728x90 AdSpace

Hot
Menu
Zon-ol na Donate

Latest News

Zomi le Music. Agelh ~ Sian Kop Lian B.Th, M.A

                                                             Zomi le Music
Agelh ~ Sian Kop Lian B.Th, M.A

Zomi Guitarist Sian Kop
Thupatna
Leitung ah, minam khat in a piang mi khempeuh in (Ngeina, Culture) kinei kim ciat a, tua I ngei na sung ah i neih loh a pha mawh thu khat in a hih le, (Tumging, Instrument) khat peuh peuh a ki hel loh a ngeina picing cih a om thei lo na hi mawk hi.

Minam kimciat in ngeina  laam (Cultural dance) kinei kim tek a, tua I ngeina laam te pen a picin’ theihna ding in, a tah (Beating), a aw (Voice), a awkhum (Melody), a aw luanzia kituak a sak diam diamna (Harmony), cih te ki hel lo in, ngeina laam, ngeina la, tumging cih te pi cing thei ngei lo hi. Tua a hih man in Music I cih lim lim le Mihing te pen a ki khen thei lo a ki zawitawn  a ki zom  den na hi mawk hi

Ei zokam in Music cihna lian I lawhna a tuam in a om tuan kei a, mangkang te in, a gingkhia thei tum theih tuam tuam a ,a ki bawl nate pen (Instrumental) ci-in, tua instrumental a kici tumging teng khem peuh a ki gawm a a lawh na (Music) ci-in a min  namnih in lawhna nei se uh hi.

Ei  zokam in  Music le Instrument pen a nih a a huam tuak ding in , Tumging maw ahih  kei le  ih zokam mah mah in Music ci-in I zang khawm lel hi.

No1. Music ih cih  Bang ai tam?
Music ih cih kammal hong pian khiat na pen, Greek kammal pan-in hong kipan khia hi a, Greek kamin (Mousike ) kici in mang kam in, (art of the Muses) ci in ki let khia kik hi. Hih , Art of the Muses cih a deih na le a khiatna bulpi in,

Khatna ah; (art)  a khiatna, hih leitung a a piang sa nate tung pan in, mihingte’n a muh khiat le a bawl tawm, (work of man), Gentehna in; khutsiamna lam tawh kisai-in, limsuaih siamna, umle bel bawl theihna cihte le,lungsim ngaihsut siamna tawh na a hoih bawl theih geeltheihna (imaginative designs), laigelhsiamna lam (literature), a gingthei tumtheih tuam tuam te bawl theih na (sounds and instrumentals) cih te pawl (art) ih cih pilna le thuthuk ngaihsutna te ah a na pakim  hi pah hi.

Anihna ah; hih (muses ) a cih pen, Greek minam ten a thupit sak mah mah khat uh le amau upna tawh ki zui in a na ciin a na saan thu khat na hi-in, den a ih gensa (art) tawh ki sai nate,a mukhiasak, a hi kei le tuate tung a thunei, a keem, ci-in  Greekte tang lai upna a hi,thu le la ciapteh theihna a kem pasian tanu kua (9)te, (9 goddesses) ci-in greek te  taanglaiupna sung ah, a na kep le a neih thu khat na hi hi.

Hih a tung a thu nih sung pan in, Music hong piankhiatna ih et teh, Music ih cih  hong piankhiatna pen,hih leitung a na khempeuh a piang sak a nung ta Pasian bawl sa nate tung pan in a ki ngah aw (voice or sound), (the art that puts sounds together) nate tung pan in hong ging khiakhawm aw te ,

Gentehna in; kongkhak ih hon bek ciang nangawn in a ging ngeu ngeu khat ih zak om hi, na khat peuh ih sat a hih  kei le ih tah ciang in cih bang, tua dan neng neng  pan in a ging ih zak teng zong ,Music hong hi pah lel hi ci-in a tom in tua dan in ki mu khia thei hi.

Etkak pawl khat:
  1.  Mousike, Henry George Liddell, Robert Scott, A Greek-English Lexicon, at Perseus
  2. Jump up^ Kozinn, Allen (13 August 1992)."John Cage, 79, a Minimalist Enchanted With Sound, Dies".New York Times. Retrieved

No2. LEITUNG AH A UPA PEN TUMGING
Music cih I gen khiat theih nading in, nate tung pan in, a aw kiza a, a gingkhia aw (Sound) khat peuh peuh a om masak lo in ,Music cih om thei lo hi.

Tua a hih manin , tua a aw a piangsak ding Tumging (Instrument) te khat peuh peuh a om masak loh hong phamawh hi ta hi.

Tua ai le tumging (musical instrument) I cih lim lim bangna te pan -in hong piang khia masa ai tam cih, a lungngaih huai le a theih huai thu khat hi kha ding in ka lamen hi, Tu hunciang in, guitar ,drum , key board, cih te zang in lasa in I om theih hang in, tua te a om ma in bang kitum ai tam cih zong I ngaih sut ding a thupi khat na hi zel kawi kawi hi.

Tumging icih bang pan hong piang khia masa ai tam?
Leitung ah, (Archaeology) tanglai,tangtawng thupiangte zonkhiatna, a kan a siam mipil tampitak in hih Musical Instruments (Tumging ) tawh ki sai ,a muhna tung tawn in a gen uh teh, leitung a, tumging a Upa pen pen in,  Phiit ( flute ) hi ci-in mipil (scholars ) a tam zaw in gen uh hi, hih phiit pen ganhing (animal )te guh pan in kibawl phiit hi ci-in mu khia uh hi.Tua bek tham lo in, hih Phiit in, kum 67,000 (kum tulsawm guk le tulsagih) bang a upa ding ci-in mipil pawl khat in um mawh uh a, pawl khat ten a gen na ah, Phiit hong pian khiat zawh a Upat kum 37,000 (Kumtul sawmthum le tul sagih) hi ding hi ci-in tanglai thukansiam ten gen uh hi. 1995,july kha in, Slovenian, minam a hi tanglai thuthuk kan, Ivan Turk a ki ci mi pan in, ganhing te guh tawh a kibawl  vanglinei phiit khat mu khia hi, tua phiit a upat kum, kum 43,400 le 67000 kim hi ding hi, cih le Sen gam China) ah tanglai thuthuk kan siam ten, ganhing guh mah tawh a ki bawl phiit mu uh a, a upat kum ,kum tul 7000 le tul 9000 ki kal  hi ding hi ci-in um mawh uh a, a nu nung pen pen  Germany gam lei kuahawm sung ah letmat (8.6 inch) a sau phiit khat mu khia uh a,  phiit a upat kum, kum35000phading hi ci-in  tumging lam tawh kisai thuthuk akan te tua dan in atuam tuam in mukhia uh hi.

Tua bek thamlo in, laisaingtho piancil alian 4:20-21, na sung I et teh ,   21 na sung ah, (“ A sanggam pa’ min in Jubal hi; amah in laiza la sakna leh tamngai tumte khempeuh; pianna pupi a hi hi ‘) Mang laisiangtho KJV sung ah, tamngai a cih na mun ah, (Flute) Phiit ci-in na gen lai hi.

Tua a hih man in, leitung ah tumtheih tuam tuam te lak ah, tumging a ki mukhia masa pen, aih kei le a kitum masa pen in, ganhing te guh pan a  kibawl (Tumging Phiit ) flute a hi  hi. Tua bekthamlo in tumtheih tuam tuam te lak pan in  a upa pen pen in, Phiit  hi ding hi ci-in musical instrument a kan mi tampi in gen uh  hi.

Hih atung a ,”tumging a kimukhia masa pen phiit” cih thu I et teh ,ei Zomi te zong leitung ah, ngeina (culture ) a nei minam te lak ah, mithupi mah mah minam te khat i hih lam kitel hi, leitung ah, ngeina  tawh kisai in, a ki upa sak mah mah ahi, Greek minam , China , India cih te’n a ngeina sung uah a thupit sak mah mah  tumging  te lak ah (phiit )zong a na pa na hi hi. Tua mah tawh a ki bang in, ei Zomi  ten Phiit pen , I zat mah mah tumging khat hi pha diak a, a aw pa lo a,tumtheih tuam tuam te tawh ih laam teh  , gentehna phiitlaam cih te ai zong ih laam teh, phiit pen a awpai pi (Solo) khat a ih zat mah mah khat na hi lai zang hi. A  diak diak in phiit ih zatna ih et teh, ei Zomi ten, khauzang kithuah a, akitum (String Instrument ) ki nei lian lo a hih man zong hi kha ding in ka um hi,.a hi zongin tumging te lak pan a u pa pen a hi Phiit , ei zomite ngeina sung ah ih zat mah mah tum ging khat na hi mawk a hih man in, ngeina tawh kisai in a picing mah mah ,  Zomi te ih hi hi. Leitung ah ngeina kician a neilo  minam in mi mangthang a suak  hi mawk hi. Minam a picing khat ih suah theih nading in, Ih ngeina sung ah musical instrumental a kim in ih neih loh a phamawh thu zong hong hi pah hi. Minam picing ih cih ten a ngeina uh a lenkip le a hun hun tawh kizui in a puah a kem a zuun te na hi mawk uh hi.Tua a hih man in, Pasian hong piak ih ngeina hoihte ih Biak Pasian minthanna ding in a zang to siam Zomi te ih suah na ding in, Topa Pasian in ih minam tung ah thupha hong pia ta hen.

Etkak pawl khat:
May 25, 2012
www.bbc.com/news/science-environment-18196349

No3. Zomi sung ah Board Casting Station, kawlgam ah lasa ma sa pen
1962,October, ni 9 ni- in,Pu Cin Khen Mang in,Burma Board Casting Station pan in, Radio ah lasak theih na ding in, lakhum na kipan hi. Eizomi sung pan in, lakhum masa pen le asa masa pen hong hi pah hi. Tua bek thamlo in , la tampi tak phuak in, gam ngaihla, Pasianla, zawlla ai zong a vek in dawng 60 val na phuak hi.

1968 kum in, Zogam ah akibawl masa pen labu, Tedim Chin Popular Songs,labu tung ah zong Pu Cin Khen Mang maan ki suak sak a, tu ni ciang dong mah in, ni thupini ,Chin National Day cih a tun ciang in,  mikim muhtheih ding in, kawlgam tangvan’  kepna (Museum) ah zomi makai ten lak thei zel uh hi.

Ih minam sung ah zong hi bangin Pasian thupha te ki cingin, ih kawlgam mah mah ah zong music lam ah a ma dawk ma sa lam aTopan hong koih man in nak pi tak in ih biak Pasaina min ih phat hi.

Etkak thu te:
U.S. Zomi  Early Radio Singer, song writer . ( Youtube Zomi innkuan kum (5) cin na  pawi, thulu ( Zomi pioneer  award ( Music )

No 4. Zomi ten I la timing ,Beating te phuahphat hunta.
THULU:   Beating 4/4, Style Country
Zomi te ih zola te,timing atam zaw pen, 4/4, 3/4, le 6/8 cih te tam ki zang pha deuh hi. Lei tung ah la a tam zaw a ki phuak  khin sa in, 4/4 Beat hi a , hih 4/4 beat in, Style ( A daan ,A zia atong) nam tampi tak nei hi. Ei zomi ten 4/4 a ki cihnak le Country hi ei, cih pah pah kha zel a, tua zong I phawkthak ding i mang ngilh khak thukhat na hi hi. Tua a hih man in( 4/4 beat in Country style )cih thu bulphuh in kikum to ni.

4/4 cih ciang in( Bar measure ,la tah ki simna, khawk khat cing in, tah 4 ta pha ding cih na hi.) Hih 4/4 tawh  lanam tuam tuam ki tum thei hi.

Gen tehna in;
(Classic Rock, soft rock, hard Rock, Country ,80s Rock)cih music te pen 4/4 timing tawh a tam zaw kitum hi, Bar khat ciang in tahli (4counts )ta a kigual a hih man in, (4/4 time signature) ci in a na ki ciam teh na hi zaw hi.

4/4 cih ih muh le, Country hi ei cih pahna hi zen zen lo hi . Tua bektham lo in tu hun teh (Blue) ih cih, late zong, ni dang laidan ,12 bar blue tawh ,kitum  lang lang nawn lo in , 4/4 time signature tawh, a et lawm a zaknop  ding in kitum ta hi. Gen tehna in,(Gospel la  pawlkhat en leng, Lincoln Brewster , cih te le, Securlar lam pan in, John Myer ,Beyonce ) cih te pawl a tom in I gen pak in.

Ih zola te ,a tam zaw 4/4 tawh ih tumte pen, classic flock song tam zaw hi, Pasian phatna la tomno te ai zong, tua lo zola khui tampi a kikhum  khin sa te tung tawn in ki mu khia thei  hi.

4/4 beat tawh a ki tum Country la pen, music  tum dan style na tuam tuam tam pi te lak ah a haksa pawl in a ki ciam teh a hi hi. , Country la a hih nak le, a la, a aw zong thu khat ,a music mah mah thu pisak mah mah uh a, a diak diak in,instrument (a tumging  )mah mah nam tampi ki sam se hi. A kisam tumging thu pi pawlkhat in, (1. Mandolin, Banjo ,harmonica,violin,Slide instument) tua teng pen a tuam diak a special phadeuh a, zang hamtang se uh hi. Mang kang ten country Music a cih ngiat te uh pen tua teng tawh a ki tum ngiat te hi se hi. Tua a hih man in Ih, zola te, (Country level) ah a lut zo tak tak ding pen ham sa mah mah lai hi. (Country flock ai kei le Classic flock level) ciang a ki lutzo hi pan hi.

Tua a hih man-in (Nitumna gam Western Music) lam diak ten, classic flock, ai kei  le, flock rock, Pop flock cih dan in a nam in khen se uh hi.

Zomi ten zong  ih la timing te, a hun zui in a ki tum dan le, tua namte ki tua citum cih dan te  kan in han ciam in , delh  in phak sawm leng lap mah mah lai hi hang.

Tu hun ciang in, Rock tawh a ki bang pha mah mah la pawl khat om in, ei ngaihsutna dan hi le Rock hi ei ih cih suk pah phiat phiat ding pawl khat pen, Country Music peuh na hi mawk. Tu lai tak lei tung ah country la sa minthang, (Taylor swift, Carrie underwood, Brad Paisley,) cih tu lai a, a thang phadeuh a maute late ih ngaih teh a music tune te uh ,a aw paizia te hoih thei mah mah hi. La style ( la ih zia le tong) nam tuam tuam  a hoih no no in tum uh ah zong zak nop in, et teh tak mah mah hi.

Tua a hih man in , ei zomi ten zong , Ih la te, (tung chek ,tung chek, ai kei le tung chek chek tung  chek chek )cih te mah tawh zai zai lai lel ding maw le.

Zomi ten  Country  music  pen ih la deih mah mah  namte lak ah khat a hi a, tua mah tawh ki zui in, tun Country Music ki koi ci tum , koi dan in ki sa cih te ih kan a ,ih delh zawh nak le, ei zomi tezong mi nam dang te mah tawh a ki bang a ihngeina te a lamsang to zomi tek suak ding hi hang..

Bang hang in tua dan in midangte  music muhna  delh ding sawm ih hiam?  Hi mah hi , ei zomi ten nitumna lam gamte music culture pen ei zo culture sung ah,100 lak ah 90 bang a ciing a zui hi mawk ih teh  tua mah tawh hanciam a, mi ih phak  ding a kisam lua na hi mawk hi. Ih gen sa mah bang in, hih nitumna gam te Music culture pen, ei zomi sung bek ah cih hi bekthamlo in lei tung bup mi nam tam pin ten a mau ngei na zah zah mah a ,anazat mah mah uh hi mawk a hi man in, han ciam a, a khang to sak thei  sem sem ih suah na ding a thu  pi mah mah na hi hi .

Etkak pawl khat: Country Music, Wikipedia, Country Music award 2011, 2012.
Note:  A tung a(Khawk khat cih ka at pen, Bar khat cih kagen na ka zat hi.)


No 5. Music  Bangci lapsang or khangtosak ding
A.Ngeina la tawh Leitung bup a ki zel Indian Music tung pan etpakna
Tu laitak in, Zomi te pawl khat ih om na, India gam pen, lei tung ah (Culture ) ngeina lam ah a u pa mah mah gam khat in ki ciam teh a, a pupa ngei na un, kum tul 5000 (Tulgna) upa hi ci-in ki sial in ki sak theih pih mah mah uh hi.

Tua zah khat mah in, a ngei na uh, len kip in tu ni ciang dong mah la a phuah uh teh, Tabla, Veena, Sitar, flute, a diak diak in tua teng pello a zat loh uh a pha mawh in ngaih sun uh a, zang ham tang uh hi.

Tua bek tham lo in, a mau ngeina sung pan a piang khia tum theih tuam tuam , la te pen a hun tawh ki zui in khang to sak bek tham lo in leitungbup in a theih pih , (Indian Music  ai kei le Bollywood Music) ci in lei tung mun khem peuh ah mi kim theih ding in theh thang , ki lang khia sak zo mawk uh hi.

Tua bek tham lo in, nitumna lam gamte ,ngeina la ,(Western Music) te zong  thu pi sak in, han ciam in, a mang kang te sak bang mah tum bang mah in, mi gam mi lei teng ah , va zai zo gawm mang lai uh hi. A bei sa tuma kum li kum 5 lai a , a min thang sak mah mah uh, Parikrama Indian Rock  Band te bang pen, England gam khawng ah va pai in, a mau phuahsa la te mah  tawh la vasa uh a ,a hun tawh ki zui in a ngeina uh  khang to sak  (Modernized  ) in,mikang te na gawn in zaknop a sak ding un, ala te uh bawl in khangto sak  uh hi.

B.Tu hun Music  ahuampi a, et khopna Music bulpi nam nih
    1 .Western Music
Hih western Music pen tu hun ciang in mi namkim khem peuh phial in a zat le a zuih uh music khat hi a , a tom in en pak  leng ,ni tumna gamte ngeina sung pan in hong piang khia tumtheih tuam tuam la te hi cih a tom in ih thei a,tua ban ah Western Music pen  ,(AD 476 pan AD 1400) ki kal hun sung in, Europ gam pan in hong ki pan khia hi a, Christian Music, Biakna la tuam tuam pawl pi sung pan in hong piang khia a ki sa khia la te pan in hong ki pan khia a hi hi., tua hun lai mah pan in, Gospel song cih le  secular song  Pasian la le Zawl la ci in nam nih in, na om to pah hi.

Hi western Music  in, tu hun ciang in lei tung mun khem peuh hong zel in, mi nam kim, ih ngeina sung na ngawn ah hong teng in hong inntek tang a suak hi ta hi. A diak diak in, Country Music, Classical Music, Classic Rock, Blue, 80 rock cih te hi pha diak hi.

 2. Fusion Music
Tu –hun ciang in, Fusion Music cih hong thang mah mah a, a diak diak in, gam khat le khat, ih ngei na te a ki bat lian loh hang in, tua te gawm khawm a, a tuam tuam a tumkhop ngei ngai na, tua te, Musical instrument ,tum ging tuam tuam  te gawm khawm a , ki tuak tak a, tum khopna pen Fusion Music cin ngeina bul kip a nei gam te in thu pi sak phadiak hi, a diak diak in, Greek te, India ,Sen,Arap ,German,African  cih minam gam ten uk pha diak uh hi. Kawl gam ah zong ,kawl ten Fusion Music thu pi sak uh a,  kawl lapi  le, tu hun a lapai zia cih te gawm khawm a sak pen uk mah mah uh hi.

C. Zomi te sung ah bang hun in Western Music ki zang, (a tomin etna)
1910 pan in 1970 ki kal hun sung pawl in ,ei zogam mah mah ah zong, Western Music hong na tung khin hi in,ih la te pen Biakna sung pan mah in hong ki pan khia hi a,a diak diak in, ih zola te nitumna lam gam te sak bang (style ) tawh phuak a hong ma kaih, Pu Hau Go te Dr Hau Lian Kham ten biakna la tawh ih minam hong ma kaih to uh a, ei zomi sung pan Pasian phatna  la, (Agape) ci-in zogam a la uk la sa siam mithang ma sa a hi, Pu En Lam Cin te aizong, pawl khat in hong ma kaih to uh in, Sihna kigozo Cih lai khui te ai zong a ban ban in biakna phatna la te  ih zogam ah hong khang to sak uh hi., tua bek tham lo in, la siam mitam pi hong ki beh lap to to in, Pu Ngabeng te band ,Sia Thang Sian Khai ,Sia Tuan Khan Mung, Sia Kap Mang  cih ten Pasian phatna la tawh ih minam hong phuah hong pi cing sak to to uh a,a hun hun in zomi lasiam tampi tak hong khang to in tu ni ciang dong a hun tawh ki zui in la sak zia tum zia om zia ai zong Zomi te a khang to lam a ma nawh to to te  ki hi phial phial ta hi.

Note: Hih Zomite sung ah bang hun in Western Music Kizang, (a tomin etna ) cih a thu lu i koih ma bang in, A source (a bulpi zaw deuh teng ) etpak na hi a, a min a puam a vek in, a bul a bal in ,isuak sak nai kei hi.

D. Zomi ten Ih late Ih ngeina te mi tawh liangko ki kim in  laptoh ding hun hi ta.
I zogam ah, sangmang Cop Topa te, hong pai lo hi le, tu ni ciang dong khuang le zaam, dak tal ,sialki, phiit cih teng lian bek mah, tum theih tuam tuam a ih neih pi pen hi kha ding in ka um mawh hi. A hi zong in, Pasian thu ih muh te, Topan ih mit kong te hong hon sak-in, ih la sak zia ding , ih music tum zia ding, ih tum ging ding, mi te zat te mah tawh a ki bang a, zangthei  tumthei ding a Topan hong na deih na hi mawk hi.

Pasian thu tawh ih lasak zia te hong ki khel tak ciang in, ih ngeina teng a ki pai a bei hi zen zen lo in, tua te a ki picing sak zaw ,a hih kei  le a hun lap a khangto sak, (updating ) cih na hi zaw hi cih ,a telsiam tek ding in  ka um hi. Gentehna in, khuang, le zaam sial ki daktal,  tun a ki zat teh (Drum )khuang le zam cihteng gawm khawm a a ki tum a ki zang Drum hong hi a tua Drum sung ah,khuang le zaam  cih te i aw pai zia a tah (Beating) cih te a na pa hi mawk hi.

E. Zomiten Fusion Music   ki sam hi.
Zomi te in, nitumna lam gam te ih ngeina te bek a zang a zui ih hi zen zen kei a, ih ngei na a om sa te,amau ngeina ,tum theih tuam tuam te mah tawh a ki bang a, a zang to a delh to te ih hi zawh hi cih ih mu theih hi.Tua a hih man-in tu hun in bagn ci, la ki phuah , bang ci ki tum , cih te zong  ihzuih a, ih ciin nak le, ih zo ngeina te mi tawh liangko ki kim a, a laamsang to te ih suak ding hi.

A tung ah ih gen mah bang –in india te hun khat lai in, Sol-fa ,zong hoih tak  ,a sa thei lo te, a tum thei lo te uh hi. Ai zong in , tun a ngeina te uh mi te tawh liang ko a kikim a kibang a, a zat theih na ding un, Fusion music te zang uh in,  a hun tawh ki zui a, la ki phuak ki sa te, delh sawm phak sawm uh a hih man un, leitung bup in theih lawh uh a,  (Indian Got talent )ci-in ki ciam teh liang hi. Ei zomi ten zong tua bang mah in, ih ngeina , a om sa tumtheih tuam tuam te , tu hun tawh a ki tuak in a hun lap in , ih khantoh sak det ding hong  kul ta hi.  Tua bang a, zuihna pen, ngei na tai san, ngeina ki lum let sak hi lo zaw in, ngeina  te a hun zui in mi tawh ki bang ding a, phak na hi zaw hi.

Tua a hih man in, ih late, ih music te, ih Biak Pasian mah ma suan in, han ciam in a hun zui in a ki sam bangin a laam sang to zomi te ih suah nading in ih Biak Pasian in thu pha hong pia kim ciat ta hen.

Etkak pawl khat;
Indian Music History Wikipedia, Fusion Music, Western Music Survey  te sung pan.


Tutung Zomi le music cih thulu tawh lai kong gelh khiat na sung ah, gen khialh le a hoih lo a om le nong mai sak na ding un khazih min tawh kong thum hi. Mai lam ah akicing zaw le a thupi zaw in kanzawh na ding in, lunggulhna ih nei lai hi tua hi in a ki sam bang bang te ki hilh in tha ih ki piakding in kong zaw hi.

Lungdam,

Sian Kop Lian B.Th, M.A
Kalanjali,The learning Center
Music instructor ,western music deparment.
J.P.  Nagar,3rd Phase,Bangalore_560078,
India.

Laigelh Zomi Guitarist Sian Kop i "Joy To The World" instrumental tumna.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Zomi le Music. Agelh ~ Sian Kop Lian B.Th, M.A Description: Rating: 5 Reviewed By: Cinpu Zomi
Scroll to Top