728x90 AdSpace

Hot
Menu
Zon-ol na Donate

Latest News

GUALNAM BEH KI PAWLNA, ZANGKONG. By ~ Pu Pau Za Mung

GUALNAM BEH  KI PAWLNA, ZANGKONG.
Silver jubilee
By ~ Pu Pau Za Mung

Photo : Gualnam Unau Khawmpi Zangkong.

Tuni a Gualnam Donghhuu  Silver Jubilee  ahong  zoo mimal ciat, kong SHALOM masa hi.  Beh leh phung vai lungsim banga ki kuumman nailo pi aa sihna in ahong khen, Zangkong Gualnam Donghhuu aa maikai ngeite leh pawlmite tuhun tulaitakin ih vekpi in,  a ciipsanh   zahtaakna(  Crimson Salute- Salaam ) ih pia hi.

Ko, hong pai nuam mahmah hi napi unghin,  thu tuamtuam hangin ka hong paithei kei uh hi. Ka pumpi  uh note tawh ahong  omkhop theihkei hangin, ka lungsim uh no tawh hong omkhawm gige ahih lamtak zong nana telloh khak ding uh ka lung uh ahi mawh hi.

Thupatna
Leitungah, mihing leh gamnhingte nuntakna zia tawh kisai pilna thuuk anei (socio-biologist) te in,  “ human being is social animal,” nana ci hi. Ei mihingte in, khatguakaa atangh omnamte ih hikei a,  a hon-a a om, aki khawlkhawm thei namte  ih hi hi.  Tua bek hikei, eite in pausiat hikei, sithei, nathei,  dahthei leh a nuamthei namte ih hi leuleu hi.  Si in na in dah lehang, pawl aki samhbek hikhang, nuam lehang zong pawlmah aki sam vevete ihhi hi.  Mihing  kician khat ih hihleh, pawllo tawhin aki khuasa thei, aki khuasa zokei ding hi.

A iiplahhuai Zo ngeina.
Ei Zomite in  ngeina hawih ngeina pha kiptaka a neisa minamte ih hi hi. A dangdangte genin neinai vetkei phot dih ning’,  a diakdiak in, khat leh khat ki khualna leh ki vaanna, ki huaina  leh ki uapna te( Social Welfare ) ah,  hici zaw leh cihna ding a omlo dingzah dongin, ih sanggam ih u ih nau,  ih beh ih phung tawh kicing  dilldell-a  vakhna(pansan) aki seh diimmdiammte ih hi hi. Tua ahih manin, Zomi Ngeina in leitungah a sang belbel pawl hiding in ka um hi.


Hunkhat lai-in, ka nuphalpa Bohmu Khup Cin Pau(Rtd) tawh ka holimhna khat uh ah, "Nang, US ah, kum tampitak sang vakah cin-a,  amau phatnate amu athei bek leh a ciambek hilo, ava nuntakpih ngeisa khatin, tulai hun-a apau  leh agen khempeuhin gam dang, gamdang aki cihtek laitak in, banghangin nang! gamdangah pai in ten ding genin neingei peuhmahlo na hi hiam?”,  ci’n ka dot leh;

“ Ih Zongeina ah, ih sanggam ih u ih naute teng tawh, kikawwm kihawh diamdiamaa, zu peuh ki kholh liaiiliaii in, sunsiah peuh  bawlkhawm liingliingaa,  khat leh khat kihuh, kivaan kihuai ki komh a ih ki uap liingliing mahmah hi, ka khiatlah. Gamdang ih cihin, ei neihloh amau aneih uh a omtei hangin, ei neih zong amau ana neihloh uh a na omthei  leuleu hi. Ka sangkah laiin,  ka khan sunguh ah sangnaupang 20- ding khawng  ka om uh hi. Nikhat ka tanpihte khat, motor car accident in hong si hi. Ke’n, eilam khawngaa bangin ka lawwmpa uh  aki uapna  in, ciktak teh sang ki khakin,  ciktak teh ki gui in, a sangbuppi un uapin, paakkual apia in kava gaal ngeiingaii taa-um! ka cih leh, tuabang dan ding om peuhmah lo bek thamlo, a lawmpa uh sihsan  pen, ” too bad- phakei mah si e,” cihciang tawh aman sak ziau lel uh hi,”  ci hi.

Phuatlloh aa a phamawh.
Hih zahta aa a iiplah huai leh aki khiatlah liang ding zahdonga ih ngeina hawih ih cihin, ih khuasunga ding ahawih leh aki cing mahmah thu ahih hangin,  ih sanggam ih u ih naute tawh ih omkhawm lohna, mundang gamdang ah ih om ciangin tuate ahong ki zangthei nawnkei hi. Tuabang dan leh zia, ngeina anei ei Zomite in, mundang gamdang ih tun ciangin, tuabang danmah  tawh aki bang,  khat leh khat  ki khual, ki uap kihuai leh ki vaanna ding ki pawlna  ih neihloh a phamawh  hi.    

Gualnam Donghhuu, Zangkong ki pawlna.
Gualnam Donghhuu in, cimhphawn man leh ommawh thu tawh  cihbanga  aki phuan ahi kei hi. Tuabek hikei,  midangte  tungah lang bawlna ding, too na ding, ki sialhna ding leh phinhna   dingaa aki phuan zong a hikei hi.  Aki taangsam kisa aa, phuatloh  phamawh, phuat kul  ahih manaa  aki phuan ahi hi.

Aki phuatna a hangin:-
(a).   1982- kumin,  Tedim, Sakollam a teeng, Gualnam Pu Zel Khua Thawng’ tapa, Sia Hang Mang’ naupa, Tg. Nang Khen Khup, University Student,  in cisa natna tawh hong nusia hi. Aman Pu ST Hau Go te a Guardian in ana kawih hangin, sihna manna aki tuak taktak ciangin,  abeh aphung tawh ahong ki kanteh, komau tawh ka ki pelhthei kei uh hi.  A inn pen,  Pu  Go te’ inn ki zang ahih hangin, a thu-a Innteekpi dingin,  ko baangkua mah  ahi hi.

(b).   1985 kum pawl,  RZBC ah Pawlpi upa in ka om laitak zingsangkhat, biakinn  mai ah ahong kikhawmte muakin ka omlaitak, Pasodaan’ pi, Pi Man Kaih Niangin, “ Suum Thang’ pa aw,  RGH ah no Gualnam behte cina suuk mahmah khat om hi, na thei nai hiam?,”  hong ci laizang hi.  Kei, biakna  Pawlpi ah makai ki taaklah mahmah aki sa khat hi napi inghin, Pawlpi min tawh hong ki kolo, beh min tawh ahong kikoh ciangin, Biakna Pawlpi in  Zomite’  Social Welfare ahuam zawhloh lamtak ka phawk pan hi.

Kei zong, ka delhtoh vingveng pah leh,  Tuithang Gualnamte, sumbawl Pa Piang Kam nana hi hi. Khua na phawk nawnlo in, aki hopih thei nawnkei hi. Akem ding omlo ahih manin,  aki samhpak ding ahi, Nursing attendant khat,  thawlpi khai sak ding leh a  puansilk teng ka laihsak  pah hi. Ahi zong in a nitak  8pm pawl dingin hong bei thong hi. Kuamah kuppih ding dang omlo ahih manin, keiman dai atanh ciang dongmah  aki samteng ka hih hi.

(c  ).   1986-kumin,  Pu Dongh Khup(Zungte) cina gim mahmah  Insein zato ah lum cih  ka zak ciangin, ka va delhpah uh leh, khua na phawk nawnlo hi. Siavuante’n zong na donnawn vetlo in,  lupna awngthong  khatah na ki kawihthong lel hi. Siavuante kiangah gensakin,  aki samhpak ding, Nursing attendant khat, a puansilhteng ka laihsak leh zatui zaha tawhte ka vaihawmsak pah leh, khua hong phawkkik hi. Tua ciangin, “ Sia Khup aw, genmawhlo in deihloh bel khattuak lehang,  kua pawlpi tawh kizom cin-a, sanggam u leh nau meltheih kuabang nei ih hi hiam?,” ci’n ka dot leh, RZBC  ah amin pia ahihna;  Samte Beh ahihna;  a pano Pum Za Neng in, Kawlpi, Leipi Pawlpi ah upa ahihna;  hong gen hi. Tuazawh a sauveilo in hong beithong  hi.

Tua laitakin, kei RZBC ah Pawlpi upa ka hihmanin,  Sia Dongh Khup’ thu Pawlpi upa meeting ah ka sunh leh,  Pawlpi sazian sungah amin aki  heltei hangin,  Pawlpi mi a hihna renew nawnlo ahih manin,  Pawlpi in tavuan la zolo ding ahihna  tawh thu ki khensat hi. Tua ahih leh ci’n, keima ai-pengin  athem aneng dongtak in tavuan  ka la a, daai ka tangsak  hi. 

(d).   1986- kum mahin,  Gualnam Behte khat, RGH ah  zato lum in suuk mahmah ci’n  zong kiko  leuleu hi. Kei zong ka delhpah leh,  akiim apaam ah kuamah ana om kilkel kei hi. Akhua lui Tuitawh, Tonsimh lama alal, tuatak panin Phaai, Kawlpi ah ahong lalsuk kikte, Pu Sian Za Nang aki ci khat ana hi hi. Amah  sinh cancer hi’n,  khua na phawk nawnlo in, aki hopih thei nawn vetkei a,  ka tunzawh a sawtlo in hong bei hi. Amah pen, Laipian biakna hi’n,  a pawlpite lah tha zawngkhal mahmah uh ahih manin, agui na a hun zatna ciang ding bangbek tavuan a lazo uh hi. A inn ding bel, Pasondaan a Pu Thawng Do Thangte’ inn ki zang hi. Kuamah koh ding dang om tuanlo ahih manin, keiman daai a tanhzawh na ding dong takin athem aneng in tavuan ka la hi.

(e).   1987- kumin, Ganhing khawina a nasem, Laailo  Gualnam, Pu Thawng Khua Gin’ tapa Tg. Thang Lamh Mang,  Kandawgyi ah tuikia in hong si hi. Anu leh apa in khitui naptui tawh ahong pai uh ciangin,  ki tai theilo ahih manin, a kisam teng khempeuh tavuan la  in daai ka tangsak hi.

Hihbang  luhmuhzee( Socail Welfare) te  in, khatvei, nihvei,  thumvei, livei,  ngavei ciangdong tavuan lakna in, haksa ki salua in aki thasiaal aki hi peuhmah kei hi. Ahi zongin, a tawntunga dingin, tuabang dan tawh piangthei dingin aki  umkei hi. Tua ahih manin,  a tawntunga kivaan, kihuai, kikom, kihuh, ki khual na dinga Gualnam Donghhuu aki phuan ahi hi.

Tuabang in aki phuat na ah, anuai a bang  ngimnate kinei hi.
A dahte ki dahpih in, anuamte ki nuampih ding.  

A.   A dahte ki dahpihna  ding. Donghhuu ki hiphot dinga,
            (i). Sihna manna ah, daai atanh na ciang dong tavuan la ding.
            (ii). Natna satna a kipan, dammawhnate  ah ki veh, kihuh, ki-en, kivaan na ding.
            (iii ).Kolbulh khaukhih a tuakte  ki panpih in ki honkhiat na  ding.
(iv).Cimawh genhtheite ki panpih na ding.
(v). Pilna lamah ki va napi sangkah zolo te panpih in sangkah sak na ding.

B.   Donghhuu a picin khitzawhciangin,  a nuamte ki nuampihna ding.
            (i). A gualzote ki pahtawi in, tha kipia ding.
(ii).Pilna leh siamna,  hauhna leh liatna, hawihna leh phatna  dingte ah ki huhin, ki panpih ding.
(iii).Akip, akho leh a muanhuai ahi, Zomite kipawlna ii, a zung kician mahmah  khat  a hihna ding ki hanciam ding hi. 

C.  Gualnam Beh ki Pawlna.
Gualnam’ suan leh khakte mimal ciatin, Donghhuu ih lungsim bangin ih zawhkhit ciangin,  aki cithei a ih nopsak kimtek na ding hanciamna dingin, Gualnam  Beh ki  Pawlna aki phuanpan ding ahi hi.  


Donhhuu ki Pawlna meeting ah makaite gentheih tawntung thute in;      
(i).  “ Tuni in ah, ei khatguak bek nopsakna in, nopsakna kicing aki cithei nai palkei ding hi.Ih u ih nau sungah, ih beh ih phung sungah, ih minam sung ah ih nopsak kimtek ciangbekin, nopsakna kicing, ihki cithei panbek ding hi”. 
 (ii). Tuni’n, nangmah bek kici thei in haulua kisa in, Zangkung khua laaizang ah taikinn thaat 100- sungah na om laitakin, Gualnam’ tate khat a puuk sih leh; ahih kei leh si in, agui ding omlo in, ui si gan si bangin lamkiim lampaam ah ki paai leh; ahih kei leh, avaan ding omlo in, Siipeente ahih kei leh Zatote in gui kici leh, tuabang hihna in, na taikinn thaat 100- tung panin ahong kaikhia, ahong thal sawnkhia  tawh kibang ding hi.  ,”
(iii).Tun’n ah, ei a maikai tengin donghtuak hi lehang, eimau thu tawh ahih zo dingte ih hi hi.  Hihbangaa hamtanghpi a hanciamaa ih vaihawmna in, amau thu aa a khuasa zolo dingte; bangmah theihna a neihloh bek thamloh, hih ih vaihawm nate nangawn zong ahong nialnial aa ahong  phunsansate keek   ading ahi zaw hi,”
 (iv).“ Ki Pawlna phuatkhiat ciangbek in a haksa hi peuhmah kei veh aw! Ih tawntun ding bek hiveh aw, a ollo”.   

(d).    Ei Zomite a dingin, ki pawlna kho, ki pawlna hawih leh apha khat ih neih ding ih  ki samh mahmah hi. Tuabang ki pawlna ih neih theihna dingin,  thakhat thu  in ih Zomi buppi,  a lompi tawh ki pawlna aki tang bawl theikei ding hi.  Ih innkuan ih baangkua sungpan, ih u ih nau sungpan, ih beh ih phung ih khua ih tui sungpan, tua panin abanban adawlldawll in kiptak leh khotakin ki phuan masa in, tuateng  khem peuh ki    gawmtuahna,  Zomi ki pawlna  khat aki neithei pan ding ahi hi.

Tulai Zomi nam  it aki sa pawlkhatte in, Beh ki pawlna in, Zomi minam itna  kiamsak, Zomite ki pawl theihna ding  a khaktanh leh aki khenthang sak bangdan in a ngaihsun thei uh hi. Tuabang ngaihsutna in ngaihsut khialna( wrong concept ) hi in,  ih minam ki gawmtuah na ding  a khaktanh pi( great barrier ) khat ahi hi.  Ih minam ki gawmtuah theihna ding a khaktanh pi in,  tuabanga aval akan a  ngaihsut  khialna (extremism)  lian khat ahi  hi.

Mawsi in,  Israel mite tul zali a makaih lai in,  a lompi in uklo in,  tullom, zalom, sawmnga lom, sawmlom cihbang tawh adawl dawl in khenin a uk mahbangin, ei zong Zo mibup ki pawlna ih bawl nop leh, Ih innkuan sungpan, ih u ih nau sungpan, ih beh ih phung ih khua ih tui sungpan aban banin, kho takin, adawl  dawlin,  ki pawlna  ih nei masa ding hi. Tuate tungtawn in a tawpna ah, Zomi minam buppi ahuamin  ki pawlna hoih ki pawlna  pha ih nei theipan ding hi.

Aki uapte ih hihleh.
Tua hia, Gualnam Donghhuu in,  a tawntunga Donghhuu aki hih kinken khak ding  zong, lung hihmawh huai kasa hi. Tua bek hikei, ih sihzawh ciang  beka aki uap  bekte ih  hihkhak ding zongin alung himawh huai mahmah thu  ahi hi.  Ih nuntak laimah in kihuh, ki komh,  kihuai, kivaan ki uap in, ih ki khual diamdiam dingte ih hi hi. Sihzawh cianga ki uapna in, mihing nuntakna  ah, hih lohaa  apha mawh thu ahih man bek hi a,  a uanglua aa hihna in,  a site a dingin bang mah phattuam na a om nawnlo, a mawknapi,  a mawkna pi taktak ahi lel hi.

Sihzawh ciangaa aki uap pante ih hihlohna ding.
Khatvei khua lama thu piangkhat in; khuapihte khat  a cina in a suuk mahmah hi. Tua pa in, tha neilo, a tha bei ahi a, thawlpi ki khai leh a dam pahlel   ding  hi napi, a innkuan pihte in,  zawngin bangmah nei kong ci’n,  tholpi khai na ding aki samh K 5000  nangawn a vaihawm zokei uh hi. Tua cina pa, a sawtlo in a si hi. A sanggam a u anaute in,  a siluang ngei ah, vul liangin adah  aa a kapkap tawh, minsial in thau  a lawn lawn  tawh  hi mahmah lo uh hi. Tua bek hikei  lai,  tua a sipa’  thanken dingin, a innteek pan in tein 3-4 man ding sial talpi khat;  a sanggamte tengin mei meipum khattek tawh  agui uh hi. Hih bang gamtatna in, a pil vai kilkello,  a dahhuai mahmah nuntak na maan hetlo khat a hi hi.

1992- kum pawl, Kaaptel Gualnamte Zam Khen Thang’ zi, Nu Ciin Heh Niang  sungpai luatsuak in  Aungsankwin Zato ah alum hi. Thuvaanpipa Sia Nangta a vadelh dingin ki  paisak pah leh, suuk mahmah ahih  hangin thawlpi K1,600/- man kikhai leh, lam-etna  omthei lai ding  a hihna  hong zasak hi. Donghhuu upadi sungah,  tuabang a hihna ding ki hello in, sih zawh ciangin daaitan na ding ciang tavuan aki laksak ding ciang bek  aki nei pan ahi hi.  Sia Nangta kiangah,  daaitanh na ding ciang tawh a sih ding ih ngak sangin, ahong nuntakkik leh ei a kampha, a hong ki lamdan kei leh ei a kamsia,  upadi ih cihin  eimau bawlmah hilel hi, thawlpi na khai in, ci’n ka vaikhak hi.

Ih nuntaak laitak mah aa aki uapte ih hihna ding.
Col. Khen Za Mung( Rtd) in a lai-atna khat sungah;  “ Ka sihzawh ciangin hong ki itna ahong ki lahna, ahong  ki uapna in ka thankuang tung dimin  pakkual ahong ki piakliang  sangin, ka nuntak laitak in itna kammal khat ahong ki genziau na in,  kei a ding in manpha zawpek  pek hi,” nana ci hi. 

Kapi( ka nu’ nu) Pi Am Dimin kah( kap) siamaa a minthang mahmah khat ahi hi. Bang zahta in siam hiam cihleh; sihdelhna ah, nupi tengin siluang  umcihin puan ki  lukhuh in a  kahtek na uhah, ka pi akah ciangin, alawm dangte in a puannuai uh ah akah uh tawpliangin ka pi’ kah ngai simtek uh, ci’n ki gen hi. 

Ka pi zong a sanggampa, a u, Pa Pum Vungh cina suukmahmah,  asi ding aki khoi khoi laitak in, Pa Pum Vungin a sanggamnu,  ka pi’ kiangah,” Am Dim aw, ka sih zawh ciangin nong kahkah ding sangin, ka theihlai mah in hong kahzaw in,” ci’n ki kah sak, ci’n ki gen hi.

Hihbang, a tungaa kammalte  in,  hawihin pha-a,  ih nuntak pihtheih ding  thu maan thutak  kammal  vive  te ahi hi.

Mailam  Gualnam  Donghhuu ki pawlna ii  vaipuak.
Ih Pu Guallnam panaa ki pan, ih pu ih pate khang dongin, midangte nuai-ah a na omngei lote nana hi uh hi.  Tua ahih manin, ei’  hunciangin zong, ih pu ih pate’  khan mah ih zil  zawhna dingin,  eimau’  khang ii ih vaipuak  lianpi ahi hi. Tua ahih manin, tuni Gualnam ki Pawlna in ih sep ih bawl dingin, mimal kim aa ih nopsak theih na  ding  ih hanciam ding vaipuak tampi tak ihnei hi. Tuate  ihsep ihbawl kawmkawm  in,  aphaw phot aa ih hih masak belbel dingin, “ GUALNAM BEH TAANGTHU BU,” bawl ding ahi hi.  

Tuabang  taangthu  ih at ciangin,  Pu Gualnam pan aa ki pan tu ni ei hun ciang dong,  Gualnam  Behte ii a hihna teng khempeuh ahuamaa  ih bawl ding ahi hi.  Tua in bang tupna hiam cihleh, ih taangthu maan ih kepcing na ding;  tuabang taangthu  maante , ei nua aa ahong khangkik ding ih ta ih tuute  ih vaikhak  ding ahi hi. Tuabang aa a ki hihna  in, mi galbawlna; lang panna, midangte phinh kawikawi na ding hipeuh  mahlo,  eimau leh eimau ih ki dal ih ki huutna ( self- defending) ding ahi hi. Tuabang taangthu nei kei lehang, Galhangpa in aki dalna ding Lum( shield) a kenglopi  aa galsim dingaa akuan tawh ih ki bang ding hi.

Tuabang in hihkei lehang, ih tuu ih tate in ih taangthu nana theikei in, midang khat peuhin, “  hunkhat lai in no Gualnamte…,  tuaci…,  tuaci ngei uh teh…;”,  ci’n a hawihlo lam in nana ki ci le uh, bangmah genthei lo aa, midangte’ khaanuai  pan  mai neu  ciiuciauu  tawh daakto aa  ana  kamkaat lel dinguh in,  a deihhuai hetlo thu ahi hi.  Tuabangaa  hihna in, Gualnamte ii, akhang  akhangaa  ih top,  ih humhum ih  kep cintenh  ih   hihna teng a  siasak,  a phiatmai leh a buaksuah ih  bang  ding  hi.

Ih dinmun bangci ciangah.
Tu ni in, Gualnam Donghhuu aki phuatzawh kum 25- apha a hita hi.  Mihing khan tawh teh le hang,  pasal  kum 25- apha,  tangval thahat  leh akhan pha laitak, tua ahih kei leh, a khan paal mahmahte bang ahih leh, zi leh ta nih leh thum bang tawh a om lihliah zote bang ahi ding hi. Tua ahih leh, tuni in, Gualnam Donghhuu te din munin bangci ciang dinmunah ih om hiam? cih ih ki et dingin a thupi mahmah khat ahi hi. 

Kum 25- apha, a khanpha a,  zi leh tate tawh a om liihliah pa bang ih hi hiam?  Tua hilo a,  kum 1/2/3 alah nawi nelai,  tuciang dongmah nawine lailai dinmun  mah ah ih omlai hiam? Ki sittel tek dih ning.  Kum tampi tak pha zo napi in, nute nawi ne lai  biahbuahte bang ih batleh;  kum 25- bang phata aki hih hangin,  pauthei nailo a, aa aa aaa, paa paa paa a cilai;  ahih kei leh ama thu a anne tui dawnthei  nai lo, mi tha bekbek amuang leh asuang  lai ih hih leh, tua in mihing a hihna man  a omlo bang hi ding hi.

Hih ki Pawlna’ mailam vai dingte ah.
A tungaa makaite’n, “ Ki Pawlna phuatkhiat ciangbek in a haksa hi peuhmah kei veh aw! Ih tawntun ding bek hiveh aw, a ollo”,  acih mahbangun, hihbang ki pawlna aki phuatna in, na khempeuh ki ci’nna hi pahlo bek thamloh, ih tup ih ngimna te taang tungaa aki  cinna ding nasep ki patna ahi panbek ahi hi ”.

Tu laitakaa, leitung buppi’ etteh ahi, Singapore in 1965- kumin  Malaysiate khutnuai panin Suahtakna a ngahna dingin apan leh a makaipite lakah,  Mr. Lew Kuan Yew bang  hi masa lo zaw in,  Mr. David Marshall(Jew) , Mr. Jatyaranam(Indian) te ahi uh hi. Suahtakna a ngahzawh uh ciangin,  a tungaa makaite hong piding nawnlo in, Mr. Lew Kuan Yew leh a pawlte ahong diantak ciangin, Singapore in hihbang dinmun ciang  dong atung  ahi pan hi.

Mr. David Marshall in a taangthu  a atna sungah, “ Kei bel, nau suaksak  a siam Siamah( Nurse) bang ka hi lelaa, tua naungeek’  mailam ah bangci khantoh sak ding cih gelna leh sepna ah ka ki vakei hi,” nana ci hi.  Tua ahih mahbangin, hih Gualnam Donghhuu ki Pawlna in zong mailamah a khanliat,  a khanphataa  ahong paallutna dingin,  khangkikte mimal ciat ii vaipuak   ahih lamtak  aki telloh khak ding lung himawhin, hihlai mun panin,  ka hong taangko hi.  

Hih Donghhuu tawh kisai, ka thu gente ki cingthei salo ka hih manin, Donghhuu hihna teng la tawh anuai a bangin ka genin ah:-
1.         (a). Pianna sulbang,  zuikik hang ee, Gualnam ah lan, bang nga’ng ee.
(b). Mabang patna, ih  phungpi in,  Pu Gualnam ci’n, sial hang ee.
2.         (a). Melmak siingdang, hi khang ee, sungkhat suakte, hihang ee.
(b). Sungkhat suak lamh, puan khat zawngkhawm, laaizom ciintuai, hihang e. 
3.         (a). Pu Gualnam ni, bang a luntna, Saitui vangkhua, hici ee.
(b). Saitui vaangkhua, Gualnam khanna, Zogam kuamthuk, ah hi ee.
4.         (a). Ih pianna Zo, gam hi ee, pupa phaksap, siing’ gamzaangah, hei hang ee.
 (b). Ih heina ih heina, Sian lapsangna, vaimang munah,  hei hang ee.   
5.         (a). Gualnam vontawi, hamhbang huai nang, Gualnam Donghhuu, kipawm ee.
 (b). Gualnam Donghhuu, pawpzawh in e, Sil Jubilee,   hita ee.
6.         (a). Hong kitawi vuau, seino gual aw, lambang paak ning,  Jubilee,
 (b). Lambang paak ning, Sil- Jubilee, siamsil paak bang, tawi leng ee.  
7.         (a). Khang masa te’n, mabang apat, mimkhau bang zuun, zom leng ee.
 (b). Mimkhau bang zuun, maciang pangkhawm,  lailung khau-hual, khawm leng e.
8.         (a). Kitawi dih vuau, Gualnam vontawi, takkheh minlo, sial leng ee.
 (b). Minlo sialleng,  seino gual aw, Pu Gualnam khan, zilleng ee.
9.         (a). Pu Gualnam khan, zilna dingin, gualtung vabang, tuang leng ee.
 (b). Gualtung vabang,  tuanna in e,  pianna  pakbang, tawi hi ee. .
10.       (a). Diamdiam leng ee, Gualnam vontawi, tawikhat baanzaal, zilleng ee.
 (b). Tawikhat baanzal, zil ve niing e, khai khat pheiphung, zilleng ee.
11.       (a). Baanzal pheiphung, kop in zil khawm, diamdiam  hanlung, ciam leng ee.
 (b). Diamdiam hanlung, ciamna in e, Donhghuu kumsawt, guabang hinna, ding hi e
12.       (a). Kumsawt guabang,  hong hing dingaa,  lungtup paallun,  ding hi ee.
 (b). Lungtup paalbang, lunt na in ee,  khan nunnopna,  hita ee.



Laigelh Pu Pau Za Mung in Zomi eLibrary/Laibusaal ading in Phalna ahong piak ahi hi.

Source :
from:   pzmung          
to:        cinpuzomi@gmail.com
date:    Sat, Jan 7, 2017 at 10:56 PM
mailed-by:       singnet.com.sg

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: GUALNAM BEH KI PAWLNA, ZANGKONG. By ~ Pu Pau Za Mung Description: Rating: 5 Reviewed By: Cinpu Zomi
Scroll to Top