728x90 AdSpace

Hot
Menu
Zon-ol na Donate

Latest News

GAWNGMUAL KHUA TANGTHU. Agelh ~ Khup Khat Mung @ Mungtawng

GAWNGMUAL KHUA TANGTHU
Agelh ~ Khup Khat Mung @ Mungtawng


Khua khat peuhpeuh akisat ciangin khua min ki mawk phuahlo hi. Atenna, amun, a omdan singkung lopa pozia tawh kizui in khua min kiphuak hi. Gawngmual khuapen atungin Gangte nateng masa uh hi. Tulai tak a, aki tenna mual ah Tawsaw kungtampitak napo hi. Gangte in Tawsawpen (Gang)na ci uh hi. Khuasat cilte in Tawsaw mual a cih nopna in "Gangmual" naci uh hi. A sawtvei ciangin Gawngmual khua hong suak hi.

Gawngmual khua pen tangkhua mahmah khat ahi hi. AD 1700 kim pawl in Guite man'laitak in, Gangte inn (150) kim bangna pha ngei kici hi. Tulai tak a, Minzang akicihna munah nateng ngeiuh hi. Khawhsa kham mahmah in Mimza tangza ai den uh hi. Tawlpi khat khit ciangin galvai savai haksatna tuam tuam hangin saklam India gamah na lal to mang uh hi.

AD 1800 kimpawlin Dimlo panin Pu Pum On makai in Gawngmualkhua ah na tengngei uh hi. Tawlkhat aten khit uh ciangin munnuam zaw nazong uha, Meitei gungal Anlangh Khua satin Gawngmual khua na nusia uh hi. Hun khat lai-in khuathupi mahmah ahih hangin Gangte leh Pu Pum On te in na taisan uh ahih man in khua lui khua gamdai hong suak hi.


AD1850 kum pawlin Dimlo khuapan Pu Sel On (Naulak) in galvai, savai haksatna tawh Tedim khua ah Pu Kam Hau na bel hi. Pu Kam Hau in zong inngua leh gamgua hong khen kei ning ci in na it bawl mahmah hi. Hamphatna tampi pia-in muan leh suan sawltak in nanei hi. Pu Sel On pen mici tak mi thuman leh mi hangsan mahmah khat ahih manin Pu Kam Hau in na pakta a, Tedim khua acing akem dingin thu neihna na pia hi Tedim pan in Gawngmual khua ah galvil dingin (Kawn cing dingin) ni simin paisuk den hi. A sawt ciangin "Ka kileh leh sangin bukno khatlam in tengsuak mai ning" ci in,

AD 1870 kum pawlin tui omna tulaitak a khua mun a kicihna munah khua hong sat hi. Kumtamsim mah hongteng khit uh ciang, galvai, savaihak satna tawh gal natai uh hi. Muizawl khua mun laizangah kum 7 bang mah nateng ngei uh hi. Galvai aven ciangin hong ciah kik uh a, khua munlui ah tawmvei hong teng in asawtlo in tulaitak a akitenna (Gangpi mual) lamah hong teng kik uh hi.

Pu Kam Hau in 1885 kum in khua kip khat in hong ciapteh sak hi. Gawngmual khua sat Pu Sel On in tapa (7) nei hi.

Atapa te in
1.Pu Thual Zel,
2. Pu On Tun,
3. Pu Zo Thang,
4. Pu Tawng Khai,
5. Pu Mual Kham,
6. Pu Khup Thang,
7. Pu Thang Zen te nahi uh hi.

Pu Thang Zen pen Muizawl pan ongciah nawnlo in Tuicinlui ah khua vasat hi. Tu ni dongin Tuicinlui khua (Naulak beh) teng Pu Thang Zen suan leh khakte na hi uh hi. Gawngmual khua Pu Sel On tapa(6) teng i suan leh khak te bek thamlo-in Ngennung khuapan Pu Khen Lam (Naulak)te hongtengin ama suanleh khakte zong Naulak behte mah ahi hi. Lamzang pan hong tengphei Pu Luan Cin, Pu Phung Gin te ii suan te (Tonsing)beh te nahi uh hi. Tua khit ciangin Lamzang mahpan Pu Vial Khaw Lian, atapa Pu Dam Za Kai, Pu Thang Go leh Pu Kham Za Cin te hong tengin amau suanleh khakte (Bawmkhai) behte na hi uh hi.

Pu Cin Khaw Thang leh Pu Pum Za Neng te zong Lamzang pan hong teng phei-in amau suanleh khakte (Phual beh)te nahi uhhi. Pu Langh Khen Thang zong Sawbuayisen pan hong teng ahih manin ama suanlel khak te (Songput)Beh te nahi uh hi. Behnam (5) om hi. Tuate in Naulak,Tonsing,Bawmkhai,Phual leh Songpuut beh te ahi uh hi. Gawngkhua leh Tedim khuapi tai 1.5 ki gamla hi. Nisuah na lamah Tedim khuapi, nitumna lamah Meitei gun, leilu lamah Lailo khua leh leitaw lamah Lamzang khua om hi. Tuipi maitangpan asanna pi 4624 sang hi. Lamzang lam Bama pan paisuk Akkha lui ah paisuaksuk Meitei gun dong, Leilum khuataw Puantawn lui dung paisuak Zalui dongah, gamgi pai hi.

Mualkai Lampen Piantit (France)gampaite hangin a ki ngah letsong leitang mun ahi hi. Mualtuk pan paisuk Takzanglui pai suaksuk in Teklui tawh gamgi pai a, Zalui dong hi suak hi. Nisuahna lamah Valvum leh Ngennung tawh ki gamgi hi. Ni tum a lampan Meiteigun in Muizawlgam tawh hong khen hi. Leilu lam Lailo tawh gamgi pen Meitei gun pan ah paito Mualtuk dong, tanggamgi pai aa, tulaitak in Meitei gun pan Mauzang lui dung zui to suak-in Mualtuk dongah gamgi ki khen hi.Gawngmual gam minte Khuagal, Vumpi, Akkha, Sihpi Dainuai, Vangtam, Lee, Ngamualzang, Eng-am zang, Nahtang mual, Nahtang sih, Le mualvum, Haisan, Mualhiam, Gunpang zang, Dolzang, Lopi, Minzang, Suangkuak, Leilui, Mauzang Suanglak, Gawnglo, Muallo, Dampi, Tuinek, Mulpi, Khuamun, Suangsia, Bekbu, Mawnglui, Zamphumna, Dawithoihna mual,Belseek, Kawlhailam, Songgizang, suaklukhum, Mualkai.Zalui Aigia zang, Takzang te ahi hi.


Gawngmual Khuapan Piantit (France)pai te
1. Pu Thual Khaw Vial (Tonsing)
2. Pu Zel Vung (Naulak)
3. Pu Thang Khaw Zen (Bawmkhai)
4. Pu Tun Za En (Naulak)
5. Pu On Za Kham (Naulak)
 6. Pu Suit En (Naulak)

Theih Huai
1. Lawki bei kum 1995
2. Christian (Tapidaw) hongtun kum 1904
3. Tapi daw hongtun zawh kum (100) cing khin (2004)
4. PAU leh HAM ZATNA .....
Hun khat lai-in i pau i hamte kibang theikha ding hita mah leh i tenna, munleh mual in hong hal ciangin i pauzia i kammal zatzia, a aw kaih dante hong ki dang thei hi. Tua mah bangin Gawngmual khua pauleh ham zong hong kikheel to hi. Khuasat Pu Sel On(Naulak) pen Pu Kam Hau ukna nuai ah na khangkhia hi. Tedim khua tawh zong kizopna, kikawmna nei tawntung hi. Tua bek thamlo-in Lamzang pan Pu Tonsingte, Pu Phualte leh Pu Bawmkhai te hong tenphei ciangin pau aki gawm ngeingai khat hong piangkhia hi. Tua bang pau zat kawm kal ah, 1910 kum teh Rev. Herberb Cope Tedim hong tung hi Zolai hong bawisak in Zolai kisin ziahziah hi. Pu Dam Khup in zong Cope topa tawh ki thuahin Zolai nasin hi. Pu Dam Khup in ama theih Zolai pen khuasung naupangte kaikhawmin na sinsak in na hilh hi. Naupangte bek thamlo-in nupi papite in zong kisin in atam zaw in Zolai simthei atthei uh hi. Hih i lai hangin i pau tampi mah hong khel toto hi. Tedim tawh lah kinai-in khuakhat tuikhat bangin ki om ahih manin Tedim sungah aki Zang Pau (Common Language) pen in hong huzap zo hi. Tua hi a, i kim i pam in zong hong lawh zo in i lai hang mahmah in zong i pau hong kip to tektek hi.Tu lai tak a kizang T-Tedim pau ei ma pau tawh aki nai penpen hongsuak hi. Hi bang hi kei leh khuasatpa Pu Sel On pen Dimlo pan a lal ahih man in Dimpau aki ding a hi hi. I lai-in i pau zong hong khelsak in, i biakna na ngawn hong khel zo sak hi. Khantohna abulpi in i lai hang mah hi aa, i lai-in Pasian thu hong theisak in tua Pasian hong dom toh na ahi hi.

Gawngmual Khua-ah Christian(Tapidaw) hong tun ma in pupa Biakna ahi, Khuazing biakna tawh nalut uh ahih manin, Tonleh han, gal-aih saaihte nahan ciam mah mah uh hi. "Kha" thu mah ngaibsutna in "Ngaih tawh laukha hualna ding"lai thupi ngaihsut mahmah uh hi. Tua laitak in Pasian khuavak in ni bangin Zogam ah hong tang silsial hi. 1904 kum ciangin Rev. A. E. Carson topa Tedim hong tung hi. Rev. A. E. Carson leh Dr. East te Tonzang khua ah Pasian thu gen dingin pai uh hi. Pu Dam Khup leh Pu Neng Thawng te unau zong sangmangte van pua dingin na ki cial a, amau zong lungkimtak mah in na zui pah uh hi. Sangmangte in lampi ah apai kawmkawm un Pasian thu genpih uh a, amaute unau in zong na sangthei pah uh hi. Rev. A.E.Carson topa in Tonzang khua kongpi lui ah May 1904 kum in Pu Dam Khup leh Pu Neng Thawng na tuiphum hi.Tua aki pan in Tapidaw na suak in Jesu nungzul dingin na khensat uh a, Zo ngeina tawh kisai tonleh han, gal-aih sa aih,zuunek sanekte na khawl uh hi. Nipi ni na semalo in na tawlnga uh hi. Haksatna tampi thuakin zahkona, simmawhna na thuak uh hi. Tangval hi lai uh ahih manin pawlpi ki ciantak in na ding zolo uh hi. Ahih hang in 1909 kumteh Pu Dam Khup leh Pi Awi Ning hong ki teng hi. A mau nupa hong suah ciangin hangsantak in hong ding kik uh a, 1910 kum in Tuiphum Pawlpi hong phut uh Tua bangin Pawipi sungah ki ciantakin hong om uh ciang in, amaute veina khitui malte hangin Pawlpi hong khang zel hi.Pu On Khaw Khai, Pu Phut Khual, Pu Man Thang, Pu Thual Vungh leh Pu Luan Khaat te in sangthei ahih manin tapidaw masa te hong hi uh hi. Khang masate' khitui mal hangin tuni ciangin thu un mi kipung mahmah a, Pawlpi (8) bang Gawngmual khua ah om hi.


Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: GAWNGMUAL KHUA TANGTHU. Agelh ~ Khup Khat Mung @ Mungtawng Description: Rating: 5 Reviewed By: Cinpu Zomi
Scroll to Top