728x90 AdSpace

Hot
Menu
Zon-ol na Donate

Latest News

PHUAK TAWMTAWM.Agelh ~ Col. Khen Za Moong (Retired)

PHUAK TAWMTAWM
Agelh ~ Col. Khen Za Moong (Retired)


1. Phuak cih pen minphuak cihnopna hi. Naungek a suah khit the, min kivawh hi. Min kipia hi. Tua pen minphuak kici hi. Naungek min phuahdan pen taang ngeina omsa hi. Min in tap nei hi. A tapte’ deihna bangin, a tapte pahtawina-in, a tapte’ thu khatpeuh pulakna in, a khiatna kidawkin min kiphuak hi. Ki-itna kingaihna kiphawkna kipahtawina ki-upna cih bang aa kilawm a kituak aa kiphuak hi. A kilawmlo a kituak loin kiphuak nuamlo hi. Min kipualah thei ci-in upna om hi. Nate khempeuh in zong min nei tek hi. Naungek suakthak thakte min a kiphuahphuah mah bangin, nate zong a thak a pian’ simin min kipia hi. Tu ciangin nalamdang tampi a pian’ ciangin eikam a, ih lawh theihloh ih phuah theihloh, a pianna bul oana min kipia-in kilo hi. Phuah tawmtawm ding kullote kiphuak tawm loin, a pianpih minin kilo lel hi. Tua a pianpih min oen, ei pau ei kam hiloin, a pianna mun a piangsakte’ pau leh kam hithei hi. Min kiphuak tawmtawm pawlkhatte, kul hiam? Ngaihsut huai hi. Thuman(honest) Thutang(frank) citak(serious) maw cihhuai om hi.

2. Ih Tedim Khuapi laizang munkhat ah, zunbuk om hi. Pasal leh numei ci-a khenna lai kisuang hi. Pasal leh Numei ci-a kam omsa taang ding, phuak tawmin, i biakna min daisakna simmawhna cih theih ding, min kisuang hi.

3. Ih Tedim Khuapi meitaang pen datmei hi. Tuitha pan dattha(electricity) hi. Datmei a pian tuungin i pu i pate in, phuaktawm ding ngaihsun loin, kilawm kituak sa-in datmei mahin na minvawh in, na lo uh hi. Tuitha tawh piang datmei (hydro power electricity) ahih hangin, i mei pen datmei mah hi lel hi. Khuaphelep mei a ci pawlkhat om tazen hi. Khuaphelep pen “Lightning” hi. Kawlte’n “Liatsilet” ci hi. “Lightning” ah dat tuamtuam kituak-kisukha a, datmei(dattha electricity) piang hi. Kawlte’n “Liatsilet” a cih khuaphelep pan, “liatsitdat” (electricity) piang hi ci hi. Tua ahih ciangin i datmei pen khuaphelep mei hi loin, khuaphelep piangsak “dat” tuamtuam kituahkhak kisukkhak cianga a piang, dattha-datmei hi. Sathau kithunna set in “Generator” kipeisak aa tua panin datmei (electricity) a pian banga, tuitha in “turbine” kipeisak aa tua pan “Generator” kipei sawn aa tua pan datmei (electricity) piang hi. Khuaphelep hilo hi. Datmei hi.

4. Ih Tedim Khuapi mun tuamtuam pana kimuthei dingin naipi khat om a, tausang inn kibawlsak hi. Tausang inndawn kimkotah nai kikoih a, gamlapipi pan kimu thei hi. Mubek lo a nai satzah a ging kiza dingin ‘long’ zong kiguan hi. Mangkamin “Clock Tower” hi a, Kawlkamin “Naiyisin” hi. Ei kamin “Naipi, Naisangpi, Naitausang” kici thei hi. Mun khat khatat Tedim Lengthe ci-in kigelh thei hi. Lengthe pen la-kam hi a, the a cihna hi. The pen gam sunga (sim lam a) sing sang dawn pan, khal(summer) cianga khuang hi. Khuakhal tahi ci-a taangkona khat zong hi. Naipi in a sun a zan, tuk phalbi khal khen loin ni khatin nai 24 sung nai satzah lakin ging hi. Nail leh The kitheipih theilo hi.

5. ABM Sangmangte’n i Khamtungah Tapidaw biakna hong laktoin hong paukto hi. Kazin siate tawh hong kithuah hi. Mangkam Christian pen Christ nungzuite cihna hi. Kawlkamin Kawl-aw-in Kharihyan ci hi. Ei kam phataka a theih ma-un a tomin Tapidaw min hong phuah sak hi. Kawlkam in (Tapyidaw) hi a, ei kamin nungzuipi cihna hi. Tu ciangin Tapidaw min taangin min tuamtuam om hi.

6. ABM Sangmang zomin RC Piancit Phungzite hong pai-in RC biakna zui tampi hong om hi. ABMte pen Tuiphum hi-in, a dang Pawlpi tuamtuam (denomination) zong om hi. Ahih hangin a vekpi-in Topa Jesuh nungzuite vive hi-in Tapidaw (Christian) hi. Tedim Khua sungah pawlpi Biakinn tampi omin a min uh zong a tuamtuam hi-in Christ nungzui Christian, ei kamin Tapidaw vive hi napi, khatvei lai-in khat leh khat kiholo zah dongin om hi. Zangkong semah Pawlpi leh Lai Siangtho Sang kigawm za kiim om ding hi. Ei Zomite sungah hizahin kipawlkhat lohna om leh, Topa Jesuh hong kam vaikhak, “Note kong it bangin note zong khat leh khat na ki-it un” a cih, bangzah dongin zuizo ding i hiam? Minphuah tawmtawm hang ahi ding hiam?

7. Nekkhawmna ah, pangmoh ahih kei leh moh ki-atnen in, kizang hi. Tapidaw sia pawlkhat in moh ci loin “khomun” ci hi. Khomun bang kam hia bang a cihna hiam thei lo uh hi. Moh hi gegu, khomun bang kam hiam bang a cihna hiam thei lo zel uh hi.

8. Ngeina tuamtuam Biakna tuamtuam a hun zui-in kihei a, kikhel a, kha nuntakna leh pumpi nuntakna lam aa khantohna khatin kingaihsun thei hi. Ahi zongin uangluatna luangkhen’na (extremism) zah donga phuah tawmtawm tawh a kizop khak loh ding thupi hi. Mihing in kha leh pumpi nei a, biakna pen kha-lam hi a, nuntakna pen pumpi-lam hi. Kha-lam ading Tapidaw suak i hih manin siangtho hi. Topa Jesuh thei ding, a thu um ding, a nung zui dinga Topa Jesuh upmuan’na (Faith) hi aa, sih ciang aa kha in tawntung nuntakna ngah aa vantung Pasian gam tun’na hi. Pumpi in leitung nuntak sungin Topa Jesuh thuhilhna tawh kituak aa, ngaihsut ding, sep ding, bawl ding, gamtat ding hi aa, thupha (blessing) ngah na’ng hi. Tapidaw upna leh nuntakna pen a tomin tua hi. Upna tuamtuam nuntakna (gamtatna) tuamtuam piang sawnsawn a, Topa Jesuh thuhilh(doctrine) pan, pialna phuah tawmtawm ahih loh ding thupi hi. Mo kilakna vaihawmna leh siguina vaihawmna munte ah, i biakna leh ngeina tawh kihual kituak ding thupi hi. Innkuan vai Sanggam unau vai Sungh leh pu vai-a vaihawm ding hi. Phuah tawm “Go Pakatanah”nsuahsak loh ding thupi hi.

9.Endik
En a diksak ding maw? A dik ending maw? A diklo diksak ding maw? Endik pen Editor a cinuam hi. Mangkam hi-in, lai kaikhawm, laigual, lailem, tadensa bawlte cihna hi. Kawlkam zong Editor mah zangzaw hi. Sati zong ci hi. Editor mah zathuai zaw hi.

Mawkphuak.
Tavuan a ci nuam hi-in, kizopna om lo hi. Tavuan pen sepding bawlding cihna hi. Tavuan kipia-in tavuan kinei hi. Mi khat in a mawhna hanga sepna thuakna mun pen thong hi. Mawhna pen mawhmaina nget ding hi-in mawhna pau-a na khatpeuh sepding bawlding cih om lo hi.


Daihna.
Peace a ci nuam hi. Peace pen kilemna, gal om lohna, thu ngawngkai om lohna, ki-it kingaihna omna cihna hi. Daihna pen a ging omlo-a nawngkai sakna omlo-a sip didena hi.
TV zong melmuh tongsan kici hi. Melmuh tongsan cihpen lakam hi-in, kimu-a kiho cihnopna hi. TV ah mel kimu bek a, kam sanga kihona om lo hi. Radio, motor-car, telephone, tembaw minte banga a kisang a kizang khinsa hi. Ngaihsiam cihte zong limtak ngai ding teltak thei ding (theikhial lo ding) cih kamte om zo hi.

10. Lukhunelkai   kici lukhumeinei pen puantual (gown) tawh kithuah a, College leh University pan a, degree (bwe) ngahte pahtawina kizepna hi. Laion tawh kizui-a ciaptehna tuamtuam tawhkizeem puantual (gown) leh lukhumeinei kibawl hi. Sang pan tan sawm (matriculation) ongte College leh University kahthei a, laisin zom thei hi. College leh University pan, hun ciangtanna hunt hum om a, hunk hat zawh ciang-on ciangin degree (bwe)zote in kipia hi. Hun khatna zote in Bachelor Degree (Weikza Bwe) ngah hi. BA, BSc cihte. Hun nihna zote in Master Degree (Maha Bwe) ngah hi. MA, MSc cihte. Hun thumna zote in Doctorate (Paragu Bwe) ngah a, Doctor min ngah hi. Tu ciangin ei Zomite sungah College leh University ong tampi om a, lungdamhuai mahmah hi. Doctorate ngah zong om kawmkawm ta hi. A diakdiakin biakna lam pan lampelh lamdawt om thei in, biakna sangte pan zong, Doctor min kipia hi. Laithei Kaisiam, Thuthei Thusiam, Laioil Thupil cihte a, a sangpen samipuai ongte in Doctor min ngah a, pahtakhuai mahmah hi. Nidangin Doctor nam khat bek kitam theih hi. Zato Siavuante hi. Ph.D, tam lo a, a omsunte kilanga kisang muhhi. Tu in a tuamtuam om ta hi.

11. Pu Pi Pa Nu Taang Lia   cih   minte tu ciangin kitam zat thei mahmah hi. Taang leh Lia pen lakam hi a, tangval leh nungak cihna hi. Laphuahna bekah kizanga kampauna lai-atna ah kizang lo hi. Taang leh Lia kizat tungin tan sawm ongte min, tadensa-a hong suah ciangin, Mg Taang….leh Ma Lia…. ci veve hi. Tu in zong, pasal khat in a min mai ah Pu a zat leh, Kawlte’n U Pu ci veve hi. Pasal leh numei khenna hi-in ei-a dingin kul lo hi. Ih min in pasal leh numei hong khen hi. Kawlte’ min in khen lo hi. Tua hangin U Daw Maung Ma zang hi. Ih pa’pa leh a sanggam pasalte-pu, ih pa’ nu leh sanggam numeite-pi, ih pa’ sanggam pasalte-pa, ih nu sanggam numeite-nu ci hang. Tua banah ih nu lamte pen i pute hi. Uham pasal khempeuh pu ci-in, khanglai pasal khempeuh pa ci-in, uham numei khempeuh pi ci-in, khanglai numei khempeuh nu ci le’ng, ih pa lam leh ih nu lam-a ih pianna, ih pu ih pi ih pa ih nu tektek khempeuh, a neusak a niamkhiat a zahtak bawllo suaklo ding hiam? Kihona kampauna ah, kamsiam in, ih pu’ hual pu, ih pa’ gual pa, ih pi’ gual pi, ih nu’ gual nu, ei sanga uzawte u, ih cih ih sak pen, ih taangngeina hi. Thuhenna leh lai-atna ah, Pu Pi Pa Nu Taang Lia kizang ngeilo hi. Phuahtawm hi.

12. Taanglai pek a kipan taangthu kante’n a muhnate uh laibu-in atin ciaptehna nei uh hi. Ei Zomite’ taangthu zong a ki-atna laibu tampi om hi. Mongolia pana piang, Tibet kantana Kawlgam tung, Kawlzang ah pawl khat thaam a, pawl khat Khamtung gam tung, cih ciang dong pen, a tam muhna leh thukimna hi. Citheite lungkimte taitai loin, haksatna tuakte guallelte in, “tuisianna gamnona” zongin kikhinkhin hi.

13. Chin (Tsin) Dynasty leh Chou Chao Zhou nampite tawh minamgui kizom ding banga pulak nuam om tazen hi. Lai nei ngei-a savun tunga ki-at hi a, ui in hong neksak hi ci hi. ( copy khat bek om maw? Ki-at kik thei lo maw? Mi khat bek in thei maw? Banga kimang ahi tam!)

Thukhupna
14.Paisuk patio lokhawh singpuak haksatna, mualsang mualkuam tungin minam min zong, Zomi Laimi Cho Khumi Asho cih bangin a tuamtuamin i kilo hi. Kawlgam leh leitung gamdangte ah Chin-in hong kithei hi. Kumpi vai leh nuntakna sepna bawlna vai-ah Kawllai Kawlpau siamloh phamawh hi. Theih semsemp pil semsem na’ng Manglai Mangkam siamloh phamawh hi. Phuah tawmtawm ding ngaihsun loin, Chin min tawh, Kawllai Kawlpau leh Manglai Mangkam siamin kipumkhat na’ng leh khantoh khop na’ng, Chin mite khempeuh kithei kikhawl semkhawmin, kikep kihuai kipan’pih siamin, Chin minam leh Chin min, thang ta hen.
           
Source :
3.12.05 – 1st Zomi Seminary
12.8.06 – 2nd Zomi Seminary
Aa a gente hi.

Zomi eLibrary/Laibusaal in hanciam in aki tei/type ahi hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: PHUAK TAWMTAWM.Agelh ~ Col. Khen Za Moong (Retired) Description: Rating: 5 Reviewed By: Cinpu Zomi
Scroll to Top