728x90 AdSpace

Hot
Menu
Zon-ol na Donate

Latest News

“Zomi : Minam Picing Hihna Lamah” Agelh ~ Kham Sian Muang, Tuilangh AG

“Zomi : Minam Picing Hihna Lamah”
Agelh ~ Kham Sian Muang, Tuilangh AG

Photo credit : Thor Thorn
Amun : Sakollam Sangpi, Tedim Zogam

Thupatna
Minam khat, gam khatpeuh peuh in amau minam leh gam tawh kisai-in a lunghimawh ding uh leh a awlmawh ding uh a neih tek mah bangin Zomite ki tangsap peelmawh khat in minam picing i suah ding ahi hi. Picin lam i manawh na’ng Zomi khempeuh in mapan hun ta a, i gam a khantoh nading hanciam a seppah ding tampi om hi. Zomi i hihna leh minam picing suah theih na’ng thu-7 kikum khawm ni.

1. ZOMI I HIHNA
Mihing piancilna thu a bulkan mipil (anthropologists) te in leitung mi khempeuh nam 3 in na khen uh a tuate in; (a) Mongoloid nam, nisuahna lam, mualtung gama kithehthang Shem suan te lak ah Joktan tate, (b) Negaroid nam, leitaw lama ki thehthang Ham suante leh (c) Europeoid nam, nitumna lam a ki thehthang Japheth suante cih bang ahi uh hi.[1] Hih in Zomi te Shem suan[2] i hih lam hong lak hi. Zomite minamdang te tawh i ki ho ciangin kumpi hong ciaptehna Chin mi ka hi ki ci bek a, kua mah in Chin ka hi, a ci ki omlo hi. Zomite piancilna pupi Jobad (Noah’ tapa Shem pan khang 7 na Jobad suan Zo) 2100 BC pawl a, a piang hi, cih ki mu thei hi.[3] Jobad pan mi i tam ciang, tua min zom suak in ZO, Zomi ihi hi.[4]  Zomi cih kammal pen a tawntunga kipanin ei leh ei kilawhna i minam min hi in, Zogam hong pai masate leh, Zomi thu kan masa Mikangte Sir Henry Yule (1508), Father Vincentius Sangermano (1983), Col. T. H. Lewin (1871-72), Dr Francis Buchanan (1835) leh Bertran S. Carr y H. N. Tuck-te in, i minam min Zomi i hihna, tuma kum za tampi lai-in, na gen khin uh hi. Kawl mipil U Thein Pe Myint leh Daw Aung San Suu Kyi-te in zong Zomi i hihna hong ciapteh sak uh hi. Ei Zomite lakah, i muan i suan Dr Sithu Vum Khaw Hau, Sangmang S. T. Hau Go leh Dr Vum Son-te in zong Zomi i hihna, kipsak uh hi.[5] Zomi cih kammal pen ‘Zo mite’ cihna hi a, Zo mite pianna pupi ahi “Zo” pan a kila ahi hi. Mualdawn Zo lak i ten manun Zomi a ki ci hi lo in, i pu sawnsawn uh ‘Zo” ahih man a Zo mi a kici ihi hi.[6] Zomite hi hang i ki cih pen i hihna taktak hi-in, kuamah in Zomi ki ci kei un, hong ci ngei lo hi.  Zomite i khanggui thu i sut ciangin, Pu Chin tawh kipan lo-in Pu Zo pan, panin thu i gen hi. Zomi in i piang a, Zomi in kinungta in, Zomi in a ki si ciat ding ihi hi.[7] Zomi cih pen mi hong piak hilo, eima’ a, ei ma neih tuam min, Pasian hong piak ei leh ei kisapna min a hih manin Zomi i hihna phawkin i minam min ding Zomi mah ahih na manggilh kei ni.

2. ZOMITE MINAM PICING SUAH NADING THU-7
            2.1 A Picing Minam Itna Lamah
Mikim in itna ki nei tek a, Zomite ki tangsap itna in a picing itna leh veina maan ahi hi. I minam, i Nu le Pa (identity) ki kheek thei lo a, Zomi hihna zong ki pai thei lo hi. Mipil ten a minam uh it-in a angtan pih mah bang un, Zomiten zong Zomi i hih na i angtan ding ahi hi. Zotate koikoi-ah i teeng, i giak ta zongin minam nei i hihna kilangsak in, i si i sa sungah Zomi i hihna a omsa te kipsak ni. Kawlpau siam in a maute sangin siamzaw taleng Zomi mah i hi veve a, mikang pau siamin, mikang te zah mahin thupi taleng Zomi mah ki hi veve cih phawk den in Zomi i hih angtan pih ni. Zomi te pen mualtung gam, gamlak, tulak- a teng te hi-in midang te tawh kizopna tam lo-in, ei bek in a om te ihi hi. Tua hangin milak ah i om ciangin Zomi hi ing, a cih ding a mai zum ngaih sut mi tampi om a, a min nangawn uh kawl min a zang om uh hi.[8] A tatak in cileng, minam picing i suah semsem nang tua bang lungsim leh a zumhuai lo thu te ah zum lo-in Zomi ihih na phawk den in i ang tan pih ding ahi hi. Zomiten i minam min maizumpih kei ni. Bang hang hiam cih leh Zomi hih nak leh Zomi mah it ding hi paha, minam itzawh kei a, Zomi ading phattuamna suah zawh kei leh, Zomi sup nading, siat nading, leh tha nem nading peuh mah bawl loh ding ahi hi. I minam itna tatak i neih masiah minam picing kisuak thei lo ding a hih manin Zomi i hihna it in, i minam angtan pih ni.

            2.2 A Picing Pau Leh Lai Zunna Lamah  
A picing sa namdang te neih mah bangin Zomiten pau leh lai ki ciantak in i nei hi. Zomi khat hi na pi-in bang zah tan, pil in, hau mah ta se leh Zo kam a asiam lo te kithupi sim khol lo pah hi. Ahangin, Zomi ihih leh Zomite’ kampau khat teitei tawh i pau a, i gelh a, i sim theih, i ki ho theih kul hi.  Zomite pen, mi dang te thupi sak zaw-in midang te’ pau le ngeina peuh la baih in, a zui baih ziau i hih manin, koi gam koi lei-ah i tung zongin, itu i tate, ei pau innkuan sungah zat pih in, Zolai sinsak, at thei sak in i hilh ding kisam a,[9] innkuan sungah Nu le Pa te Zopau in ki ho tangtang peuh leng i ta te ki lawh lel ding hi. Kampau i cih pen minam khat i ki ciaptehna hi-a, Zomi hing ci-in Zokam in i pau kei leh Zomi ki hi thei tuan lo hi. Zomi phazah a kisim (census) teh tua minam khatte pau a zang teng kisim a, a beh a phung, a sisan nam peuh tawh ki sim lo hi. Namdangte paupen, sin ding, siam ding mah hi, a hi zongin eima pau (Zomi pau) le eima hihna nusia lianga mi-a i vazat pih leh ei le ei minam neilo, singbul suangbul pan a piang banga ki bawl i suak hi. Tua bek hi lo, Zopau, Zokam a i pau loh ciang i man (value) kiam hi. Minamdang te kiang vatengin a mau pau in pau in a mau mibangin i om phial zong, midang, gamdang mi in hong mu den ding uh a, beh le phung, nam nei lo kisuak bek tham lo, a mau simmawh in ki om lel tak ding hi. Tua a hih manin, Zomi khempeuh in, i omna ciat ah Zokam ciat in pau ni, Zolai, Zo pau mang sak kei ni.  Mikang te khat peuhpeuh khualzin gamvak in a om ciangun a mau pau’ mangpau’ bek zang uh a, midang pau zangthei phial leh zong zang vet lo uh hi. Tua bangin a om manun mikang pau pen tuhun khang sungah leitung buppi’ pau (international lingua Franca) suak mawk hi.[10] Tua bang mah in, Zomi te minam picing i suah nadingin; i pau, i lai te zumpih lo-in domsang ciat ni. Zomi khat peuh in i pau ih zahpih leh ei leh ei a ki zah pih kisuak hi. Zolai in i Zo pau hong kepcing sak a, i Zo pau in  i Zo minam hong kep cing sak[11] a hih manin, Zomi khangthak ten, i pau, i lai in Zo minam hong kipsak, hong kilangsak ahih lam phawk in hoih takin i puah i  zun ding thupi hi.
           
2.3 A Picing Minam Ngeinate Kem In Zatna Lamah  
Leitung ah minam khempeuh in ngeina leh tatdan hoih nei ciat uh hi. Ei Zomite zong ngeina kician nei-in zu hawm, sahawm te hi tiuteu-in a zui te hi hang.[12] I Zo ngeina tat dan hoih te kem cing ni. A diakdiak in, khuado pawite, Zo minam ni pawi te kum sim in bawl ding hanciam ni. Zu ki kholh thupha ki dawh dan te kem cing in zang ni. Ngeina la ahi Tonla, Galleh Sa aihla, Zangtala, Sawngla, Sanolhla, Khuadolate leh i laamte biakna tawh ki-elpuak sak loin zun toto ni. Mikim in i zola sa thei in, a khiatna telin, i nuntakna-ah muibun sak ni. Tanglai-vangilte; puansilh, niikteen aluite, kizepna tuamtuamte, khi-awh taubulhte, bilbahte, kawnggakte, za, leh daktalte, namsaute leh i gam-salute, sakiite dongin zuak nawn kei ni. Haltum sese loa, kepcing ding hi zaw hi.[13] I hoihna te pomsuak in i ki zenlahnate ki puahpha-ni. Ngeina kician a nei te minam kicianHI-A, luahza, inn sung pan mun kipiak kikoih na-in minam picing hihna, kumpi kilam zia hoih hi a, minam lian, minam kician i hihna lak hi. Ngeina cih pen i nuntak pih hi a, nisima i nuntak zia luhek zia, kipi ki ten zia le misi vui zia cih te ahi hi. Tua hi a, khua kimah Zongeina ‘Van te keepna’ (Museum) neih kim huai hi. Mikim in i ngeina vante kem ni, a ki sapna munte ah zang tangtang ni.

            2.4 A Picing Minphuah Kammal Zatna Lamah
Minphuahna leh ki lawh minte tuampian in a nei diak Zomite hi hang. Zomin mah i ki phuah tangtang na pen tangthu ngelhngelh i hi-a, i min pen tangthu hi pahpah hi.[14] Khangkanna a kizom thei dingin, ta upa pasal peuhmah pasal lam pu tawh naumin ki tamsak pha diak hanga, leitung minam dang te neih het loh min le puam limtakin kitap ngeekngeek in min a phuak te[15] ihi hi. Zomite koikoi ah i om zongin, i omna peuh ah Zo min phuak-in, Zo min mah tawh kisam ciatciat ni. Midang te in Chin-in leitung bupah hong theih hangin ei le ei Zomi, Mizo, Laizo, Laangti, Cho, Asho, Khu, Yaw a ki lote ihi hi. I ki lawhna min tatak hong ki theih zawh na ding Lia le Tang, Nu le Pa, Pi le Pu cih te zang toto ni. Zongeina minphuahdan i tap Pu leh Pi, te mintawpna tawh kitapsak in namdang te a eng se kei ni. Mintap nei a min phuak i hih manin ipi, ipu i mintap te mualsuang hi pah hi hang. Ut bangbang mangmin, kawlmin phuak lo in Zomin nei in, Zopau tawh kisam ni. Bang hang hiam cih leh mihing khat a min panin a minam ki theithei hi. Zomite minam picing i hihna hong lak gige khat in i Zomin neihna hi-a, i min in Zomi i hihna hong langsak hi.[16] I Zomin tang a mikang min khawng zat pen minam picin vaihet loa, mi hong theih na ding a i zat min pen Zomin mah hi leh hoih hi. Zomite minam picing i hihna lak in Zomin mah phuak in, Zomin mah tawh kisam ciatciat ni.
           
2.5 A Picing Sepkhopna Lamah
Nuntak khuasakzia haksak manin, muntuam gamtuam ah Zomite ki thehthang mang khin hi hang. Zogam ah i teng kim thei kei zongin, Zogam ading pang khawm thei hi hang. Hun saupi nuntak nading muhsiam a, thu khual Zomi i hih ding thupi hi. Zomi te lapsang ding, minam manthan loh nading  kem cing in, ei hangin Zominam dai sak kha kei ni. I gam in teen na ding a a nuam gamhoih, gam nuam i suah sak ding nang leh kei mawh puak hi a, i gam nuam in an ki kham leh mundang ki lunggulh, ki lal nawn lo ding hi. Lampi te a nop semsem nang, electric tawh na sep nate beh lap a i sep ding tam mahmah lai hi.  Zogam puah a zun ding pen i minam bup i vaipuak (national responsibility) hi a, amoi, a ham, ulian, uneu in i sep ciat ding ahi hi. America gam pen American-te in puah uh a, Germany gam pen German-te in na puah uh hi. Leitung gam thu pi te’n amau gam ciat na puah uh a, kum tampi na puah tohtoh, a na zun tohtoh uh ciangin tu dinmun tung thei pan ahih lam uh phawk in ei Zomite’n zong i Zogam puah in zun ni.[17] Zomi te’n Zogam i puah kei leh hong puah sak dingin kua mah hong kuan lo ding hi cih phawkin i gam puah khawm ni. Mimal kimin i phawk ding ah, Zomi leh Zogam khantoh nading pen nang leh kei tung pan a kipan ding ahi hi. Zomite leh Zogam hong lamto ding pen mi namdang te hi masa lo a, mi namdangte’ hong sep sak ding ngak ding zong hi lo hi.  Zomi a kilaptoh ding i ut leh nang leh kei in i lungsim ngaihsutna, i khuasakzia, i luhekzia leh pilna siamna tuamtuamte i khantoh a kul ahi hi. Sepzawh lai-in bangmah sep sawm lo a, sepzawh nawn loh teh na hoih a sep sawm pan Zomite hi lo-in i gam khantoh na’n g tu mahmah in mapang khawm ciat ni.

            2.6 A Picing Lungsim Neihna Lamah  
Zomite minam picing i suah nang a picing lungsim neih kul pelmawh ding hi.  Pasian in mihing abawl cil in Zomite zong hong bawl hi. Zogam Christian gam (Christian state) ci-in, hong ki thei mahmah na pi-in, i lungsim puak zia leh i kampaute a Christian vai het lo i ki puahphat ding tampi om hi. Gtn. A malneu, aginalo vokte Zovok i ci a, Ak a neu tata Zo-ak peuh ci-in, mihing a melsia tata Zomeel cih bangin guallelh na vive i pau kha hi. A hoih khempeuh namdangte piapia lo-in ei le ei ki pia, kipahtawi ni. Minam picing i suah na’ng, i pianpih lungsimneu neihna leh i lungsimpuakzia hoihlote nusia in, nampi lungsim nei ta ni. Keileltak keenkawm, guamkawm, khuata lokho innkuan pan khangkhia cih sanziate phiat ta ni. Ei leh ei ki suangtak niloh kei ni. Gam khangto te’n nampi lungsim na nei uh hi. Israelte bangin ko “Pasian teeltuam minam,” hi ung ci ngam uh hi. Japanten ko, “Pasian pan khanggui kizom suk minam,” hi ung ci uh, Germany te bangin ko, “Minamlian, mipilnam, leitungbup a uk ding kumpi nam,” hi ung na ci uh hi. Tua banga lungmuang tak a nuntak, kampau, san zia te-in nampi lungsim neihna hong lak hi. Nam dang te’n a gam uh angtanpih bangin, Zomiten zong Zomi lungsim pua in nampi lungsim nei ta ni. Zomi te hoih lo hi cih kammal peuh mah zang kei ni. Zomiten Zomi mah hoih hi, Zomi mah thupi hi, Zola mah ngaih hi i cih cih ding ahi hi. Zomi ka hi, ka kipak hi cih ding pen nampi lungsim neihna ahih manin ei le ei ki pimuh lel ni. Hih bang dan, nampi lungsim zom ciat ni. Minamdangte tawh liangko kikim in, leitung thu le la piangte tawh hunlap in khantoh khop theih nadingin, Zomi khatciat hunlui mi hihna pan luplapmi hihna, a khangto-nampi lungsim neihna, hunlap ngaihsutnate neih masak ding kul hi.  Nov. 8, 2015 a i kiteel hun laitakin kidemin, kitawng kisel kha ding hihang. Kiteelna man khin ahih manin pumkhat suakin gam a dingin mapang khawm a, kiteel sung a thute gen kikkik se dah ni.  Biakna vai, behvai leh minam vai a hoih bek in zang ni. Biakna-upna dankhat tawh ki deidanna, kipawltheihlohna te kipuahpha ni. Biakna makaiten i pawl kibat pih te bek it kei ni. Kumpi nasemten ei liat sung sawt lo dinga, party ading bek hi lo-in, mipi phattuam nading na tampi sem in, mualsuang hoih tampi gelh ni. I Minam picin semsem na’ng piangthei lo ding cih lungsim te paikhia ta ni. 

            2.7 A Picing Pilna Sinbehna Lamah 
Zogam ading i sepna ah a kisam pelmawh thu khat in, pilna sang sin peh ding thupi hi. Zomi te’n pilna sangin hauhna thupisak zaw, mipilte sangin mihaute thupi muh zaw kha hi hang. A tatak in, pilna kihel lo hauhna, zaliatna te in lengla bangin hong taisan pak ding a, sep leh bawl na-ah pilna tawh kithuahna te bek sawt vei kip ahih manin pilna zong ni. Degree thupi sak lo in pilna tatak ngah in, i degree tawh kituak pilna neih sawm a muhna sang i khai toh tek ding thupi hi. Zomiten pilna sang (Higher Education) i sin ciang; degree sangin pilna leh siamna taktak neih sawm ciat ni. Mipil misiamte bek in gam khangto sak zo a, pilna bek tawh minam kilaam zo bek hi. Pilna bek in nuntaknuam hong pia zo bek a, pilna bek in neihsa vangil, kiimleh paam, ngeina, tatdan hoihte hong kem sak zo bek hi.  Pilna in midang gam leh khangual hong baan sak zo bek hi-a, khantoh na’ng a tawsawn pen in zong pilna bek mah hi. Tua hi-a, Zomi khangno ten sum le pai zon ding masak lo-in, pilna masak zaw ni. Nu le Pa ten zong tate thanek pah sawm lo-in, pilna mah sinsak phot ni. Tuhun tawh kituak pilna i neih kei leh khangkhat ki zekai ding cih phawk in Zomiten pilsilna hanciam tek ni. Ei mite lakah, pilna tawh a kop mipil taangpi taangtate’ muan, mi tampi a huaizo ding makai hoih ki sam mahmah lai hi hang. Pilna nei leng Zomite lak ah a kipilsak hong tawm ta ding a, pilna (knowledge) leh ciimna (wisdom) a thuah khawm makai muan huai tampi i nei ta ding hi. There is no wealth equal to learning.

Thukhupna
 picing, a thahat, a gualzo, thupha ngah leh a khangto minam i suah theih nadingin i ki hanthot nop in, i minam Zomi i hihna it in angtan pih ni. I minam hong picing sak i pau zang tangtangin i lai a picin na’ng puah in zun khawm ni. Picin lam i manawh nading i Zomi ngeina hoihte kem in i zat ding manggilh kei ni. Mite simmawh i hih loh na’ng Zomin phuak in Zopau mah tawh kisam, kiho tangtang ding hi hang. Zomiten i gam i lei, i minam a manthan loh na’ng puah in zun khawm ding hi hang. Gam ading i sep, i bawl na-ah hong nuaikiat sak thei updan leh sandan hoihlo te nusia ni, nampi-namlian lungsim nei ta ni. Namdang te tawh liangko kim a nuntak nuam ah kalkhat i suan toh zawh na’ng pilna kisam a, pilna sang sin beh ding ki sam hi. Zomite thupha hong pia, hong laamsang a minam lian a a hong siam i biak Pasian manggilh kei ni. Ama thupha piak taak dingin gamta, kampau in nungta ciat ni. I Zogam in mi citak kisam a, i gam it ding mi kisam hi. Gam phat tuam na dinga nakpi tak a na a sem ding makai, mipil, Pasian kihta a cihtakna tawh na a sem dingin i gam in nang leh kei hong lamen a hih lam phawk tawntung in picing nuntak na lamah kalsuan ta ni.


[1] Go Za Nang, Zogam Khakhanlawhna leh AG (Kalay: AMC, 2010), 1.
[2] Shem suante in Canaan gam leh Mesopotamia kikal gam tengah kizel uh a, Ham suante tawh minam-sisan kigawm pawl teng, Hamito-Semitic kici uh hi. Mongolia gam dong a tungsuaksawn pawl teng Mongoloid minampi kici uh a, Tibet gam tawn a, Burma (Kawl) gam a zuansuksuak pawl teng Tibeto-Burman kici uh; hih minampi sungah Zomi-Chin mite minam hiang lian khat ahi hi ci-in Rev Dr Pum Khan Nang in Minam khenna sungah na ciamteh hi.
[3] Ngul Lian Zam, “Leitung Beidong Zomite,” Zolus Journal No. 13 (2009): 36.
[4] Zam, “Leitung Beidong Zomite,” 36.
[5] S. Gin Sian Mung, “Census Nungah, Zomite Kipumkhatna tawh, I mainawt Zawh Nang, Deih Pulakna,” Zolus Journal No. 18 (2014): 165.
[6] Jamang Ngul Khan Pau, Zomi in Diaspora (Siloguri: Bibhawana Prakashan, 2013), 15-16.
[7] Mung, “Census Nungah,” 165.
[8] Kam Khaw Thang, “Zomi Le Christian Biakna,” in CMBC Kum 100 Cin leh Biakinn Honna (Tedim: CMBC, 2010), 231.
 [9] C. Thang Za Tuan, “Leitung Beidong Zomite,” Zolus Journa l No. 13 (2009): 32.
[10] S. Dal Sian Pau, “Khangno le Ka Sunmang,” in ZYA Tin Jubilee Magazine (Kalay: ZYA, 2015), 60-61.
[11] Sing Cin Thang, “Zolai Thei Kei Kha Zenzen Leng,” in CMBC Kum 100 Cin leh Biakinn Honna (Tedim: CMBC, 2010), 218.
[12] Tuan, “Leitung Beidong Zomite,” 29.
[13] C. Thang Za Tuan, “Hunthak Ah Ngaihsutna Thak,” Zolus Journal No. 16 (2012): 38.
[14] JM Ngul Khan Pau seminar on Christian Life in a Metro City on 12th Oct. 2014 at World Gospel Hope Church, Bangalore organized by ZCF.
[15] Zam, “Leitung Beidong Zomite,” Zolus Journal, 29.
[16] Dal Lian, “BangTan Vei Zomi Hi Ding?,” in H.Gin En Cin and others (eds). Tedim BEHS No. 1 Golden Jubilee Magazine (Yangon: MBC Press, 1999), 296-297.
[17] Lian, “BangTan Vei Zomi Hi Ding?,” 297. 

References :
Ø  Go Za Nang, Zogam Khakhanlawhna leh AG. Kalay: AMC, 2010.
Ø  Pum Khan Nang, Minam Khenna.
Ø  Ngul Lian Zam “Leitung Beidong Zomite,” Zolus Journal No. 13 (2009): 36.
Ø  S. Gin Sian Mung, “Census Nungah, Zomite Kipumkhatna tawh, I mainawt Zawh Nang, Deih Pulakna,” Zolus Journal No. 18 (2014): 165.
Ø  Jamang Ngul Khan Pau, Zomi in Diaspora. Siloguri: Bibhawana Prakashan, 2013.
Ø  Kam Khaw Thang, “Zomi Le Christian Biakna,” in CMBC Kum 100 Cin leh Biakinn Honna. Tedim: CMBC, 2010.  
Ø  C. Thang Za Tuan, “Leitung Beidong Zomite,” Zolus Journa l No. 13 (2009): 32.
Ø  S. Dal Sian Pau, “Khangno le Ka Sunmang,” in ZYA Tin Jubilee Magazine. Kalay: ZYA, 2015.
Ø  Sing Cin Thang, “Zolai Thei Kei Kha Zenzen Leng,” in CMBC Kum 100 Cin leh Biakinn Honna. Tedim: CMBC, 2010.
Ø  C. Thang Za Tuan, “Hunthak Ah Ngaihsutna Thak,” Zolus Journal No. 16 (2012): 38.
Ø  JM Ngul Khan Pau seminar on Christian Life in a Metro City on 12th Oct. 2014 at World Gospel Hope Church, Bangalore organized by ZCF.
Ø  Dal Lian, “BangTan Vei Zomi Hi Ding?,” in H.Gin En Cin and others (eds). Tedim BEHS No. 1 Golden Jubilee Magazine. Yangon: MBC Press, 1999.




Leigelh Kham Sian Muang, Tuilangh AG tawh kizopna ding :
Email. ksmuang16@gmail.com  
Ph: 09259154211, .
Facebook: Drkham Sianmuang    

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: “Zomi : Minam Picing Hihna Lamah” Agelh ~ Kham Sian Muang, Tuilangh AG Description: Rating: 5 Reviewed By: Cinpu Zomi
Scroll to Top