728x90 AdSpace

Hot
Menu
Zon-ol na Donate

Latest News

Min Tawh Kisai Ki deihsaknate. Agelh ~ Siapi Kung Za Mung

Min Tawh Kisai Ki deihsaknate.
Agelh ~ Siapi Kung Za Mung


1. Min Gelh Dan
            Min in khiatna nei sinsen ahihmanin ut bangin kimawk gelh thei lo hi. Zomin hi a, Zokam tawh khiatna nei hi. Na pu gual tungtuang ahihmanin na min “Za Khai” hong kiphuak ci ni. Tua pen nangma thu tawh “Ya Khine” ci mawk lecin Zolai ah “Ya Khine” a khiatna om vetlo hi. Na pu in mi zatam lakah a kikhai tuamna hong phuah hi. Zomin peuh mah Zolai malgawm tawh gelh ding ahi hi.
           
Kei bang ka min “Mung” pen khuam, a phungpi cihna dan hi a, ka pu mi tampite makaipa a hihna hong lak hi. “Mung” pen Mangkang ten asim teh ei pau “Mung” piandan in a aw ging hi ci’n pawlkhat in “Moong” in gelh hi. Zolai Zopau ah “Moong” a khiatna om lo hi. Pawlkhat in daktal gindan ci bek mawk hi, Moong in gelh mawk leng kapu’ deihna tawh kigamla lua ding hi. Mangkangte sim theih dingin Zomin a kiphuak hilo a, Zomi pianzia tawh khiatna nei in Zomin kiphuak hi zaw hi. Minam dangte zenzen in asim theih bangbang un asim ding uh hi lel hi.

Tua mah bangin “Chin” leh “Cin” vai kikum ni. Roman alphabet zangin Cope topa in Zolai hong bawlsak hi a, Tedim, Falam, Hakha teng i laimal gawmzia kibang hi. Mizote gelhdan tawm khat tuam pian hi. Amau ‘Cing’ gelh leh ‘Ching’ in gelh uh a, ‘Cing’ aw suah hi. Eite’n ‘Ch’ aw i suah sakte pen mizo te’n ‘Chh’ in gelh hu hi. Kawlte in Zomi hong lawhna  aw asuah nadingin Mizo gelh dan ‘Chhin’ zat kul hi. ‘Chin’ pen amau aw suah ah ‘Cin’ hi pan hi. ‘Cin’ pen Mangkangte in asim teh ‘Sin’ aw suak ci uh hi. Zomi buai-a buai lo, Mangkang buai-a i buai den keei i khialhna ahih lam kitel leng hoih ding hi. Zo min ah ‘Cin’ pen kicingsak cihna hi a, ngaih peuhmah hi. ‘Chin’ in khiatna nei lo hi. Mangpau ah ‘Chin’ pen ‘Kha’ cihna hi. Hih ‘Chin’ minn gelhdan pen Zomi nautang lakah kizang lo a, pil dinga kilawm pipiten a hong haizat pen dah huai hi.


2. Min Lawh Dan
            Zomin pen namdangten lawh haksa sa uh hi. Ahi ding mah hi. Ei zong mi namdang minte lawh hak is a hi. Zomite lawh theih ding ci-in mi namdang kuamah in amin gelhdan uh khel se lo uh hi. Kawlmi U Thant in UN General Secretary a ngah ciangin Mangkang min phuak se lo a, leitung minam kim in a lawh theihtheih in lo keei uh hi. Zomite zong UN ah GS khawng hi dingin, Zomin pen minam khempeuh in hong lawh theih dandan a hong lo ding hizaw hi. I min gelh dan khawng khel vaivai zawsop ding hi lo hi. Pawlkhat ten i min lawh hak kisa ci-in Kawlmin, Mangmin, Kalamin phuak ziau uh hi. Minam itna veina dan them zong omlo hi. Kawlmin na phuah hang Kawlte in na min pen ‘Chin+na Kawlmin’ in hong lo veve ding hi.



3. Min Phuah Dan Man Lote
            Thu kimusak Zomi pawlkhat ten a zi’ min, a tate’ min te ah ama min guang dih zen hi. Hih pen Zomi ngeina hi lo hi. Mipil kici napi Zo ngeina lam pan enleng mihai, a hehpih huai pa hong suak hi. Sanggam Mindatte bel a tate khempeuh in a pa’ min tapsuk uh hi. Amau ngeina hi. Mangkang numei ten pasal aneih uh teh a pasal min pua uh hi. Amau ngeina hi. Eima ngeina ciat a om dimdiam hi. Mangkang gamah amau dan i zat kul ci-a hong khem zong om hi.

4. Min Gelh Dan
            Zomin pen malkhat khat in kigelh hi. A vekpi in a kizom hi lo hi. Min khempeuh laimal khat danin gelhna zong Zomi ngeina hi lo, Mizo ngeina zuikha hi leuleu hi. Minneu pen a vekpi’n kizom ding hi. Gentehna... Thang Za Cin a minneu Cinno.

5. Behlap Neihna
            Pawlkhat in amin mal leh amin nungah behlapna nei thei uh hi. Biakna upna tawh kisai min mai a misiangtho min behlapna pen kipaupih theihna om lo hi. Pawlkhat ten hoihsa pong mawk in Mang min peuh mawk behlap  thei uh hi. Kei lian bangin kul sa khol keng. Pawlkhat in ama min kithei zolo liangin beh min lim dawksak uh hi. I min a cing takin i gelh dinga, behmin zong i gelh nop vanvan leh kikham theih om lo hi. Beh min i limzat luat lai teng Zomi sungah kipumkhatna om thei lo ding hi.

6. Min leh Bulhna
            Mintap i cih pen i pu i pi, i mintap min tawpna pen eima min patna hong suak cihna ahi hi. I pu i pi min patna peuh taw hi tate min pat vaivai ding hi lo hi. Khangsimna ah kisongsawlawi gawp ding hi.

7. Min Seel
            Lai gelh ciangin kua gelh cih i theih saknop loh hunt eh min seel khat peuh kizangh thei hi. Tua pen endikpa bekin a theih sim giugiau ding hi a, hih laigelhpa pen tuapa hi ci-a selphokik pahmawk ding hi lo hi.

Thukhupna
            Zomite in min phuah paidan khat kinei a, leitungah ngeina hoih pen hiding hi ci-in ki-angtang mahmah hi. Nangma khang ciangin nang ma innkuan khat sung peuh ah alum alet in min na phuah pen pil vai lo-a hai vai hi. Zomi buppi in zong hong zuih pih ngeilo dinga, nang mah mi tangkai, mi tawh kibang lo-in hong kimu lel ding hi. Tua hi-a Zomi na hih leh Zo ngeina tawh kituak in na tate min phuak in. Na zi na tate min ah nangma min peuh na guan mawkmawk khak leh Zo ngeina hilo ahihmanin a manlang thei pen in phiat khia in. Mi namdangte sap theih loh ding launa tawh Zolai malgawm na mawk laih leh na minam neu lungsim, na sila lungsim suahkhia in la tu-a kipan khiatna nei Zolai malgawm tawh na min gelh ta in.

Zo minte manpha in ngaih mahmah hi. Leitung bup vaihawmna panmun lian pipite ah Zomi tampi kihel-in i Zo minte minam kim in lawh hak sa pipi in hong lawh ngeingai ding uh ka sunmang ahi hi.

************************************************************

Hih Siapi Kung Mung (Phamsa) i laigelh' adam lai azi, ata te'n Zomi eLibrary / Laibusaal ading in Phalna hong piak ahi hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Min Tawh Kisai Ki deihsaknate. Agelh ~ Siapi Kung Za Mung Description: Rating: 5 Reviewed By: Cinpu Zomi
Scroll to Top