728x90 AdSpace

Hot
Menu
Zon-ol na Donate

Latest News

MIPILTE CHRISTMAS LETSONG (THE GIFT OF THE MAGI). Agelh – Thang Khan Lian

MIPILTE CHRISTMAS LETSONG
(THE GIFT OF THE MAGI)
Agelh – Thang Khan Lian


Ni dang lai-in James Dillingham Young (Jim) leh Della kici nupa ki-it mahmah khat om uh hi. Christmas tunkimni (Christmas Eve) ni-in Della in innsung van poimawh tuamtuamte- nek ding leh sa leina panin a sum val khol teng hong sim ciangin $1 leh cents 87 bek pha hi. Della in a sum kholte thum vei a sim phat hangin $1 leh cents 87 bek mah pha hi. A pasal adingin Christmas letsong (gift) pia nuam napi a sum neih khempeuh tua zah bek pha ahih manin a lei zawh ding bangmah om lo hi. A zing ciang lah Christmas hita ding ahih manin ahih theih dang om loin a lupna ah lum in kap ngeungeu bek hi. A room uh sian’sakna leh puahphatna dingin nipi kal khat in $8 bei ahih manin kah ding lo buang a dang bangmah hih theih nei lo hi.

A inn uh hall nuai-ah laikhak bawm (letter-box) om a, tua zong neu lua in laikhak ta zo lo hi. Tua loin electric bell zong khat om napi tua zong ging thei lo zaw lai a, kong khak-ah “Mr. James Dillingham Young” cih tuang hi. Tua Jim’ minpi kigelhna a tuan’sak lai-in nipi kal khatin Jim in $30 lawh a, tu-in nipi kal khatin $20 bek lawh hi. A min pen sau lua ahih “Mr. James D. Young” ci leh tom tuam deuh mah ding hi ven! Mr. James Dillingham Young in tua inn deite a kipuahphat (furnished) khit nungin hong teen a kipanin a min hong tom pah hi. Bang hang hang cih leh Della hong lut a kipanin Della in James Dillingham Young pomcip in ngawng kawi a, “Jim” ci-in sam hi.


Della in a kahkah mawk pen a mawknapi hi cih tel ahih manin a kah lam a kitheih lohna dingin a khittuite lim takin a biang panin nulsiang in, lawpna bangmah nei loin tawlet ah dak khia hi. Kha tampi sung a sum kholkhopte $1.87 bek pha a, Jim a dingin letsong a piak nuam hangin a nangmah leina kicing lo a, nipi kal khatin $ 20 a ngah uh pen van man khan’na hangin kicing zo lo hi. $ 1.87 bek tawh Jim adingin Christmas letsong a lei ding pen Jim in a itna leh a pasal a angtan’ pihna lahna dingin a sum kholte tawm sa lua hi. A inndei ua tawlet nih kikal-ah limlangh khat om a, Della a gawn’ mahmah hangin ki-et dan pen siam khin lel hi. A sam a vekin khah in limlangah ah ki-en a, a mitte tee kelkel napi-in a maisuah dahmel pua mahmah hi. A nupa un a neihsa lak panun Jim in kham (gold) nai a neih (tua zong a pu in a pa a piak, a pa in Jim a piak sawn) leh Della’ sausau hi napi-in tuate gel tawh lungkim mahmah uh hi. Della in a samsau pen etlawm sa mahmah a, kumpinu’ kham leh ngun leh letsongte sangin hoihzaw in etlawm zaw hi ci-in ngaihsun ahih manin a inn kiang uh-ah kumpinu teng leh zong kumpinu in Della in a sam a sawp ciang leh gamsak ciangin kumpinu in hong munuam mahmah ding hi cih ngaihsun hi. Jim in zong amau inn ah kumpipa a neih a lamh khempeuh tawh teng leh zong kumpipa neihsa en loin a kham nai bekbek mah et bel in nei zaw ding hi.

Della in a etlawm mahmah a sam a khahsuk ciangin tuisik luang kelkel bangin tee a, a khuk ciang dong ban suk hi. Della in zum kawm leh manglang takin a lu hei vat hi. Tawl khat sung hong din’ leh a biangah khitui hong tak suk keukeuh leuleu hi. Tua khit ciangin a pualtualpi (coat) a puang, sansim kangsim eng sim mel pua (brown) la-in silh a, a lu khut puang (broen hat) khu-in kong khak kan in khualak manawh in hong tai khia hi. Tawl khat khit ciangin hong khawl leh lim (sign) khat mu a tua-ah: “Mrs. Sofronie. Sawm tawh kisai van tuamtuam a omna leh kizuakna” cih mu hi. Tua sumbuk dawl nihna ah tai to-in a hu hong sangin tawmvei hong khawl hi.

Tua sumbuk nei Mrs. Sofronie in Della na en a, Della in tuanu manawh phei in, “Ka sam nong leisak ding hiam?” va ci hi. Mrs. Sofronie in,“Kong leisak ding hi, na lukhu la khia in la i en masa phot ding hi,” ci-in dawng hi. Della in a lu khu hong lak khiat ciangin a sam tuizeu puang, a sansim a kangsim (brown waterfall) bangin hong kia suk hi. Mrs. Sofronie in Della’ sam bangzah in gik hiam cih a tel theihna dingin Della sam dom in tehsak a, “$20 kong pia ding hi,” ci hi. Della in, “Pha hi, manlang takin hong pia in,” ci samsam hi. A sam a zuak khit in Jim ading letsong (gift) zongin sumbuk khat khit khat va veel kawikawi a, naikal nih sung a leng bang liang hi. Sumbuk khempeuh en kawikawi a, a tawpna dingin Jim ading ngiat a kibawl kham sikkhainiang (gold chain) khat mu hi. Tua a muh phet in hih pen Jim adingin ngiat a kibawl hi ci-in $21 tawh lei hi. A sam zuakna sum teng leh a sum khol khawmte $1 behlap in lei a, manlang takin a val cents 87 tawh inn lam manawh in hong tai samsam pah hi. Della in Jim in tua kham sikkhainiang a nai-ah thuah leh a omna mun khempeuh ah a nai keng in, en thei ta ding hi ci-in lungdam mahmah hi.

Della in inn hong tun kik ciang a lungsim nuam khin lo hi. Bang hang hiam cih leh a sam lua lua ahih manin sangnaupangno khat sam tawh a sam kibang belbul hi. Minute 45 khit nungin a lungsim hong nuam tuam a, ahih hangin, “Jim in hong that nuam phial kha tam!” ci-in phun siausiau hi. Limlangah a nihveina ding ki-et kik ma-in, “Jim in sum ngahna dinga numei lasa leh laamte bang teh hong ci ding hi,” ci-in ngaihsun hi. “Ahih hangin tua $1 leh cents 87 bek tawh bang letsong pia zo mawk ding ka hiam?” ci siausiau hi. Nitak nai 7:00 in Jim’ nitak an ding mansa-in na koih dimdiam khin napi cik mahin inn hong tung hak ngei lo Jim hong tung nai lo hi.

Jim inn hong tun ciangin inn hong lutna kongkhak bulah tua kham sikkhainiang a khut tawh humcip in Della na tu hi.

Jim hong ciah kik a, a khe gingte a zak ciangin a dipkua pian ahih manin Della in ni dangin na neu nono khat nangawn ah thungetna tom a neih zel mah bangin, “Topa Pasian aw, hehpihna tawh Jim in a meelhoih leh a ngaihbaang bangin hong ngaihsunsak ta peuh in” ci hi. Kongkhak hong kihong a, Jim hong lut ta hi. Jim gawng mahmah a, nuih meel pua lo hi. Jim pen kum 22 bek pha pan napi innkuan lutang suak ta ahih manin a tavuan lian mahmah hi. Phalbi khuavot nuai-ah a khutte a lum theihna ding puantualpi (coat) thak kisam mahmah napi tua zong lei zo lo hi. Kongkhak ah lut in khawl a, a mitte pen uisiam sabeng dinga kizangte mit tawh kibang hi. Della lim takin en a, lamdang sa mahmah hi. Jim in a zi tua bangin a et ciangin Della lauhna tawh kidim hi. Jim pen a heh hilo a, lamdang sakna tawh a zi a en hi bek hi. Della in Jim manawh phei in, “Kong it Jim aw, tua bangin hong en kei in,” ci-in kap hi. “Nang adingin Christmas letsong pia loin nungta zo lo ding ka hih manin ka sam ka zuak ahi hi. Ka sam pen khanghat mahmah ahih manin hong sau kik pah lel ding hi. Christmas hun hi ta hi, lungnuam in hun i zat khawm ding hizaw hi. Nang adingin letsong hoih mahmah bang hong leisak ka hiam cih thei lo hi teh,” ci khiankhian hi.

Jim in kamdam in, “Nang na sam tan maw,”? ci-in telsiam hamsa sa mahmah hi. Della in, “He ka sam tan in ka zuak hi. Nang hong it hong deih nawn lo na hi hiam? Ka sam tan tom in ka sam a kiau phial hangin kei mah ka hi veve hi,” ci-in dawng hi. Jim in um zo lo ahih manin inndei sungah lut in Della sam zong a, “Na sam na zuak takpi maw”? ci hi. Della in, “Jim aw, ka sam na ding kul nawn lo hi. Nang adingin tan in, ka zuak hi ci khin hilo ka hi hiam. Tu zan pen Christmas tun ma zan hi a, kei tungah na hoihna hong lak in. Ka samte a mal in a kisim thei phial ta zongin kong itna kuamah in sim zo ngei lo ding hi. Nitak ann i ne ta ding hiam?” ci-in dawng hi. Jim in Della kawicip in second 10 sung a lehlam tuak ngat uh hi.

Jim in a puantualpi sung panin lai tawh a kituam lingleng van khat hong la khia hi. Tua van sabuai (table) tungah paai phei a, “Della aw, nong telsiam ding ka deih hi. Hong telkhial peuhmah kei in. Na sam na tan hangin kong itna kiam tuam ngei lo hi. Ahih hangin tua sabuai tungah ka van paih pen hong in la, en lecin na tel ding hi,” ci hi.

Della in tua van hong pah samsam a, a muh ciangin a lungdamna khittui pen dahna khittui in hong kilaih kik hi. Tua van kitun lingleng pen samsih (The Combs a kici sam hiatna ding leh a kilhna dingin a kizang thei) hi a, Della sam sau lai hi leh ama’ ading ngiat a kibawl bang a, a man zong tam mahmah hi cih Della in telcian mahmah hi. Della in tua samsih a neih hangin a sam hiat ding leh a sim kilh ding a sam om nawn lo ahih manin tua a letsong ngah samsih hum in a ang ah koih tentan hi. “Ka sam nawh khan mahmah Jim,” ci hi. Tua ciangin diangin Della hong kap a, “Oh, Oh! Jim in ka letsong etlawm mahmah mu nai lo hi,” ci-in Jim letsong ding a lei ong hong samsam a, “Kong letsong leisak hoih bukim hilo hiam? Hih letsong pen khuasung khuavai mun khempeuh ah ka zon’ ahi hi. Koi e na nai hong pia sin aw, na nai tawh a kilawm khawm hiam cih mu nuam ing. Tu-a kipanin na nai ni khat in za tampi vein a enen thei ta ding hi,” ci hi.

Jim zong tutna ah tu suk in nui hieuhiau kawm in, “Della aw, i Christmas letsongte koih khia phot ni. Tu-in tuate i zat dingin hoih lua uh hi. Na samsih ding kong letsong theihna dingin letsong ding ka leina theihna dingin ka nai ka zuak ahi hi. An ne phot leng hilo hiam Della aw?” ci hi. Mipilte pen mikang pau in i Lai Siangtho sungah "The Magi" kici hi cih i tel kim tek a, a pilna thu uh leh Christmas ni-in a hong suak i Topa Jesuh letsong pia dingin nisuahna panin letsong puak dinga hong kuante hi cih zong i thei uh hi. Amau pen Jesuh letsong pia masa pente in kiciamteh hi. Mipil ahih bangun a letsong piakte uh zong hoih in, naungek suak cil khat letsong piak dingin a letsong piak uh kilawm mahmah hi. Ahih hangin hih tangthu gelh O. Henry in hih tangthu hih bangin khum hi. “Hih tangthu ah kong gente gel pen nupa moi mahmah ahih mah bangun mipilte bangin pil lo uh hi. Ahih hangin a neih lak panun a manpha pente uh zuakin a nupa un Christmas letsong a kipiak ding uh lei uh hi. Tu hun adingin mipil letsong kipiate lak panin hih nupate gel pen mipil (magi) ahi uh hi. Letsong a kipiate leh a ngahte pen tu hun adingin mipil (magi) ahi uh hi,” ci-in a tangthu khum hi. O. Henry in hih tangthu, “The Gift Of The Magi” pen December 10, 1905 in The New York Sunday World newspaper ah suaksak a, a laibu pen April 10, 1906 in khenkhia hi.


Source :
from:tk lyant 
to:Cinpu Zomi <chinpuzomi@gmail.com>,
Cinpu Zomi <cinpuzomi@gmail.com>
date:Sat, Dec 24, 2016 at 3:15 AM
subject:THE GIFT OF THE MAGI (MIPILTE CHRISTMAS LETSONG)
mailed-by:gmail.com

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: MIPILTE CHRISTMAS LETSONG (THE GIFT OF THE MAGI). Agelh – Thang Khan Lian Description: Rating: 5 Reviewed By: Cinpu Zomi
Scroll to Top