728x90 AdSpace

Hot
Menu
Zon-ol na Donate

Latest News

ZOMITE KHAN KHIATNA. Agelh ~ Thang Khan Dal

ZOMITE KHAN KHIATNA.
Agelh ~ Thang Khan Dal

Photo credit : Thor Thorn
Amun : Sakollam Veng, Myoma Veng Tedim Khuapi.

I. Minam min.
Zomite khang tang thu a kan ei mi te sungah tampi ki om a ,a ki bang lian omlo mai hi.A hang in I pu I pate khangin lai ki neilo  ahih man in kam gen sawn tung tawn in a ki kan ciat a hih man in ki bang theilo kha mah ding hi.Lai tawh limtak a ki ciamteh ih Laisiangtho sung na ngawn ah Topa Zeisu khan khiat na khang thu at na Mathai leh Luka sungah,kibang lilian leh kilawm peuh mah napi khanggui zopna a mi min mahmah khang ki zop na-ah kibang lo mawk hi.Tua hi-in ei lai tawh kop lo te a dingin a baih lo ding mah ahihi.Ahizong in ih kan na tung tawn in ih muh na ciat at ih hih mah bangin khial hi man hi cih sang khang kizop na et theih ding a ki gual hi cih ciang nga ciat lel in hi leng vaiveng pen lel ding hi.Khang gui ih zopna ah unau pipi khang a ih zop khak zong a om theih mah bangin,khang gui a zop ding kimlai unau ih suah zong om thei lua mahmah ding hi.Tedim gam sung leh Tonzang gam sung a teng khempeuh ZO suan hi hang ih ki ci ciat hi.Pu pa khang pek a ki pan ZOMI hihang na ki ci uh hi.Kawlgam ah  Kum 2014 kum March kha bei kuan pan ni 10 sung khawng misim na ki nei a ,nidang a misim mawkmawk tawh ki bang lo in,minam code a omsa a om mah bang in ZOMI cih minam code lian pen na om lo hi.Hih thu  ih et kik ciang in nidangin ih vekpi in ZOMI ki ci na pi hangin Code tuamtuam ih neih se, ZOMI na ki cikhin pah lello uh hiam cih huai hi.Na kici lo khin ahih man in a buai pih ih hihi.Ei leh ei ZOMI ki ci na pi hangin ei kilawh na tawh hong ki ciamteh lo a hih man in a huam thei pen a ki lawh na min ih deih pen a khial hilo hihang.Mite hong theih pih ding pulak theih na ih neih hun lai takin ih pulak theih pen a hoih penpen hun a hihi.Bang hangin ZOMI te sung ah code tuamtuam nei se ih hiam cih pen tel nop mahmah lel sam hi.Beh khang gui thu en leng nidang in nam khat bek hi napi nam tam pi ih ki suah na ih tang thu at suk leng hong kilang mahmah ding hi.Tu hun lian a min khat ah ih kigawm theih pen hun hoih khat a ngah ih hihi.

ZO khang thu ih at nop ciangin ZO cih lian pen tang thu sung ah a ki atna ki tam muh het lo hi.Sen Gam ah Zou (Jou)dynasty pan a  kizom suk ihpu ihpa ten tua min na la suk suak a hi tam cih nop huai hi.A hi zong tang thu ki zom suak thei dingin ih kan zawh loh na pen lai neilo ih hih man a hihi.Malaysia ka tun ciangin ei mite pen Sen minam pan a ka khia ih hih luat dan ding kimu thei pha mahmah hi.Pawl khat in Sen minam hi leng a pilna uh a cih tak na uh tawm bek sun ding hihang a ci hel zong om hi.Tu hun ciang ki citak lo lua a hi zongin ih pu ih pa te a citak nam mah na hi uhhi.Ih pu ih pa te cihtak na ah ih ciah kik theih leh Sente mah bangin pil in hau ding hihang.Sen te tawh ih mel kibang bek tham lo in ih lungsim puak zia zong ki bang mahmah mawk hi. Ei mi a tam zaw Sen  Boss te kiangah sem uh a ,ka kikup pih zel ciangin Sente zong nam tampi mah om a,ang sung theih dan pen ei mi lian mah hi uh hi. Ang sung thei uh a hih man in nasep haciam pha mahmah uh hi.Minam dang te khut dawh ngen khawng a tam hangin Sente ki mu khol lo hi.Ei ZOMI te leh LAIMI ih kilam dan na lian pen Sente ih lawh na pan ki bang lo mawk hi.A mau Kawl te a tawh ki bangin Taruk na ci uh hi.Mi nam khat ih hih hang ih kikhen khiat na gam la ta ding a hih na kimu thei hi.Tangthu sungah,Takaung ah a kiteen lai in Turkey ten sim uh a ,Kawlte’n tua Takuang a sim mite Turkish a ki cih uh pen Taruk in ciamteh uh a,Sente in a ngaih sun uh ahihi. Chin Gazetteer vol.1 sungah Chinese a cih pen Kawl ten lo thei lo in Jin(Yen,Sen) ci uh a tua pen mi a cih na hi ci hi.Ih pu I pa te in  Sen mi lawh na pen tu dong ei mi ten Sen ci hi hang.Tua hi in Sen min pen ih lawh na tudong kem ih hih man in Sen mi nam tawh ih ki nai lam kilang hi.Tang thu kan pawl khat in Chin pen Kawl te hong min piak mawk hi kei in Sen minam Chin dynasty pan a khang khia  Chin minam hi hang a ci zong om hi.Sen tang thu ih et ciang in Chinese Invasion laibu sung ah Zou;Han:Wei te pian khiat na pupi pen Chin na ci hi.Tua hi in Zo a hi zong Chin a hi zong Sen  pan a ka khia tuak mah hong suak hi.Eimi te sungah ZO leh ZOMI cih peuh ih buai pih cit ciat hi.Ih PUPI pen ZO hi in Ih ki min lawh na ding pen ZOMI cih ding mah hong hi lel ding hi.Ei Khamtung ah minam min ciapteh na code pen  ih Kawl gam ah a tam pen pawl ih hihi.A hi zong ei guak hilo in Kawl gam mi khem peuh a namnam in code ki nei ciat hi.Kawl kumpi in a ciapteh na minam code min te a nuai a  bang a hihi.

II. Kawlgam sung Minam 135 minte.(Table of 135 counting Races in Burma).
Table.1.          Kachin.           (Six groups in reality).





Kawl gam sung minam tuamtaum te ciapteh na code a na lak lai tak un beh min teng a ki piak mang loh pha dawm lai hi.Hih code nambat piak na ah a na ngaih sun masa te ngimna taktak bang hi ding hiam cih ih theih loh hangin ei leh ei kilawh kisap na zungpi deih uh hi leh kilawm hi.A taktak in Mon te a dan in Khamtung mi teng bang nam khat in ki pia lel leh a hoih pen ding hi zaw hi.

III. Chin hilo in Zomi hihna:
Nidangin ih pu ih pa te in ih pian khiat na mun na ngaih sun theilo uh a hih man in KHUL a piang hi hang na ci in,Tang thu at peuh mah in KHUL om na mun ding khawng geel in Sen gam tua mun ah om hi ci-in a at zong om hi.KHUL ih cih pen suang hawm,Leihawm a cih na hi lel a mun ki ciang tan tuan lo hi.Leitung tangthu ih et ciangin gamsa bangin ih om hun in om nading lam thei,bawl thei nai lo ih hih man in a baih sa suanghawm,leihawm sung khawng ki bel hi lel hi.Ih tuntun na ah suang hawm, leihawm peuh kizong in a ki bel na hi lel hi. Zo  tang  thu kician takin ih theih na ding in  Chin hi hang ci-in a at  (In search of Chin identity, a  study in Religious Politics and Ethnic Identity in Burma.By.Lianh,Sakhong) Lianh Sakhong in doctor a lak na ding a Thuphuang Pulakna(Thesis) sung ah hi bangin na at hi. A khang khang a kiluah suk ngaih sut na pan pulak na ah Chin ii zungpi pen Chinlung ahih keh CinLung hi.ChinLung ii cih pen Khul,khur,LungKua(lung cih pen Haka,Falam ten suang a cih na hi a Tedim pau in ngaih sut na lungsim tua ahih keh ganhing lung a cih na hi-in ih lak na khiat na ki lam dang pah malam hi) cih na hi-in suang hawm a cih na hi.Tibeto-Burman minam teng a nuai a bangin minam kikhen khia hi.



{NB. Hih Lianh Sakhong hong suaih na sung en pak leng behkhat sung na ngawn ah ii ten na mun zui in min ngah mawk ih hih man in,Gentehna in Guite pen Teizang lak a teengte Teizang na kici uh a,Lushei lam a teengte Lushei na suak uh a,India lam a te Paite lah kici,Hmar lah kici,Sim a teeng teng Simte cih bangin kilo  koikoi a,beh khat veve min tuamtuam ngah ih hi lel hi.}
           
Hih a tung a lalkhiat kikhen thang na pen Tangthu lam mipil Dr.ThanTun leh Gordon luce gelh na pan a lak a hihi.Tu laitak a,khang lam Asia mi peuh mah Sen gam pan a lal suk hi ci-in Edmund Leach in ngaih sun hi.(Lehman,1963-22).Mihing khan khiat na lam pilna a nei T.S.Gangte in zong Leach leh Lehman te pulak na thu kim pih hi.Zawla leh Gin Za Tuang in Chinlung pen Tibet gam mun khat hi a cih pen nial hi.Chindwin min a pian khiat na  a kipat na pen Chin minam te ten na mun min tap a piang Chin te lak cihna hi cin SingKhoKhai in pulak hi.(1984:36).Kum zalom 9 hun lai in Kawlte  Kawlgam zang lei laizang ah hong pai suk lai-in Chin te Chindwin gunzang dung ah na teng khin hi cin VumSon in zong pulak hi.Pagan gam a kisiat AD 1295 pan Shan ten Kalemyo a kulhpi a lam 1395 kum kikal a tawm pen kum 100 sung bang Chindwin gun dung Kale-Kabaw zang lei ah nuam tak in kiteng hi.Tua hun sungin Chin te in Khampat khuapi phutin teeng uh hi.Chin tang thu sungah hih Khampat khuapi kisat cil pen a vang neih pen hun uh hi ci-in Mizo tangthu lam mipil Lal Thang Lian leh Zomi tangthu lam mipil M.KipGen in pulak uh hi.Khampat ah tu laitak in Chin State,Mizoram;Manipur,Cachar leh Tripura a  teeng te ukpi khat nuai ah kiteeng khawm in ngei na khat,kampau nam khat kizang hi.(KipGen 1996-39).A hi zongin 1395 kum ciangin Shan te in Kalemyo kulhpi hong lam ciangin Chindwin gun nitum na lam tai 20 bang a gam lat na Chin Hills mual bul ah kum 100 sung bang nop tak a kiten na  ki nusia hi.(Luce a.26-27).Nasep ham gen theih na pan suah tak nadingin mual tungah kikhin uh in Chin New(ChinNwe) khua sat in teeng uh hi.(Cary&Tuck,Chin gazetteer vol.I).Chin te tu lai tak a a ten na uh Chinram ah Shan te in hawl khia hi cih pen tangthu lam mipil D.GE Hall in kip sak hi.(Hall 1968:158).Khampat  khua a nusiat ding uh ciangin Tual Biak na munah Mawng hiang khat suan uh a,hih mawng hiangdawn te in lei a phak kik ciang in tawn tung ka ten nading uh Khampat khua ah kong ciah kik dinguh hi cin Tual biak na bawl uh hi .(KipGen 1996:40-41.).Chin te  hunkhat sung Ciim Nuai(Carey&Tuck in Chin Nwe a at) ah teeng khawm uh hi.A hi zongin CiimNuai mun pen mun kuatoi khat a hih man in an cin nading kicing loh hang tawh kikhen thang hi.Hih a tai khia te pawl khat tulai tak a Falam gam sung LaiLung a cih na ah na teng uh a,tua mun a teeng mite Laimi kici uh hi.(Z Sakong 1983-5).A dang pawl khat Locom khua sat uh a tua pan a piang teng Mizo kici hi. CiimNuai (ChinNwe)pan sak lam zuan te Zomi kici hi.ChinNwe  pen Chin te pian khiat na huan(Eden),tua hun dong Asho;Cho;Khuami;Laimi;Mizo,leh Zomi cin minam min om nai lo hi.Chin pawl khat te zang lei ah tham suak in a diak in Gangaw zanglei leh sak lam Kale-Kabaw zang lei ah teeng uh hi.Tua te pen tu dong Chinpun,Chin-me in ki sam hi.Asho minam te pen Chindwin sak lamah pai to lo-in Pandaung mual kuam ah teeng masa uh a,tua pan in Irrawady sehtak;Pegu mual dung;Arakan mual dung,leh pawl khat te Chittagong mual tung tu lai Bangladesh ciang dong ki tung hi.(Lian Uk.1968:7).

Hih a tung a Chin Minam hi hang ci a pulak na ih et ciang in Chin koi tak pan a ngah ih hiam cih kimu kha lo hi.Ei leh Ei Chin a kici lah om lo ban ah chin ih ngah na kua mah in siang tho tak  in a pulak thei kua mah om lo hi.Chin gazetteer at Carey&Tuck in zong a mau leh a mau Zo;Lai ki ci uh hi na ci ngiat hi.Chin gazetteer min pua zaw zen na pi tua lai bu sungah a ki hel minam khem peuh Chin a kici khat zong om lo hi.`Chin  cih pen Kum zalom 11 leh 12 pawl ciangin Kawl te tawh kizop na hong om ciang in a piang kammal a hihi.(Vumson Zo History 1986:3).Chin cih pen ei pau in lawh,palbawm,seng (basket) cih na hi –in nidang in Kawl ten Ei mi te palbawm pua,seng pua vive a hong mu uh a Kawlpau in “Chin neh lu” hong cih na pan Chin ki ngah cih pen,Mandalay University ah Burmese History department a sem B.Lalthangliana in zong tua pulak na sang thei hi.Professors G.H.Luce leh F.K. Lehman in Zo leh Kawl kisim ki gal neih ngei lo in kilawmta cih na in” achinchin” cih na pan  a piang hi cin pulak uh hi.A hi zong Kawl te tawh a ki sim tawn tung hi zaw a hi man ki leh bulh hi.1950 kum ciangin Burmese encyclopedia sung ah Chin cih pen Lawm cih in hong at uh ciang in tua lai tak a MP sem Mindat te Tunnaung in a ki lawm ding a” nainganzi “a na lep tuah lel uh hi cin na nial ngei hi.Khamtung gam Zomi te sung ah M.A.degree a ngah masa pen Mandalay University ah lecturer a sem HauGo in Kawl te hong ko na kam mal hi-ih Minam min dingin deih huai lo hi cin na at ngei hi.Rev. HauGo in TuiPhum sang mang hong sep lai tak 1953 kum in Thantlang gam Saikah khua ah Haka,Falam,Tedim leh Kale Valley  Baptist Association te pan taangmi kikhop na ah Convention phuat ding vaihawm uh hi.Convention min ding a kikup uh ciang in Rev. Hau Go in Zomi Baptist Convention ci leng a hoih diam ci-in a pulak ciang in,Laimi a deih sia khat dingin ko ZO ka cih uh ciang in a khang to lo mual dawn tam lak a mite ka cih na uh hi cin a nial ciangin Rev.Sang Fen in lim tak in pulak na nei a Zo ih cih pen Chin minam buppi a huam min hi a-ih Khamtung gam mun tuamtuam ah Zo ih cih na om koikoi hi.Kei mahmah zong Zo khua pastor pa hing cin thu cing tak in a gen ciang Zomi Baptist Convention cih ding kithu kim in ZBC phuan khia uh hi.Tu tawm a Zomi a ki deih hilo in ih pu ih pa te kisap na minam min a hih man hi zaw hi.Zomi te pian khiat na khang thu kizom suak in a man lian ih at theih loh hangin Sen gam pan ki lal suk a hih na tangthu lam mipil khem peuh in sang thei ciat uh hi.Chin min pua lian Ei minam sung ah Khamtung mun tuamtuam ka pai hang in amau leh a mau Chin a kici ka mu kha ka thei kha kei hi.Ei leh ei a nuai a bang in agam a mun zui in ih kisam in min ih nei ciat hi.

1.    Tedim; Tonzang; gam a tengte  midang ten Chin hong cih mite ei le ei;Zomi, in ih  ki sam hi.

2.  Falam; Khalkha; Thantlang; a tengte midang ten Chin in sam uh aa, a mau le amua,Laimi ki ci uhhi.A mau Zo cih pen deih lo uhhi.Bang hang hiam cih leh Zo pen a khang to lo ngeina gina neilo , tam lak a teeng te a cih na uhhi a,deih lo uhhi.A hi zongin  pawi bawl na phuisam na ah “Zoram” mah ci uh hi.KhalKha te lak na ah amua  leh a mau’  Lai’ a kicih uh pen  a mau gam lai zang a teeng uh hi in Ei lam ten Sim ih cih dan hi lel hi.Khalkha ten zong Zote cih tuam neih veve uh hi.Khalkha ten Khalkha Zo a neih uh hang in ei mah bangin nam khat veve uh hi in a ten na mun zui in Zote min a pia uh ahihi.

3.    Kanpelet; Mindat; Matupi gam a Chin a kici mite a mau leh a mau Cho;Sho/khxou cih bang in ki sam uhhi.Mangkang te hong sim ma ciangciang  mi ki tawm lai mahmah hi ding a hih man Mindat khua om nai lo hi.Mangkang te hong uk zawh zong a sau vei sim dong Kanpelet khua pen khang lam gam khen khua pi hi-in Mindat pen gal kap te om na bek a hih man Kawl pau in kumpi gal kap om na phual(Min tat) cih na hi.

4.   Paletwa gam a teeng Chin a kici mite a mau leh a mau Khumi;Khami in ki sam uhhi.Ahi zongin Khumi/Khami cih pen Khua mite(Khuano mite) cih na hi a minam min taktak hi lo hi.

5.    Rakhine a om te Masho a ki cih uh pen a kim a pam a ten lim tak sam theilo uh in a sawt ciangin Mru cih min ngah uhhi.

6.    Kawl gam zang lei a teengte midang ten Chin a cih mite a mau leh a mau, Asho na ki ci uhhi.

7.   Rakhine gam; Zogam khanglam nitum na lam leh Chittagong mualtung a teengte midang te’n  a sap uh ciangin “Khyang” ci in sam uhhi.Ahih hangin a mau leh amau Asho in ki sam uhhi.Chin min ih ngah na pen hi pan hi thei pen ding in kingaih sun hi.Khyang a cih uh pen Kawl lai-in a ki at ciang Chin a suak hi thei pen ding hi.Tua lo Chin min ih ngaih na a kician taktak kua man thei lo hi.

8.   Kawl gam zang le kham cin a teeng Chin a kici mite a mau le amau Zou a kici uhhi aa, Kawl lai in a at uh ciangin “Yaw” hong suak ahihi

Hih a tungah ih pulak Chin a ki ci minam te a ciangciang a ih kisap ih kilawh na min te a ki huang a ki zawitawn zaw deuh teng gual leng,Zo;Cho;Asho;Yaw hi teng pen a ki pat cil in ih lawh na ki bang khangel ding hi.Kua a pen a bulpi lawh na ki zom suak hiam cih ki kan zo tuan lo hi.Ih gawm khop nop hang kei a mah a bulpi hi ci nuam tek lel ding hihang.Tua hi in ih pu ih pa te ii ki lawh na ciat ih kep  ih zun ciat ding hi lel ding hi.

IV. Ciim Nuai Khua sat na.
Chin gazetteer volume I sungah Mangkang te kham tung  a tuntun na uhah ih pian khiat na tang thu na dong uh in Sihzang te in hi bang in na sut uh hi.Um gah khat vantung pan in kia suk in ,tua um gah ki tam in Chin Adam leh Eve hong pai khia in a mau te’ Eden huan pen Ciim Nuai khua  cin na suut uhhi.(Chin Adam leh Eve a cih pen Zomi pasal masa leh numei masa a cih na hi.)(Chin gazetteer vol.I 127). Guite in hi bangin na suut leuleu uh hi.Meitung pan in pasal khat leh numei khat kia suk in a tuk na mun pen Ciim Nuai hi cin na suut uh hi.(Chin gazetteer vol.I 140).Ciim Nuai ih cih pen a khiat na a tuamtuam in ki ngaih sun thei hi.Ciim cih pen Zomite in tei-in pil cih na hi in tua khiat na tawh CiimNuai cih min in khiat na hong nei het lo hi.Khang lui pute pate pawl khat in Ciim cih pen ken baal a cih na hi a ci om ahih man in CiimNuai cih pen Kenbaal po na nuai cih na  hi a ki ci pen ki tuak pen kha ding hi.Hih CiimNuai khua pen mual ki khup sin suang ken dang nuai zang mun a hih man in Ciim cih pen Kenbaal cih na hi leh ki lawm ki tuak pen hi.

Kawl zang pan in 1295 kum ciangin Shan te in kulhpi a lam uh ciangin tang tha tam lua a hih man in Khamtung ah ki tai to hi.Pu SongThu makai-in Tuingo dung zuito uh a, khamtung ki kah hi.Taaksat a cih na mun ah tawl khat teng uh hi.Pu Songthu in pasal nih tui neek ding zongin sawl a tung thei mahmah lo uh hi.Pu Songthu in lam dang sa in a mahmah a kan ding in a pai leh a mi sawl te gulpi in na vat tan hi.Tua gulpi Pu Songthu in a tem tawh ban tan a gulpi mei-in Pu SongThu mit lang khat vat kha a, ki tam in a mit langkhat taw hi.Taaksat pan in Thuam vum lam kah to uh a,nitum na lam ah tuak suk uh in,CiimNuai khua sat uh hi.Pu Songthu in CiimNuai ah hausa sem hi.

Pu Songthu in a zi  tawh ta nei pak lo uh a hih man in,a cii man ding dah mahmah hi.Pu Song thu in a zi kiangah “ En lah ta neilo mawk ih hih man ih cii man ding ut lo hi hang,tua hi in mi dang tawh ta nei leng nang hong sim mawh kha ding a hih man na nau nu tawh om khom leng nang hong sim mawh lo ding hi” ci’n a gen ciangin a zi zong lung kim hi.A zi nau nu min pen NemNep kici hi.NemNep pen a tha cing a mel hoih mahmah khat hi cin kigen hi.A zi thu kim na tawh Pu Songthu Pi NemNep tawh hong om khawm uh a,nau hong pai ciangin mang a man zelzel hi.Zan khat a mangin a huan khang a hual singpi heng sung ni vang zang in a tan hi.Tua ni zang pen tang pha mahmah a sakhi tuihup bangin hual heng sung a sun hi.Tua mang a mat ciangin lamdang sa in Pu Songthu kiangah gen hi.Pu Songthu in tua thu a zak ciangin thu lam dang khat hong kihilh hi ding hi,ci-in tua hual heng sung a et leh,aktui cia a pha suang vom kilkel khat a mu hi.Hih nitui ai in hong siam ding hi ih bia ding hi ci hi.Tua nitui ai a kep ni a ki pan a dau pai lam Pu Songthu in thei hi.Nitui ai pian na kipat na leh biak kipat na hi kici hi.Zan khat Pi NemNep in mang khat man leuleu hi.A mang sungah zingsang tung a nisuak pan-in a tangpha mahmah ni vang in taang bem tung a kikoih nitui ai pen sal leuleu hi.Tawm vei ciangin tua nitui ai pen naungek in piang a nakpi takin a kap hi.Tua naungek ladingin a thawh leh a takin tho a hih man in khanglo hi.Hih a mang lamdang pen zingsang ciangin Pu Songthu kiang ah a gen hi.Pu Songthu in”Ni-in hong siam(huh)taktak hi”ci’n a ngaih sun hi.Pi NemNep in zan khat mang man leuleu hi.A mahmah huan sung pan in um gui-in a po hi.Tua um gui zam in inn tung teng a khuh hi.Um gah hoih mahmah khat gah a a nun kawi,sathau biing tawh ki bang hi.Tua um gah  ni vang tang pha mahmah,meii kawm pan a nitang tawh kibang khat in nakpi’n tei tawh sut bangin a sun kham hi.Tua um gah a ki tap ciangin naungek khat pusuak a,a kap hi.Khat vei leuleu Pi NemNep in mang man a,a mang sungah ni sun lai tak a ihmu in a ki ngaih sun hi.Zan a aksi ek kia tawh ki bang ni pan in a tang pha mahmah khat kia in a ma tungah tu hi.Tua a taang in a khak ciangin a si ding zah in lau in a awng khia hi.Tua awtna in amah phongin a khang lo hi.Pi NemNep nau hong suak in pasal khat hong hihi.Pu Songthu zong nuam mahmah a,pasian te in cii mang lo ding hong siam hi,khan sau hen la,nu vaak pa vaak in piang hen ci-in thupha pia hi.Pu Songthu in  nau min phuak dingin a upate a khawm hi.Hih nau a pian ma in a nu NemNep in mang lam dang a man hi ci-in a mang teng a banban in a upate kiang ah a gen hi.Upate in zong lam dang sa in “  Hih naungek in Ni tawh kizop na thu a nei hi,”a ci uh hi.Nivang Nigui in hih nau ngek uk hi ci-in Nigui pan a piang,GUITE phuak ni a ci uh hi.

Pi NemNep in tapa Guite a neih khit a sawt sim ciangin a zi pi in tapa khat hong nei hi.A zi pi in ta hong neih ciangin a min Thado phuak uh hi.Tua a hih man in Thado te in  a piang masa ih u hi ci’n sa a gawh uh ciangin a cingsa(sa-cing)a piak ngiatngiat uh tu ni dongin ngeina in nei lai uh hi.

V. CiimNuai pan kikhen thang na leh Min tuamtuam a kilawhna,
CiimNuai khua ah mi hong tam in lo khawh na ding mun a ki cin nawn loh ciangin gam thak zongin khua ki sat ciat hi.Tua khua sat te in hausa sem ciat pah uh hi.CiimNuai khua ah ih ten lai-in nam min kilawh na khat bek hi leh kilawm hi.Beh nam te lak ah Guite leh Thado pen tu hun ciang nam min a hih hangin mi min na hihi.CiimNuai ciangciang pen ZOMI a kilo hi cih kingaih sun thei hi.Ciim Nuai khua pan ih ki khen thang ciangin ih tun na mun peuh min pua in ih ki sap na pan a sawt ciangin minam min dan in ngaih sun in,Kawl kumpi in minam code hong piak ciang in Zomi a kici lel ding teng nam (10) bang ih ki suah hi.Tua min te pawl khat a pian khiat na a nuai a bangin ih suut ding hi.

            (a). Khuanote pian khiatna.
CiimNuai pan GeelTui; Dimpi a tengte lak pan in pawl khat in Sasih khua sat uh hi. Inn 7 bek pha a khang theilo uh ahih man in Khuano kici a, tua mun pan a khang khia mi te Khuanomi ki ci hi. Khuano min pua te tu hun a ten na khua te:- Zung; Phunom; ThangNuai; Suangpi; TuiSau; LaiBung; TuiVial; Pimpih; Ngalzang; Tampi; Cingpikot; MualLum; VanDo; DimZang; Pyidawta; NawiKai; Dolluang; MualNuam; Budiman; Lalta; KhuaBem; Tuilang; LunMual; Phai leeng khua te ah teeng uh hi.

(b). Guite  pian khiatna.
Pu Songthu ta upa pen min hi-in a sawt na ciangin beh min hong suak hi. Guite pian khiat na pen Chin gazetteer vol-I sungah hi bang in na gen hi. Meiitung pan in Pasal khat le Numei khat kia sut in CiimNuai tu hi ci’n na gelh hi. Guite ten na khua te:- Vangteh; Pakzang; Tuizang; Thangsan; Haiciin. Tuimui; Tuimang; Pangmual; Tongciin; Selbung; Sekpi; Vaivet; Suang bem; Lamzang ;Tonzang; Gawng; TuiThang; Kaptel; MualBem; Tuipi; Pangzang; Lamka; Tonglon; Hansip khua te ah teeng uh hi.

(c). Sihzangte pian khiat na.
CiimNuai khua pan in a lal khia pawl khat sihkhuk(ci khuk) omna zangah teeng uh a; tua pan a khang khia te sihzang kici hi. Sihzang te teenna khuate:-Thuklai; Khuasak; Buanman ;Lophei; Bung; Zongal; VokLak; PumVa; TheiZang; Dolluang; SuangDawh; TakKhawl khua te ah teeng uh hi.

(d) Saizangte pian khiat na.
Pu Songthu Ciim nuai khua pan in Cian lai khua sak in ,tua mun pen gamsai vive po na zang khat a hihi. Tua khua pen a sawt ciangin Saizang ci uh hi.S aizang pan in a lal khia mite Saizangmi kici uh hi. SaiZang mite ten na khua te:-SaiZang; TualZang; TeekLui ;Lailo; ThangZang; VongMual; Aipha; Mualpi; TuiTawh; ThalMual; Phaiza; Zampi ;TaalEk; Kaptel; Hiang Awn; TuiTang khua te ah teeng uhhi.

(e) Zote pian khiatna.
CiimNuai khua pan in Pu HangHil makai in TungNung; LianZaw; TaiThul; TungDim; Neu Zaw te tawh Baalzang khua sat uh hi. BaalZang khua pen mual dawn a vot na tam lak hi a, tua mun te pen zo kici hi. Tua mun a teng te zo lak a teng te ki ci a ,a sawt ciangin Zote cih minam min hong suak hi. Zote pen minam tuam hilo in Sukte; Zo; KamHau mi cih te a taktak in minam khat hi (Chin gazetteer vol-I:140). KamHau mi ih cih pen Mangkang te hong ciapteh na ah KamHau uk sung mi khempeuh huam a genna na hihi. Tedim, Tonzang gam sung a teeng khem peuh a cih nop na zong ahihi. Zote teenna khua te: Phaitu; HaiMual; TualMu; KhuaDai; BumZang; SalZang; TakZang; PhunTong; SialThaw; Lam Thang; BuangZawl; MimBil; KhamZang; GamNgai; LungTak; AnLun; GeelMual; KhiangLam; TaalZang; PhaiDim; ThauThe; Maulawn; MangKuh; LomZang; SekSih; Haipi: BuangMual; KhuaiVum; SialMei; BiZang; VangLai; ThenZang; SialThawZang; TuiGial; TuiLam khua te ah teenguh hi.

(f). Tedimte pian khiat na.
Tedim mi a tuam in om lo hi.Tedim khua pen Pu GuiMang in a sat ciangin a gam et lai ua,VanSang Dim bual a te diamdiam pen Paite pau in Tedimdim a cih uh tua tung tawn in a piang khia khua min a hihi. Hun hong sawt toto a,PuKamHau in Tedim hong luah ciangin,tua lai tak a, teeng masa minam 7:- SaiZangmi; TeiZangmi; Dimmi; Guite; Zote; Thado-Kuki; VaiPhei(Hualngo) te teng khawm uh a,tua te sung pan in a tam zaw in a theih pau nam khat na zang uhhi.Hih minam te sung ah sahawm zuhawm  tat zia nam 3 TeiZang tat; Dim tat; Zotat bulpi nam thum kizang hi. Tua hi-in ih pian khiat na ki bang hi mah ta leh khua tuamtuam ah ih teen ciangin ih aw kaih zia kilam dangin kammal pawl khat zong hong kilam dang hi.Cope Topa in Zolai hong bawl sak ciang in tua hun lai takin Tedim khua a ki zang pau pen Zomi khem peuh in tel a hih man in KamHau dialect hong cih sak hi.KamHau ih cih pen Teizang mi hi a,Tongzang ah KamHau Ukpi gamh a luah Pu HauCinKhup a khan lai in Teizang pau mang ngilh kha leng ci-in Mualbem khua ah kum khat khat veita Teizang pau va sin hi kici hi.Tedim mi leh Tedim pau ih cih pen a tuam in omlo hi.A taktak in Tedim pau ih cih pen nidang  CiimNuai pan a ih kam zat teng mah a ki keng suak hi lel hi.

(g) TeiZangte pian na;
CiimNuai khua ah a ki teen lai in pawl khat khang lam ah lal suk;paisuk uh a tua te Sukte na ci uh hi(Chin gazetteer Vol-I:118).Tua a suk pai te lui nih ki tuahna(Ngatan lui leh Sialtang lui ki tuah na) ah khua na sat uh in LuiKa khua na ci uh hi.Tual biak na pen khua laizang paangpi sing nuai suang tumpi gei khat ah bawl uh hi.Nitak khua phat kha tan ciangin naupang te tua singpi gei ah kimawl zel uh a,naupang mang thei pahpah hi.Limtak in a et uh ciangin,tua suangpi nuai ah kua hawm khat om a,tua sung pan in gulpi khat in naupangte la thei zel na hihi.Khua mi te’n thang a siah uh leh tua gulpi awk a,a kaih uh leh gulpi sau lua in kai khia zolo uh hi.Tua gulpi pau in,”ka om na thuk mahmah a, ka mei-in gun ban hi,van suang zawl ah ki vial hi;,hong kai zo kei nuteh” a cih ciangin tua gulpi at tan uh a,khua zang in a sa hawm uh hi. Mei gong nupi khat a sa pia lo uh in,a lutang pia uh a,tua nitak in mei gong nu in BualTung khua pan zin nih a nei hi.Nupi nu in a gul lutang huan a,buh tei-in a tawh leh,gul lutang hong pau in”Ka mit nong sun kha deh”ci hi.Nupi nu zong lau in vok kuangah bua hi.Zan kim tak ciangin ak lam dang khat hong khuang a,”Zinte kha vevua”ci’n khuang hi.Innteek nu lung hi mawh in a khua pih te kiangah a gen hangin thudon lo uh hi.Innteek nu in ak khuang a zak kik tak ciangin a uital leh a zinte nih tawh pai khia uhhi.Khua nawl a tun phet in huihpi nung a,a khua cim in khua zangin si mang uh hi.A zin te gel a khua uah ciah suak uh a,nupi nu Baang zang ah teeng hi.Nupi nu a gai sa in a pasal in sih san a,a uital tawh luika khua pan BaangZang khua hong teen ciang nau hong suakin,a min Sukzo phuak hi.Naupang hong khan ciangin MualBem khua Teipi phung zang khat ah hong teeng hi. Tua Teipi zang pau lap in a suan a khak te TeiZang mi ki ci uh hi. TeiZang mi te teen na khua te: MualBem; ZangZawl; DakDung; Buan; Heilei; Suangphei; Sim SuangZang; LamZang; PangSak; ZangTui; MualNuam; Gawsing; Tuipi; PangZang; Keeltal; LuangEl;  SaipiMual; LingThuk; VaiKhuaMun; SialTui;F artlang khua te ah teeng uh hi.

(h). Dimte pian na.
CiimNuai khua pan in pawl khat in GeelTui khua hong sat a,LianDo le ThangHo te unau hong nuam sa uh hi.GeelTui pan in pawl khat in Dimpi khua hong sat hi.Dimpi pan dimlo ah pawl khat hong peemta in,Dimpi,Dimlo pan in a khang khia teng Dimte kici hi.Dim mite teen na khuate:- Dimpi; Dimlo; SeZang; LaiTui; Tui Cinlui; TungZang; SuangHoih; Mal SuangZang; Tedim; Tonzang; Pyidawtha; Kalaymyo; khua te ah teeng uh hi.

(i) Losaute pianna.
Nidang in Ciimnuai pan in Lamzang lam lo kho te in a lo khawh te uh a dung sau zilzial in lokho uh hi.Tua bang a lokho a kiveng kha teng hih lo dung sau te a kicih na pan a sawt ciangin Losau mi tang uh hi. Losau mite ten na khuate, Lamzang, Gawng mual, Tonzang, Kansau, Lailo, Tuithang khua te a teeng uhhi.

VI. Beh min tuamtaumte.
Hih bang dan in CiimNuai pan a ki lal khiat ciang in khua sat na mun min khawng peuh min pua in minam hong piang khia hi.Beh min tuamtaum hong pian khiat na pen Pu le Pa te min a ki la suk a om mah bang in,ki eng sap na,kikhel sap na pan a piang beh min  tam pi om hi.Zomi te sungah beh 200 val bang a om theih na pen inn tuan khia peuh khuasat zo peuh te min  teng khawng beh min peuh suah toto ih hih man ZOMI te beh 200 val dong kipha to a hihi.Ih beh min te pawl khat a nuai a bang a hihi.Hih a nuai a beh min te a kicing hilo-in kan theih pak teng bek hi lai hi.

Beh minte.





VII. ZOMI KIPAT KHIATNA LEH HUN LUI.
Hih a tung a thulu pen Dr. Hau Za Cin.Tapei.ii article pan hi in Zomite pian khiat na hong at na sungah Zomi tawh kisai hong at na mun teng puah se lo-in a ma at bangin a nuai a bang in ka-at kik hi.

1. Zomi kipat khiatna Adam pan khang tampi a phak zawh ciangin Sengam ah Zomi Ukpi Ji Fa, Zhou Wu Wang(Wu= Zomite Ukpipa a cihna,Wang=Ukpipa=Kumpi=King cihna hi)in vaihawm hi.Zhou innkuan ukpi sep sung(Zhou Dynasty)kum zagiat ahihi.(1027-221 BC).Hih innkuan pan Zomi a piang hi.Zomi na hih uh leh”Zhou” suan na hi ding uhhi.Zhou Ming (Chinese)cih ciangin”Zomite cih na hi.(Ming=mi) ci’n Dr.Tommy Tsai Po-Yu(National Taiwan University,Tapei) in hong hilh hi.Zhou Ming cih pen lai i neih ciangin Zomi ci’n ih at ziau hi ding hi.

2. Sengam om lai thu BC 1757 pawl in Xia Ukpipa in a mite itna leh hehpihna tawh uklo-in git loh na leh kiphat sak na tawh uk ahih man in,Zomite in ol takin a ukna BC 1027 in sut khia hi.BC 1046 hun tak ciangin Zomi Ukpipa Ji Fa in a uk ciangin khua kim ah hausa upa koih kim ahih man in kua mah in Ukpi zaa sut zo paklo hi.Zomite uk sungin khangto mahmah uha,a ki-uk zia,zum nasep zia,khat leh khat ki zah tak zia,lokawh singpuak leh  sumbawl paibawlna te ah khangto mahmah uhhi.Hih hun pen Sengam khantoh mahmah hun hi.Sente miciim Con Fu Cius in siangthona,hauhna,dikna leh pilna,khat leh khat kithupi simna,nupa kikal,lawm leh gual kikal,ulian uneu kikal ah kizahtak zia,innkuan sung nuntak zia,beh leh phung ki-it zia dingte kimakaihna,inn luahna,sa hawm ziate kician tak in hilh hi.Tua a hilh ziate Zomite in I ngeina(Zomi culture or tradition) ih cihte ahihi.Zhou Wu Wang hong khan a kipan in kipum khatna hong khang aa,a mah pen VANTUNG TAPA(Son of Heaven) kici liang hi.Vantung pan hong kum suk kumpipa hidingin um mawh uhhi.Hun hong pai to zel in Ji Fa innkuan sungah vaihawm ding khang kita sam a,Ping Wang Ukpipa (BC 770-720) hun pan in Zomi vaihawm na pen a min bek hi ta aa,Ji Fa innkuan zahtakna om nonlo-in vaihawm upate in kumpi bangin vaihawm gawp uh ahih man in BC 221 ciangin Hui Wang khut sung pan in Qin Shi Huang in Zomi vaihawm na suh sak hi.

3. Tua bang a,Zomite ukpi sepna a ki suh sak ciangin ukpi thak te in”Great Wall”lam ding hong kipan a,mihing nasem dingin zang uhhi. Hih nasep gimhuai leh ukpi hihna a khah suah uh nuamsa lo-in Sengam  nusia in leitaw lam zuan in suahtak nadingin paikhia uhhi.BC 4 hun ciangin Szechwan kimah teengin Pagyi khua sat uh a,AD 6 ciangin Chindwin gundungah teeng in Dahpa leh Penglam te hun lai AD 108 kimin Pugam leh Pupa khua na sat uhhi.AD 600 ciangin Ji Fa a suan sung pan Thetmite Zomi suak hi.

4. Chindwin pan tuni ciang AD 800 hun in Khampat khua sat in hun sawtpi teeng uhhi.Khampat khua pen Zang leh Kham kipeh na ahih man in”Khampat”a kici ahihi.Mualtung gam gen na”Kham” cih kammal pen Zomite bek in nei hi.AD 1300 in CiimNuai satto in 1350 ciangin Zomi nungak mel hoih Leng Tong Hoih pen Ava mang zi in na om hi.1450 AD in ThangHo,LianDo,GalNgam, HangSai, CingKhup, NgamBawm te CiimNuai leh GeelTui ah teeng uhhi.(CiimNuai a sa ki bak GeelTui ah ki thuk ci’n upate’n kammal na nei uhhi).Kabaw luidung pan kham kahtoh,Khampat,CiimNuai leh GeelTui hun pen Tedim khuasat(1570AD)KamHau hong khan’(1840 AD) Mangkangte hong pai(1886 AD).Pasian thu hong tun (1899 AD) lai-ih neih(1900) tan zong eimau beh hausa,khuasat leh ukpi te makai-in kizangin ki uk ciat a,Zomi namni(February 20,1948) ciangin tua ki ukna bei-in Zomite a suakta minam ih hi ta hi.Kabaw valley pan a paitohna uah Tuingo leh Thang mual te kantan to in CiimNuai ahKhul ah tuak uhhi.Tua lai pan suakta taktak kisak na neita uh ahih man in a mau leh amau ukpi ding kiseh tawm in “Khul” a piang na ki ci uhhi.

(NB. Hih Article thupulakna in Mangkang te hong tun cil a koi pan a piang cih na suut na uah Meii tung pan tuak suk cih a na suut uh tawh hong ki zawitawn mahmah hi,).

******************************************

Source :
ZOMI KHANG TANG THU.
ZOMI  CHRONICLES.
Agelh ~ Thang Khan Dal

Laigelh Siapa in Zomi eLibrary/Laibusaal ading in Phalna ahong piak ahi hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: ZOMITE KHAN KHIATNA. Agelh ~ Thang Khan Dal Description: Rating: 5 Reviewed By: Cinpu Zomi
Scroll to Top