728x90 AdSpace

Hot
Menu
Zon-ol na Donate

Latest News

Pu Zo Khup ( Gin Pian Khup ) Tangthu.

Pu Zo Khup ( Gin Pian Khup ) Tangthu.


 Photo : Cinpu Zomi ( www.laibusaal.com) leh Pu Zo Khup

Zomi website khat in nang thu zong suaksak ni ci in, dalzaazi lah kigelh ngeilo, ei leh ei thu lah kigelh ngeilo in, piak ding hong ompaklo hi.

Nunglam Kawlgam sung sepna, gamgi sepna teng gelh ding kipanpan, Thein Sein kah ma hi in, Pu Zogam Mang in na gelh nai het kei dih o, Thong sung pan zuau bulomtang teng tawh galkapte khem a, hong ki pusuak hi mawk in, nang hong gelhkhia mawk lecin, innlam a ten nak thuak lua ding hi. Hong ci hi.

Zoheisa Sulnung part 1-2 cih tan tung man in, tua pan innlam a mi taumtuam kei/ko tawh kizom kha teng in thuak lua ding ahihciangin ci in ka khawlbawl kik phot hi.

Nung Kawlpi thong kum 5 kia (Tu'n Portland) Pu Zogam Mang in tu'n bel na ut leh kei thu zong na gelh ta o ci in, tua ciang lah, i gelh tha hong dah leuleu hi. A mood om nawnlo ahih ciang a.

Kumpi langdona leh a sungthute uh a heh theihtheih nang uh leh, a dai theihtheih nang vua laigelh cihloh, 1988 a kipan Kawlte leh mualgamte mahmah zong laigelh midang tawm mahmah hi.

Amau tuahkhakte agelh ka theih;
·         Bo Kyaw Zaw ( Yebaw 30, Communist Party of Burma, China)
·         Yebaw Shaung ( KNU, Coco Island pan taisimna)
·         Sao Yin Aung ( SSA, Mongshu Sawbuapa tapa, Kawl ulian teng sungthupholh khia mang, Ne Win tanu tawh a kingaihna khawng gelhmang)
·         General Mya ( KNU, Saw Jacob in gelhsak)
·         Thet Aung Kyaw ( ABSDF a tuakkhak teng leh DVB Norway radio a sepna)
·         Ko Ngyo ( RFA, India. Amau refugee hongci, ko leh ko lah tawhlanyay tamar kici cih bu Yangon pan nung deuh thoh.

Thautawi lam teng i gelh kacihna hi.

Timeline kaikhawm kik in, article no khat bek kipia leh kacih pong hi in tudong kipia zo nai mahmah lo hi.

Timeline kong gual pong deh.Timeline gualhna timeline mah a gelh i hih ciangin kitheisiam ni.

1970-----------------Lawibual,Tedim, Chin state, Zogam ah suak.

1972-74-------------Haka ah om.

1974-5--------------Tedim tung leuleu, Sakollam ah KG kah.

1975-82-------------Falam ah KG ah tukik 5th grade dong.

1982-4---------------Anisakhan, Maymyo ah kilawnsuk. Grade 6-7

1984-5---------------Lawibual ah Grade 8 kah innlam nuam salua kiapah.

1985-6---------------Saizang Siapi Thang Khua Lian inn ah Grade 8 hong kibilhsuk, ong pah sam.

1986-87--------------Sakollam BEHS ah grade 9 kah kikiasak, Tedim nuamsa lua.

1987-88--------------Grade 9 BEHS 1 mah kah ong liamliam sam.

1988-89--------------BEHS 1 mah ah tan 10, science pan art tai, gambuai. Hpakan pai themvei sung hau. Kum 18 pha pan. Bei pah.

1989-90---------------BEHS.1 pan grade 10 kia dektak.

1990-92---------------Sang kihong paklo piaupaa, fieufi. Palik galkap peuh tawh kilailai. 3 vei thong kia dektak. Customte vua, Khuado sawng ah galkap hon thautawi tawh kilai, thongkia, kamphatna tawh sakhan hmu ka Pu Hang ( Vanleng hawl Pu Khup Khan Mung pa) na hi in, a zingciang suakta pah sam). Thau sialphei bel kikham ei, tua tungtang.

1993------------------Mandalay ah Suang training/Kyauhmiat Tintan (Gemology) ka kah laitak, University kihong, Psychology tawh Mandalay Universiy ah innlam ciahlo in kah suak.

1993-4---------------Kum 2 na Zomi Siamsin ah Lailam member.

1994-5---------------Kum 3na Zomi Siamsinah lailam vaipua.

1995-----------------Zomi siamsin leh state bup CLCC lailam vaipuapi sem.

1995-----------------Yangon Siamsin te Ciimnuai magazine 3na huh.

1996-----------------Mandalay University min tawh magazine 2 bawl. Khat siamsinte a, khat Chin state bup a.

1996-----------------Sanglai buaipih manlo, kum 4na kia leuleu.

1996-----------------Yangon ah vaitham, tuakawm a Yangon University ah kah.

1996------------------Sangkah ngeilo, siamah nu in hongsamin lai hong hilh. Ong liamliam.
1996------------------Tedim ciah, MI teng tawh kisia pah.Buai dekdek.

1996------------------Kalay University buai vai a kisamkik Tedim pan 3 teng buaipih. Thapia. ZogamMang ( Portland) Nang Sawm Tung ( Malay), Sia Hau Suan ( Hong nusia khin.) tuateng thum hi in, Sia Hau Suan te inn kava pai uh leh, a nu lungtangna suak in, amah sam nawnlo.

1996-----------------Yangon gelsuk kik. Zozum ah nautualkai.

1996------------------Zomi revolution ding aci ding ci in Zoheisa Unit phuan.

1997-----------------Ka nu lungkim nang ci in, Yangon Seihkanta street ah Buaihman khat kizaih in innlam khak. Hehe. Buaih lakna ah kah man nawnlo.

1998------------------Saklam ah sum thalawh ding ci in innkuanpihte khemin, February gamnuai lut. Galkap leh pawlitic sin.

1999------------------Kawlgam sung khatvei lut, Kawlgakap tona in Cikha sakhan mai ah thau 70 vei lawn. Kuamah hong pusuak ngamlo uh. Khuasung ate'n zong hong kap ngamlo uh. Tamzaw le uh bek hangsan uh.

2000------------------Manipur Kiteelna om, Meiteite hong lutcil hi in, Thanlon sub-town area bup vaipua, Meiteite khat support in ZRO/ZRA in Pu Song Chin Khup Naulak support in kinawkpi a kinawk. Meitei support khua 2 hiam a vote teng haltum sak. Vote bungbung khat sut kuk. Lamka om. Kiteelna vai a ZRO sung Lamkalam teng hong buai. Sungbuaina tuapan hong kipan toto. Tuasawng kha 3 sung khawng ko zong palang ngeingai. Drug hih tawh, zukham tawh, sukham tawh, palang. Tua khitciang hoihkik, kipuahkik leuleu.

2001------------------Lamka om lai. Lawmte sungbuaina dam nailo.

2002------------------Kawlgamlam pan pai makai teng ki- akgualkhen pian ta.

2002------------------Suan Mang ( Baltimore) leh Ko Denny New Delhi ah. Paupi (Mualbem) zong Delhi ah om sawtta. Tualo teng 2000 kiim a taivai gai khin pian ta. Zogam Mungno leh ka naupa bawkkhat Nang Sawm Tung ( Malay) zong tua sunga taikhia uh. Champhai base a pawl aphuat sawm uh leh phuan zolo. Mungno pen Tual Khan Suan beel a, Thailand taisuak. Ka sanggampa anung ciang Delhi pan Malay leng. Tudong om suak ci. Ka kiholoh kum 3 khawng pha ta.

2002---------------- kum bel Kawlgamlam pan makai leh member teng inhong taisan gaih kum hi.

2002------------------Tu a ZRAE makapi ( Lamka) Min Thang zong Zo Khai te tawh kicontact in Malaysia tai sawm. Ka khoh leh ut sam. Lamka zii nei in tuahang a om suak hi.NGO tavuankhanpi ci in vaipuak khat phuahsak in, tentan om khempeuh bupkahsak.

2002------------------Mizoram om. Tua sung Manipur ah ZRA bup na buai leuleu. Siannzo ( Okklahoma City) leh Singpi ( Australia) te lungmang in thau 2 tawh tai. Athau uh Mizoram ah nusia in, Moreh ah beel. Khat in na gensak in in gensak in KNA te'n bangmah na cihlo uh.

2002------------------ZRA leh Phungzathang Tonsing kiguulluk a makaih ZRA makai pa, Aizawl khuapi sungah zong khia in, Lamka ciahsak. A motor hawlpa Mizoram PHE a lian pen pa inn pan mankhia in, thusit.Ka tawp khit ciang hong phin pian nuam laideep. Hong kisawl bangin sem leng Aizawl ah 2002 kum pek a asi khin ding uh hi.

2002-----------------Aizawl ah Mualgam tangin KNU tawh kimu. Kawlgalkap tawh kiho ding vai gen khawm. Zomi te'n bangdeih cih hong kankhia hi.

2003------------------Mizoram ah MNF party kumpi tokhom tusak. Hong kiman. Thongkia leuleu.

2004-----------------Chin state base kipawlna teng Bangladesh gamgi naihlam ah kimukhawm. Tua mun ah CNF Shwe Khar in refugee zong kong support ta ding uh ci keei. Malaysia refugee quorum lak ah atam zaw Zomite hong pia uh. Chin lak a Tedimte cih daan hi in, anung ciang Pu Zo Khai te'n Zomi mintawh na phusuak uh in, quorum cingtakin ngahzo pan a, eimite mah in ngahta. Tuama bel eimi min tawh midang na kiguang zel hih tuak. Pu Hau Kim in hong genkikna ah 50 lak ah 35 hong pia uh ci. Hun masa lai.

2004----------------Refugee vai bel mipite lunglut i genna pong hi in, kimuhkhawmna taktak bel leitung gam 10 val weight ( 16 hiam hi) tawh Khin Nyunt Bangkkok ah sam dingin, kihona bawl ding cih ahihi. Tua hong om leh kua tengin Chin State tangin kah ding cih thu kikum ahihi. Minam min tawh buaihuai ahihmanin State base in represent ni kici hi. Tua pen Bangkkok Process kici a, Kawl galkapte kimaituah a tutkhawm ding lau uh ahihmanin lawhsam hi.China, India, Thailand cihte zong thukim man khin uh ahihi.UN General Assembly thukhensatna siksan a hong piang dektak mah hiven.

2004-----------------Bangladesh gamgi pan ciah ciang Manipur Lamka zuankawm, Suangdawh khua ah ka bang uh leh ZRO president Pu Thang Lian Pau leh ZRA Chief Thawng Khua Gin ui leh keel na bang keei uh. Thawn Khua Gin in pistol tawikhia in, om kawikawi. Mimal sungthu neih tuak uh. Suangdawh gate ah kha khat Rs. 200,000 kiim lut in, tua banah Kawlgam lam pan thau lei teng Suangdawh kipuak hi in, tuavai khawng saguh bawk kituh hi ding in mimalinka um sim hi. A puatham ah bel thu tuamtuam kinungzak hi.

2003-5---------------Lamka om ZRO sung buaipi in hong pha, Meitei laang. Zogam sungbup kikawmna tengah dim uh. ZRA sung zong Meitei beel a, lom tai zuahzuah uh. Beidektak.

2004-5----------------ZRA pan taikhia a Meitei tawh kipawl teng viikpi a kiviik, heu zo phial uh. Amakai tamzaw si, thau honpi khat kingah kik.

2005------------------August 30 ni India tawh kikap khawl, tua zawh kha 2-3 khawng a ZRO pan tawp. Hun hoih kik khit a tawp. Sum tamna tuahun pan kipanpan hi.

2006------------------ Lamka ah The Zoland Times newspaper bawl.

2006------------------ Sumbei, New Delhi pai. Blogging kipan.

2008------------------December US leng.

2009------------------Zo Khup Blog pan.

2010------------------WZC phuan lawmte tawh phuan.

2012------------------Galkap phuan.

2014------------------Zovontawi Fund campaign kipan. Dongkhia taktaknailo.
2015------------------

Cih daan ninia teng hi. A kum ah thupiang teng thuah in gelh kul ding hi in baihlo veve hi. Hon khat kimangngilh khin lai.

Ahihhangin gelhzo leng Zomi tangthu a ding thupoimawh honpi khat bel om ding hi. Thukhentatna tuamtuam leh tuate i gah sia leh pha tampi om hi.

Refugee vai bek en leng zong:
·     Guam vai ah Zomi Org (ZRO) hong kidongin na theihpih uh hiam? hong ci uh in Lamkalamte kuppihlo a " Theihpih mah ung cipong." A pai ding vai uh hong kuppih leh theihpih kihi hiaulo, Pastor hon khat leh CNF lamte hih hi in, US gamsung paisak taktak ding cianga, Alliance ( Mahameihte) te kiangah na dong uh. Tua pan hong dong sawn uh hi. thusia genleng Alliance teng in US kumpi kiangah ahilolam in na gen le uh, CNF a buaigawp lawh ding ahihi. I minam himhim gamdangah kitawm lua ci in ka theihpih mah uh kici pong hi. Tuni dong aphattuamna lawmlawm uh a thei nailo hi ing. US atu'n khit uh teh, Tawhlanzee lam phawklo in, innlam ah kihausak thei peuhmah laideep uh hi.High boss bangin om kuakuaa uh hi.

·      Thai gamgi pai khangno 39 kiimte na theihpih mah uh hiam? hong kici in theihloh pipi ka mi kasate uh hi cihpih pong.ABSDF te hong dong sak uh ahihi. Tua hunlai khawngin Chin, Zomi cih himhim khong Kachin, Karen leh Kawl tawlanzee tamar te'n hong up ngiatloh uh ahihi. Zoheisa hong om cianga, ki lobby koikoi in, tua pan hong en thei pan uh ahihi. Tua khangno 30 te tuhun teh alaigelh na uh khenkhat uh dik hetlo hi. Alaklawh khat a kipei cokcok uh in, dongkholh pian sim hi. Tu'n tuateng mun luah a haipau mongmong 2-3 thum khong hong kipan leuleu pong hi.

·       Malaysia vai zong tuabang mah.

Tua banah Zomite pen kizekai ahihmanin mun khempeuh ah mi na inntek gai khin ta in, tuateng phu a Zomi va ki ci kawikawi in, tuahang mah in hamphatna khempeuh hong dal ngam nawnlo uh ahihi.

Detail in khatvei gelh ni.

Hih nangawn ki edit kik ngap nawn loin post hong meksuk phot ning ei.

Pu Zo Khup

Facebook : Gin P Khup 

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Pu Zo Khup ( Gin Pian Khup ) Tangthu. Description: Rating: 5 Reviewed By: Cinpu Zomi
Scroll to Top