728x90 AdSpace

Hot
Menu
Zon-ol na Donate

Latest News

Numei Hoih Leh Hoih Lo. Agelh ~ Rev. Lian Za Nang

Numei Hoih Leh Hoih Lo.
Agelh ~ Rev. Lian Za Nang

Photo : Samson and Delilah

Thupatna:
Leitung kiukna bangin innkuan sung a kiuk hi lehang anuai a bangin tavuan kinei ciat hi.
(1) Pa – Chairman, Innkuan lutang
(2) Nu – Secretary, Thuvanpi
(3) Tate – Members, Mipi.

Pasian thu tawh kizui-in innkuan pen Pawlpi neu khat tawh kibang a, anuai a bangin tavuan kinei ciat hi.
(1) Pa – Senior Pastor, Innkuan Siampi.
(2) Nu – Sunday School Teacher, Nipi Sianu
(3) Tate – Sunday School Children, Nipi Sang Naupangte.

Thuneihna:
Innkuan sungah tate tawh a kitamthuah pen Nute ahi hi. Ni khat nai 24 a omna sungah Sangah Siate tawh nai 6 sung bang bek kithuah uh a, a om lai nai 18 sung pen nute tawh a tamzaw kithuah uh hi. I pu i pate in thuciin khat na nei uh a, “Zi pil in innkuan nuam sak, zi hai in innkuan susia” (Numei pilte’n u leh nau gawmtuah, numei haite’n phung khen) ci uh hi. Innkuan nuam leh innkuan nuam lo i cih pen Nute’ makaihna tawh kisai mahmah hi.

Leitung Sangte leh Nipi Sangte a thumang lo, siate’ uk zawh loh, a makaih zawh loh sangnaupangte pen inn pan nu leh pate’ hilh loh, makaih lohte mah na hipah hi. Kawlte’n zong, “Leitungah i sia masapen Nu leh Pate hi” na ci uh hi. Innkuan sung pan nu leh Pa’ pattah numeite pen a tamzaw pasal a neih uh ciang leh to a neih uh ciangin zi hoih, nu hoih suak uh hi. Nu pil lo in a tate pil mahmah cih tam lo hi. Tua ahih manin Nu ahi ding peuhmah in innkuan sung makaihzia ding a theih kul a, sin zong kul hi.


Innkuan khat sim hoih tek leh Pawlpi zong a hoih hipah a, Pawlpi khat sim in hoih tek leh i Zo minambup a hoih hong hipah hi. Innkuan khat i cih pen Pawlpi neu khat i hih lam kiphawkhuai mahmah hi. Tua hi a, i innkuan, i Pawlpi leh i minam adingin numeite bangzah in manpha hiam cih kimu thei hi. Lai Siangtho in zong hih bangin na gen hi. “Zi hoih in suangmanpha sangin manpha zaw pek hi (Pau 31:10).

Topa Jesu khang simna numeite:
(1) Bethseba – 1 Kum 1:6
(2) Ruth – Ruth 4:13,14; Mat 1:5
(3) Rahab – Mat. 1:5
(4) Tamar – Mat 1:3

Zi hoih:
Paunak lai a gelhpa Solomon in zi hoih i cihte a bangci nam hiam cih Paunak 31 sungah hih bangin na gelh hi.
(1) A pasal in muang mahmah hi.
(2) A khan tawntungin a pasal tungah thupha bawl hi.
(3) A pasal tungah thusia tun ngei lo hi.
(4) Thanuam takin na sem hi.
(5) Tho baih in lum hak hi.
(6) Nasep ding a vaihawm sak hi.
(7) Amah in khau khekin a puan ding gan tawm hi.
(8) A zawng mite tungah cingh hi.
(9) A cimawh mite tungah huhna pia hi.
(10) Pilna tawh thu gen in kamkhum takin pau hiathiat hi.
(11) A innkuan sung nasep ding teng sem ahih manin manlah den hi.
(12) A tate in itbawl uh a, a pasal in zong pakta mahmah hi.
(13) Topa a zahtak numei in a phattaak khat ahi hi.

Lai Siangtho sungah numei hoihte:
(1) Abigail (1Sam 25:3-18) A tei, a dim, a navak.
(2) Kanan Numei (Mat 15:21-23) Upna lian nei.
(3) Deborah ( Thkn 4:4) Gam mite deihsak.
(4) Dorcas (Sawl 4:4) Cimawh huh.
(5) Elizabeth (Lk 1:39-45) Kiniamkhiat.
(6) Martha (Lk 10:38-42) Innngak muan.
(7) Magdala Mari (Joh 20:1-2) A thokik Jesu kilatna
(8) Naomi (Ruth 1:8-10) Teek hoih
(9) Samaria Numei (Joh 4:1-42) Lungdamna Thu tangko
(10) Shunem numei
(2 Kum 4:10) Zindo siam.

Lai Siangtho sung etteh huai numeite:
(1) Esther bangin gam leh minam it in.
(2) Hanna bangin Pasian tawh kiho den in.
(3) Lydia bangin Pasian’ mite zindo siam in.
(4) Mari bangin lungduai in.
(5) Ruth bangin cihtakna leh thumanna nei in.

Hih hun nunung sungah Pasian in ei Zomi numeite thupha hong pia a, Lai Siangtho sungah a kigen numei hoihte nuntak zia tawh kibangin hong nungtasak hi. Tua bek tham loin pilna lamah zong minam dangte mah bangin ThD; Ph.D dongah hong lamsang to hi.

Lai Siangtho sungah numeite Pasian nasepna.
(1) Kamsangte zin do (2 Kum 4:10)
(2) A cimawh mite huh (Pau 31:2)
(3) Jesu khe silsak (Lk 7:37-38)
(4) Pawlpi na sem (Rom 16:1-2)
(5) Sangmang na sem (Rom16:3)

Lai Siangtho sung numei hoih lote.
(1) Delilah (Thkn 16:22) Samson’ zi, sum deihna tawh pasal nei, a pasal zuak.
(2) Eve (Pian 3:6) Adam’ zi. Leitung mikhempeuh Pasian gal suak sak.
(3) Gomar (Hos 1:1-3) Hosea’ zi, Numei paktat, a pasal dai sak
(4) Miriam (Gam 12:1-2) Thunei nuam
(5) Sapfira (Sawl 5:1-6) Ananias’ zi. Sawltakte’ tungah lo zuak man khem.

Tu hun pen hun nunung ahih mah bangin leitung mun tuamtuam ah nuntak haksatna tungtawn in thu um lo numeite pen Noah hun a tuiciin tun hun tawh kibang in sia mahmah hi. Bangkok ah a gam kumpite theihpih numei kizuak awn khat leh alang (million 1½) pha hi. Tua ahih manin leitung bupah HIV lungno kihawmkhiatna phualpi kici liang hi. Cambodia ah 40% HIV natna nei hi uh hi. Leitung ah thu um lote bangzah takin sia taleh ei Zomite Khristian 99% kihi ta  a, hih siatna pen hong kem i biak Pasiam Min phat hang.

Thukhupna:
Leitung lam leh Pasian Thu lamah mipil misiam, mi minthangte leh Pasian mizatte thu i et ciangin a tawmzaw pen Pate’ makaihna sangin Nute’ makaihna hang hi zaw hi. Ka nu hong thungetsakna hang, ka nu hong pattah siamna hang, ka nu hong makaih siamna hang, cih vive hizaw hi. Hih article a simkha numei khat kim ciat in numei manpha leh numei thupi na hihna kitel thak a, na innkuan sung, na Pawlpi sung leh na minam ading Nu hoih ahi dingin X Topa’n thupha hong pia ta hen.

Source :
Lungdamna Aw
Vol. XL No. 12 DECEMBER, 2016

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Numei Hoih Leh Hoih Lo. Agelh ~ Rev. Lian Za Nang Description: Rating: 5 Reviewed By: Cinpu Zomi
Scroll to Top