728x90 AdSpace

Hot
Menu
Zon-ol na Donate

Latest News

TAZEN. Agelh – Col. Khen Za Moong (Retired) Yangon

TAZEN.
Agelh – Col. Khen Za Moong (Retired)
Yangon


            “Tazen” kammal pen, phatna pahtawina lah hithei a, lamdang sakna zong hithei hi. Khatvei vei ah zahpihna kilawm lo sakna zong hithei hi. “Tazen” zatna ah a thu zui-in ngaihsut theih ding hi. “Tazen” bek hi loin “Tazen aw! Tazen mahmah aw! Mahmah Tazen aw!” ci-in zong kizang hi.

            Mihing nuntakna leh gamtatna ah ngaihsutdan leh muhdan tuamtuam om a, tuate pen “Tazen” a hoih lam leh “Tazen” a hoihlo lamin kikhen thei hi. Ei Zomite’ nuntakna leh gamtatnate pan, a hoih lam kimuthei a, a hoihlo lam lah kimuthei hi.

            Khanglui hunin, khuak zanga ngaihsutna tam nailo hi. Nektawm ding vai thupi-in thatang zatna tam hi. Khawhsa an, lawhsa singsth singgah leh betsa ganhingsa zonna-in thatang zatna tawh hun kizang hi. Thatang hatte adingin kicin’na omin, thatang hatlote adingin kisaona om hi. Tua banga nuntakna enle’ng, “Tazen” hoih lam lah kimuthei a, “Tazen” hoihlo lam kimuthei hi.

Ngeina lam
            Galmat samat tawh kidemna om hi. Zulup sagawh leh hihneih zunun tawh kidemna om hi. Kha hual na’ng kha nopsak nangin tonna leh sagual tawh kiguina om hi. Hihte pen, a hun zui-in ngaihsun le’ng, “Tazen” hoih lam vive hi. Ahi zongin tulai hun tawh ki-en leh “Tazen” hoihlo lam suak leuleu hi.

            Nuntak nading sepna bawlna ah thatang mah bullpen manin thatang kicing innkuan kicinte’n khozo bawlzo zaw ahih manin, neih leh lamah zong kicingzaw hi. Lokhawh singpuak gancin’na bek om ahih manin tua hun adingin “Tazen” a hoih lam mah hi. Tu hun, khangnote’n pilna siamna zon’ hun leh annek tuidawn puansilh nikteen omna inn kicinna’ng leh khantohna omna’ng kidemna hun leuleu ciangin “Tazen” hoih lam hilo lam aa khen theih ding ngaihsut theih ding kisam hi. “Khuttam” tawh nasepna pan “Kamtam” an kivak zawh hun leh “thalawh khatpa” sepna bawlna pan aa a tam kivak zawh a tam kipantah zawh kikhantoh sakzawh hun kibang lo hi.

            Khuttam cih ciangin, innkuan sunga nasem thei khempeuh cihna hi. Kamtam cih ciangin, innkuan sung an nethei khenpeuh cihna hi. Thalawh khatpa cih ciangin, innkuan luting sum thalawhpa cihna hi. Khatvei lai-a khangno nasem thei khempeuh pen, tu ciangin sangkah kula nasem thei nawnlo hi. Tua ahih cianga “cidam hen mulmam hen tanu tapa tampi tawi hen” cihte pen, a hun tawh kizui-a “Tazen” theih ding kisam hi.
            Galmat samat zulup sagawh hihneih zunun kidemnate ah, khatvei lai-in phattuamna om hi. A hun zui-a tua banga kidemnate, zuhai sabek leh ki-uapna in zui aa, min nei aa phattuamna om hi. Tungtuan’na om hi. Pilna siamna neihna lamna kidemna, tuhun ciangin, koilamah “Tazen” ding ci-a ngaihsut kak theih ding kisam hi. A taang ding zong phuahtawm kul lo hi.

            Pilna siamna tawh kituak a, annek tuidawn puansilh nikten omna inn kicin’ sak zawh na’ng leh tate pilna siamna tawh kicin’ sak zawh na’ngte pen, tu hun leitung nuntakna ah, a thupi pen a kisam pen, “Tazen-Hoih” khat ahi hi.

            Tu hun leitung nuntakna ah khantohna sang semsem a, kidemna tam semsem hi. Mitpil ding navak ding laithei ding ngaihsun ding khensat ding tupna ngimna nei ding sem ding hahkat ding cihte pen, pelh lo-a phawk tawntung ding, vom tawntung ding thuci’n ding thukep ding, “Tazen Hoih” vive ahi hi.
           
Biakna Lam
            Ih kam ah, Pasian  cih kammal om napi, i pu i pa khangluite in Pasian bia loin dawi na thoih uh hi. Pasian kihta loin dawi kihta zaw uh hi. Tua hangin dawi lungdam na’ngin dawi thoih uh hi. A sia khempeuh dawi bawlin ngaihsun uh hi.

            Leitung nusia a, sihkhit ciangin misi gam tunga kha nopsak na’ng, khanglui lai-in ngaihsutna om hi. Hanken, neih theih ding umin, sagual tawh kigui uh hi. Galmat samat leh zulup sagawh hihneih zunun minte, misi gam dong keng dingin um uh hi. Mihing in Kha nei a, misi gam tun’ ding um uh hi. Leitunga nupate sih cianga misi gama nuamsa tak a om khop nangin Kha hualna tonna nei uh hi. Khanglui hun lai-in khanglui ngaihsutna tung tawna upna gamtatnate pen, a hun zui-a ngaihsut theih ding hi in, “Tazen” mah cih ding hi.

            Tapidaw biakna hong tun’ ciangin, Pasian kithei-in Pasian kibia hi. Pasian muangin Pasian suangin Pasian’ thu zui-in Pasian kibel hi. Pasian’ hehpihna leh Pasian’ thupha um aa lametna hi. Biakna kikhelna zui-in gamtatna zong kikhel hi. Nuntakna aading aa lamdang “Tazen Hoih” hong piang hi.

             “Tapidaw” kammal pen Kawlkam hi-in “Nungzuipite” cihna hi. Mangkam in Christian hi. Christ’ nungzuite cihna hi. tapidaw biakna pen Christianity kici Topa Zesuh Kharith thu theihna-thu upna-thu zuihna- biakna hi. Topa Zesuh thu pen Lai Siangtho Thak hi.

            Topa Zesuh tung tawna Tapidaw Pasian umte, gupkhiatna ngah dinga leitung nusia aa sih ciangin, Kha in tawntung nuntakna ngah a, vantung gam tung ding hi. Tua pen, Pasian’ hehpihna (Grace) hi. Leitung nuntak sungin, Topa Zesuh thuhilhna zui-a ngaihsun a, sem a, gamta a, nuntakna pan, Pasian’ thupha (Blessing) ngah ding hi. Tapidaw biakna in, ki-itna leh thuman bulphuh hi. A hoihlo khempeuh paikhia aa zui lo a, a hoih khempeuh kem aa zuihna pen Tapidaw biakna kici thei hi.

            Tapidaw biakna sungah, ngaihsutna tuamtuam piangin, pawl kikhenna gamtat kibat lohna tawh kizom hi. Mihing in ngaihsutna tuamtuam nei theih pen, a lamdang hilo hi. Ahi zongin “lungkhen’na” (extremism) hanga Pawlpi tuamtuam kikhenna ciang dong a pianna Topa Zesuh thu ahi, Lai Siangtho Thak, bulphuhna a kipelh leh, “Tazen Hoihlo” mahmah hi ding hi.

Nuntakna Lam
            Leitung Galpi Khatna ma-in Khamtungah kumpi (government) ki-ukna hong piang hi. Kumpi nasem aa khasum sanna hong piang hi. Galpi Khatna khit ciangin Piancit (France) paite tung tawnin muhna zakna theihna zaituam hi. Galkap nasepna tawh kizom toin pilna, siamna khangto hi. Khasum sanna mun kibehlap to hi. Khamtung gam aa kumpi  khuate ah, sumzuak sumbuk bawl zong pawl khat hong om a, nuntakna tampi-in kikhelin, khantohna khat hong suak hi. Meikang patau khualnain “Sikkang inn” neih ding kidemna piangto hi. Lai thei ding kideihsakin sangkah ding kihanciam hi. “Tazen Hoih” hun khatin kiciamteh thei hi.

            Leitung Galpi Nigna ma leh Galpi khit hunkhen sung teng pen, Khamtung leh Khamtungmite aa ding aa gamdang mundang mite tawh kinai kitheih hun hi kici thei hi. Laithei khangno tampi kibehlap hi. Kumpi nasem galkap nasem tampi kibehlap hi. Sum zuakna sumbuk bawlna tampi kibehlap hi. Khamtungah Sang leh Zato tampi kibehlap hi. Paisuk paitohna lampi tampi kibehlap hi. Khuaphawkna khuadakna kinei semsem a, pusuahna zonna tawh kizom aa sepna leh hahkatna khangto mahmah hi. “Tazen Hoih” hun kizomsuak hi.

            Khasum sanna, thatang tawh sum thalawhna, sumlei sumzuak sumbawlna tampikhangto hi. Khawhsa an bek ngakna pan, thalawh sum tawh kivakna hun kikhel hi. Nuntakna hun kikhel a, phattuamna tampi kibehlap hi. Annek tuidawn puansilh nikten omna-inn zong kilamdang to a, khantohna lam vive hi a, “Tazen Hoih” mahmah hi.

            Taangtuan a, kithei kikhawl semkhawm a ki-it kingai Khamtungmite, ki-uap in, kihuh in, pimkhat in, om uh a, Pasian tungah lungdam ko zo uh hi.

Ki-ukna Lam
            Taanglai mite hun lai-in tha bek kisuang ahih manin thahat penpen peuhpeuh in makaihna ngaih in, vai khempeuh hawm pahin, thahatte deihna bangin vaihawmna om hi.Nuntakna khanto a, theihna leh siamna a kineih ciangin, ngaihsutna zong kikhel to hi. Thahatna tawh mapina a hun hun aa ngaihsutna khangto zui-in, gam leh lo neihte’ ukna (Feudalism) leh Kumpipa kumpinu ukna (Kingdom) ki-uknate kizomto hi. Khat deihna (Dictator) tawh vaihawmna pan mi tawmkhat deihna (Oligarchy), pawl khat deihna (one party system) cih bangin ki-ukna vaihawmna kikhel toto in, tu ciangin Thamada gam (Republic) leh a tam deihna Democracy tawh ki-ukna pen, a hoih penin kingaihsun hi. “Tazen Hoih” kizom toto cih ding hi.

            Kawlgam ah zong “Tazen Hoih” tawh kihual in, Taangpi’ telsa-Taangpi’ deihna bulphuh vaihawmna-Taangpi’ Kumpi hong piang hi.

            Taangpi cih teh, mi tampi hi-in, deihna zong a tuamtuam tampah hi. Kitheih kikholh sepkhopnate ah, kiho kikup kilep siam ding thupi hi. Khat lam peuhpeuh a, uanglua a, “lungkhen’na” (extremism) ciangdong om ciangin, gazatna huaihamna kidemna piang a, kikakna kilangbawlna, kigalbawlna tawh kizom hi. “Tazen Hoih” vaite zong, lungnop lohna lunghihmawhna launa lungkhamna haksatna dahna kahna ciang dongin kihei a, “Tazen Hohlo” lam manawh thei hi.

            Leitung mihing nuntakna ah, “a hoih” leh “a hoihlo” om hi. MI khempeuh in “a hoih” leh “a hoihlo” khen thei hi. “A hoih” pen “Tazen Hoih” hi a, “a Hoihlo” pen “Tazen Hoihlo” hi.

            Mitpilna bil navakna laisiam hanciamna siamsin hahkatna pan, theihna pilna siamna neihna tawh, ahun amun athu ami ahang (when where what who why) khempeuh, zaitak ngaihsun hualkhawm gawmtuah a, ngaihsutna hoihna khensatna hoihna kampauna hoihna sepna hoihna bawlna hoihna gamtatna hoihna nuntakna hoihna khempeuh pan aa luang, “Thupha” kidimin, hoihna pahtawina “Tazen Hoih” kolo zo ta hen.

Zomi eLibrary/Laibusaal in hanciam in aki tei/type ahi hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: TAZEN. Agelh – Col. Khen Za Moong (Retired) Yangon Description: Rating: 5 Reviewed By: Cinpu Zomi
Scroll to Top