728x90 AdSpace

Hot
Menu
Zon-ol na Donate

Latest News

Pasian pen Itna Hi. Agelh ~ Kap Za Khai @ Photoh

Pasian pen Itna Hi.
Agelh ~ Kap Za Khai @ Photoh


Itna kammalte Itna thu kigen simin itna zia leh, tuamdangna tawh kizui-in itna tawh kisai kammal tampi kimu thei hi. Adiakdiak in leitungah mipilpente kici Greek mipilte tungpanin itna tawh kisai kikhenna kammal tampi kitheikhia a, tuate a tomin tawm en ding hihang.

Eros:              
Robert Driskell genna ah hih Eros kammal pen Thuciam Thak Lai Siangtho sungah om loin, numei leh pasal kingaihna (sexual love), sunglam hoih hanga ki-itna hi loin pumpi taksa duhngawh manin ki-itna cih hi. Hih itna pen Greekte’ itna pasian (love of god) pan hong pai itna hi, ci uh hi. Eros pen a hoihlam in kigen khollo hi. Roman Krznaric genna ah, Eros itna in ei leh ei kikepzawhna beisak bek tham loin tua itna mahmah pen lauhhuai, kihtaak huai leh khat leh khat kikal ah siatna hong pia thei itna hi, ci hi.


Philia:            
Hih pen “deep friendship love” ci uh a, lawmta ki-itna hi. Greekte in hih itna pen Eros sangin thupisakzaw uh hi. Philia pen lawm leh gual, sanggam u leh nau kikal a om itna hi. Lawmte tungah cihtakna, amau ading deihsakna, amau ading kipiakkhiat ngamna leh amau tawh khawlkhop ngamna hi. Khat veivei Philia pen Storge kici zel a, nulepa leh tate kikal a om itna kigenna in zong kizang thei hi. Phileo pen “hehpih itna” zong kici hi. Lai Siangtho sungah, Johan 21:16-17; Mk. 14:44; Titu 2:4; Phileo itna kimu thei hi.

Ludus:           
Hih itna pen naupangte aihkeh khangnote kikal-a om ki-itna, hoih kisakna, kipaktatna genna ahi hi. Hih Ludus itna hangin eite in lawmte tawh nuihkhopna, lam leh dian khopna, nekkhop khawlkhop theihna nei hihang, ci-in Greekte’n um uh hi. A diakdiak in i theih ngeiloh midangte tawh hun tomno sungin kipawlkhawm in i lam i dian theihna pen Ludic itna ii tuampianna hi, ci uh hi. Ludus itna i nuntakna tekah kinei ciat hi. Theih ngeiloh, muh ngeiloh mite tawh, naupangte ahi zongin, khangnote ahi zongin, kimuh phetin kilawmta nuam, ki-it kingai thei cih pen hih Ludus itna hi, ci uh hi.

Agape:           
Aituam lungsim nei loin a tawntungin kipiakkhiatna tawh itna ci hi. Innkuanpihte hita leh hita kei leh kuamah deidan nei loin it theihna ahi hi. C.S.Lewis in hih itna pen “gift love” ci-a, Khristiante adingin sangpen Pasian’ itna hi, ci hi. Roman Krznaric genna ah, hih dan itna pen “metta” cih kammal tawh Theravada Buddhism ah zong kimu thei, ci hi.

Pragma:        
Hih pen “longstanding love” ci uh a, Greekte in sauvei a kip a picing itna a gennop uh ciangin a zat uh ahi hi. Sih khit dongmah a it tinten nupa kop ki-itna hi, cih hi. Mihingte’ itna kip hi leh kilawm hi. Zomite’ kammal bang hileh “tullo itna” hileh kilawm hi. Hih itna in i langte tungah lungduai, na hoih bawl, bek tham loin amau tawh nungta khawm nuam den ci hi. Psychoanalyst Erich Fromm gennna ah, Pragma itna in “ngah nading sangin piakkhiat ding a tumzaw itna hi,” ci hi.

Philautia:       
Hih pen “self-love” kici ei leh ei bek ki-itna hi. Midangte sangin ei leh ei kithupisak, midangte it ding sangin i pumpi, i nuntakna bek ki-itna hi. “Kei” cih bulphuh itna cih ding hi.

Storge:          
Hih itna pen khat ii pianpih hihna tungah itna ahi hi. Pianpih ngaihbaanna tungah itna hi a, hih pen zi leh pasal kikal ki-itna, naupangte aihkeh ganhingte it theihna cihte hi. Pawlkhatte in a genna ah, Hih pen “familiar love” zong kici hi. Storge pen Philia tawh kizawitawn pian-a, mel leh sa hoihna tungah a kinga lo, meltheih leh beh leh phung, unau kikal-a om itna mah ci hi. Nulepate kikal a om itna, nulepate leh tate kikal a om itna hi. Naupangte khat leh khat kikal ah zong hih ki-itna kimu thei hi. “Kilawmtat itna” cih bangin mihingte khat leh khat kilawmta in ki-itna bulphuh pha diak itna ahi hi.

Mania:            
Hih itna pen “obsessive love” kici hi. Sih ngaih, sihpih ngam zah dongin it/ngai cihte hi. “lunghimawh itna/ it tintenna” zong kici thei ding hi. Hih itna a neite in amau zong midangte sih ngaih/sih it thei uh a, midangte in zong amau a sih it/ngai ding ut uh hi, kici hi. Hih itna hangin khat leh khat kitel khialhna, kimuan mawh denna, kitotna cih buaina piangthei zel hi.

Hih bangin Greek mite in itna pen min tuamtuam vawhin nam tampi na khen uh hi. Hihte in itna tungah amau’ telna theihna ahi hi. Ahi zongin, Lai Siangtho sungah itna tawh kisai a kizang kammal nih bek om a, Agape cih leh Phileo cih kammal hi, ci-in Robert Driskell in gelh hi.

Pasian pen Itna Hi cih ciangin...
Thuciam Thak Lai Siangtho sungah Pasian’ itna pen Agape cih kammal kizang a, ciangtan nei lo leh mong nei lo itna hi. Pasian pen itna hong pia bek tham loin amahmah pen itna naak (the source of love) hi. Na khempeuh a bawlpa (Pian. 1:1) pen itna piangsak pa zong ahi hi. Pasian’ itna hang bekin mihingte zong a ki-it thei ahi hi. Bang hang hiam cih leh Pasian’ limlemel sun-a mihingte hong kibawl cihna thu sungah, itna zong Pasian’ limlemel khat in a kihel man ahi hi.

Pasian pen itna hi cih thu i teltheih nadingin itna ii pianzia i tel masak ding kisam hi. Itna tawh kisai Lai Siangtho sung ah, itna pen lungduai, migi, hazatna lungsim nei lo, kisa thei lo, a kilawm loin gamta lo, heh pakpak lo, mite’ mawhna ciamteh lo, thuman lote ah lungdam lo, thuman bekah lungdam, lungkia ngei lo, upna, lametna, lungduai takin ngakzo, a tawntungin kip (1 Kor. 13:4-8), ci hi. Hih pen Pasian in a itnazia hong lakkhiatna hi-a, Pasian mahmah zong tua bangdan lian pianzia nei ahih manin Pasian pen itna hi, a kici ahi hi (1 Jn. 4:8). Itna cih pen Pasian’ zia leh tong, leh pianzia hong lakkhia kammal ahi hi. Itna laigil tungtawnin Pasian’ hihna kimu thei hi. Pasian’ hong itna (Agape) pen siangtho, thuman, leh a dik bangin Pasian hihna zong thuman, siangtho in dik hi. Tua ahih manin Pasian pen eite adingin a bucing itna ahi hi. Tua itna hangin Pasian leh ei mawhnei mite kizom-kik thei ihi hi. Itna in Pasian leh ei hong kipehkiksak hi. Tua ahih manin Stanly J. Grenz in, “Itna pen a it pa leh itna a ngah mite kikal hong kizomsak kammal hi. Hih thu hangin a it pa leh itna a ngahte kikal ah kikhenna om lo hi,” ci hi. Itna a piangsak Pasian hi a, amahmah itna naak ahih banah, Ama’ hihna leh pianziate itna kici thu tawh hih leitungah kicing takin hong kipholakkhia ahi hi.

Pasian in leitungbup a om mi khempeuh it hi.
(Jn. 3:16; 1 Jn. 3:1; Rom 5:8).

Source :
Pasian In Hong It Hi. (Laibu).
Agelh ~ Kap Za Khai (Photoh)

Laigelh Siapa in Zomi eLibrary/Laibusaal ading in Phalna ahong piak ahi hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Pasian pen Itna Hi. Agelh ~ Kap Za Khai @ Photoh Description: Rating: 5 Reviewed By: Cinpu Zomi
Scroll to Top