728x90 AdSpace

Hot
Menu
Zon-ol na Donate

Latest News

Taangtai Khristian Biakna. Hanthotna : Rev. Dr. S. Pau Khan En (President, GZA)

Taangtai Khristian Biakna
Hanthotna : Rev. Dr. S. Pau Khan En (President, GZA)


Pasian min tawh khatvei Ama thu kikum kikthei ding ihih manin lungdam hang. Tuni-a kong gen nop thu in  “Taangtai Khristian Biakna” ahi hi. Mi khempeuh ading taina, gilvahna, damna, lungdamna ahi hi.

Laisiangtho Bulphuh ding.
Matthai 6:9-15
9 Tua ahih manin thu na nget uh ciangin hih bangin na ngen un: ‘Vantunga om kote' Pa aw, na min siangtho kizahtak hen.10 Na ukna hun hong tung hen la, vantung bangin leitungah zong na deih bangin kigamta hen.11 Nisim khamkhop an hong pia in.12 Kote tungah a hong mawhte mawh maisakna ka neih bangun ko' mawhna zong hong maisak in.13 Ze-etna lian hong thuaksak ke'n. Gilo' kiang pan hong honkhia in,’ (Uk zawhna, vangliatna, minthan'na, na nei tawntung hi. Amen.) ci-in na ngen ding uh hi.14 Note in midangte' hong mawhna na maisak uh leh vantungah a om na Pa un zong note' mawhna hong maisak ding hi.15 Ahi zongin note in midangte' hong mawhna na maisak kei uh leh vantungah a om na Pa un zong note' mawhna hong maisaklo ding hi.


1.Kote’ Pa: 
‘Kote’ cih kammal a om ciang mi khat bek hi lo, mi khempeuh a genna hi. Eite khempeuh, ei Khristian khempeuh a cihna hi a; ko pawlpi, ko innkuan, ko minam cihbang ciang bek hi loin Khristian upna a zui mi khempeuh a genna ahi hi. ‘Kote Pa’ cih ciangin Pasian pen eite khempeuh i Pa ahihna a gen ahi hi. I Topa Jesu in thunget dan hong hilh pen ‘kote’ cih a zang dingin hong deih hi. Pasian pen mi khempeuh Pa hi a, ei bek kineihsak theih thu hi lo hi. I vekpi i Pa ahi hi. Tua ahih manin ‘kote Pa’ kici hi. Pawlpi deidan lo hi, pauleham deidan lo hi, behlephung deidanlo hi. Tua pen Jesu’ Thusim ahi hi.
Rev. Dr. S. Pau Khan En (President, GZA)

2. Kote Khamkhop: 
Tuni ka khamkhop ding uh an hong pia in... cih ciangin kote khempeuh in ka khamkhop ding uh an hong pia in cihna ahi hi. Nisim khamkhop ding a nei lo om lua hi. I pianna Zogam mahmah zong enkik lehang - nikhat khamkhop ding an a nei lo om hi. Zingsang bang huan ding, nitak ciang bang huan ding cih a theilo tampi om hi. Huan ding nei lo, bangci ngah ding cih zong a thei lo, a lampi a om vetlo tampi om hi. Gamsung singlak, singnuai pan gilvahtheih nading khatpeuh zongin ne-in a nitum tampi om hi. Meikuang paisuak om hi. Lungngaih ding hoih ka sa hi. Topa thungetna in ‘nisim in ka khamkhop ding uh’ ‘tuni in ka khamkhop ding uh an hong pia in’ ci hi. Tuni khamkhop ding a nei lo i mipih, i sapihte phawkin mangngilh kei ni.


I duh kine loin, i neih kine hi. Nungkum, 2010 in Europe gam pawlkhat ka va zinna ah Zomi nupi bangzah hiam tawh ka kimu hi. Amau hong gen khat in ka lungsim hong lawng mahmah hi.  “Sia aw, khua lamah ka om lai-un, tuni bang huan ding, bang ne ding cih pen a kilungkham mahmah hi. Tu-in hih lai ah, bang huan ding hi nawn loin, ‘bang duh i hiam, bang huan ding i hiam’ kici ta a, tua mahmah nuamsa ung,” hong ci uh hi. A neih uh huan hi loin, a duhduh uh tengthei, a duhduh uh huanthei uh hi. Khua lam tawh teh ciangin a hampha ahi uh hi. Ahi zongin Topa in kote, ko minamte, ei minam bup in ‘nisim khamkhop’ a nei dingin hong lamen, hong deihsak hi. Mangngilh kei ni.


Khua khat ah khedap a lian mahmah a bulh khat om a, “Bang ci?” ci-in a kidot ciangin, “Ka deih ka lei hi lo a, hong kipia bangbang ka bulh hi,” ci hi. I khe tawh kituak ding a kileizo lo tampi om a, a kilawm, a kilawm lo cih hi loin i neih bangbang a kibulh ahi hi. I kipatna, i gam, i khua, i minam i mangngilh loh ding ‘kote’ cih sungah kihel hi.


3. Kote Mawhna: 
‘Our sins’ cih ciangin kei bek mawhna hi lo, ko innkuan bek mawhna hi lo, ko minam mawhna bek hi lo, ei Khristian khempeuh mawhna a genna ahi hi. Mawhna i bawlkhak ciangin maisak ding a ngeina ahi hi. A mawhte in zong maisakna a nget ngam ding a ngeina ahi hi. A kinget leh zong maisak ding a ngeina ahi hi.

Mikang kammal ah bang haksa sapen na hiam? ciin kidotna khat om a, sangnaupangte in kammal lawh hak a sakte uh hong gen deudeu uh hi. A tawpna ah khatpa in,  “I am sorry” cih mah haksa sapen ing, ci hi. Siapa in, “I am sorry” cih pen a baih mahmah hi, tua sanga kammal haksazaw tampi om hi, ci hi. Naupangpa in, “hi lo hi, sia aw, a lawh a baih hang, a genkhiat baih lo hi,” ci hi. Mikang laigelhsiam John Milton in zong, “‘I am sorry’ is the hardest word to say” na ci hi. Mawhmaisakna hong kingen leh zong maisak ziau ding pen a baih lo khat hi kici leuleu hi.

Mite mawhna maisak ding pen, ei a maisak ding dinmun ah i om ciangin kiphatsakna in mun la thei hi. Mawhmaisak ding dinmun ihih leh maisak suk pah ni. Mawhna i bawlkhak leh zong maisakna nget ding neu ngaihsut kei ni. Khristian nuntakna pen Jesu Khris in mawhna hong maisak bangin eite khat le khat a kimaisak dingte ihi hi. Maisakna a om kei leh Khristian nuntakna ah mai kinawt theilo hi.

Nung Nipini, June 26, 2011 niin Sia Khual (Rev. Dr. Gin Khan Khual) hong kikhawm hi. Ko biakinn Tedim Baptist ChurchYangon ah Nipini zingsang hun hong zang hi. Mi tampi ngaihsutna ah kei leh sia Khual pen a kilemlo, a kigal bangin hong ngaihsun om uh hi. Tua leh kei zong mipite ngaihsutna a siang ding hoihsa ka hih manin hihbangin ka gen hi. ”Sia Khual aw, kei u zaw ka hih manin mite in hong ngaihsutna vuah a kilem lo bangin hong muhkhak uhleh keima mawhna hikha ngel ding hi. Tua ahih manin tua banga mite hong ngaihsutna a om leh hong maisak in maw....” Tua leh ka nihun kikhawm mipi 400 val muhna pulpit tungah lungdam khut kilen, kikawi-in ka om laitakun, nupi pawkhat bang na nehno gawpi khitui na luang keei uh hi. Ka cihnop ah, mite in hong muhna ah a sianglo a om leh khial hi ning, hong maisak in ci-in kigen leng, i navaak in, i om nuam a, mite hong muhna zong siang pah, mai kinawtthei pah hi. Sorry cih ding neuna-in ngaihsun kei ni.

Thuum ding vangikin ngaihsun kei ni. I kithuum khit leh zong kimaisak ni.

4. Taangtai Biakna: 
Khristian biakna pen ei-a bek hi lo a, Taangtai b i a k n a   h i .  Ch r i s t i a n i t y   i s   a   s o c i a l   r e l i g i o n .   J o h n  We s l e y   i n , “Christianity is not a solidarity religion,” na ci hi. Khristian biakna i cih pen amah bek a tangdin biakna hi lo hi. Mi khempeuh a huamkim biakna ahi hi. Mi khempeuh damna a pia biakna ahi hi. Mi khempeuh nuntakna a pia hi. Pawlpi deidan lo hi. Minam deidan lo hi. Behlephung deidan lo hi. Gamgi nei lo biakna ahi hi. Mi khempeuh huam khin hi.

Ka sangkahpihte khat amah bek lai zo nuam hi. Mite muhna ah “laisim lo” bangin kidawk ut a, ahi zongin lai zo amah bek hileh ut hi. Mi muhna ah lai sim ngei lo a, mite ihmut khit ciang zanpuan nuai ah datmei tawh laisim hi. Amah bek kikhual ahi hi.

Khristian nuntakna tua bang hithei lo hi. Nang bek kikhual cihbang omthei lo hi. Na innkuan, na pawlpi, na khua le tui, na minam, le leitung mi khempeuh a huamkim ding ahi hi. Tua in “we ”   “ k o t e ”  c i h   a   d e i h n a   a h i   h i .   P a s i a n   p e n   ama h   a   n e i  mi khempeuh’ PA ahi hi. Nang le kei hong huap a, midang khempeuh zong huamkim hi.

Khangluite in, “Singdang/Singphung a kikhen behiang kum kuaa kituakkik lo,” na ci uh a; ahi zongin Jesu Khris thuakna hanga i mawhna khempeuh hong kimaisak khit ciangin mite, “Jesu Khris’ singlamteh phungah mawh kimaisak uh hi,” kici ta hi. 

5. Youth, Khangno Hun: 
Na nuntakna, na khangno hun Jesu Khris adingin na piak leh a manpha penpen nuntakna a nei na hi hi. South Africa gamah tuhun technology tampi a om ma-in Pasian thu bangci tangko uh hiam cih a genna vuah, khangno makai khat in, “Ko, South Africa gam ah khangno khat in kumkhat sung khua khat ah nasem dingin ka kipia uh hi (we invest one year of our life for Christ),” ci hi. Khua khat adingin mi 5 kila a, sangsia, doctor, engineer, etc cih bangin mi nga in khua khat ah kum khat Pasian thu tawh kituakin na ka sem uh a, Pasian thu zong ka gen kawm uh hi. Tua hangin Khristian hong suak uh hi, ci hi. I nuntakna, i khangno hun Pasian adingin ap, zang, invest lehang, tua mahmah a thupi penpen nuntakna ahi hi. Tua pen tuni Khangnote Nipin (Youth Sunday) i zatna ah i kithapiakna hileh ci ing.

(Tuni July 4, 2011)

Topa in thupha hong pia ciatta hen. Amen.

Ciamteh ding: Zomi Innkuan, Singapore ah Siapa’ thugenna pan ka phawkkhak teng tomlakin kong gelh suk pak hi. Khialhna a om leh hong maisak un.

Dr. Hau Za Cin
Phuitong Liim

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Taangtai Khristian Biakna. Hanthotna : Rev. Dr. S. Pau Khan En (President, GZA) Description: Rating: 5 Reviewed By: Cinpu Zomi
Scroll to Top