728x90 AdSpace

Hot
Menu
Zon-ol na Donate

Latest News

MEIGONG. Agelh ~ Rev. Job Thawngno

MEIGONG
Agelh ~ Rev. Job Thawngno


            “Meigong” i cih ciangin a pasal a site, a zi a site pen meigong  kici hi. Mei i cih ciangin numei pan a hong pai hi cih i theih hangin pasal meigongte zong pagong kici tuan thei khol loin meigong papi mah kici zel ahih manin meigong cih kammal in numei leh pasal mah huam khawm tuak hi. Hi thei hi leh numei meigongte pen meigong  kici hen la, pasal meigongte pen pagong kici thei hi leh hoih mahmah ding hi. Tua hi le hi zak phet in numei meigong leh pasal meigong cih kitel pah lian ding hi.

Lai Siangtho sungah meigong cih kammal pen 84 vei om a, meigong leh tagah cih kammal kigawm khawm pen 15 vei na om hi. Hih meigong leh tagah cih kammal a kilawh a kigen simsim in Pasian ompihna, thupha piakna, Pasian kepna, meigong tagah ta ding lam-etna, thuhkikna … cih lamsang vive hi-in a lungdam huai mahmah lamin kigen den hi. Simmawhna pampaihna leh bawlkhinna lamsang om hetlo hi.
           
Leitungah pasal sangin numei tam zaw hi. Pawlpi kimah zong pasal sangin numei mah tam zaw den hi. Bang hangin hi bangin numei tam zaw hia i cih leh a nuai a teng hang ahihi.


(a) Nute sungpan a piang nausuak limlim pen numei tam zaw den hi. Pawlpi kim i  nipi nauapna sungah pasalno sangin numeino mah tam zaw tawntung hi. A piang limlim pen numei tam zaw cihna hi.

(b) A tam mahmah leitung galkap nasemte lak-ah numei pawl khat a om tei hangin pasal a tam zaw thamtham hia a, nisim gal ki kapna sungah a tultul a thenthen in ki si ziahziahte lakah pasal bekbek mah a si den ahih manin pasal tawm semsem in meigong kibeh lap ziahziah den hi.

(c) Numeite in khasim simin a nuai lam pan un a sisan uh khek den uh a hih manin pasalte sang in cidam zaw khansau zaw tham uh hi. Tua manin galsung sa sung ahilo mi nautangte sungpan a site lak-ah numeite sangin pasalte tam zaw den hi. Tua manin meigong a tam in tam a nisimin a kibehlap den keei ahihi.
           
Tua manin leitungah numei tam zaw a, pasal meigong sangin numei meigong mah tam zaw hi. Ni tawp ni ciangin vantung gamah pasal sangin numei mah tam zaw lai ding hi.
           
A lamdang mahmah thu khat ah Lai Siangtho sungah meigong numei tangthu tampi tak ki-at hi napi meigong pasal thu om mello mawk hi. Bang hang hi ding hiam cih ka lungngaih ciangin pasalte meigong suak zolo uh hi cih ka mu hi. Kawlte in a paunak khat vuah “Numei in a sih tawp dong nik deih a, pasal in a sih tawp dong zi deih hi”  na ci uh hi. Zomite paunak khat ah “pasal in a zi sih nitakin zi zong hi” na ci hi. Tua bang mah in papi khat a zi si leh ta tampi nei-in teek mahmah ta se leh a tate kem a, a meigong pih suak zo ding hamsa mahmah mawk hi. Nupite in tano khat bek ngakin meigon’ pih suak zo uh a, papite in ta likim a neih hangun meigon pih suak zo hetlo uh hi. Tua manin khangluite in “numei khat in innsuang zo, pasal khat in innsuang zolo”  na ci uh hi.
           
Papite teek mahmah in samkaang keei ta leh a zi sih pan kipanin hong kipuah pian hong kitangvalsak pian pah mawk mah uh hi. Kum tam ta le hut lailai, deih lailai, uuk lailai mawk uh hi. Khatvei lai-in puteek kum 100 a cing kuan ding khat meigong hi. Tute tate aw ka lukham taaksing pum ahih manin siktulhkilh tawh kilhcipsak uh hi. Tua ciangin ka khuadam lua mahmah veh aw hong ci kik leuleu hi. A tute in puanza puanbupi thuap gawp uh hi. Tua ciangin ka khel nang ding om kei veh ci leuleu ahih manin pamsik bawlsak uh hi. Tua ciangin puteekpa in puanlum kei veh aw, mi lum bek veh hong ci tanghial mawk hi. Paulap tuamtuam zongin a gengen hangun a khiatna taktak pen “zi deih ingh”  zi hong zon sak un a ci uh ahihi. Tua manin Kawlte paunak bangin a sih tawp dongun pasal in zi deih takpi mah ahihi.
           
Lai Siangtho sungah David kumpipa teek mahmah a, a khualum thei nawn lo hi. Ama adingin Sussas khuasungah nungak kizon’ sak a, a kimuh ciang in kilum khawmsak hi. Tua ciangin David kumpipa a khualum hi. Ahi zongin hih zo nawn lo hi, kici tanghial hi. Tanglai kumpite leh tulai ei khang hun a puteekte a kilamdenna om loin a meigong suak zolo mah ahi uh hi. Tua manin Lai Siangtho sungah pasal meigong a om khol hetlohna pen meigong suak zolo zi nei kik nuam hamtang a hihna hang uh ahihi.

Source :

MEIGONGTE'N PASAL MU TA! TAGAHTE'N PA NEI TA!! (Laibu).
Rev. Job Thawngno
Literature Ministry
151/16 Van Daitui
Tahan, Kalaymyo.


Laigelh leh Laibu bawl Siapi I Phalna tawh Zomi eLibrary/Laibusaal in aki tei/type kik ahi hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: MEIGONG. Agelh ~ Rev. Job Thawngno Description: Rating: 5 Reviewed By: Cinpu Zomi
Scroll to Top