728x90 AdSpace

Hot
Menu
Zon-ol na Donate

Latest News

REV. NGIAK ZA DIM’ TANGTHU (Zomi Numei Ordination Ngah Teng Tangthu).

REV. NGIAK ZA DIM’ TANGTHU
(Zomi Numei Ordination Ngah Teng Tangthu)


I. Pianna leh sangkahna
Rev. Ngiak Za Dim pen Tedimgam Thuklai khua a teeng Zamang beh Pa Son Khaw Cin leh Sumniang beh Lunteng suan Nu Thang Khaw Dimte sungpanin August 2, 1937 kumin Thuklai khua-ah suak hi. Pianpih laizom a nuai a bangin nei hi.

1. Pa Suang Khaw Thawng + Nu Cing Za Dim, Tanu tapa 10 tawi uh a, tate zong zi nei pasal nei hi khin uh hi. Pa Suang Khaw Thawng pen a Pa’ kumpi nasepna Mindat pan a suak hi-in, Manglai tan 6 a sim zawh ciang galkap tumin, CSM tawh pension la hi.
2. Captain On Za Cin Apa’ nasepna Sikkhauto hi-in Hakha ah November 22, 1932 suak in, sangkah a, tan 10 ong in, galkap tumin Captain a ngah zawh ciang Shan gam Maifalung pan vanleeng kia in si hi. Zi leh ta nei man lo tangval a si hi.
3. Rev. Ngiak Za Dim - Thuklai Church Pastor
4. Siama Neam Khaw Mang Health Sister

A pa Nasepna Hakah pan 14.2.1940 kumin suak hi. Tan 10 a on zawh ciangin Mission Hospital Namkhamah Nurse Training kah hi. First posting Hakha hi-in 1968 kumin nasep kipan a, 2002 September in Sister tawh pension la hi.

Pa SK Gin Khaw Thawng tawh kiteenga tapa 3 leh tanu khat nei hi. Pasian thupha sangin tate pilna nei vive hi-in, Siavuan, Sangsia, Pasian nasem 2 a suak uh hi.

Sianu pen Thuklai sangah 1947-58 sung sangkah in tan 8 dong kah hi. A pa in 1949 August 16 ni-in sihsan a, a nu in 1991 February 16 ni-in sihsan hi.


II. Lai Siangtho sangkahna leh nasepna
Sianu pen Lai Siangtho sang a kahma a neulai akipan biakna sungah a lawp a kin mahmah khat hi-in, Sunday School lam leh Numei lamah makai sem hi.

1955 May 15 ni-in Rev. Za Khup in Ak-awmlui-ah  tuiphum  hi. 

1959-1962  sung  Yangon  Kawllai  MICT  sangah  Lai Siangtho sinin zo hi.
1.3.1962  panin  Thuklai  Tuuiphum  Pawlpi  ah  numei  lam  leh Sunday School lam makaih in nasep kipan hi.

1965-1971 sung Rev.Ngo Khaw Cin in TBA General Secretary a sep sung Thuklai leh Pumva Pawlpite ah huhsia semin mapang hi.

1971-1974  sung  Thuklai  Tuiphum  Pawlpi,  Pumva  Tuiphum Pawlpite ah Secretary sem hi.

1974-1983 sung Rev.F Ngo Khaw Cin hong sih ciangin Thuklai, Pumva Pawlpite ah Pawlpi kem Pastor sem hi.

1968-1974 (kum 7 sung) TBA gamsung numei lamah hunlang (parttime) in mapanga Sianu Cing Khaw Vung tawh semkhawm uh hi. Sianu Cing Khaw Vungin zum nasepteng semin, Sianu Ngiak Za Dimin khualzin lamsang tavuan la hi. Hih hunsung teng Tekim Lai Siangtho kiletkhiat hun hi-in endik. Committee sungah kihel ahih manin Pasian nasepna sungah “amanpha bel hun” in ngaihsun hi.

1983-1991  February  dong  SRBA  gamsungah  Numei  lam  leh Sunday School lamah makai in kum 9 sung mapang kik hi.

1992-1998 Thuklai leh Pumva Pawlpite-ah a thum veina Pastor sem  kik  hi. 

1998,  January  lst  ni-in  a  sepzawh  kum  (36)  a  cin,  ama pianzawh kum 60 cing ta ahih manin, thu cidam la cidam tawh pen-sion la hi.

III. Siampiza (Ordination) ngahna leh pahtawina
1962 kum panin Thuklai Pawlpi ah nasep kipan hi. 1974 kumin Rev.F Ngo Khaw Cin in a sihsan ciang 1976 kum panin Ordination piak  ding  kivaihawm  a,  1976  TBA  kumcin  kikhop  Kapteel ah(Delegates) kingen hi. Zomi lakah numei Ordained om nailo ahih manin ngaihsut lai dingin kikoih hi. 1978 kumin ZBC Annual meet-ing Kawlpi ah kingen leuleu a, Convention in vaihawm theiloin a zang ding Pawlpi tawh kisai zaw ci-in Thuklai Pawlpi apkik uh hi. 1979 SRBA Annual meeting Lophei ah kigen leuleu a, Delegates mee a tamzaw ngah hita leh Sianu in sang zo loin nial hi. 1983 kum ciangin SRBA Ordination ngahsa Siateng samin Thuklai biakinn ah Sianu Ngiak Za Dim leh Sia Son Cin Pau Siampiza (Ordination) pia uh hi. Tua ni pen March 6, 1983 nipi ni hi.

Hih Siampiza piakna ah Rev. Mang Khaw Pau, Rev.E Tun Khaw Lian, Rev.E Ngin Khai, Rev.M Vai Pum leh Upa Mang Hau, Upa Mang Khaw Cin, Upa Mang Thawng, Upa Thawng Za Khai, Upa Kham Cin, Upa Ngin Khaw Thawngte kihel hi. Ordained Siatengin March 5,1983 sani ni-in thukikupna nei masa in, amau thukim khensatna tungtawn a kipia ahi hi. Zomi khempeuh lakah Numei Ordination ngah om nai mahmah lo, amah a masa pen himawk ahih manin ngaihsut hak akisa pha mahmah ding mah ahi hi. Ngah veve in, kipia veve hi.

Hih bangin Siampiza ngahna hangin kilungdampih, lamdang zong kisa veve ahih manin kipawlna tuamtuam, mun tuamtuam panin zong pahtawina nam tuamtuam kipiapia mai hi. 14.5.1983 kumin Kawlgambup Tuiphum Numei kipawl na(MBWF) panin moh leh niangtui, Ks . 500/_ pia uh hi. 13.11.1983 ZBWF panin Pastor puantualpi (Tamu Thahdo biakinn) pia uh hi. 25.2.1984 ni-in KVBWF in Tahan ah letsong tuamtuam pia in, mi 37 tuiphumsak uh hi. 8.4.1984 ni-in SRBWF in Buanmanah pahtawina leh letsong tuamtuam pia uh hi. 16.2.1985 ni-in TBWF in Gawngmualah pahtawina leh letsong tuamtuam pia uh hi.23.4.1988 ni-in ZBWF kum10 cinna Hakha ah pahtawina leh mi 5 tuiphumsakna nei uh hi. 5.12.1990 niin Judson hong tun kum 175 cinna pawi ah MBC geelna tawh pahtawina leh hun-uk sepsakna, khamkhi vui khat leh singlamteh piakna nei uh hi. 22.11. 1992 ni-in MBWF kum 35 cin phawkna tawh Shield khat pia uh hi. 31.1.1993 ni-in Thuklai Pawlpi in pahtawina leh letsong nam tuamtuam pia uh hi. 1997 October in Kawlgambup Khristian Kipawlna MCCWF panin pahtawina leh letsong pia uh hi.

13.12.1998 ni-in Tedim Christian Fellowship vaihawmna tawh Ordained ngah masa ci-in beelkang khat leh laipi kipia hi. 15.2.1998 niin Pension lak hun ahih manin anbuksung kisam khempeuh SRBA numeite in pia uh hi. 24.4.1998 ni-in ZBWF kum 20 cinna Tahan Tuiphum Biakinn ah Shied thuappi 2 kipia hi. 1.4.1999 ni-in Zomi Christian kumzacin pawipi panin pahtawina Laipi kipia hi. 15.10.2000 ni-in TBWF kum 40 cinna CMBC biakinnah pahtawina leh letsong kipia hi.

IV. Golden Jubilee Pawipi kibawlsak
Rev. Ngiak Za Dim pen Zomi lakah mi masa, numei Ordained ngah masa khat hihna tawh Thuklai pan USA a tung sanggamte 8 in pahtawi nuamin kikumin sumkhak uh a, Ks. 3,543,000/- pawipi bawlin ganlian 8 bang gawh dingin geel uh hi. Sianu in zong amah bek min puasak loin ama mai a sem Rev. Za Khup Centenary, Rev. F. Ngo Khaw Cin Diamond Jubilee leh ama’ Golden Jubilee min puasakin 19.12.2002 ni-in ganpi 5 bang go in, SRBA gamsung, Kawlzang pan, Khamtung mun tuamtuam pan kikaikhawmin pawi lianpi khaam hi. Lungdampih a, letsong, pahtawina a pia bekbek inn 150 val hi. Jubilee laibu hoih mahmah khat zong bawl uh hi. A bawlni ding zong Sianu in amah a it a huh apanpih den Dr. Lt Col. Suang Za Pau hong nusiat ni-in bawl hi. Hih Jubilee ni-in mun tuamtuam pan motor tampi, mi tampi pai-in uap thei ciat uh hi.

V. Tagah sang phuatna
Sianu in pension a lak khit ciangin US a om Pu Lian Kamte nupa phutkhiat masakna tawh 1998 February 16 ni-in Rev. Ngiak Za Dim innah Tagah kepna Boarder neihna dingin SRBA kumcin kikhop a pai Upa makaiteng tawh thukikupna kinei hi. 1998 June kha in kihonga naupang 5 tawh pat ding ahi hi. Ks. 1000/- tawh inn kisap in, Sia Mang Kho Tual innah kum 4 a ki om khit ciangin Sweden huhna tawh tagah inn khat kilei hi. James 1:27; Paunak 19:17; 22:6; Thuhilhkikna 10:18 bulphuh uh hi. Hi bangin Siamanu in mapan khia a, amaban SRBA in zomtoto hi.

VI. Hong nusiatna
Sianu pian kum 70 cinga hih hun sungah natna nam tuamtuam nei hi. Kawlpi khawngah zong kibawlin pai zel hi. A sih ding theikhol mahmah a, zong kihta tuan hiaulo hi. Siavuanten a natna nam tuamtuam a gen laitak Sianu in “tua zah gen in, khat bek zong nak sih ngap lua ing” ci ngei hi. Hi bangin damloin om toto a, January 12, 2007 zingsang 11:00 hunin Thuklai-ah hong nusia hi. 15 January 2007 1:00-4:00 hun sungin kivui a, SRBA gamsung Siate Upateng leh Zangpan Khampan a paito thei zahzah tawh limcitakin kivui hi. Innah biakpiakna akibawl khit ciangin Biakinn sungah hun kibawlpih hi. A luang zong Siateng, Upa makaiteng cih bangin a tuamtuamin kizawng hi. Department tuamtuam, kipawlna tuamtuam panin phawkna, khakna, lai tuamtuam leh lasakna tuamtuam kinei hi.

Ama’n hong nusiat hangin ama hihna in hong nuntakpih a, ama khekhap leh sepnasate in thu hong gengen lai hi. Zomi numei lakah Ordained ngah masa pen hi-in, numei Ordained ngah lakah hong nusia masa pen zong hi.

Source :
Zomi Numei Ordination Ngah Teng Tangthu
Rev. Job Nang Khaw Thawng
October, 2008

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: REV. NGIAK ZA DIM’ TANGTHU (Zomi Numei Ordination Ngah Teng Tangthu). Description: Rating: 5 Reviewed By: Cinpu Zomi
Scroll to Top