728x90 AdSpace

Hot
Menu
Zon-ol na Donate

Latest News

MINAM CIDAM NADING KILEMNA - PEACE. Agelh ~ Rev. Thang San Mung, MDiv., Th.M.

MINAM CIDAM NADING KILEMNA - PEACE.
Agelh ~ Rev. Thang San Mung, MDiv., Th.M.
Tyrannus Gospel Ministry (Int.)


Thupatna
Abeisa hun khempeuh ah, minam cidam nading leh minam bup huama nopsak theih nadingin hat ding, dam ding, hauh ding leh pil ding kisam ci-in kingaihsun a, tua dingin kidem in kihanciam hi. Ahi zongin, mihingte hinkhua aencik (sociologist) te in, hat-le-pil leh hauh bek tawh minam kidam kiim lo ahihna, tu-in hong phawksann uhi. Hun khat lai a, leitung hong buaisak galpi tuamtuam te bang, hat ding, hauh ding leh pil ding kidemna pan hong kipan vive ahizaw sop hi. Tuhun takciangin minam acidam nading leh minam buphuama nopsak theih nadingin PEACE akici KILEMNA bucing aom loh in piang theilo ahih lam kitel semsem ta hi. Tua tawh kizui in Leitunga pilsinna University tampite ah peace study ci-in, PhD ciang dong sinsak zen uhi.

Kilemna Icihin Gal Beina Bek Hilo Hi.
“Peace-kilemna” cih kammal pen atamzaw in gal beina, gal venna, gal omlona cih bangin ithei hi. Atungtham ah ahi mah ahihi. Ahi zongin iveng ipaam tawh kamkitam, kithu nialna ineih lo man bekin kilemna om hi ci leng ikhial kha ding ahi. Kilem cih ciangin, kikamtam lo bek hi lo a, kiho siamna, kikhawlh theihna, kimai taina cihte zong aomzek kul hi. Tua hi in, “peace-kilemna” icih pen “harmony” ci in vialvial leh diamdiam a omkhop, khawlkhopna tawh nupa banga, atonkhawm tawntung hi.

Leitung galpi masa abeitheih nadingin Gam Khempeuh Kipawlna kiphuan in, tua ii makaihna tawh galven nang thukimna hong bawl uha, tua pen “peace-kilemna” ci uhi. Ahi zongin, tua kilem nading thukimna abawl uh asawt loin, Germany in Poland gam sim in, Leitung Galpi Nihna akipankik pah hi. Tuni in ikiim ikiangte ah atamzawte in, galven nading bek tawh kilemna bawl uh ahih manin, kilemna abukim thei kei hi.

Banghang hiam cih leh kilemna icih pen gal venna, gal beina, gal omlona bek hi loin, kitheih siamna leh kitel siamna hi a, tua panin kiho theihna, kithuahkhop theihna, kimai taina, kithukhual tuakna cihte in hong nungzuih ding kisam. Tua dana lungsim pumkhat sakhat suahna om loin, gal abei bek tawh kilemna om kici thei lo hi.

Thumanna leh Thutanna (Truth & Justice) Bek tawh Kilemna Kipkho Thei Pan.
Abeisa Leitung khangthu sungah kilemna cih kammal bulphuh in kiciamna atuamtuam kibawl napi’n itenna hi Leitung ah tutan dong kilemna bukim aom thei nai tuan kei hi. Banghang hiam cihleh, tua kiciamna leh kilemna akici atamzawte pen, thumanna leh thutanna om loin, deihkaih langleek thu vive tawh na kivaihawm ahihi.

Tua hi in, kilemna taktak pen thuman thutang aom ciang, tua thuman thutang pen lungkim takin ipomkim theih takciang bekin aom thei pan ding hi. Nidang lai in, kilemna akibawl ciang azozaw, atamzaw, ahatzaw leh ateizawte ii cih bangbang, alelzaw, atawmzaw, agina lozaw leh atei lozawte’ lungkimna kidong loin kimang, kizuisak hi. Tua dana zawhthawh thu vive tawh kivaihawm ahih manin, kilemna akipkho thei kei hi. Kilemna cih pen athuman athutang taka vaihawm kul a, tua pen ilungkim tuahtuak takciang bekin piangthei pan ding hi.

Tuamah bangin, kilemna diktak pen kilem ding utluatna tawh deihkaih, phuaktawm in, zuauthu peuh tawh zong apiang thei ding ahi kei hi. Alelzaw, ahat lozaw, agina lozaw, atawm zawte, khualna tawh vaihawm ding ahih saam hangin, amau akikhual luatna tawh deihkaih in, phuaktawm in, ileptawmna tawh, kilemna bukim piang thei tuanlo ding hi. Thuman thutang khat aom kul a, tua ah vekpi in kilungkim tuah ding akisam hi.

Kilem Nading Suplawh Ngamna leh Kiniam Khiatna Zong Kisam.
Tua bangin thuman thutang tawh thu akivaihawm takciangin, akhialzaw leh atangzaw cih khenna hong ompah ding theisa ahihi. Ahi zongin, eite’ deih pen aman leh akhial khen ding ciang bek hi loa, tuate khengval in kilem ding ahihi. Tua kilemna bukim ideih manin, athuman athutang pen akikan khia ahizaw hi.

Tua hi in, thuman thutang tawh khenna huhau in alelzaw, akhialzaw, asamzaw ihih khak zenzen lezong, tua pen thangpaih lak ding hi loa, ei deihna taktak pen kilemna ahih lam itel ding kisam hi. Tua bangin kilemna kipkho leh bucing ideih takpi nakleh, akhial, asam leh alelzaw ihih phial lezong, kilem theih ding deih ihih manin, kiniamkhiat in, kilut tumpah ding ahilel hi. Banghang hiam cileh, ei deih pen akhial leh aman cih hizaw loa, kilemna bukim pen ahizaw hi.

Tuamah bangin, thuman thutang tawh khenna huhau in amanzaw leh athu zozaw ihih phial lezong, ei deih pen thuzawhna hizaw loin, kilemna taktak hizaw ahih lam iphawk gige ding ahihi. Thuman thutang ii khenna tungtawnin athu tangzaw leh azozaw ihih phial hang, kilem ding iut takpi nakleh, nupi galzawh banga gamtat ding hi loa, athu lelzaw leh khial akisazawte, ihuai ding leh tua dana kihuai theih nadingin akisap leh, suplawh ngam ding nangawn akisam ahihi.

Vangteh khua ah Pu Mangkiim (Guite pan khang 22) amaan lai in, khuasung, gamsung leh minam sung kilem nading adeihna tawh, tua hun khuasung biakna ahi Liikvum leh Zawipei aphiat hi. Tua hun lai in ipu ipate in khuasung kilem ding adeih luatna utawh abiakna nangawn uh, ana suplawh ngam uh na hi tazen hi. Kilem theih nading, tua bangin deih mahmah ding kisam hi. Tua banga deih mahmahna in, akisam banga suplawh ngamna leh akilawm banga kiniam khiatna piangsak hi.

Kilemna Aom Ciangbekin Nopsakna Bukim Pan.
Hauh man pil man leh hat man in nopsakna om ding kisa khial kha hi. Ahi zongin, tua hauh nopna, pil nopna leh hatzawk nopna teng in ulenau, khualetui, leh gamleleite sutuah in, Leitung Gal lianpipi zong apiangsak hi. Tuate om loin, nuntak kicing zolo mah a, ahi zongin tuateng aom bek tawh nuntak nopna kicing theilo hi. Kilem dimdiamna, vialvial leh diamdiam a omkhop, khawlkhop theihna akisam lai ahihi.

Tu laitak Kawlgam khuahunte en leng, abeisa kum 50 sung gam sung nopsak nadingin hat kul hi cih tawh, galhat theihtheih ding, kumpi in ana hanciam ahihi. Ahi zongin, tua sung teng in tualgal hong khanga, Leitung ah azawngpen gam asuak hi. Tu a kumpi thak hong kah ciangin, kilemna bawl ding hong thupi ngaihsun in, Mualmite hong kaikhawm in, thau khiat ding hong ngen uhi. Ahi zongin, kilemna taktak cih pen, Mualmite lam pan thau akhiat bek tawh kingah lo dinga, ami a atamzaw ahi Kawl kumpi inzong akikim leh akibangin akhiat ngam, asup ngam, akhiap ngam ding uzong kisam veve hi.

Tua bangin lang nih tuakin akhiapngam zawh ciang bekin, kilemna thu kigen thei pan dinga, gamsung a nuntak khuasakna hong nuam taktak pan ding hi. Ihau a, ipil a, ihat zongin inuntakna gal bit kei peuhleh amawkna ahihi. Gal abit nadingin gal ibeisak pak, kitot kisel ikhawlbawl pak bek tawh zong piang theilo dinga, kilemna bukim aom nading ivaihawm masak kul ahihi.

Thukhupna
Pasian in mawhna hangin Amah tawh akigalneih leitung mite tawh kilemna bukim ana vaihawm lai in, akhialzaw leh atangzaw akilat theih nadingin thuman thutang ahi Thukham hong pia masa hi. Ahi zongin, akhial leh atang khen ding pen Pasian deihna hi masa zaw loin, kilemna bukim vaihawm theih nading akisam ahih man bek ahihi. Tua bangin mihingte in akhial amawh ihih lam ikitheih khit ciang, kisik kikna tawh Pasian kiangah kiluttum in ithuum ding ahihi. Ahi zongin, kilemna bukim pen mimawhte lampan kiluttum sak bek tawh apiang thei ding hi lo ahih mah bangin, Pasian lampang pan zong a Tapa Jesuh hong suplawh ngiingei hi. Tua  bangin, alang nih tuakin akikhiap tuak manin, kilemna picing leh nopsakna bukim akingah thei pan ahihi. Hih in, tuni in khuaung, gamsung, minam sungah kilemna taktak hong pian theih nading lamlak ahihi.





Laigelh siapa in Zomi eLibrary/Laibusaal ading in hong Piak ahi hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: MINAM CIDAM NADING KILEMNA - PEACE. Agelh ~ Rev. Thang San Mung, MDiv., Th.M. Description: Rating: 5 Reviewed By: Cinpu Zomi
Scroll to Top