum 5 a phakin Latin, kum 9 a phakin Greek, kum 11 a phakin French (Piancik pau), kum 13 a phakin Hebrew sinin siam mahmah pah hi. A kum tawm mahmah lai mah-in la tuamtuam phuaka hoih thei mahmah sawnsawn hi.

            Isaac Watts pen “Mangkama hymn kiphuah kisakna a piankhiatna pa” ci-in kiciamteh hi. A neu lai-in Congregational pawlpite ah Psalms la bek kisa a, a kiseh upa khat in samkhol daudau-in tua nungah mipi-in tua late oltakin sa duaiduai uh hi. Tua lamalte zong khum het lo thei lai-a, Watts in nuamsa het lo hi. Khatvei bang, “Pasian phatna lasakna pen biakpiakna ah vantung tawh a kinaipen hi napi-in, leitunga ei’ sak dan pen a suuksiapen hi mawk hi” ci ngei hi. Nipi Ni zingsang khat tua bangmah-a lasak nuam het lo kikhopna pan a ciah ciangun phun kha leuleu hi. A pa in, “Bang hang tu-a sanga hoihzaw khat hong pia pah lo na hia, tangvalpa?” ci giap hi. Tua ni nitum ma-in Isaac Watts in a la phuah masak pen zo khin pah a, mipite in zong lungdam takin sang uh hi.

            Khango laphuaksiampa Iassac Watts in zong la dang tampi phuah ding hong tum pah hi. Kum nih sung Watts in Nipi Ni sima mipi’sakding la thak phuak den hi. Nidanga a saksak uh Psalms-te zong “Christian-suah-in” Thuciam Thak thute leh paizia tawh kituakin phuaka tuate lakah “Jesus Shall Reign,” “O God, Our Help in Ages Past” cihte minthang deuh hi. Naupangte’ la “I sing the Migthy Power of God” zong ama’ phuah ahi hi. Tua banga Psalm lasakna pan pialkhia a a thak a phuan manin pawlkhatte bangin mihai bangin ngaihsun zawzen uh hi.

            Isaac Watts pen a neutunga kipanin laigelh leh laphuah a va ding mi ahihna a kilang pah khat ahi hi. Kum 7 a phakin ama’ min mahmah a khiatna bulhtawma a gual sezen khat ahi hi. Upna lamah a nuntak tawntung  Calvinistic den ahih mahhangin hih a min khiatna gualh ngiat in zong ama’ nuntakna buppi lak hi, kici thei hi.

            “I”- I am a vile, polluted lump of earth
            “S”- So I’ve continued ever since my birth
            “A”- Although Jehovah, grace doth daily give me
            “A”- As sure this monster, Satan, will deceive me
            “C”- Come therefore, Lord, from Satan’s claws relieve me
            “W”- Wash me in Thy blood, O Christ
            “A”- And grace divine impart
            “T”- Then search and try the corners of my heart
            “T”- That I in all things may be fit to do
            “S”- Service to Thee, and Thy praise too.

            Hih lamalte a puakpa Isaac Watts leh a la-aw phuakpa George Handel-te enkaak dih ni. Watts pen a pumpi a thaneu, a tun pi 5 bek a sang, a cingkam mahmah leh a migi mahmah khat hi a, Handel bel a thacing, a lungtom mahmah, khuapi sung nuamsa-a piano,organ keyboard, opera leh oratorio-te a zothawh mahmah mi khat ahi hi. Anih un London ah a om sungun kimu kha, kithei kha ngel dinguh hi, kici hi.

            Handel’ phuah late lakah a minthangpen khat ahi The Messiah pen leitungah a za ngei lo om lo kha ding hi. 1741 kuma a phuah hi-a, ni 24 sungin number 53 khempeuh zo hi. April 13, 1742 ni-a a kisak pen a kisak masaknapen ahi hi. Oratorio kiphuak lakah a kisa munpen hi a, a kideihpen khat zong ahi hi. Tua la sunga a sakkik teng “Hallelujah Chorus” ci-in kisa den a, ei’ kiang nangawnah la minthangpen khat ahi hi.

            American musician minthang Lowell Mason in 1836 kumin tua The Messiah sung pan “Comfort Ye”a cihna mun leh “Lift Up Your Heads” a cihna munteng la-in Isaac Watts’ lamal tawh bulh-a hih la hong piangkhia hi, ci-in kingaihsun hi. Tua la-aw pen “Antioch” ci-in a min kiphuaka, 1839 kuma Mason’ khetkhiat Modern Psalmist labu sungah kihel hi. Isaac Watts’ phuah hih lamalte tawh a kisa khawm dingin la-aw tuamtuam a kibulhsuk a kibulhtoh hangin hih “Antioch” la-aw mah tawh kituakpena, tuni dongin kizang hi.

            18th century lai-a England gama a pumpi a zawngkhal ningniang den Isaac Watts’ phuah lamalte leh tua hun lai mah-a mi cidam mi thahat mahmah German minam Handel’ phuah la-awte 19th century hun ciangin American musician Lowell Mason in hong gawmtuah ciangin leitunga ngaihpen la dawng khat hong suak hi.


Leitung Lungdam, Topa Hong Pai (Lamal)
(Joy to the World)

Key: Eb
Leitung lungdam Topa hong pai, Kumpi za ngah ding hi.
Lungsim khempeuh bawlpha sak hi.
///Van leh lei la sak ngai///

Leitung nuam nang Zeisu maang hi. Mihing te’n la sa hen,
Lo lai tuipi suangpi mualpi’n
///Kidem in ham uh hen///

Nung ciang mawhna a khanloh nang, Lingin bawlsialo ding,
Apha lohna aphabel in
///Bawlpha ding hong pai ding///

Hong hehpihna thupha bel in, Leitung hong uk ding hi.
A min thang siangtho hong itna,
///Mi khempeuh theisak hi.///
La ngai ni.

Source :
Christian Hymn-te’ Tangthu (Laibu)
Agelh – Zam Khat Kham

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Leitung Lungdam, Topa Hong Pai (Joy to the World). Christian Hymn-te’ Tangthu. Agelh – Zam Khat Kham Description: Rating: 5 Reviewed By: Cinpu Zomi
Scroll to Top