728x90 AdSpace

Hot
Menu
Zon-ol na Donate

Latest News

Zomi-te Pilna lamah koi bangin hanciam Khawmding? Agelh ~ Pau Sian Lian

Zomi-te Pilna lamah koi bangin hanciam Khawmding?
Agelh ~ Pau Sian Lian


Minam khat khantohtheih nading le picin theih nading in pilna pen a thupi pen ahih lam a kua maciatin I theihsa tek ahihi. Pilna zon dingzong I ki hanthawn denhi. Thatang nasepna te ki nusia in leitung hauhna le setkhuak pilnate hong khauhpai semsem teh pilna sin zaw ding maw, anngawl zaw ding cih nopphial dinmun hong suak tahi. Zomi te-in pilna I zonna-ah koi bangin hanciam huai, kitha piak huai hiam cih naupang no gual a kipan minam bup huam dong kiging a thasan khophuai kasak thute kong sungkhia nuamhi.

Neutung pan ki pattah siamna
Pilna I cihteh bul pat mahmah le hang naupang hun lai pekpan thu ngaihsun tawmtheihna (critical thinking) neihtheih ding kisam masa penpen hi. Tua thu ngaihsut tawm theihna neihtheih nading in lampi tampi lakpan hanciam huai kasak khat-in Zogam a om khua sim ah makai te in kumpi sangkhak sung naupang kum 10-14 kikal (tan 4-8 ) cihdan te ading siamna lahna (talent show) kumsim phial neihsak huaihi. Lasakna, lamna, kimawlna, limsuaihna, laigelhna, thukinialna (debate) cih a kipan a motor no bawlciang na ngawn uh lahtheih nading geelsak lehang naupang note-in amau suahpih Pasian piak a talent, siamna, kivak nate uh hong theikhia pah ding uh-a, a innkuan pih le sia/siama te in zong naupang te neutung a kipan koicih pattah suakding cih lungngai theipah ding uhhi.

Critical thinking lam khuaktat sak in pattah nading in amau gual tekah (gentehna, tan 5 gual, tan 7 gual) thu kinialna (debate), laigelh kidemna (essay contest) te kidem sak in tua zong amau gen, gelh ding thulu te-in thulu neu nengneng hilo-in, “Myanmar president hileng bang sem ding?”, “Zogam puahkikna-ah bangteng kisam?”  cihdan a khuak zang-a ki limgin kul ngiat thulu khauhpaite tawh kidem sakding kisam hi. A khatna ngahte zong pahtawina khauhpai sak in mikim in a lunggulh ding, tua lunggulh manin demnop na lungsim khang in lai sim-a, thu-le-la a kan pah tangial ding uh namte piak huaihi. Genteh na-in sang kum khat ai scholarship, khuamuh nading deihsakna tawh Malaysia/Thai/ Singapore ciang zinsak ek ding cihdan geel zo lehang tua ading kiginna hangin kumpi sang-a kilim sin manlo leitung pilna tampi theihlawh pah ding uhhi.

Naupangte pattah nading in Zogam a om khua kim-ah library khat peuhmah omsak zawh nading cihte a kipan, inn simin Zolai, kawllai le mikang lai-in kihawm thukizakna (newspaper) lak hamtang ding kisam hi. Naupangte tawh kimaingap sak limlim ding kisam hi.

Nuntak kivakna
Sum le pai hamsat man in tan 10 dong tunglo/gualzo lo te ading le, university le college tuamtuam te-a kihilh thute a lunglut khollo-te ading a kipan siamna kician sin nuamte ading in kivakna pilna sinna sang (vocational training) geelsak huai pelmawh hi. Gentehna- sammet dan, mehhuan dan, meibawl dan, innlam khutsiamna, setbing/saikel puahdan cihte thupi mahmah hi. Hihte zong pilna limci mahmahte hi-a, hih pilnate neile hang leitung bup koikoi I tung zongin kizang theihi. Vocational training tawh kimei zomin a lunggulh huai mahmah khatin Zogam a om khua tuamtuam pan koimah a lal sawm lo khuangak dingte (khua khat pan numei khat-ta ahi zongin) cidamna kepna (nursing training) Tedim ah hon sakin kha 3/6 bang pantah in vanzat (si tehna cihdan, first-aid kit)te guan zo lehang a khua ciat vuah phattuam pih mahmah in siavuan/siama te tun zawh pakpak lohna khuate phadiak ah manpha mahmah dinghi.

Vocational training tawh kisai pen gambup makai Aung San Suu Kyi in 2010 kum khit gamdang a pusuah masak penpen hun-a kipan tudong mah Myanmar gam khangnote ading kisam pen khatin vocational training hi, ciniloh hi. Ama meekuang luina Kawhmu khua-ah zong vocational training honsak pahhi. USA gam a kipan Switzerland, Germany, Denmark lamte ah zong hih pilnate mah thupi sak mahmah uh-a, neu muh hetlo uhhi. Gam zawng pha mahmah diak Zogam ah zawnna khiapna ading in hoh vocational training in a kiallap pen khadiam ka cihi. Khuahun siatna hangin khua bupin kituah liang dinmun tungte, nuntak na kithak patte zong mau le amau kivak tawm zawh nading (ngasa pialo in nga siahna pilna piakna) in vocational pilna tawh pattah huaihi.

Zomi Khangno khempeuh-te sinhuai
Zomi khangno te tan 10 gualzo in university a tung peuhmah in ei ukna tek tawh kituak in leitung bup ah kitheihpih, kisang (international recognized) pilna te ahi IELTS, TOEFL, LCCI, GCE-A/O, China pau, Japan pau, France pau cihte sin-in certificate le mat hoih te mah tawh gualzawh nading hanciam huai mahmah hi. Hih pilna te sinna hangin a kimu thei pah hamphatna honkhat a, a masa penin Myanmar gam sang te ah kihilh pilna pen niam mahmah ahih manin ei omna gam pan gam khangto sate pilna I ciapnop leh, I batzawh nop leh hih pilnate sinna tawh kidelh theihi. IELTS, TOEFL, GCE cihdan te I sinteh mikang lai siamlawh bek thamlo-in a sung-a kisin thute mahmah tawh zong kipil lawhhi.

Hamphatna-nihna in gam sungah na sepna tawh kivak sawm, khasum kician a deih peuhmah in hih pilna te neihloh phamawh a, University pan a kingah degree khat bekin hong vak zo nawnlo hi. A tawpna-ah tu laitak leitung bup gam tampi-in Myanmar gam mite scholarship tuamtuam kipia ziahziah ta in hih certificate te kisam pelmawh tahi. Scholarship tuamtuam te I siauhteh pum pil ing cihtawh kingah lo-a, I sinsa pilna te hih certificate te tawh kilak kul hamtang hi.  

Makai dingte pattahna
Gam sungah university mankhin, kah laitak khat pilna lam ukin, mailam hun ading lamet huai nakleh kipawlna tawh a hizo pah kei zongin a innkuan/bawng/tanau te in tua nu/pa pilna sinna zop theih nading panpih suak ding kisam hi. Ei gam sang pilna lam a khangto zaw gam vengte kiang ciang ahi zongin pilna sinbeh theih nading in hanciam pihna ahihi. Sawm taktak lehang South East Asia gam khat peuhpeuh (Thai, Malaysia, Philippines, Indonesia, Singapore) gamte ah pil sinna zom dingin ei thu in kipuak zo lua mahmah lelhi.

Kei mahmah zong Philippines ah development tawh kisai sang ka kah lai-in ka lawm Hakha/Falam lamte amau innkuan, tanaute panpih na tawh gamdang te scholarship ngah masak sese lohhang MBA, engineering, nursing, agriculture, political science kah zo lel uh. Tu laitak in zong Japan lai sin dingin sanggam Hakha lamte Japan ah tanau sung kipanpih natawh hong tung nainai uh-a nidangteh Myanmar gam a om Japan company te-ah amau mahin panmun na neiding suakta hi. Zomi te in zong hihdan in I kipanpih keileh midangte ukna nuaiah ki-om suak dinghi. Sumtuhna (investment) na lak-ah a gah kimu pah lo napi sawt vei a kikhom pen-in mihing te sungah tuhna (human capital investment) a hihi.

Minam bup huam Nasepna
Zomi bup huamin I etteh minam vei-a kiphuan kipawlna tam mahmah ta-a tua lak ah a kisap beh pawl khat-in gam tuamtuam ah scholarship siaunuam, sang zom nuam, recommendation kisam te a zon pih ding, information zonsak ding le grant tuamtuam siau nuamte a panpih ding technical support team dan zong I kisam mahmah hi. Khangnote le makai te a khawnkhong in huhna piazo ding think thank group bang khat neizo in panpih zo den lehang tampi kikhan beh lai ding hi. Scholarship a pia kipawlna, sang naupangte sum leitawi piakna tawh a panpih kipawlna cihkhawng zong lunggulh huaihi.

Gambup huam in khantohna
A tawpna ah gambup huam in gen ding hile hang lungngaih huai kasak tu laitak thu piang khatin “Make America Great Again”, cih lungtup a nei Donald Trump in president ding ahih lam kitheih khit phet in ama zum-ah leitung ah technology lam a madawk Microsoft, Amazon, Apple, Facebook company te a kipan setkhuak pilna lam a makai lianpite (silicon valley leaders) te kimuh pih in na sepnate uh mazan theih sem sem nading in kong panpih dinghi, cih kamciam piakna le thu kikup pihna nei hi. Mipil te genna-ah technology manlan dan pen mihing te  maingapzawhna (human adaptability) khengval ta hi, ci uhhi. Tua ahih manin pilna nawh sin zaw inla, gam makaih zong piltei semsem zaw in (learning faster and governing smarter) cih hun hong suakta hi. 2016 bei kuan-in Aung San Suu Kyi in Singapore ah va zin-a kum 20 sungin na gam hauhna uh hong makhelh ding hi-un va cigiap hi. Tua dan dinmun tun nading in technology lam ah 100% tha I san keileh piangzo ngei lo dinghi, ka cingam hi.

Thukhupna
Gam le minam khat khangto in a khauhpai semsem nading in technology siamna mah in thu hong gengen tahi. Tu laitak gam sung gam pua, leitung mun tuamtuam a tung Zomi khangthak te-in sangkah na-ah Zogam mah I mitkha-ah koih-in gam khangto sate bansak zo ding cih ngimna tawh I sin kul-a, engineer pilna, IT lam pilna le computer lam a sinte in zong I sin pilna tawh mipih te koicih lapsang ding cih lungngaih det ding kisam hi. 


###############################################

Laigelh Siapa in Zomi eLibrary/Laibusaal ading in Phalna ahong piak ahi hi.


Source:
from:   Lian
to:        Cinpu Zomi <cinpuzomi@gmail.com>
date:    Mon, Jan 16, 2017 at 11:07 AM
subject:            Article khakna
mailed-by:       gmail.com


Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Zomi-te Pilna lamah koi bangin hanciam Khawmding? Agelh ~ Pau Sian Lian Description: Rating: 5 Reviewed By: Cinpu Zomi
Scroll to Top