728x90 AdSpace

Hot
Menu
Zon-ol na Donate

Latest News

2017 kum Zomi te maasuan. Agelh ~ Khupkhan Thang

2017 kum Zomi te maasuan
Agelh ~ Khupkhan Thang
Norman, OK USA

2017 kum Chin State buppi in ih sep ding pawlkhat leh ei Zomi te, Tedim leh Tonzang Township in ih sep ding kisam kasak pawlkhat kong gual suk pong hi.

Lakkik ding. Nget ding hilo ei aa ahisa lakkik ding.
1. Nidang aa Mangkang kumpi bawlsa ih ChinHills gamgi dung teng lakik ding.
Chin State buppi sung aom MP teng tavuan hi.
2. Kalay College pen Chin College in laih kik ding.
Chin State buppi sung aom MP teng tavuan.

Nget ding
1. Tedim District.
Tedim leh Tonzang Myone MP teng tavuan.
2. Maha Dat line  leh Beltang Hydro Power.
Tedim leh Tonzang Myone MP teng tavuan.
3. Sapan Zozang lampi
Tedim leh Tonzang Myone MP teng tavuan
4. Tulsuk Pimpih Laibung ayan mawtaw lam
Tedim leh Tonzang Myone MP teng tavuan.
5. Lampi thak, Lawibual zaang pan Sonsing lamka ah Sapan ah nidang aa Lam Mingyi U Lal Bik zonsak alignmemt.
Tedim leh Tonzang Myone MP teng tavuan.

Tuah ding leh bawl ding.
1. Five Star Hotel
Tedim Myone MP teng tavuan.
2. Vongmual, Kahgen leh Thenzang gam teng Wildlife Sanctuary aa bawl ding.
Tedim Myone MP teng tavuan.

Laihkik ding.
Khuapi sung nawk Tedim Road teng amin maan tawh laih kik ding.
Cikha, Tonzang Tedim Myone GA, Myone Municipal leh Hausa teng Tavuan

Mipi Sep ding
1. Innkim innpaam dum sak ding.
2. Inn nung innmai hawklam hoihtak bawl ding
3. Nin thaangpaih lo dong
Myone Municipal, Hausa teng, Biakna pawlpi sia teng lehTaangpi Taangta Tavuan.


I. Lakkik ding. Nget ding hilo ei aa ahisa lakkik ding.
1. Nidang aa Mangkang kumpi bawlsa ih ChinHills gamgi dung teng lakik ding.
Ih Chin State gamgi; Nidangin Chin Hills gamgi bohtai omna “Phaai” ah Sagaing Taing in Gate khat hong bawl in, antang a ki pan van paisuk paito teng check manggawp ahih man’ in, Northern Chin Special Division, Township 5 tengah hamsatna nakpi tak hong tung hi. Col. Khen Za Mung in, Chairman of Chin Special Division, Security and Administration hong sep ciangin, tua gate hong phiat hi. Taangpi in kinoptuam pih pah hi. Kua ma’nh bangmah cih ngamlo hi. Chairman of Sagaing Division People’s Council Ahaihan Kyaw Swa (Tura Kyaw Swa) in, Tulsuk Palik gate phungah, “Welcome To Kalemyo” sign board hong phut aa,   mualbul, mualci’n dung zui-in Chin State gamgi hong kikhiinto hi. Tua mah bangin Gangaw lam ah zong gamgi mualbul ah na khinto uhhi. Kua mahin bangmah cih ngam tuanlo leuleu hi. Chin State in ih zaanglei hoih teng ih tan hi. Chin State buppi tawh kisai thu hi.

(a). Hih gamgi khin vai pen siimmawh zawhthawhna (Contemptuous Bullied) tawh hong kikhinsak hi. Ih Chin State Peoples’ Council Chairman te in, bangmah khinkik ding nahanciamlo hi. (Ei Chairman teng pen, Tura Kyaw Swa sang’ pilna saang zaw, a senior zaw te vive ahih uhhi.)

(b). Ih Galkap zalian: Maj. Gen. Tuang Za Khai, Col. Khen Za Moong, Col. Van Kulh te in zong bangmah nacihlo hi.

#1. Sepding (Action):- Chin State MP teng leh Kalemyo District, Magwe, Arakan sung aom Chin Amyota Hlutdaw MP teng in, kipawl khawm in ngen kik ding.

2. Kalay College pen Chin College in laih kik ding.
Chin College lamna ding in Department of Education, Ministry of Education, Central Government in Budget Sanction hong kipia hi. A College lam nading mun in Khai Kam khua kitel hi. Chin State gam Tedim uk sungah kilam hi. A kipatcil lamin Private Contractor tawh kilam in, nungciangin Construction Corporation in hong lam kik hi. Construction a’mansiang khit ciangin Kalay College ci a min hong kilaih ziau in, Sagaing Taing te college hong suak ziau hi. A College bek hilo tua college kilam na Chin State gam leitang teng zong Sagaing Taing gam hong suak hi pah hi.

(a). A beisa Kawlgam ki-uk hunsung, ih Chin State maa kai teng tua college Chin State te aa hi ci-in, a,ngen kik omlo hi.

#1. Sepding (Action):- Chin State MP teng leh Kalemyo District, Magwe, Arakan sung aom Chin Amyota Hlutdaw MP teng in, kipawl khawm in ngen kik ding. 

II. Nget ding
1. Tedim District.
Kamdawn ih zakna tung tawn in, Tedim Khazai (District) siauhna (Motion) lai pen, Kawlgam Hlutdaw meetingah ih Pyithu Hlutdaw MP pa in na tin ding, ngetna thusung dingin kisawl hi. Ahih hangin ih MP pan’ na’ tinlo, thu nasunglo hi ki ci hi.  Thantlang Pyithu Hlutdaw MP nu in, Khalkha leh Thantlang myone nih gawm in, District ngetna (Motion)  Pyithu Hlutdaw meetingah natin in, thu nasunghi. Tua ciangin ei zong District Hludaw ah ih ngen kik aa, District kituh nih hong suak hi. District vai Chin State Hlutdaw ah, kikup ding thu hong suak hi. Chin State Chief Minister in, telkak ding (option) thum hong pia aa; (1) Tedim District pia ding; (2) Khalkha District pia ding (3) Anih tuak in kua mah pia nailo dingin, a thu diahphot (Pending) ding.  Ahizongin, ih Tedim MP khatin mee khia aa kidem dingin thu nasung aa, mee khiat na tawh thuki khen hong suak hi. Mee lel in Tedim District ihtaan hi.

(a). District ih kituhpih Khalkha + Thantlang; lelhding thei gegu aa, Pyine Hlutdaw mee  (Secret vote) ding aa ih tawn’ zong Kawlmitphial or Kawlngian (Burmese illusion)  ahihi. Ih ngah meetang 5 lakah, mee khiatin kidem ding cii a thusung ih Tedim MP pa’ mee zong paading paaloding kitheilo hi. Ih Tonzang MP pa, Pyine Hlutdaw Okathah pa’n amaa meetang khianailo ding ci leng, ei MP mee 2 leh adang meetang 3 pen kua Myone te mee aitam theih ut huai mahmah hi.

(b). Mee khiat tawh thukhen ding tawng ihhi leh bang ding aa, in Tedim Tonzang MP te’n a dang Myone 5 MP tetawh sizungyee nabawl lo hiam? (Falam, Matupi, Kanpetlet, Mindat leh Paletwa)

(c). Lel ding theih gegu bang dia, Pyine Hlutdaw Okathah pa in, a Veto zangin, hih thu minnailo, meekhia aa khenlo ding, pending photding na cilo hiam?.

#1. Sep ding (Action) Tedim, Tonzang MP teng Pyithu Hlutdaw ah ngenkik ding.

2. Maha Dat line 
Khalkha, Falam in ngah khin; Tedim leh Tonzang in ngah nailo. Bang hang? ZCD pu a interview na sung bang aa, mipi hong nget ciang a ngak maw? No a semsem mah ko mipi in angaklah lua maw leh? (Mipi na ngaklah kei un interview na aa na cih)   

Beltang Hydro- Power bang ciang tung?
Tedim leh Tonzang Myone MP teng tavuan la in hong sul zuih un.
3. Sapan Zozang lampi
4. Tulsuk Pimpih Laibung ayan mawtaw lam
5. Lampi thak, Lawibual zaang pan leilum, Sezang, Sonsing lamka ah Sapan ah nidang aa Lam Mingyi U Lal Bik zonsak alignmemt.
Tedim leh Tonzang Myone MP tengin hong vaan un.


Hih a kigaalmuh lampi pen Sapan – Zozang lampi hi. 

Sapan Zozang lampi pen Socialist kumpi te in myone khat le khat kikal antang puak ding khaktan ahihman in Tedim gambuppi hausa khempeuh tawh kop in kumpi huhna tawm  (number cian pak keng) leh Tuiphum (BBC) lam pan Dr. Kyaw Than vaihawm na kigawm in Sapan, Tuisau khua, Vando khua, Tuivial khua, Dolluang khua, Mualzang khua, Mualnuam khua, Zozang khua teng nawk a kito lampi ahi hi. Tuisau le Vando kikal ah leinip mincim den khat om in zekai tuam mahmah hi. Hih Sapan – Zozang lampi pen 1974 kum in, tawh kipan hi. Rev. Kam Do Thang (Retd. Tedim Township People Council E.C.) hong gen bang aa kong at hi.  Tulaitak aa Tedim- Kalaymyo lampi saang’in tai 18 bang tom zaw hi ci uhhi. Hih lampi pen nidang pekin, Pu Khup Za Cin in, tawhding aa, agengen ngei lampi hi aa, tu aa Tedim leh Kalemyo ihlampi sa’ang tai 20 bang tomzaw ding hi ciden hi. Lt. Col. Son Khaw Pau zong lamto ding taangthakuan a pai, lamkal ah phung ah kingam in si hi. (Hih mi tegel thu kong gen na pen, ih mimaasaa ten, ihgam leh ihlei a’ding hong deihsak dan uh konggen na ahihi.)

Kalay – Tulsuak (Taikua) - Pimpih-Laibung lampi pen tunai kum 4 kum5 lai aa kisem hi. Kumpi in Ayanlan (Feeder Road) ding aa angim hi aa, private contractor tawh kito hi.

Lumlet Kumpi (Tawlanye asuyah) hong kah maa 1958 kum pawl-in Lam Mingyi pa U Lal Bik in, Lawibual zaang pan Leilum khua sung nawkin, Sezang khua ah, Hawpmual Tedim lam kaai mual daang zui in, Sonsing lamka ah mawtaw lampi thakding alignment khat hong zong aa, tu aa ih lampi sa’ang phei zaw bek thamlo in, Thaangmual ihkal dong Tedim pan mawtaw paisuk paito te zong kigalmuh thei dingaa hoih mahmah ding hi. Tua Road Alignment zong tuni ciang dong khelam in kizangh thei lai hi. Songsiing lamka pan, Kennedy peak ah kahto nawnlo in, Thuamtuilii dek ah, Sapan-Zozaang lampi tawh kimat na ding alignment thak khat zong lai leng lampi phei mahmah ding aa, Tedim pan Kalemyo tai 40 zong pha nawnlo ding hi. Tu aa ih lampi sa’ang tai 20 tomzaw ding hi. Hawp phei, Sozang kiang, Akluai gei, Taingen khua taw, Aicik paam, kumsim aa mencim (Lampi cim) teng kinawk nawnlo ding aa, Tuuk tawh Khaal tawh Tedim leh Kalemyo noptak, baihno tak in kipai ziahziah ding hi.


Red line- A kitosa Sapan- Zozang lampi: Black line- A kitosaan’ Tulsuk- Pimpih- Laibung Ayanlan lampi:Blue line- Lampi alignment kizongsa tawhding lampithak
White line- Tulaitak aa kizangh lampi,

III. Tuah ding leh bawl ding.
1. Five Star Hotel
Tedim khua ah tourist te, NGO, Biakna lam ahizongin, gamdang mi zin zahtak leh Kawlgam sung mahmah aa nasem, Embassy te, UN staff te leh Kumpi nasem zin zahtak te ih nei ciangin, a tung nading uh, five Star or Four Star Hotel khat kisam pha mahmah hi. Tedim ah Hotel hong om leh  Rihli, Lennupa, Tonzang, Kennedy Peak, cihte  nai 2, nai 3 sung bek kipai aa, nikhat in olno takin, kinileh ziauziau nading vive ahihi. Eimi atamzaw in ih ngaihsut teh Gtn.. Rih, Kennedy Peak khawng mahmah ah hotel lampah dingin ih ngaigsut kha hi. Tourist ih cih te a tamzaw in, mun leh mual a lamdangte a et khawm un a mi (local people) te mahmah ii, ngeina, pau leh ham, (Culture, tradition, literature, Civic, language, living standard, social) cih te a kan nuam kawm uh ahi uhhi. Hotel hoihpipi gamlak ah ih lam hang kua mah isolation in zin tung lo ding hi. Tedim Khua sung mah ah lam zawk ding ahihi.

Kamdawn ih zakna ah ih Kumpi in, Khai Kam khua ah Hotel lam ding sawm hi. Tender zong sam zo hi cih ihza hi. Hoih hi. A hizong in, tua Khai Kam khua aa, Zogam hotel ah gamdang mi zin hong tung sang’in Kalaymyo hotel hoihzawte ah zin tung zaw ding uhhi. Bang hang hiam cih leh Kawlpi aa hotel te hoihthei mahmah aa, demzo ngeilo ding hi hang.  Tourist te kua mahin Zomi te tha piakna in, Zogam aa om Khai Kam khua hotel ah tung zawni ci peuhmah lo ding uhhi. Kawlpi aa, tourist te tun’na hotel a tamzaw anei ei mite vive mah hilel aa, ih an kuang kituh tuh kullo hi. Tua ahih ciangin Khai Kam khua aa ki lam ding HOTEL pen, ei gam ve’ve Tedim khua ah tuah ding hoih zaw hi. Zong busy zaw pek ding hi. 

Tedim Myone MP teng leh Tedim Myo GA te tavuan.

2. Wildlife Sanctuary.
Kam’siatna pan in kam’phatna ih cidiam? 2015 kum, khuahun sialua, guahtui tamlua ahih manin, Vongmual, Kahgen leh Thenzang khua teng kiciim gawp in, ihpu ihpa khua ih loih loh phamawh hong suak hi. Tua khuami teng zong, Tedim leh Khai Kam khua te ah inn kilamsak in kilalsal kmangta uhhi. Kuamah in akhua atui uh hong zuan kik nawn khollo kha ding hi. Tua ahih ciangin, hih Vongmual, Kahgen leh Thenzang te gamteng, ih Zogam ah a kisam khat ahi “Wildlife Sanctuary, Forest Reserved” in ih hawii, ihbawl, ihkep ding hoih mahmah hi.

Tedim Myone MP teng leh Tedim Myo GA te tavuan.


IV. Laihkik ding or khekkik ding.
Min dang khat a’ kivawh or min maanlopi aa kilo, Cikha, Tonzang, Tedim khuapi sung nawk Tiddim Road teng amin maan Tedim Road  tawh laih kik, khek kik  ding.

British kumpi in, Leitung Galpi II or Japan gal hunsung, 1942 kum June kha in, Imphal pan Tedim khua ciang mawtaw lampi hong zik uh aa, tua lampi a min “Tiddim Road” naphuak  uh hi. Tua lampi in Zomi te khuapi: Lamka, Sing-at, Cikha, Tonzang, Tedim khuate na nawk hi. Imphal pan Lamka 39 mile, Imphal pan Tedim 165 mile pha hi. Lamka khua sungah tua lampi min “Tiddim Road” mah na ci uh aa, etlawm mahmah hi.

Pu La Cin Khup hong gen ngeina ah; Mikaang kumpi in a gel cil in Tedim pan India gamgi ciang mawtaw lampi zik ding hi aa, Tedim pan Meitei gun Phil luitun’ ah kan in Tuithang, Tungzang, Ngalbual, Zampi, Khuabem, Singial taang, Lennahkot ah pai sak ding sawm uhhi. (Tu hun aa ZRDC Pu Vum Nang bawl mawtaw lam teng hileh kilawm kasa hi.) A hizong in Ukpipa Pu Pum Za Mangin, Tonzang hong nawk kei ding leh kei uksung pan coolies or taangtha hong pia zoloding hi ung a cih ciangin, lampi alignment pen, Tedim, Tonzang , Tuitum, Nakzangah Meitei gun kan in, Mualkawi, Tuikhiang, Singgial Taang,  Kansau, Cikha ah pai ding in hong khel kik uh hi ci hi. Pu La Cin Khup gen leh Kelly’s Burma Campaign laibu sung aa tawh kituak bilbel hi. (I have been ordered to make my road from Lennakot to Tiddim motorable, and also to make a new motorable road west of the Manipur from my Northern border. Pg 110)

Van (Tools) zat ding khempeuh vanleeng tawh hong kikhiat khin aa, Tedim pan Tonzang lampi bawl, 19 October 1942 ni-in kipan pah hi. Ciimtaang to teng Soklek kahleei (Chocolate Staircase) cii’n minphuah aa, tai 7 sung’in (Tai 4; Kelley in, ci hi. Ken tai 7 manzaw inteh ka ci hi.) samkilh bang aa kawi (Hairpin bend), kawi 38 vei kawi-in, asau pi 12 teh pi 1 gradient tawh pi 3000 sea level ciang kahto hi. (Defeat into Victory; Sir W. Slim pg. 357). Tua mah bangin Imphal leh Tedim kikal a’ciang a’ciang pan in, lamzik na’kipan uhhi. Mun thupi te amin tawh lo’lo in milestone in kilo zaw hi. 110 milestone Sakawng,(Tuikhiangzaangah Mawtaw Khawlmun om hi.) 119 milestone Mualkawi, 126 milestone Nakzaang leei, 135 Milestone Tonzang, 147 milestone Tualmu Buzung, 150 Milestone Beltang Leei, 155 Milestone Tualzang Buhlo Buzung, 161 Milestone Teeklui Lamka, Laaitang pen Tuitum Saddle ci in na ciamteh uhhi.

161 Milestone pan in Tedim Road in No. 1 High School ah pai phei hi. Tu aa kimawlna innpi mun teng ah mualbo (Pi 30 val bang asang ding numei te nawibawk bang mualbo) 2 om in, Tedim Road in tua mualbo khat ii nisuahna lam pai phei in, tu aa Kam Hau tualpi nisuahna lam nawl zuiphei hi, (1973 or 74 kum Kam Hau tualpi kiziikmaa ciangciang, Kam Hau tualpi teng munzaang pian hi-aa, Tedim Road ii anawl ah Theikung a’ kisuan bang in pi 10 kiim kihal in po phei dewdeu hi. Tua theikung te Japan galkap te’n Tedim Road lampi nawl aa, ek a’thaak naa pan aa po hi ki ci hi.) Tu aa Kam Hau Road ih cih dungzui in pai phei aa, tu aa Soldier Board zum nuai ah, suangtawh kiciang kumpi quarter khat omin tua quarter mai tawn phei hi. Tua pan zum kong nuai ah. Lawibual zaang (Lawibual Primary School) ciang: Tua bansiah teng Tedim - Kawlpi (Tiddim – Kale Road) ki ci thei ta hi. Lawibual phei teng pen tu aa lampi hilo in, anuai nidang innte kituahto maa, inntual lampi dung hizaw hi. (Ih mutheih ding Pu Kham Sial Khup taih-innpi tual hi.) Tua Lawibual zaang pan in, makeshift Zato mun, tu aa SDA te huang gei mualdang tengah lampi khat tokah hi.

Lawibual khua taw, han (Cemetery) paam teng Brigade head quarter hi aa, Lawibual zaang pan lampi khat Rev. Thang Khawm Pau sang inn mai ah, Pu Gin Thaul innpi leh Pu Kai Nang innpi kikal ah paisuk in Brigade Hq ciang tung hi. Lampi dang khat; Pu Dal Za Khup leh Rev. Neng Za Sawm te inn kikal ah paisuk in, Pu Khup Zam (Sawn thum leh hamsiat) kong tawnsuk aa, Brigade Hq ciang tung hi.

Circular Road ih cih pen, Tedim Road pan tu aa Haimual-Ciau paina lampi mengkhiana, Pu Dal Za Khup te kongmai, pan mah in meng khia aa, Pu Vung Khaw Mang inn mai, meiset nuai ah, zato nuai ah Vansangdim ah, palik leen nuai ah TKBC biakinn nung ah, Kyuaktai nawl (Nitumna lam nawl) ah, Kam Hau tualpi nitumna lam nawl ah pai phei in, atung aa ih gen mualbo nih te pang ah Tedim Road tawh ki mat hi. Imphal pan van pua convoy hong pai ciangin Jeep bekbek sawm nih sawn thum, za khat phialphial bangzong pha thei aa, van teng akhiatkhit uhteh kileh hei (Reverse) nawnlo in, paisuak suak aa, Circular Road ah kot in, Imphal lam kileh kik hi kici hi.

Tedim khuasung pai na’ding Pu Kai Za Dal (Siapi Gin Khaw Thang’ inn mai) te innmai pan lampi khat mengkhia suk aa, nidang Laito zum mai, Tedim sumbukpi teng mai ah, Palik leen lui nuai, Municipal zum mai, Pu Tual Khan Mang te inn mai ah, Vansangdim bual nuainung dek ah pai phei in, Tedim Road tawh Sakollam Tuiphum biakinn mai, Pu Hau Lian Thang te inn mai ah kimat kik hi.  

Hih Tedim Road tawn in, Lord Louis Mountbatten; The Allied Supreme Commander, South-East Asia in 11 February 1944 ni-in Thuamvum (Kennedy peak) ciang pai aa, Kalemyo gal-et (Galdot) hi.  Tua hun sungin Lawibual zaang ah, thugenna hun tomkhat neipak in, Khuasak hausapa Pu Lian Thawng minphatna Ahmudan gaung Tazeik ya Min (ATM = Burmese Good Service Medal) pia hi.

Tu laitak aa Tedim Road (Tiddim Road) min kivawh lampi pen Tiddim Road amaan hilo hi.Kei neulai; 1959-1962 Zomi Baptist Academy sang, tulaitak kangmeiphel (Fire Brigade Quarter) aa om, Zo Education Board (ZEB) sang inn luui aa kakah lai ciangciang tua lampi mawtaw pai theih naang’ (Motorable) dingin vang suak lo hi. RCM biak inn ciang mawtaw (Jeep) pai thei bek hi. Tua zom aa inn Pum Nang (Tuilang khuami, siiksek siam) inn kong ah jeep kihei thei lai; tua pan Pu Lam Zam (Meiset) innpan zato lui kiang tamah/BOC Pa Kham Ngaih Lian te inn ciang mihing sakol noptak kipai thei mawtaw pai theilo. Luikawi teng lampi neu mahmah. Lui gal lam pan, Pu Hang Cin (Thokap; Tamdeng/Akbutun khua) te inn pan Pu Gin Za Dal (Sang lai-atpi) kong, Pu Go Suan te kong ah, a tung aa ih gen Brigade Hq paina lampi pan aa ki ziikphei Jeep pai theina lampi om bek hi. Tu aa Tedim Road ki cii; Lawibual zaang pan a kipan, Pu Tun Za Kam (Sitni), Pu Thual Khan Suan (Thual Neu) te inn mai a pai phei lampi, Myoma veeng Pu Mang Lian Suum te kongtung aa suakphei lampi pen Tiddim Road hilo hi.

Ataktak in, ke’n a mantakpi kong cih in ah, tulaitak aa Kam Hau Road ih cihcih pen tuma kum 75 lai (World War II, Japan gal) aa kizik Tiddim Road ci aa Mangkaang Kumpi in min a’phuak lampi pen ahi hi. Myanma Socialist Lanzin Party hun, Pyitu Council hun ciang, tumaa kum 40 kiim pawl aa min kilaih in Kam Hau Road kici ahi zawhi. Tua ahih ciangin tu aa Kam Hau Road ih cihkhialh pen, a min man or adik Tedim Road or Tiddim Road ci kik ni in, tu aa Tedim Road ci aa ih vawh mawkmawk pen Kam Hau Road ih ci kik ding kilawm or manzaw hi. Bang hang hiam nacih uh leh Innpipa Pu Kam Hau, Pu Khaw Cin te Galkap tualpi khang leicial mun teng ateng ahihi. Tiddim Road nawkkhakna, Lamka khuasung, Sing-at khuasung, Cikha khuasung, Tonzang khuasung, Tedim khuasung teng ah tua Tiddim Road, min dang vawh selo in Tedim Road or Tiddim Road mah ihcih pah tiltel ding mihing lungsim hizaw hi. A min maanlo ih vawh khialhkhak khempeuh khelkik ni. 


Cikha, Tonzang Tedim Myone GA, Myone Municipal leh Hausa teng tavuan ahihi.



Figure 1. Hih man kizaih na munpen tulaitak aa Kam Hau Tualpi nawl, Pa Kim Za Tun (Tunta) inn mai, Tiddm Road pan hikha ding hi. Galkap Tualpi sak aa Beleng kung, Mawngkung, thong inn lui, nupi leen, Tedim khuapi sung leh sumbukpi pan aa paito Tiddim Road matto na lampi zong tawm kimu thei hi.

Figure 2. Tedim khua.  Tulaitak aa, Hla Wa Ka zum pan aa et. 

V. Mipi Sep ding
1. Innkim innpaam dum sak ding.
2015 kum January kha in “Ihveeng Ihpaam Duum Sak Ni; Green Our Neighborhood.” Cih thulu tawh project document khat email pan in kong khahkhia hi. Tedim leh Tonzang khua te ah zong copy pawl khat keima kudaing in ka hawm khia lai hi. Tua Document sungah, ihteenna inntung sikkaang teng a duum (Green color) tawh zut ding, kumpi zuminn teng vandum (Blue color) tawh zut ding leh Biakna inn teng a saan, CMBC Biak inn tung color tawh zut ding. Tua hi leh ih Tedim khua  Saimual pan in ethoih etlawm mahmah ding hi.

Ih innkiim ih innpaam leh ih huansung tengah pakkung namtuamtuam, a paknei singkung hoih nono te leh a dum tawntung (Ever green) singkung te ih suan ding hi.

Khantohna hong manlang mahmah aa, tu in ih Tedim khua vantung pan in drone camera tawh hong kizaih ciangin , inn sikkang ahoih leh a hoihlo teltak in ihmu thei pah hi. Tua ahih ciangin ih inntung sikkang teng hih a tung aa, ih cih bangin zut hi leng bangzah et lawm ding hiam!

2. Innnung innmai hawklam hoihtak bawl ding
Tua ban ah 2015 kum tukpi aa Khalkha khua in a’tuah, inncim, locim te ih thuak khak loh nadingin, inn nung innmai, lampi dungah hawklam (Drain) hoihtak ihbawl ding thupi mahmah ding hi.

3. Nin thaangpaih lo ding.
Veeng kim-in, ih anbuk nin, vantunna nin te, plastic nengneng cih bang ninteng peuhmah munphual khat khol in, sa nit ta ciah (Systematically) tak in pai ding hi. Khua sung siantho na in cidam na hi.  

Myone Municipal, Hausa teng leh Biakna Pawlpi sia teng,  Sangsia teng, Taangpi taangta tengin tavuan la ding.


Khupkhan Thang Taithul
Norman, OK
U.S.A.

Source :
from:Khup Thangkhupkhanthang@yahoo.com
reply-to:Khup Thang <khupkhanthang@yahoo.com>
to:"Cinpu Zomi (www.laibusaal.com)" <cinpuzomi@gmail.com>,
date:Sun, Jan 8, 2017 at 10:53 PM
subject:2017 kum Zomi te maasuan
mailed-by:yahoo.com

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: 2017 kum Zomi te maasuan. Agelh ~ Khupkhan Thang Description: Rating: 5 Reviewed By: Cinpu Zomi
Scroll to Top