728x90 AdSpace

Hot
Menu
Zon-ol na Donate

Latest News

Official Laiphah. Agelh ~ Zokhai

Official Laiphah
Agelh ~ Zokhai


Sanggam Ngaihteng,

I' minam sung-ah I' phawkkhaak ngeiloh ana-lian mahmah kipawlna cihkhawng nangawn-a kipan kipawlna minam minsel tam simsim ta-a, tua kipawlnate' thuzeekpi ahihkeileh makaaipi (tulaai paulehSecretary or President) min-tawh lai kigelh lai kikhah nengneng-zong Zolai, Myanmar-saa (Burmese: Kawllai), English cbt-tawh hongtam pianpian ta-hi.

Zomi tuabang mapanna anei makaai upa diakdiakte-in Zolai hitaleh Myanmar-saa hitaleh English hitaleh abangbang-tawh gelh taleh naakpi-in hong cilgil mahmahleh lunggulhhuai-hi. Adiak-in Upazil (Official: Laikhah thupi zawdeuhte cimai-ni) deuhdeuhbang laimal zatzia, kammal teelzia mahmah pan-a ngentel-a cilgil mahmahding akisam ahihi.

Laimal leh kammal-ah English ahihleh present, past & future tense te-tawh ataangpi laigual kilam-a, mikim-inzong theihsa cipak lehang:

Zolai leh Myanmar-saa ciang-in hong tuamdang mahmah-a, laimal nih/thum/lii akigawm ciang-a kammal khat asuak malkop (za-ka-zuh စကားစု) zatzia naakpi-in athupi ahihi. Khen dingte gawm-a, gawm dingte akikhen ciang-in upazil cihthadah social media ciang nangawn' ading-a asim taaklo, agina zolo suakthei den-hi.

Adiak-in kipawlna khat' taángmi hihna-tawh kipawlna lailuu (letterhead) azangh diakdiakte-in naakpi-a laigelh kisin phat mahmah kuul-hi, khenkhat-in "gelhlam siam kuulkei, seplam haatding" aci-zong omsaam taleh leitung paizia tuabang hi nawnlo-a, laiphah, laikhah, taangkona, pulaakna cihte-tawh kipawlna kician leh kicianlo cihthu-tawh ataangpi-in thukhen-hi.

Tua thamlo-in, kipawlna min-tawh gamukpawl (government)' tung-ah laiphah akineih deuhdeuh nate-ah naakpi-in laimal leh kammal teelsiam kuul-a, hihte-pen atuam-in tertiary education-ahzong ataangpi kisin thei-hi. Subject khat-a laak zawhkei lehzong laibusaal-ah tuabang lai namte gelhzia pattahna laibu tuamtuam om saam ahihman-in lailuu zanghding upa diakdiakte-in sin maiding akuul leh akisam hiding-in ka-umhi.

Gamukpawl-ah laiphah piakna-ah nampi 5-bang enpak lehang:

  1. - Kipawlna min-tawh thusuah (Statement)
  2. - Kipawlna min-tawh taangkona (Declaration)
  3. - Kipawlna min-tawh ngahding kilawmte ngetna (Demand)
  4. - Kipawlna min-tawh mi tampi pangkhawm-a thuumna (Petition)
  5. - Kipawlna min-tawh deihngetna (Request)

Hihte unau-bang ahihang-in lai paizia leh thu paizia kidang diimdiam-hi. Kipawlna alian leh aneu zil-in Gamukte' kiang-ah laiphah piakzia mahmah-zong kidang-hi. Lahpakding (Lpd): Mi 10-20 kipawlna min-tawh gamukte' tung-ah "Demand" khawng kibawl giapleh kithusim tangtang loding, "Declaration" khawng bawlleh kinuhnaau lelding cihbang-in kipawlna aneu alian zil-in laiphah thuluu piakzia mahmah naakpi-a athupi khat ahihi.

Zomi minam ahuam phial-a akinei kipawlna diakdiakte-in laiphah abawl-uh ciang-in kammal teelsiamna-in minam vaangpha sakding-hi. Lpd; ZRO, WZC, LZIK, GZA, ZCD, ZYA.... cihte diakdiak-in kipawlna min-tawh laiphah hong bawl-uh ciang-in laiphah sung-a guandingte akisim thei liamliam ciang-tawh hong lungkim hetkeileh hoihding-hi. Ahial (finalise) ma-in hoihtak veelkiik ciatciat-a, "lem taktak ta-ei" cihteh khah/puak/hawm panding akisam mahmah ahihi. Hihbang kipawlnate-in atung-a malsim 1, 2, 3-pen naakpi-a azatding kisam-hi, banghanghiam cihleh thuum ngetngut nading omlo, ngahding kilawmte ngen giapgiap, suahding kilawhte suah giapgiap, taangkoding kilawmte taangko giapgiap ding ahihi.

Kawlgam sung-a mulkimhuai nambih kikaapna tepawl bangpen atung-a kipawlna tepawl-in "Ngen or Thuum" ding hilo-in malsim "1. Statement" bawl-a Namcin Gawmkhop Kipawlna (United Nations Organisation) leh alian kipawlna tuamtuam-ah khah zihziahding tepawl ahihi. Tualo-in, "... na-khawl nading-uh'n kong ngen/thuum uhhi," cih tepawl-pen "Akhawl keileh Action ala theiding kipawlnate' gen/gelh dingte" ahihi.

Athupipen-ah, Zolai leh Myanmar-saa gelh ciang-in laimal-tawh akilam kammal, khiatna-nei kammal 2 or 3 or 4-tawh akilam kammalte:

Lpd: Kawlgam (Kawl + gam): 
Kawlgam - gam khat' min ding-a Zomite' phuak hi-a, "Kawlte' gam" bek cihna hilo-in Myanmar or Burma buppi akigen ahihi. Kawl gam ahihleh Division teng hi-a, Kawlgam ahihleh Mualmite' teenna khempeuh-zong ahuam ahihi. Myanmar-saa ah: မြန်မာ ci-in kigelh-a, မြန် မာ kici lo-hi. Myan leh mar -pen "manlaang (adj)" leh "sak/khauh (adj)" hi-a, akigawm-a akigelh ciang-in gammin hiziau-hi. Zogam-pen suunmang-ah Guunkhawm leh Assam kikaalteng hi-a, Zo gam ahihleh munsaang taám, singmaangte pona avotna munte hihi.

Tua-tawh kizuui-in, Pa Sian cih ciang-in "Sian" min anei papi khat sapna hi-a, Pasian cih ciang-in Vaan leh Lei Piangsakpa genna ahihi. Tua hi-a, laimal leh kammal-kop zatzia naakpi-a cilgil thei ding-in kipawlna-ah kipawlna' thusuahte avaan phadiakte-in hong haanciam ding-uh lunggulhhuai mahmah-hi. Zomi min-mah pua-in minam it cih kawmkawm-in laimal leh kammal zatzia awlmawh keilehang ei' laigelhte hongki thusim seemleh minam it pipi-a minam lai leh pau athupi saklote cihna hipah dinghi.

Lpd:
- nu leh pa - tuun leh zua (mun & dad)
- nulehpa - pianna mi nihte (parents)
- nuu leh paa or nuulehpaa (numei-pasal: female & male)

Nulehpate-in tate' thupha luanna naak ahihi. (Laizuunpaal)
Nu leh pa te in ta te thu pha luan na nak a hi hi. (Naupang laigelh ciilte)

Tua hi-a, I' lai-pen a-ol mahmah daan khat-a akiseh hang-in akinlo leh lungsim pialo mite' ading abaih hetlo ahihi. Ulian pipi, kipawlna lianpite' taángmi pipi khawng-in naupang laigelh ciilte' gelh bangmah-a honggelh zeel-uh ciang-in anungzuuite-in tuabang mah-in gelhding cihpen muhkholh theih ahihi.

Kammal 3, 4-tawh akilam kammal themcik Christmas Citpiak:
- ki + pawl + na (horn + group + painful) kipawlna (organisation/association)
- ki + phat + sak + na: kiphatsakna (ar + ro + gan + ce: arrogance)
- gam + tat + lu + heek: gamtatluheek (be + hav+ iour: behaviour)
- ki + uk + na: kiukna (po + li+ tics: politics)
- siam + sin + na: siamsinna (e +du + ca + tion: education)
- thu + theih + na: thutheihna (know+ledge: knowledge)
- tong + kum + na: tongkumna (coun+sel+ling: counselling)
- tong + kum + pih: tongkumpih (counsellor){numei/pasal hithei}
- gam + uk + pawl: gamukpawl (go +vern + ment: government)

Kammal kopzia naakpi-in kisin pha-in, ei' lai ei mah-in zuunding hihang!

Zomi Pasian' Thupha!

Zokhai

***********************************************                                  
T. Zokhai          ITNA-IN GUABANG HINNA-HI       
60 Narr-Maen Drive                                                          
Croydon Hills VIC 3136       
Melbourne, AU                 
Tel: +61 39723 0460                                    
Mob: +61 420 800 560                          
***********************************************


Source :
from:Pu Zokhai zomizokhai@rocketmail.com [zominam]zominam@yahoogroups.com
reply-to:zominam@yahoogroups.com
to:Zominam <zominam@yahoogroups.com>,
ZD Group <zomidaily@googlegroups.com>,
Tongsan Groups-mail <tongsan@googlegroups.com>
date:Fri, Dec 23, 2016 at 10:35 AM
subject:[ ZOMI NAM ] Official Laiphah

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Official Laiphah. Agelh ~ Zokhai Description: Rating: 5 Reviewed By: Cinpu Zomi
Scroll to Top