728x90 AdSpace

Hot
Menu
Zon-ol na Donate

Latest News

Zomi Numeite Tavuan. Agelh ~ Rev. Dr. Mary Hau Lun Cing

Zomi Numeite Tavuan.
Agelh ~ Rev. Dr. Mary Hau Lun Cing
Zoliate : Snowlay Ddym, Esther Sian Ki Cing, Nuam Bawi Samte

Numeite tavuan tawh kisai in Laisiangtho bulphuh in kikup ding thupi kasa hi. Pasian in leitung vantung leh na khempeih abawl khit ciangin mihing pen ama lim (image) leh ama meel (likeness) sunding in hongbawl hi (Pian 1:26-27). Numei pen a pasal huh dingin bawl aa, amautegel pen Pasian bawlsa na khempeuh tungah uknaza aneiding in tavuan na pia hi. Hih thute limtak ih ngaihsut ciangin numeite tavuan nam li in kimu thei hi.

I. Numeite in eimah leh eimah “Kua kahiam? ” cih (identity) ihkitel ding kisam masa pen hi.
Numeite in Topa Pasian lim leh meel asun ihhihlam ihphawk ding thupi mahmah hi (Pian 1:31). Tua ahih man in numeite in nisial limlang mai ah ihkipuah siel un, “Pasian lim leh meel sun kahih man in hoih mahmah ing” cih den ding tavuan ihnei hi.

Pasian lim leh meel sun nahihlam phawk khalo in nang leh nang na kihawmthawh denkha hiam? “Ka mel hoih kei, ka form maan kei, ka ci vom lua, thau lua ing, tom lua ing, kasam mahmah hoihsa keng” cih bang in naphunphun kha hiam? Tuabang aa naphunphun leh nang hong bawl Pasien akosiasia, agensiasia nahi hi.

Tuhun nungakte (nupi pawl khat zong) in eite hong piangsakpa, Pasien tawh kisut ding saang in model nungakte, mintami (rif;orD;)te peuh tawh kisut ding hanciam in, Pasian atheilo, azahtaklo, leitung nopsak na abulphuh nungakte kizepzia, kipuahzia te zuinuam uh hi. Asawt teh nikten puansilh aa kipan, vanzat inn leh lo dong na khempauh ong enguh aa tua nate ngah thei nading ahanciam luat nalam un, Pasian thuman thutak lampi pan hong pial in leitung deihgawhna, cilehsa lunggulhna, sungah (IJn 2:15) hongkiasuk uh aa, zumhuaina, dahhuaina mun tung thei uh hi.

Numei pawlkhatte in Zomite lak, Pasian thu-um mite lak nangawn nuamsa thei nawnlo in Pasian theilo, milimbiate peuh tawh kizui kawikawi in Pasian kiangpan gamlapi paikhia uh hi. Bangzah tak in dahhuai hiam? Zo mi numeite aw, ei hongbawl Pasian hinapi, dawimangpa tawh ihkisut khak loh nading kidawm ni.

Tua ahihman in numeite tavuan amasa pen leh athupi pen in, ” Pasian lim leh meel sun dending, keem den ding hihang(Ephet 5:1-2). Tuabang ihgen ciang in numeite kipuahlo ding, khantohnate pampaih ding cihna hilo in, akilawm akituak ciang khinkhai thei aa, Pasian mai leh mite mai ah akilawm ciang ihngaihsut theihding thupi kasa hi.

Tuabang ahih kei leh, koici bang in Pasian lim leh meel ihkem zo ding hiam? Nupi ihhi zong in, nungak ihhi zong in eihong piangsakpa Pasian mai ah kiniamkhiat in, ama pahtak nading in ih nungta ding hi. Nakhempeuh ah ihTopa Pasian pen amungpi in koih den in, ama deihte deipah in, ama deihlohte ihdeih kei ding hi. Tuabang aa Topa Pasian ihzon ciang in ihlungsim deihnate amahmah in hong kicingsak ding aa, Topa lim leh meel asun tanute ihsuak ding hi. Topa Pasian tawh ihkisut toto ciang in, leitung nate hong vukcipna pan suakta in, ihlung zong hong nuam toto ding aa, Pasian eitung ah honglungdam ahihman in ihsep ihbawl na khempeuh mapai in ihdaupai semsem ding hi.

II. Zi in Pasal huh(support )ding tavuan nei hi
Pasian in numei masa Eve abawlna thu in ” a pasal, Adam ahuh ding” ahi hi. Hihpen Pasal nei numei(Zi)te in ihseploh aphamawh Pasian hongpiak ihtavuan ahi hi.

Tua ahih leh zite in Pasalte bangcibang in huh thei ding ihhi hiam? Laisiangtho bulphuh in ihngaihsut ciang in zite in apasal thu mang leh, Pasalte ahuhtheihna lianpen hi ciin ka ngaihsun hi. Zite in apasalte thuman ding pen Laisiangtho deihna hi.(Ep. 5:22-24).

Nupi pawlkhat in apasal ukna mang cihthadah amau ten apasalte uh uk nuam zawsop uh hi. Innkuansung thuvaihawm makai ding pen pasalte hizaw hi. (Meigong te sim loh). Zite pen apasal sang in pilzaw taleh, cidam zaw taleh innkuan lutang pen pasal mah ahi hi.

Nupi pawlkhatte leuleu in ” Ka pasal in hong it mahmah ahihman in kei thuthu in kai ning” ci-in lehtat taleuleu hi. Nupite zite aw ihpasalte hong-it hong muannate ahilo lam in zang khial kei ni. Banghang hiam cih leh tuabang gamtatna in Pasian thupiak apalsat ihhi hi.

Pasian thupiakte ihzuihciang in Pasian kiang pan hongpai thuphate ihngah theipan ding hi. Tuabang hilo in Pasian hong thupiakte ihzuih kei leh ihinnkuan sung ah ihngah ding thupha, “cidamna, lungnopna, neih le lam, khantohna ” cihte ihtaan khading uh hi.

Ahizong in zite thuak zawh loding zah aa gilo, khut zang den keei a kihtak huai pasal pawlkhat omzel aa tuabang pasal aneikhate in pum thuak mawk ding hilo in, beh le phung, pawlpite tawh hoihtak in kikum aa thuhilh ding aa ahihzawh kei leh kumpi upadi bang aa sep huaite septoh ding hong kul ding hi.

III. Zi (numei)te in tate kep ding tavuan ihnei hi.

Nupi (zi) te in tate hoihtak aa khantoh sakding tavuan lianpi ihnei hi. Pasal ten tavuan neilo cihna hilo in numeite tavuan lianzaw icihna ahi hi. Ihtate Pasianthu leh gamtat hoih, lungsim hoih hongneih zawh nading in hong pattah sak ding pen, saangsiate, sunday school siamahte bek peuh hilozaw in ei “nute” mah athupi pen ihhi hi.

Nupite aw, nangman zuauthu gengen napi, tate kiang ah “mi khem ken” nangmah thadah napi tate kiang ah” ki zen un”, nang ma’n mite gensiasia napi natate kiang ahi “mi gen sia ken” cihmawk pen thu hilo hi. Na inn sungah nangmah mah in Laisiangtho sim ngeilo, thungen ngeilopi, tate kiang ah”Pasian zahtak un, Laisiangtho mun lotngah un, thungen den un” ci aa sawl pen thu mahmah hilo hi. Ei Zo paunak ah ” Sakhi api san, ano san” ci ahihman in nupite in tate aading limhoih i lah ding tavuan lianpi ihnei hi.

Nupi(zi)te in tate kepding, cinding tavuan ihnei hi. Pawlkhatte in atate donlo khoilo in, milak ah khahzau in mipite nawngkaisak den mawk uh hi. Naukep pen pasalte tavuan hi zenzen lopi, apasalte uh peuh naukem sak cingsak in amau tu ziauzuau uh hi. Tua pen mibatna, picinna bang in ngaihsun laidep uh hi. Tate limtak aa kem nuamlote pen Pasian thupiakna adonlote mah ihhihlam ei nupite’n phawk in kipuahpha ni.

Nasem aa kuankhia ahilo, inn-aa om zite in napasal anasepna pan hongciah ciang in gim mahmah, khat veivei nasep asenpii loh hun ciang in napasal naucing peuh, nasem peuh in sawlkei in. Phun daidai kei in. Atawl dam theih nading in tuivot, niangtuite pia in maitai tak in navaidawn den in. Tuabang nahihteh napasal nang tung ah hong lungdam ding aa, innkuan sung hong nuam in Topa Pasian in thupha hong pia ding hi.

Ei Zo mi numei pawlkhat leuleu, Pasianthu kin lua, uklua cipong in, a inn ah limtak om ngeilo in, apasal, atate leh a-innsung vaiteng nusia in vakvak mawk uh hi. Antang, thungen, thuhilh cipong in ama innah om ngei lo in mi-inn teng ah vak kawikawi in ama tavuan taktak pen thudon khalo uh hi. Zo mite ihpaunak sung khat ah ” Pasal vak hat in sum leh pai mu aa, numei vak hat in thusia mu hi” na ci hi. Pasian in nupi (zi)te pen inn leh lo, tu leh tate tung ah ihsep ding aa hongpiak tavuan pen sem lopi in Pasianthu gen, thungen aa vakvak ding in hong deih masa locih phawk tawntung ni.

IV. Numeite leh apualam aa nasepkhiatna
Numeite leh apualam aa nasepkhiatna icihciang in leitung pilna leh siamnate zangkhia aa, mi manpha suah nading cihnopna ahihi. Piancil 1: 26-28 ah Pasian in Adam leh Eve leitung ukna zaa napia hi. Leitung uk cihciang in, leitung leh leitung aa om na khempeuh anei (possess)pen Pasian hi aa, mihingte in tua Pasian neihsa leitung pen Aneipa deihna tawh kituak aa uk ding (steward nasempi) te ihhi uh hi. Tua nasepna sung ah pasalte sepding aom mahbang in numeite sepding leh septheih nangthu (right) zong Topa in hongpia hi.

Tuhun ciang in Pasian hehpihna tawh pilna, siamna, theihnate khangto semsem in Pasian in hong lamto ta hi. Numei te’n amau pilna leh siamna zui in apualam nasepna hitaleh tavuan lian pipi hitaleh asem tampi ih omtahi. Nidanglai in Zomi numeite pen laitheilo in lokho ding bek, inn nasem ding bek in kizang hi. Ahizong in tuhun ciang in leitung pianzia te hong khangto in numeite zong pilna, theihna kibehlap to bek thamlo in tuate zontoh thei nading lampi zong kihong seemseem ahihman in lungdam huai mahmah hi.

Tuatawh kisai in, tuma kum(30) laikhawng aa kipan nitumna gam lam pan in “Feminism” (Numeite bulphuh ngaihsutna) kici khat hong piang khia in leitung mun tuamluam hongzel hi. Feminism pen akizat zia nam tuamtuam aom hang in nampi(2) in kikhen thei hi. Khatna pen “Biblical Feminism” (Laisiangtho tawh kituak aa numeite aading ngaihsut na) hi aa, anihna pen “Secular Feminism” (Leitungzia bulphuh aa numeite aa ding ngaisutna) ahi hi. Secular Feminism a-uangpaite in na khempeuh ah pasal leh numei kizakim hi cih nakgen uh aa atawpna ciang in zite in pasalte thusim nawnlo, demgawp in, pasalte sep khempeuh sem nuam in numei ahihlam nangawn uh mangngilh uh hi. “Biblical Feminism” (Laisiangtho tawh kituak aa numeite aading ngaihsutna)te in ahih leh Pasian lim leh mel ihsutna leh Pasian in leitung nate tung aa ukna hongpiakna ihbulphuh hi. Atung aa No.I , aa ihgente pen Biblical feminism pan aa hong pai ngaihsutna ahi hi.

Kong it Zo mi numeite aw, Pasian hongpiaksa ihpilna ihsiamnate tawh Pasian in eisepding aa hongpiak tavuante ihsep tohtoh ding pen Pasian deihna ahi hi. Tuhun ciang in numeite in nasep lian pipi, zato siavuanpi, sitni, engineer, saang siapi cihte ah asem ki-om khinta aa biakna lam ah zong Laisiangtho sang sia, Pawlpi kem Pastor, missionary, evangetist, cihte zong numeite in semta hi.

Tua ahih man in ei numeite in Pasian hongpiak ih”talent”te phumphum nawnlo in Pasian hong deihsakna teltak in kansiam in ahoih pen, asang pen ihtun nading ih hahkat ding hi. Ih innkuan, ih minam, ihgam ihlei apuoh zote ihsuah zawh nading leh Pasian min athangsakte ihsuah nading in Pasian in hongdeih hi.

Tuabang ihgen ciang in, midangte simmawh in, thangpaai in vadem gawp ni cihna hilo zaw in Pasian hongdeihsakna tel in, tua ei aading aa Pasian hongpiak ngimna hoih vissionte ihtunzawh mateng hanciam ni cihna hizaw hi. Tuabang ihtun zawh nading in, ei leh ei kineumuhna, thadahna thaneemnate Topa min tawh, paaikhia in cihtakna, thumanna, hanciamnate tawh ihsep nak leh Topa Pasian in hong gualzawh pih ding hi. Zuauna, zulhtatna, hazatna, ki-elna leh ci leh sa lungsim khempeuh paaikhia in lungsim hoih, lungsim siangtho tawh Pasian en gige in ihnuntak nak leh Pasian in asangpi ah hong lam toto ding hi. Zo mi numeite a etteh huai, mipil, misiamte ihsuah nading Topa Pasian in thupha hongpia ciat tahen.

Source :

Zo Magazine
AD 2000.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Zomi Numeite Tavuan. Agelh ~ Rev. Dr. Mary Hau Lun Cing Description: Rating: 5 Reviewed By: Cinpu Zomi
Scroll to Top