728x90 AdSpace

Hot
Menu
Zon-ol na Donate

Latest News

PASIAN ZIA LEH TONG. Agelh – GSPau

PASIAN ZIA LEH TONG
Agelh ~ GSPau


David in, “Topa aw, na zia na tong thei in hong bawl inla, na lampite hong hilh in,” ci in thu na ngen ngiat hi (Late 25:4). Mikim in zia leh tong khat tek kinei a, ahizongin khat leh khat i zia i tong kibang khin khollo hi.

Mihing bek hi loin, Pasian in zong zia leh tong mah na nei a, tuate pawlkhat a tomin en dih ni.

Amanlahte sam:
Pasian’ zia khat in a manlah tata sam dihdih hi. Elijah a laih dingin bawngtal kap 12 tawh lo kho in amanlah mahmah Elisha na sam dihdih hi (1Kum.19:19). Israel makaipi dingin Midian mite’ muhloh dingin leenggah sukna ah mangbuh satin amanlah mahmah Gideon na sam dihdih hi (Thte.6:11). Topa Jesu in zong a nungzui dingin Galilee tuilii ah nga bengin amanlah mahmah Simon leh Andrewte unau vasam dihdih hi (Mk.1;16). Gunkuang sungah ngeen khui in a manlah mahmah Jacob leh a naupa Johante zong vasam dihdih hi (Mk.1:19). Mi pawlkhat in pilna sangpi nei uh a, maban dang zong nei tuanlo napi, Pasian in na sam tuanlo veve thei hi.

Apillote teel: 
         Pasian in lungpilte azumsak nadingin leitung mihaite ateelkhia hi (1Kor.1:27a). Topa Jesu a suahna thu a za masa pen leh a thei masa pen in pilna neilo tuucingte hi a, vantung mi in a vakoh ngiat ahi hi(Lk.2:8-12). Peter pen pilna neilo, ngabeng khat hi lel napi, Pentecost ni in ama’ thugenna tungtawnin mi 3000 tak piangthak venvan mawk hi (Sawl.2:41). Nungzuipi (12) te zong pilna neilua na om khol lo uh hi.

            US gam khanlawh nading a Pasian mizat D.L.Moody tuhun laitak liana Pasian’ mizat minthang Benny Hinn cihte akipan khan lawhna lianpite ah Pasian’ mizatte i et ciangin laitan nei tumlo, a kipumpiak gawpteng peuh ahi uh hi. US gam ah University minthang pipi a phuankhia Bob Jones, Oral Roberts leh Kenneth E.Hagin i cihte in zong pilna neilo uh hi. Pasian in a kulna tawh kizui in a pillote piltawm sak lel a, a siamlote zong siam tawm sak lel hi.

A thanemte zang:
Pasian in a thahatte a zumsak nadingin a thanemte a teelkhia hi (IKor.1:27b). Samaria khua ah kialpi a tun lai in kulhpi pua lamah an tampi a omna thu kumpipa kiangah a ko dingin Pasian in miphak 4te zang hi (2Kum.7:9-10). Pasian in leitung mit tawh i et teh a ginalo, mite neumuh kha thu ah a hawmthawh huai a thanemte zong thei ahih manin mite in san’hak kisa thei hi. Tua tham loin a cidam lote leh pumpi cinglo tata atumdang deuhin zang thei lai hi.

Pasian’ mizatte sungah Moses danin paumawlte, Gideon danin namneute, Jefthah danin mite’ simmawhte, Peter danin pilna neilote, Paul danin pumpi damlote leh David danin naupangnote khawng na kihel kha uh ahih manin mihingte in telhak kisa in, kibuaipih thei hi.

Lamet bei teh nasep kipan pan:
Pasian zia khat pen mihing lampan cih nading thei nawn lo in lamet a bei kiuhkeuh hun teh nasep hong kipan panse hi. Cana khua mopawi ah mihingte’ bawl leenggahtui teng a beisiang kiuhkeuh teh Jesu in tui pen leenggahtui suaksak pan se hi (Joh.2:7-9).

I pilna i muan’ laiteng, i hauhna i suan laiteng, ulian khat peuh i muan’ laiteng Pasian in ei tungah bangmah hong seem nailo hi. Mihing lam pan i muan’ i suan’ ding a om nawnloh hun ciang, siavuante in hong bawl zawh nawnloh hun ciang, beem(zero) dinmun tungin lamet a bei kiuhkeuh hun ciang Topa nasep hong kipan pan hi.

Lawhcin’na en lo, cihtakna en zaw:
Mikangte’ paunak ah, “Mihingte in a lawhcingte pahtawi uh a, Pasian in ahih leh a citakte pahtawi hi,” ( Man crowns success, God crowns faithfulness) cih khat om hi. Pasian in i nasepna (doing) hong en lo a, i hihna (being) hong en zaw gige hi. Khat veivei Billy Graham, Reinhard Bannke, Benny Hinn, David Yonggi Cho cihte tawh i kitehkaak khak teh i lung hong kia diaiduai thei a, Pasian’ na sep bang kitawp nuam zo liang thei hi. Ahi zongin Pasian in i lawhcin’na hong en lo in, i cihtakna hong en zaw a, i cihtakna zui in thaman hong pia, cih thu i tel ciangin tua in tha tampi hon guan hi.

A zekai tawh kibang napi, ahun lap veve: Pasian’ zia pen azekai tawh akibat hangin ahun lap veve den se hi. Tua pen mihingte in kingak zolo thei hi (2 Pet.2:3).

Pasian in Abraham thupha ngah dingin samkhia napi, Abraham pen tawlpi khat sung puanbuk sungah na teeng veve hi. Joseph in kumpi suak dingin mang man napi, tawlpi khat sung thong na kia veve hi. David zong kumpi dingin sathau a kinilh khit teh kumpi tokhom tungah na tu pah nai lo-a, tawlpikhat sung gal na tai niloh hi. Hihte pen a huncing nailo hi bek a, ahun a cin’ teh Topa gen bangin tangtung veve hi.

Suakta takin deih hong teelsak den:
Pasian in a thuneihna tawh mihingte hong ukcip gawp ngeilo a, suakta takin eima’ deihna hong teelsak den hi. Pasian in i mai ah nuntakna lampi leh sihna lampi koih a, ei deih zawk zawk i teel ding ahi hi (Jer.21:8). Tua mah bangin i mai ah nuntakna leh hauhna, sihna leh siatna koih a, tua zong ei’ deih zawk zawk mah i teel ding ahi hi (Thkna.30:15). I teelsiam leh eimah a kihampha, i teelkhialh leh eimah kihamsia hi ziau lel a, Pasian ngawh theih hi lo hi.

Source :
Lungdamna Aw
Vol. XXXVIII                  No. 04
APRIL, 2014

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

1 comments:

Item Reviewed: PASIAN ZIA LEH TONG. Agelh – GSPau Description: Rating: 5 Reviewed By: Cinpu Zomi
Scroll to Top